เพรโด่แนพู๊ เต๊เห่ 25 - Eastern Kayah Shadaw Dialectꤋꤢꤨ꤭ꤕꤢꤪꤜꤢꤨ ꤊꤝꤤ꤭ꤡꤝꤢ ꤘꤣ ꤚꤥꤗꤢꤩ꤬ ꤋꤝꤤꤘꤢꤨ꤬ ꤢ꤬ ꤥ꤬ 1 ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤧ꤭ꤒ꤫ꤥ꤬ ꤙꤣꤧ ꤊ꤫ꤢꤩ꤬ ꤔꤣꤧ꤬ꤒꤣ꤬ꤙꤢ꤬ ꤢ꤬ꤊꤢꤨ꤭ ꤚꤣꤧ꤬ ꤢ꤬ ꤙꤢ꤭ꤟꤣꤧ ꤞꤥ꤭ꤔꤣꤧ꤭ ꤓꤥ꤭ꤔꤣꤧ꤬, ꤢ꤬ ꤥ꤬ ꤙꤣꤧ ꤠꤤ꤭ꤊꤢꤧꤎꤢ꤬ꤚꤤ ꤔꤣꤧ꤬ ꤚꤣꤧ꤬ ꤢ꤬ ꤡꤝꤢ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬꤯ 2 ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤢ꤬ ꤊꤢꤨ꤬ꤊꤜꤢꤪꤘꤢꤨ꤬ ꤒꤣꤧ꤬ꤟꤢꤩ꤬ ꤟꤢꤧ꤭ ꤘꤢꤧ꤬ꤜꤥ꤭ꤓꤢꤧ꤬ ꤒꤢꤩ꤬ꤘꤢꤧ꤬ꤒꤢꤩ꤬ꤞꤢꤦ ꤋꤢꤨ꤭ꤕꤢꤪꤜꤢꤨ ꤒꤣꤧ꤬ꤟꤢꤩ꤬ ꤘꤣ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤢ꤬ ꤥ꤬꤯ 3 ꤛꤢꤩ꤬ꤞꤤ꤭ ꤊꤝꤤ꤭ꤞꤤꤛꤢꤪ꤬ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤔꤢꤧ ꤢ꤬ ꤊ꤫ꤢꤦ꤬ ꤗꤢꤩ꤬ꤙꤝꤤꤗꤢꤩ꤬ꤒꤣꤧ꤬ꤚꤣꤧ꤭ ꤕ꤫ꤢꤩ꤬ꤊꤣꤧ꤭ ꤛꤢꤩ꤬ꤞꤤ꤭ ꤚꤣꤧ꤬ ꤛꤢꤩ꤬ꤞꤤ꤭ ꤞꤤꤛ꤫ꤢꤦ꤬ ꤔꤢꤧ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤊ꤫ꤢꤦ꤬ ꤔꤢꤪ꤭ꤞꤢꤨ꤭ꤟꤢꤧ꤭ ꤢꤨ꤭ ꤔꤢꤧ ꤋꤢꤨ꤭ꤕꤢꤪꤜꤢꤨ ꤚꤣꤧ꤬ ꤢ꤬ ꤊ꤫ꤢꤦ꤬ ꤞꤢꤨ꤭ꤟꤢꤧ꤭ ꤕ꤫ꤢꤩ꤬ ꤛꤢꤩ꤬ꤞꤤ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ꤚꤢꤩ꤭ ꤋꤚꤢꤩ꤬ꤗꤢꤩ꤬ꤞꤣꤧ꤭ ꤋꤢꤨ꤭ꤕꤢꤪꤜꤢꤨ ꤘꤣ ꤊꤜꤢꤧꤜꤥ꤬ ꤕꤢ꤭꤯ 4 ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩꤏꤢꤦ꤬ ꤔꤢꤧ, “ꤢꤨ꤭ ꤘꤢꤪꤒꤢ꤭ ꤋꤢꤨ꤭ꤕꤢꤪꤜꤢꤨ ꤘꤣ ꤠꤤ꤭ꤊꤢꤧꤎꤢ꤬ꤚꤤ, ꤚꤣꤧ꤬ ꤑꤢ꤭ꤒꤢꤧ꤬ꤒꤥ꤬ ꤕꤢ꤭ꤔꤣꤧ꤬, ꤠꤢꤧ꤭ ꤊ꤫ꤢꤦ꤬ ꤡꤝꤢ ꤙꤣꤧꤔꤣꤧ꤬ ꤕꤢ꤭꤯ 5 ꤚꤣꤧ꤬ ꤔꤢꤪ꤭ꤡꤝꤢ ꤒ꤫ꤣ꤬ꤊꤣꤧ꤭ ꤞꤤ꤭ ꤊꤣꤧ꤬ꤛꤢꤧ꤭ꤘꤢꤨ꤬ ꤒꤣꤧ꤬ꤟꤢꤩ꤬ ꤔꤢꤧ ꤠꤢꤧ꤭ ꤘꤣ ꤠꤤ꤭ꤊꤢꤧꤎꤢ꤬ꤚꤤ ꤕꤢ꤭ ꤔꤤ꤮, ꤚꤣꤧ꤬ ꤊꤢꤩ꤬ ꤋꤢꤨ꤭ꤕꤢꤪꤜꤢꤨ ꤗꤢꤩ꤬ꤗ꤫ꤢ꤬ꤔꤤꤔꤢꤧ꤬ ꤒꤢꤩ꤬ꤞꤢꤦ ꤘꤣ ꤢꤨ꤭ ꤒꤥ꤭ꤙꤢꤩ꤬ ꤘꤣꤧꤡꤢ꤭ ꤢ꤬ ꤕꤢ꤭ ꤟꤢꤩꤚꤣꤧ꤬, ꤞꤤ꤭ ꤊꤣꤧ꤬ꤛꤢꤧ꤭ꤘꤢꤨ꤬ ꤣꤧ꤭ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤘꤢꤧ꤬ꤓꤢꤧ꤬ꤜꤥ꤭ ꤜꤢꤨ꤭ ꤒꤢꤩ꤬ꤞꤢꤦ ꤕꤢ꤭ꤗꤢ꤬ ꤢ꤬ꤔ꤫ꤤ꤬ ꤖꤢꤧ꤯” 6 ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤥ꤬ꤕ꤫ꤥ꤬ ꤙꤣꤧ ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤠꤤ꤭ꤔꤣꤧ꤬ ꤢ꤬ꤔꤣꤧ꤭ꤜꤝꤤ꤭ꤞꤝꤢ, ꤗ꤫ꤢ꤬ꤒꤥ꤬ꤚꤣꤧ꤬ ꤔꤣꤧ꤭ꤏꤣꤧ ꤙꤣꤧꤔꤣꤧ꤬ ꤒꤣ꤬ꤖꤥ꤬ ꤚꤣꤧ꤬ ꤢ꤬ ꤜꤢꤧ꤬ ꤘꤣ ꤠꤤ꤭ꤊꤢꤧꤎꤢ꤬ꤚꤤ꤯ ꤢ꤬ꤔꤥ꤬ꤒꤣ꤬ꤔꤣꤧ꤭ ꤚꤣꤧ꤬ ꤢ꤬ ꤥ꤬ꤔꤢꤧ꤭ꤥ꤬ ꤘꤣ ꤖꤚꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬ ꤢ꤬ꤜ꤫ꤢꤩ꤬ꤥ꤬ ꤢ꤬ꤋꤢꤨ꤬ ꤚꤣꤧ꤬ ꤢ꤬ ꤟꤢꤩꤒꤢ꤭ ꤢ꤬ꤍ꤫ꤥ꤬ ꤔꤢꤧ ꤢꤨ꤭ ꤊ꤫ꤢꤦ꤬ ꤞꤢꤨ꤭ꤟꤢꤧ꤭ꤔꤥ꤭ ꤋꤢꤨ꤭ꤕꤢꤪꤜꤢꤨ ꤘꤣ ꤢ꤬ ꤥ꤬꤯ 7 ꤙꤣꤧ ꤋꤢꤨ꤭ꤕꤢꤪꤜꤢꤨ ꤟꤢꤧ꤭ꤒ꤫ꤥ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤨꤘꤢ꤬ꤖꤢꤨ ꤘꤣ ꤢ꤬ ꤥ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤚꤣꤧ꤬ ꤢ꤬ ꤟꤢꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤟꤢꤧ꤭ ꤊꤣꤧ꤬ꤓꤢꤪ꤬ꤥ꤬ ꤒꤣꤧ꤬ꤠꤢ꤬ ꤜꤢꤪ꤭ ꤋꤢꤨ꤭ꤕꤢꤪꤜꤢꤨ꤯ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤧ꤭ꤘꤢꤧ꤬ꤓꤢꤧ꤬ ꤢꤩꤜꤥ꤬ ꤒꤢꤩ꤬ꤞꤢꤦ ꤘꤣ ꤢ꤬ꤘꤢꤨ꤬ꤢ꤬ꤛꤢꤧ꤭ ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤟꤢꤧ꤭ ꤘꤢꤧ꤬ꤓꤢꤧ꤬ ꤜꤢꤨ꤭ ꤒꤢꤩ꤬ꤞꤢꤦ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ꤒꤥ꤭ ꤒꤣ꤬ꤡꤣ꤬꤮ ꤒꤥ꤬꤯ 8 ꤟꤢꤨꤔꤣꤧ꤬ꤚꤣꤧ꤬ ꤋꤢꤨ꤭ꤕꤢꤪꤜꤢꤨ ꤟꤢꤩꤜꤣꤧ꤬ꤕꤜꤢꤩ ꤢ꤬ꤔ꤫ꤢꤩ꤬ ꤔꤢꤧ, “ꤒꤢꤩ꤬ꤞꤢꤦ ꤘꤣ ꤢ꤬ ꤗꤢꤩ꤬ꤕꤛꤢꤗꤢꤩ꤬ꤜ꤫ꤢꤨ꤬ ꤛꤢꤨꤘꤢ꤬ꤖꤢꤨ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤒꤢꤩ꤬ꤜꤢꤨ꤭ꤒꤢꤧ꤭ꤟꤥ꤭ꤔꤣꤧ꤬ ꤙꤢꤩ꤬ꤙꤢꤩ꤬, ꤓꤥ꤭ꤚꤣꤧ꤬ ꤚꤥꤗꤢꤩ꤬ ꤢ꤬ꤋꤝꤤꤘꤢꤨ꤬ ꤙꤢꤩ꤬ꤙꤢꤩ꤬ ꤠꤢꤧ꤭ ꤗꤢꤩ꤬ꤔꤢꤪ ꤒꤣ꤬ꤡꤣ꤬꤮ ꤒꤥ꤬꤯” 9 ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤞꤤꤛ꤫ꤢꤦ꤬ ꤕꤣꤧꤞꤢꤩ꤬ꤥ꤬ ꤘꤣ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬, ꤢ꤬ ꤘꤣꤧꤟꤣꤧ꤭ ꤋꤢꤨ꤭ꤕꤢꤪꤜꤢꤨ ꤔꤢꤧ, “ꤊꤢꤩ꤬ ꤡꤝꤢ ꤘꤣꤧꤡꤢ꤭ ꤕ꤫ꤢꤩ꤬ ꤔꤢꤧ꤬ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ ꤘꤣ ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤘꤣ ꤠꤢꤧ꤭ ꤕꤣꤧꤞꤢꤩ꤬ꤑꤢꤩ꤭ ꤟꤢꤩꤔꤣꤧ꤬ꤗꤢ꤬, ꤔꤢꤧ꤬ ꤞꤤꤕꤜꤢꤪ꤬ꤥ꤬ ꤡꤝꤢ ꤏꤢꤜ꤫ꤢꤩ꤬ ꤟꤢꤧ꤭?” 10 ꤚꤣꤧ꤬ ꤋꤢꤨ꤭ꤕꤢꤪꤜꤢꤨ ꤟꤢꤩꤏꤢꤦ꤬ ꤢ꤬ ꤔꤢꤧ, “ꤊꤢꤨꤔ꤫ꤢꤧ꤬ꤚꤣꤧ꤬ ꤠꤢꤧ꤭ ꤊꤣꤧ꤬ꤓꤢꤪ꤬ꤥ꤬ꤟꤣꤧ ꤘꤣ ꤋꤝꤤꤘꤢꤨ꤬ ꤜ꤫ꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬ ꤢ꤬ꤜ꤫ꤢꤩ꤬ꤥ꤬ ꤟꤣꤧ꤯ ꤣꤧ꤭ꤗꤢ꤬ ꤜ꤫ꤢꤩ꤬ꤥ꤬ ꤘꤣ ꤒꤥ꤭ꤙꤢꤩ꤬ ꤡꤢꤧ꤬ꤒꤥ꤭ꤙꤢꤩ꤬ ꤘꤣꤧꤟꤣꤧ꤭ꤡꤢꤩ꤭ꤗꤢꤧ ꤠꤢꤧ꤭ ꤟꤣꤧ꤯ ꤟꤢꤨ ꤔꤢꤧ꤬ ꤞꤤꤑꤢꤩ꤭ ꤒꤢ꤭ꤒꤢꤩ꤬ ꤓꤥ꤭ꤘꤢꤦ꤬ꤟꤣꤧ ꤔꤣꤧ꤬ ꤟꤣꤧ, ꤠꤢꤧ꤭ ꤗꤢꤩ꤬ꤞꤢꤦꤔꤢꤪ ꤔꤢꤧ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤒꤣ꤬ꤡꤣ꤬꤮ ꤒꤥ꤬꤯ 11 ꤊꤢꤩ꤬ ꤠꤢꤧ꤭ ꤗꤢꤩ꤬ꤞꤢꤦ ꤒꤣꤧ꤬ꤜꤝꤢꤒꤣꤧ꤬ꤕꤜꤢꤩ꤬ ꤟꤣꤧ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤘꤣ ꤢ꤬ ꤒꤥ꤭ꤙꤢꤩ꤬ ꤔꤢꤧ ꤒꤢꤩ꤬ꤘꤣꤧꤡꤢ꤭ ꤞꤣꤧ꤭ ꤠꤢꤧ꤭ ꤒꤣ꤬ꤡꤣ꤬ꤡꤣ꤬ ꤟꤢꤩꤚꤣꤧ꤬, ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ ꤕꤢ꤬ ꤔꤢꤧ ꤞꤤ꤭ ꤘꤣ ꤞꤤ꤭ ꤊ꤫ꤢꤦ꤬ ꤕꤜꤝꤢ꤭ ꤞꤣꤧ꤭ꤖꤚꤢꤩ꤬ ꤕ꤫ꤥ꤬ ꤠꤢꤧ꤭ ꤔꤣꤧ꤬ꤒꤥ꤬꤯ ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤘꤢꤧ꤬ꤓꤢꤧ꤬ꤜꤥ꤭ ꤠꤢꤧ꤭ ꤒꤢꤩ꤬ꤞꤢꤦ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬, ꤊꤢꤩ꤬ ꤢ꤬ ꤒꤥ꤭ꤒꤥ꤬ ꤟꤢꤩꤚꤣꤧ꤬ ꤢꤨ꤭ ꤘꤣꤧꤒꤢ꤭ꤡ꤫ꤢꤧ꤬ ꤠꤢꤧ꤭ ꤘꤣ ꤛꤢꤨꤘꤢ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤊꤢꤨꤛꤢ꤭ꤊꤢꤨ꤭ ꤒꤣ꤬ꤖꤚꤢꤩ꤬꤮ ꤒꤥ꤬꤯ ꤞꤢꤧꤟꤢꤨ ꤢꤨ꤭ ꤊ꤫ꤢꤦ꤬ ꤘꤣꤧꤡꤢ꤭ ꤠꤢꤧ꤭ ꤚꤣꤧ꤬ ꤠꤢꤧ꤭ ꤊꤝꤤ꤭ꤡꤝꤢ ꤢꤨ꤭ ꤘꤣ ꤢꤨ꤭ ꤊ꤫ꤢꤦ꤬ ꤞꤢꤨ꤭ꤡꤝꤢ ꤠꤢꤧ꤭ ꤘꤣ ꤚꤥꤗꤢꤩ꤬ ꤋꤝꤤꤘꤢꤨ꤬ ꤢ꤬ ꤥ꤬꤯” 12 ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤔꤢꤧ ꤊꤣꤧ꤬ꤛꤢꤧ꤭ ꤒꤢꤩ꤬ꤞꤤꤒꤢꤩ꤬ꤖꤢꤩ ꤒꤣꤧ꤬ꤟꤢꤩ꤬ ꤟꤢꤩꤙꤢꤩ꤬ ꤔꤥ꤭ꤊꤢꤨ꤭ ꤚ꤫ꤥ꤬ꤋꤛꤢ꤭ꤜꤢꤨ꤭ ꤚꤣꤧ꤬ ꤢ꤬ ꤟꤢꤩꤏꤢꤦ꤬ ꤋꤢꤨ꤭ꤕꤢꤪꤜꤢꤨ ꤔꤢꤧ, “ꤔꤢꤧ꤬ ꤊꤝꤤ꤭ ꤢꤨ꤭ ꤘꤣ ꤢꤨ꤭ ꤊ꤫ꤢꤦ꤬ ꤞꤢꤨ꤭ꤡꤝꤢ ꤔꤢꤧ꤬ ꤘꤣ ꤋꤝꤤꤘꤢꤨ꤬ ꤊꤢꤧꤎꤢ꤬ ꤥ꤬ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭ ꤔꤢꤧ꤬ ꤊ꤫ꤢꤦ꤬ ꤡꤝꤢꤔꤢꤪ ꤘꤣ ꤜꤢꤨ꤭ꤥ꤬ ꤕꤢ꤭꤯” ꤋꤢꤨ꤭ꤕꤢꤪꤜꤢꤨ ꤘꤣ ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤔꤢꤧ ꤢ꤬ꤕ꤫ꤥ꤬ ꤗꤢꤪ꤬ꤙꤢꤩ꤬ꤔꤤꤊꤢꤩ꤬ ꤢ꤬ꤕꤣꤧꤞꤢꤩ꤬ꤑꤢꤩ꤭ 13 ꤘꤣꤋꤛꤢ꤭ ꤞꤥ꤭ꤜꤝꤤ꤭ꤔꤣꤧ꤭ ꤟꤣꤧꤔꤣꤧ꤬ ꤚꤣꤧ꤬ ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤔꤢꤧ ꤢ꤬ꤕ꤫ꤥ꤬ ꤗꤢꤪ꤬ꤙꤢꤩ꤬ꤔꤤꤊꤢꤩ꤬ ꤟꤢꤧ꤭ꤒ꤫ꤥ꤬ ꤘꤣ ꤠꤤ꤭ꤊꤢꤧꤎꤢ꤬ꤚꤤ ꤘꤣ ꤢ꤬ ꤊ꤫ꤢꤦ꤬ꤚꤢꤩ꤭ ꤟꤢꤧ꤭ ꤥ꤬ꤜꤢꤩ꤭ ꤊꤣꤧ꤭ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤚꤣꤧ꤬ ꤢ꤬ ꤊ꤫ꤢꤦ꤬ ꤟꤢꤧ꤭ ꤥ꤬ꤜꤢꤩ꤭ ꤘꤣꤧꤜꤥ꤭ ꤜꤢꤨ꤭ ꤔꤢꤧ ꤢ꤬ ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤒꤣꤧ꤬ꤟꤢꤩ꤬꤯ 14 ꤛꤢꤩ꤬ꤞꤤ꤭ ꤡꤝꤢꤥ꤬ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤑꤢ꤭ꤚꤢ꤬ꤚꤢꤩ꤬ ꤊꤢꤨ꤮ ꤜꤥ꤬ ꤙꤣꤧꤔꤣꤧ꤬ ꤚꤣꤧ꤬ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩꤜꤥ꤭ ꤕꤢꤩ꤬ ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤔꤢꤧ ꤋꤢꤨ꤭ꤕꤢꤪꤜꤢꤨ ꤢ꤬ꤚꤤ꤬ꤢ꤬ꤊꤢꤧ꤭꤯ ꤚꤣꤧ꤬ ꤢ꤬ ꤟꤢꤩ ꤔꤢꤧ, “ꤋꤝꤤꤘꤢꤨ꤬ ꤠꤢꤩꤜꤤ꤬ ꤘꤢꤪꤒꤢ꤭ꤊꤢꤧ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ꤕꤥ꤬ꤊꤢꤨ꤭ ꤒꤣ꤬ꤖꤚꤢꤩ꤬꤯ 15 ꤚꤣꤧ꤬ ꤙꤣꤧ ꤠꤢꤧ꤭ ꤟꤢꤧ꤭ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤨꤘꤢ꤬ꤖꤢꤨ ꤖꤚꤢꤩ꤬ꤜꤢꤨ꤭ꤒꤢꤧ꤭ ꤊꤢꤨ꤬ꤊꤜꤢꤪ ꤒꤣꤧ꤬ꤟꤢꤩ꤬ ꤔꤢꤧ ꤛꤢꤨꤘꤢ꤬ꤖꤢꤨ ꤗ꤫ꤥ꤬ꤖꤚꤢꤨ꤭ꤗ꤫ꤥ꤬ꤖꤚ꤫ꤢꤩ꤬ ꤘꤣ ꤢ꤬ ꤓꤝꤢ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣꤧ꤬ꤟꤢꤩ꤬ ꤟꤢꤧ꤭ ꤘꤢꤧ꤬ꤜꤥ꤭ꤓꤢꤧ꤬ ꤜꤢꤨ꤭ ꤒꤢꤩ꤬ꤞꤢꤦ ꤚꤣꤧ꤬ ꤢ꤬ ꤔꤢꤪ꤭ꤘꤣꤧꤡꤢ꤭ ꤔꤢꤧ ꤠꤢꤧ꤭꤯ 16 “ꤗꤢ꤬ꤔꤢꤧꤚꤣꤧ꤬ ꤠꤢꤧ꤭ ꤟꤢꤩꤏꤥ꤬ ꤛꤢꤩ꤬ꤞꤤ꤭ ꤔꤢꤧ ꤕꤢꤩ꤬ ꤚꤥꤗꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤢ꤬ ꤜ꤫ꤢꤩ꤬ꤊꤜꤥ꤭ꤜ꤫ꤢꤩ꤬ꤋꤢꤧ꤬ ꤥ꤬ ꤔꤢꤧ, ꤙꤣꤧ ꤢꤨ꤭ ꤘꤣꤧꤒꤢ꤭ ꤒꤢꤧ꤬ꤜꤢ꤭ꤟꤤ ꤊꤣꤧ꤬ꤛꤢꤧ꤭ ꤗꤢꤩ꤬ꤞꤢꤦ ꤓꤣꤧ꤭ꤊ꤫ꤢꤩ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢꤨ꤭ ꤊꤢꤨꤛꤢ꤭ꤊꤢꤨ꤭ ꤜꤢ꤭ꤟꤤꤒꤥ꤬ꤔꤣꤧ꤬, ꤢ꤬ ꤒꤥ꤭ꤙꤢꤩ꤬ ꤔ꤫ꤤ꤬ꤙꤢꤩ꤬ ꤢ꤬ꤏꤣꤧꤢ꤬ꤋꤢꤩ꤭ ꤘꤣ ꤢꤨ꤭ ꤊ꤫ꤢꤦ꤬ ꤔ꤫ꤤ꤬ꤟꤥ꤭ ꤢꤨ꤭ ꤘꤢꤧ꤬ꤒꤢꤩ꤬ꤞꤢꤦ ꤘꤣ ꤢ꤬ꤜꤥ꤬, ꤓꤥ꤭ꤚꤣꤧ꤬ ꤙꤢꤩ꤬ ꤘꤣꤧ ꤜꤢꤨ꤭ ꤢ꤬ꤏꤣꤧꤢ꤬ꤋꤢꤩ꤭ ꤘꤣ ꤢ꤬ ꤙꤢꤩ꤬ ꤟꤢꤩꤙꤢꤩ꤬ꤜꤣꤧ꤬ꤕꤜꤢꤩ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤔꤢꤧ ꤒꤢꤩ꤬ꤞꤢꤦ ꤘꤣ ꤢꤨ꤭ ꤘꤢꤧ꤬ ꤜꤢꤨ꤭ ꤣꤧ꤭ꤔꤣꤧ꤬ ꤒꤣꤧ꤬ꤟꤢꤩ꤬꤯ 17 ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤙꤣꤧ ꤛꤢꤩ꤬ꤞꤤ꤭ ꤟꤢꤧ꤭ꤒ꤫ꤥ꤬ ꤙꤣꤧ ꤠꤤ꤭ꤊꤢꤧꤎꤢ꤬ꤚꤤ ꤢ꤬ꤊꤢꤨ꤭ ꤣꤧ꤭ꤢ꤬ꤋꤢꤩ꤭ꤔꤣꤧ꤬, ꤠꤢꤧ꤭ ꤡꤝꤤ꤬ꤓꤢꤨ꤭ ꤕ꤫ꤢꤩ꤬ ꤕꤢ꤬ ꤛꤢꤩ꤬ꤞꤤ꤭ ꤗ꤫ꤢꤪ꤬ꤔꤣꤧ꤭ꤗ꤫ꤢꤪ꤬ꤞꤢꤩ꤭ ꤒꤥ꤬꤯ ꤢ꤬ꤔꤥ꤬ꤒꤣ꤬ꤔꤣꤧ꤭ ꤚꤣꤧ꤬ ꤠꤢꤧ꤭ ꤥ꤬ꤔꤢꤧ꤭ꤥ꤬ ꤘꤣ ꤜ꤫ꤢꤩ꤬ꤡꤢꤧ꤬ꤒꤥ꤭ꤙꤢꤩ꤬ꤒꤢꤩ꤬ ꤢ꤬ꤜ꤫ꤢꤩ꤬ꤥ꤬ ꤚꤣꤧ꤬ ꤠꤢꤧ꤭ ꤔꤢꤪ꤭ ꤢꤩꤟꤢꤧ꤭ꤔꤥ꤭ ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣ꤬ꤖꤚꤢꤩ꤬ ꤘꤣ ꤠꤢꤧ꤭ ꤕꤣꤧꤞꤢꤩ꤬ꤑꤢꤩ꤭꤯ 18 ꤊꤣꤧ꤬ꤛꤢꤧ꤭ ꤟꤢꤧ꤭ ꤘꤢꤧ꤬ꤒꤢꤩ꤬ꤞꤢꤦ ꤋꤢꤨ꤭ꤕꤢꤪꤜꤢꤨ ꤣꤧ꤭ꤒꤣꤧ꤬ꤟꤢꤩ꤬ ꤊꤣꤧ꤬ꤓꤢꤪ꤬ ꤜꤢ꤭ꤋꤢꤧ꤭ ꤚꤣꤧ꤬ ꤘꤢꤧ꤬ꤓꤢꤧ꤬ꤜꤥ꤭ ꤜꤢꤪ꤭ꤕꤜꤤ꤭ ꤜꤢꤨ꤭ꤒꤢꤩ꤬ꤞꤢꤦ ꤒꤣꤧ꤬ꤟꤢꤩ꤬꤯ ꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤊꤢꤩ꤬ ꤋꤢꤨ꤭ꤕꤢꤪꤜꤢꤨ ꤒꤢꤩ꤬ꤞꤢꤦ ꤔꤢꤧ ꤢ꤬ ꤗꤢꤩ꤬ꤞꤢꤦ ꤒꤣꤧ꤬ꤜꤝꤢꤒꤣꤧ꤬ꤕꤜꤢꤩ꤬ ꤓꤣꤧ꤭ꤊ꤫ꤢꤩ꤬ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤥ꤬ ꤕꤢ꤭ ꤟꤢꤧ꤭ ꤠꤢꤧ꤭ ꤒꤣꤧ꤬ꤔꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤛꤢꤩ꤬ꤞꤤ꤭ ꤊꤢꤩ꤬ ꤜꤢꤨ꤭ ꤒꤢꤩ꤬ꤞꤢꤦ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤗꤢꤩ꤬ꤞꤢꤦ ꤒꤣꤧ꤬ꤜꤝꤢꤒꤣꤧ꤬ꤕꤜꤢꤩ꤬ ꤓꤣꤧ꤭ꤊ꤫ꤢꤩ꤬ ꤢ꤬ ꤒꤢꤩ꤬ꤞꤝꤢꤒꤢꤩ꤬ꤞꤢꤧ꤬ ꤔꤣꤧ꤬ ꤢ꤬ ꤥ꤬ꤕ꤫ꤢ꤬ ꤒꤣ꤬ꤡꤣ꤬꤮ ꤒꤥ꤬꤯ 19 ꤛꤢꤩ꤬ꤞꤤ꤭ ꤋꤚꤢꤩꤋꤚ꤫ꤢꤧ꤬ ꤏꤥ꤭ꤏꤢꤦ ꤋꤛꤢ꤭ ꤚꤣꤧꤘꤢꤦ꤬ ꤜꤢꤨ꤭ ꤔꤢꤧ ꤛꤢꤩ꤬ꤞꤤ꤭ ꤢ꤬ꤒꤢꤩ꤬ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤚꤣꤧꤘꤢꤦ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ꤗꤝꤤ꤭ ꤔꤢꤧ ꤛꤢꤩ꤬ꤏꤛꤢꤨ ꤘꤣ ꤢ꤬ ꤞꤣꤧ꤭ꤓꤥ꤭ꤟꤣꤧ ꤔꤣꤧ꤬ꤒꤣ꤬ꤖꤚꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭ ꤖꤢꤧ, ꤒꤣꤧ꤬ꤘꤢꤦꤚꤣꤧ꤬ ꤋꤢꤨ꤭ꤕꤢꤪꤜꤢꤨ ꤊꤣꤧ꤭ꤜꤢ꤭ꤒꤢꤩ꤬ ꤚꤣꤧ꤬ ꤢ꤬ ꤟꤢꤩ ꤔꤢꤧ ꤢ꤬ ꤥ꤬ ꤞꤣꤧ꤭ꤖꤚꤢꤩ꤬ ꤕꤢ꤬ꤖꤢꤧ꤯ 20 ꤞꤢꤧꤟꤢꤨ ꤠꤢꤧ꤭ ꤊ꤫ꤢꤦ꤬ ꤞꤤꤑꤢꤩ꤭ ꤢꤩꤓꤢꤧ꤬ꤕ꤫ꤥ꤬ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤚꤣꤧ꤬, ꤠꤢꤧ꤭ ꤒꤥ꤭ꤙꤢꤩ꤬ ꤗꤢꤩ꤬ꤟꤢꤨꤒꤢꤩ꤭ꤔꤣꤧ꤬ ꤠꤢꤧ꤭ ꤟꤢꤩꤕꤜꤥ꤭ꤙꤢꤩ ꤕ꤫ꤢꤩ꤬ ꤕꤢ꤬ ꤛꤢꤩ꤬ꤞꤤ꤭ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤘꤣꤧꤟꤣꤧ꤭ ꤋꤢꤨ꤭ꤕꤢꤪꤜꤢꤨ ꤔꤢꤧ ꤗꤢ꤬ ꤔꤢꤧ꤬ ꤞꤤꤕꤜꤢꤪ꤬ꤥ꤬ ꤡꤝꤢ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤚꤣꤧ꤬ ꤔꤢꤧ꤬ ꤞꤤꤛ꤫ꤢꤦ꤬ ꤔꤢꤪ꤭ꤘꤣꤧꤟꤣꤧ꤭ ꤡꤢꤩ꤭ꤗꤢꤧ ꤢꤨ꤭ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤢꤧ ꤔꤢꤧ꤬ꤔ꤫ꤢꤩ꤬ ꤟꤢꤧ꤭? ꤠꤢꤧ꤭ ꤘꤣꤧꤟꤣꤧ꤭ ꤜꤢꤨ꤭ ꤟꤢꤨꤔꤣꤧ꤬꤯ 21 ꤗꤢ꤬ꤔꤢꤧꤚꤣꤧ꤬ ꤋꤢꤨ꤭ꤕꤢꤪꤜꤢꤨ ꤊꤝꤤ꤭ꤥ꤬ꤛꤝꤢ꤭ ꤊꤥꤜꤢꤦ꤬ ꤚꤣꤧ꤬ ꤢ꤬ ꤞꤤꤛ꤫ꤢꤦ꤬ ꤔꤢꤪ꤭ꤡꤢꤧ꤬ꤒꤥ꤭ꤙꤢꤩ꤬ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤣꤧ꤭ꤔꤣꤧ꤬ ꤔꤢꤧ ꤋꤝꤤꤘꤢꤨ꤬ ꤊꤢꤧꤎꤢ꤬꤯ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤔꤢꤪ꤭ꤒꤢ꤭ ꤠꤢꤧ꤭ ꤊꤜꤣꤧ꤭ꤟꤢꤨ ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤕ꤫ꤢꤪ꤬ ꤚꤣꤧ ꤜꤢꤨ꤭ ꤒ꤫ꤥ꤬ꤘꤣ ꤕꤢꤩ꤬ ꤞꤢꤨ꤭ꤡꤝꤢ ꤒ꤫ꤥ꤬ꤙꤢꤩ ꤟꤣꤧ ꤜꤢꤨ꤭ ꤘꤣ ꤋꤝꤤꤘꤢꤨ꤬ ꤊꤢꤧꤎꤢ꤬ ꤢ꤬ ꤥ꤬ ꤕꤢ꤭,” ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩ ꤟꤢꤨꤔꤣꤧ꤬꤯ 22 ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤟꤢꤩꤏꤢꤦ꤬ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤔꤢꤧ, “ꤠꤢꤧ꤭ ꤞꤤꤛ꤫ꤢꤦ꤬ ꤔ꤫ꤤ꤬ꤟꤥ꤭ꤊꤣꤧ꤭ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤒꤢꤩ꤬ꤟꤢꤩꤙꤢꤩ꤬ꤟꤢꤩꤏꤥ꤭ ꤔꤢꤧ ꤠꤢꤧ꤭ꤔ꤫ꤢꤩ꤬ ꤚꤣꤧꤘꤢꤦ꤬꤯” ꤚꤣꤧ꤬ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩꤏꤢꤦ꤬ ꤜꤢꤨ꤭ ꤔꤢꤧ, “ꤊꤢꤩ꤬ ꤟꤢꤩꤟꤢꤨꤔꤣꤧ꤬ ꤚꤣꤧ꤬ ꤏꤢꤕꤣꤧꤚꤥ꤬ ꤕꤢ꤭ꤔꤣꤧ꤬ ꤔꤢꤧ꤬ ꤊ꤫ꤢꤦ꤬ ꤔ꤫ꤤ꤬ꤟꤥ꤭ꤔꤢꤪ ꤘꤢꤦ꤬ ꤕꤢ꤭꤯” 23 ꤘꤣꤋꤛꤢ꤭ ꤒꤣ꤬ꤔꤣꤧ꤭ꤔꤣꤧ꤬, ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤔꤢꤧ ꤢ꤬ꤕ꤫ꤥ꤬ ꤗꤢꤪ꤬ꤙꤢꤩ꤬ꤔꤤꤊꤢꤩ꤬ ꤟꤢꤧ꤭ ꤚꤣꤧ꤬ ꤢ꤬ ꤊꤢꤦ꤭ꤞꤢꤧ ꤟꤢꤧ꤭ꤔ꤫ꤤ꤬ ꤟꤣꤧ꤬ꤡꤢ꤬ꤒꤝ꤫ꤢ꤬ ꤟꤣꤧ꤬ꤡꤢ꤬ꤚꤢꤧ ꤘꤣ ꤢ꤬ ꤕꤜꤢꤧꤒꤣꤧ꤬ꤋꤢꤩ꤭ ꤒꤣꤧ꤬ꤟꤢꤩ꤬ ꤚꤣꤧ꤬ ꤢ꤬ ꤟꤢꤧ꤭ꤔꤥ꤭ ꤚ꤫ꤥ꤬ꤊꤣꤧ꤭ ꤔꤢꤧ ꤊꤜꤣꤧ꤭ꤊꤢꤨ꤬ꤊꤜꤢꤪ ꤔꤢꤧ ꤊꤣꤧ꤬ꤛꤢꤧ꤭ꤘꤢꤨ꤬ꤊꤣꤧ꤬ꤛꤢꤧ꤭ꤓꤢꤨ꤭ ꤙꤣꤧ ꤠꤤ꤭ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤘꤣ ꤢꤨ꤭ ꤜ꤫ꤢꤩ꤬ꤥ꤬ꤊꤢꤨꤥ꤬ꤊꤢꤧ ꤜꤢꤨ꤭ ꤢ꤬ꤜ꤫ꤢꤩ꤬ꤥ꤬ ꤒꤣ꤬ꤖꤥ꤬꤯ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤔꤢꤪ꤭ꤢꤩꤔꤥ꤭ ꤢꤨ꤭ ꤔꤢꤧ ꤋꤢꤨ꤭ꤕꤢꤪꤜꤢꤨ ꤘꤣ ꤢ꤬ꤊꤢꤨ꤭꤯ 24 ꤚꤣꤧ꤬ ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩ ꤔꤢꤧ, “ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ ꤙꤣꤧꤣꤧ꤭ ꤜꤢꤪ꤭꤮ ꤕꤜꤤ꤭ ꤞꤤ꤭꤮, ꤞꤤ꤭ ꤗꤢꤧꤓ꤫ꤣꤧ꤬ꤟꤣꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤟꤣꤧ꤯ ꤜꤢꤪ꤭ ꤛꤢꤨꤘꤢ꤬ꤖꤢꤨ ꤘꤣ ꤢ꤬ ꤥ꤬ ꤙꤣꤧꤣꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤩ꤬ꤙꤢꤩ꤬, ꤢ꤬ ꤥ꤬ ꤘꤣ ꤠꤤ꤭ꤛꤢ꤬ꤚꤢꤨꤏꤛꤢ꤬ꤜꤢꤩ꤬ ꤢ꤬ꤊꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤙꤢꤩ꤬ꤙꤢꤩ꤬, ꤢ꤬ ꤟꤢꤧ꤭ ꤊꤝꤤ꤭ꤞꤤꤛꤢꤪ꤬ ꤠꤢꤧ꤭ ꤔꤢꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭꤯ ꤛꤢꤩ꤬ꤞꤤ꤭ ꤢꤩꤓꤥ꤭ꤓꤢꤧ꤬ ꤜꤢ꤭ꤋꤢꤧ꤭ ꤔꤢꤧ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤒꤥ꤭ꤙꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤕꤢ꤬ꤒꤥ꤬, ꤢ꤬ ꤟꤢꤩ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ 25 ꤗꤢ꤬ꤔꤢꤧꤚꤣꤧ꤬, ꤢ꤬ ꤗꤢꤩ꤬ ꤒꤢꤩ꤬ꤞꤢꤦ ꤘꤣ ꤒꤥ꤭ꤙꤢꤩ꤬ ꤘꤣꤧꤡꤢ꤭ ꤞꤣꤧ꤭ꤊꤢꤧ꤭ ꤢ꤬ꤔꤣꤧ꤬ ꤠꤢꤧ꤭ ꤗꤢꤧꤓ꤫ꤣꤧ꤬ ꤒꤣ꤬ꤡꤣ꤬꤮ ꤒꤥ꤬꤯ ꤢ꤬ꤔ꤫ꤢꤩ꤬ꤙꤢꤧ꤬ꤡꤢꤩ꤬ ꤚꤣꤧꤘꤢꤦ꤬ ꤊꤝꤤ꤭ꤘꤢꤦ꤬ ꤔꤢꤧ ꤢ꤬ ꤞꤤꤛ꤫ꤢꤦ꤬ ꤔꤢꤪ꤭ꤘꤣꤧꤡꤢ꤭ ꤚꤣꤧꤘꤢꤦ꤬ ꤔꤢꤧ ꤋꤝꤤꤘꤢꤨ꤬ ꤊꤢꤧꤎꤢ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤘꤢꤧ꤬ꤜꤢꤧ꤬ꤟꤣꤧ ꤠꤢꤧ꤭ ꤞꤤꤕꤜꤢꤪ꤬ ꤔꤢꤧ ꤠꤢꤧ꤭ ꤊ꤫ꤢꤦ꤬ ꤞꤢꤨ꤭ꤜꤢꤧ꤬ ꤢ꤬ ꤖꤢꤧ꤯ 26 ꤗꤢ꤬ꤔꤢꤧꤚꤣꤧ꤬, ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤘꤣ ꤠꤢꤧ꤭ ꤊ꤫ꤢꤦ꤬ ꤚꤢ꤭ꤜꤥ꤭ꤓꤢꤧ꤬ ꤒꤢ꤭ꤒꤢꤩ꤬ ꤕ꤫ꤢꤩ꤬ ꤘꤣ ꤋꤝꤤꤘꤢꤨ꤬ ꤥ꤬ꤔꤣꤧ꤬, ꤢ꤬ ꤥ꤬ ꤒꤣ꤬ꤡꤣ꤬꤮ ꤒꤥ꤬꤯ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤔꤢꤪ꤭ꤢꤩꤟꤢꤧ꤭ ꤢꤨ꤭ ꤔꤢꤧ ꤢ꤬ ꤘꤣ ꤞꤤ꤭ ꤜꤢꤪ꤭꤮ ꤕꤜꤤ꤭ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤟꤣꤧ꤯ ꤢ꤬ ꤜ꤫ꤥ꤬ꤘꤢꤨ꤬ ꤚ꤫ꤣꤧ꤬ꤜꤣꤗꤢ꤬ ꤟꤣꤧ ꤠꤢꤧ꤭ ꤊ꤫ꤢꤦ꤬ ꤔꤢꤪ꤭ꤟꤢꤧ꤭ ꤜꤢꤨ꤭ ꤘꤣ ꤋꤝꤤꤘꤢꤨ꤬ ꤢ꤬ꤊꤚꤤꤕꤢ꤬ ꤗ꤫ꤢ꤬ꤟꤣꤧ ꤔꤢꤧ꤬ꤣꤧ꤭ ꤢ꤬ ꤕꤣꤧꤞꤢꤩ꤬ꤑꤢꤩ꤭ ꤟꤣꤧ꤯ ꤏꤢ꤮ ꤕꤢꤩ꤬ ꤘꤣꤧꤟꤣꤧ꤭ ꤓꤥ꤭ꤟꤣꤧ ꤢ꤬ ꤕꤢ꤭ ꤒꤢꤦꤗꤢ꤬ ꤠꤢꤧ꤭ ꤚꤢ꤭ꤓꤢꤧ꤬ꤜꤥ꤭ ꤒꤢ꤭ꤒꤢꤩ꤬ꤔꤥ꤬ ꤒꤢꤩ꤬ꤚꤤ꤬ꤒꤢꤩ꤬ꤊꤢꤧ꤭ ꤕꤢ꤭, ꤟꤢꤨꤔꤣꤧ꤬ꤖꤢꤧ꤯ 27 ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢꤨ꤭ ꤘꤢꤪꤒꤢ꤭ ꤊꤣꤧ꤬ꤛꤢꤧ꤭ ꤘꤣ ꤢ꤬ꤕꤥ꤬ꤊꤢꤨ꤭ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤠꤢꤧ꤭ ꤊꤢꤩ꤬ ꤟꤢꤩꤜꤥ꤭ꤕꤜꤥ꤭ꤓꤢꤧ꤬ ꤒꤢ꤭ꤒꤢꤩ꤬ ꤋꤛꤢ꤭ꤞꤢꤧ ꤒꤢꤩ꤬ꤞꤢꤦ ꤘꤣ ꤢꤨ꤭ ꤊꤢꤩ꤬ ꤜꤢꤨ꤭ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤒꤥ꤬ ꤟꤢꤩꤚꤣꤧ꤬ ꤠꤢꤧ꤭ ꤊꤢꤩ꤬ ꤔꤢꤪ꤭ꤞꤢꤨ꤭ꤡꤝꤢ ꤜꤢꤨ꤭ ꤘꤣ ꤋꤝꤤꤘꤢꤨ꤬ ꤥ꤬ ꤟꤢꤩꤔꤣꤧ꤬, ꤢ꤬ ꤡ꤫ꤣ꤬ ꤔꤢꤧ ꤢ꤬ꤒꤥ꤭ꤢ꤬ꤙꤢꤩ꤬ ꤒꤥ꤬,” ꤋꤝꤤꤘꤢꤨ꤬ ꤠꤢꤩ꤬ꤎꤢ꤬ꤒꤢꤨ ꤟꤢꤩ ꤟꤢꤨꤔꤣꤧ꤬꤯ |
Wycliffe USA
The Seed Company