ทิโมธี เนอบ่า ต๊าบ่า 3 - Eastern Kayah Shadaw Dialect

ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤏꤢ꤮ ꤗ꤫ꤢꤪ꤬ꤔꤣꤧ꤭ ꤘꤣꤋꤛꤢ꤭ ꤒꤣꤧ꤬ꤘꤢꤦ꤬ꤕꤢ꤭ ꤒꤣꤧ꤬ꤟꤢꤩ꤬

¹ ꤗꤢ꤬ꤔꤢꤧꤚꤣꤧ꤬ ꤏꤢ꤮ ꤗ꤫ꤢꤪ꤬ꤔꤣꤧ꤭ ꤘꤣꤋꤛꤢ꤭ ꤒꤣꤧ꤬ꤘꤢꤦ꤬ꤕꤢ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤞꤤ꤭ ꤒꤥ꤭ꤙꤢꤩ꤬ ꤞꤤꤑꤢꤩ꤭ ꤔꤢꤧ ꤒꤢꤩ꤬ꤏꤣꤧꤒꤢꤩ꤬ꤋꤢꤩ꤭ ꤢ꤬ꤕ꤫ꤢꤧ꤬ꤢ꤬ꤏꤢꤩ꤭ ꤊ꤫ꤢꤦ꤬ ꤥ꤬ꤓꤢꤧ꤬ ꤕꤢ꤭꤯

² ꤙꤣꤧꤔꤣꤧ꤬ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤊꤣꤧ꤬ꤛꤢꤧ꤭ ꤒꤣꤧ꤬ꤟꤢꤩ꤬ꤟꤢꤩ꤬ ꤔꤣꤧ꤬, ꤢ꤬ ꤊ꤫ꤢꤦ꤬ ꤗꤥ꤬ꤜꤢꤧ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬, ꤢ꤬ ꤊ꤫ꤢꤦ꤬ ꤗꤥ꤬ꤚꤣꤧ ꤚꤢꤦ꤭, ꤢ꤬ ꤖꤛꤢꤘꤢꤨ꤬ ꤢ꤬ꤔ꤫ꤢꤩ꤬, ꤢ꤬ ꤊ꤫ꤢꤦ꤬ ꤘꤢꤧ꤬ꤓꤢꤧ꤬ꤜꤥ꤭ ꤢ꤬ꤞꤤꤕꤜꤢꤪ꤬ ꤕꤢ꤭꤯ ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤕꤣꤧ꤬ꤡ꤫ꤣꤧ꤬ꤕꤣꤧ꤬ꤢ ꤒꤢꤩ꤬, ꤡꤢꤨ꤭ꤜꤢ꤭ꤖꤛꤢꤚꤣꤧ ꤗ꤫ꤥ꤬ꤍ꤫ꤥ꤬ꤖꤢꤩ꤭ꤍ꤫ꤥ꤬ ꤒꤥ꤬, ꤞꤤꤑꤢꤩ꤭ ꤢꤨ꤭ꤙꤝꤤꤢꤨ꤭ꤒꤣꤧ꤬ꤚꤣꤧ꤭ ꤒꤥ꤬, ꤡꤢꤪꤙꤢꤩ꤭ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤒꤣꤧ꤬ꤟꤢꤩ꤬꤯

³ ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤥ꤬ꤚꤣꤧ ꤊꤣꤧ꤭ꤢꤨ꤭ ꤒꤥ꤬, ꤢ꤬ ꤕꤜꤝꤢ꤭ꤊꤢꤧ꤭ ꤊꤣꤧ꤭ꤢꤨ꤭ ꤒꤢꤩ꤬ꤞꤢꤦ ꤒꤥ꤬, ꤟꤢꤩꤕꤛꤢ ꤢꤨ꤭ꤗꤝꤤ꤭ꤜꤢ꤬, ꤕꤣꤡ꤫ꤢꤧ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ꤒꤥ꤬, ꤊꤣꤧ꤬ꤛꤢꤧ꤭ꤟꤢ꤭ꤊꤣꤧ꤬ꤛꤢꤧ꤭ꤟꤢꤩ꤭, ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤓꤢꤩ꤬ ꤒꤢꤩ꤬ꤚꤢꤧ ꤒꤣꤧ꤬ꤟꤢꤩ꤬ ꤕꤢ꤭꤯

⁴ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤗ꤫ꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤤ꤬ꤏꤢꤩ꤭ꤢꤩ꤬ ꤢꤨ꤭ꤗꤝꤤ꤭, ꤢ꤬ ꤤ꤬ꤏꤢꤩ꤭ꤢꤩ꤬ ꤢꤨ꤭ꤔ꤫ꤢꤩ꤬ ꤚꤣꤧ꤬ ꤗꤢꤩ꤬ꤙꤢꤪ꤭ꤗꤢꤩ꤬ꤙꤛꤢ꤬ ꤢ꤬ꤔ꤫ꤢꤩ꤬, ꤢꤧ ꤓꤢꤧ꤬ꤗꤢꤪꤓꤢꤧ꤬ꤖꤥ꤬ ꤢ꤬ꤔ꤫ꤢꤩ꤬, ꤞꤤꤛ꤫ꤢꤦ꤬ ꤗꤢꤩ꤬ꤗꤥ꤬ ꤒꤣꤧ꤬ꤕꤢ꤬ ꤏꤥ꤭ꤏꤢꤦ ꤡꤣꤧ ꤢ꤬ꤔ꤫ꤢꤩ꤬ ꤣꤧ꤭ꤔꤣꤧ꤬ ꤢ꤬ꤘꤢꤨ꤬ꤜꤣ ꤡꤣꤧꤔꤢꤧ ꤒꤢꤩ꤬ꤗꤥ꤬ꤚꤣꤧ ꤡꤢꤪꤗꤣꤧ꤬ꤚꤢꤧ꤬ ꤕꤢ꤭꤯

⁵ ꤛꤢꤩ꤬ꤞꤤ꤭ ꤊꤜꤝꤢ ꤋꤚꤝꤢ꤭ꤗꤢꤩ꤬ꤊꤣꤧ꤭ꤙꤛꤢ꤬ ꤖꤢꤧ ꤕꤢꤩ꤬ ꤒꤢꤩ꤬ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤢ꤬ꤜ꤫ꤢꤩ꤬ꤊꤜꤥ꤭ꤜ꤫ꤢꤩ꤬ꤋꤢꤧ꤬ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤞꤤ꤭ ꤊ꤫ꤢꤦ꤬ ꤓꤢꤩꤏꤢꤦ꤬ꤊꤢꤧ꤭ ꤒꤢꤩ꤬ꤡꤢꤪꤙꤢꤨ꤬ꤡꤢꤪꤙꤢꤩ꤭ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤘꤣ ꤢ꤬ ꤗ꤫ꤢ꤬ꤔꤤꤔꤢꤧ꤬ ꤣꤧ꤭ꤔꤣꤧ꤬ꤒꤣꤧ꤬ꤟꤢꤩ꤬ ꤕꤢ꤭꤯ ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤔꤢꤧ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤜ꤫ꤢꤩ꤬ꤔꤤ꤮꤯

⁶ ꤛꤢꤩ꤬ꤞꤤ꤭ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬, ꤢ꤬ ꤡꤝꤢ ꤔꤥ꤭ꤋꤢꤔꤥ꤭ꤋꤥ꤬ ꤘꤣ ꤢꤨ꤭ ꤟꤤ꤬ꤘꤢꤪꤊꤢꤪꤊꤢꤨ꤭ ꤚꤣꤧ꤬ ꤛꤢꤩ꤬ꤞꤤ꤭ ꤕꤣꤒꤣꤧ꤬ꤚꤤ꤬ ꤕ꤫ꤢꤦ꤬ꤗꤢ꤬ꤚꤣꤧ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤡꤢꤨ꤭ꤢꤩ꤬ꤛꤢꤨ꤭ꤑꤢ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤚꤢꤩ꤬ꤗꤢꤪ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤖꤚꤢꤩ꤬ꤗꤢꤪ꤬ ꤘꤣ ꤢ꤬ ꤥ꤬ ꤔꤢꤧ ꤢ꤬ ꤒꤢꤩ꤬ꤞꤢꤦꤒꤢꤩ꤬ꤥ꤬ꤚꤢ꤬ ꤢ꤬ ꤒꤢꤩ꤬ꤠꤤꤒꤢꤩ꤬ꤛꤢꤧ ꤚꤣꤧ꤬ ꤢ꤬ ꤋꤚꤝꤢ꤭ꤊꤣꤧ꤭ ꤒꤢꤩ꤬ꤞꤤꤛ꤫ꤢꤦ꤬ꤞꤤꤜꤢꤪ꤭ ꤢ꤬ꤗꤤ꤭ꤗꤤ꤭ ꤢ꤬ꤡꤣ꤬ꤡꤣ꤬ ꤢ꤬ꤋꤛꤢ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯

⁷ ꤖꤚꤢꤩ꤬ꤗꤢꤪ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤢ꤬ ꤤ꤬ꤞꤝꤢ ꤒꤣꤧ꤬ꤗꤥ꤭ꤒꤣꤧ꤬ꤗꤥ꤭ ꤊꤣꤧ꤭ ꤓꤥ꤭ꤟꤣꤧ ꤒꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤞꤤꤑꤢꤩ꤭ ꤙꤢꤩꤓꤢꤧ꤬ ꤕ꤫ꤢꤩ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤒꤣ꤬ꤖꤥ꤮ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯

⁸ ꤢ꤬ ꤗꤢꤩ꤬ ꤞꤢꤧꤟꤢꤨ ꤋꤢꤨ꤭ꤛꤢ꤬ꤔꤤ꤬ ꤔꤢꤧ ꤋꤢꤨ꤭ꤛꤢ꤬ꤙꤚꤤ꤬ ꤗꤢꤩ꤬ ꤒꤣꤧ꤬ꤗꤥ꤭ꤒꤣꤧ꤬ꤊꤢꤩ꤬ꤏꤢꤦ꤬ ꤋꤢꤨ꤭ꤗꤢꤪꤎꤢꤧ ꤔꤣꤧ꤬ ꤟꤣꤧ꤯ ꤊꤣꤧ꤬ꤛꤢꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ꤗꤢ꤬ ꤢ꤬ ꤓꤢꤩꤏꤢꤦ꤬ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ꤯ ꤛꤢꤩ꤬ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤒꤣꤧ꤬ꤔꤢꤩ꤬ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤢꤩ꤬ ꤒꤣꤧ꤬ꤟꤢꤩ꤬, ꤚꤣꤧ꤬ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤕꤛꤢꤊꤢꤧ꤭ ꤘꤢꤦ꤬ꤑꤢꤩ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤖꤢꤧ꤯

⁹ ꤗꤢ꤬ꤔꤢꤧꤚꤣꤧ꤬ ꤛꤢꤩ꤬ꤞꤤ꤭ ꤒꤢꤩ꤬ꤗꤢꤩ꤬ ꤣꤧ꤭ꤔꤣꤧ꤬ ꤑꤢ꤭ꤒꤢꤧ꤬ꤒꤥ꤬ ꤕꤢ꤭ꤗꤢ꤬ ꤢ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤖꤢꤧ꤯ ꤢꤨ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤔꤢꤧ ꤛꤢꤩ꤬ꤞꤤ꤭ ꤞꤤꤕꤜꤢꤪ꤬ ꤔꤣꤧ꤬ꤗꤢ꤬ ꤢ꤬ ꤙꤢꤪ꤭ꤙꤛꤢ꤬ ꤖꤢꤧ꤯ ꤒꤢꤩ꤬ꤟꤢꤨꤣꤧ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤓꤝꤢ꤭ꤓꤢꤧ꤬ ꤓꤥ꤭ꤟꤣꤧ ꤘꤣ ꤋꤢꤨ꤭ꤛꤢ꤬ꤔꤤ꤬ ꤔꤢꤧ ꤋꤢꤨ꤭ꤛꤢ꤬ꤙꤚꤤ꤬ ꤢ꤬ꤓꤢꤦ꤭ꤋꤢꤩ꤭ ꤔꤣꤧ꤬ꤟꤣꤧ꤯

ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤋꤢꤨ꤭ꤒꤤ꤬ꤗꤢ꤬ꤞꤢꤩ꤬ ꤘꤣꤋꤛꤢ꤭ꤜꤣ

¹⁰ ꤗꤢ꤬ꤔꤢꤧꤚꤣꤧ꤬ ꤔꤢꤧ꤬ꤊꤣꤧ꤭ꤜꤢ꤭ꤒꤢꤩ꤬ ꤚꤣꤧ꤬, ꤔꤢꤧ꤬ ꤋꤚꤝꤢ꤭ꤊꤣꤧ꤭ꤟꤣꤧ ꤠꤢꤧ꤭ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤢ꤬ꤋꤛꤢ꤭, ꤔꤢꤧ ꤠꤢꤧ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤢ꤬ꤊꤜꤢꤧꤢ꤬ꤊꤜꤥ꤭ ꤔꤣꤧ꤬ꤒꤣꤧ꤬ꤟꤢꤩ꤬, ꤔꤢꤧ ꤠꤢꤧ꤭ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤢ꤬ ꤒꤢꤩ꤬ꤒꤣꤧ꤬ꤔꤢꤩ꤬ꤥ꤬ꤔꤢꤩ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯ ꤔꤢꤧ꤬ ꤗꤢꤧꤓ꤫ꤣꤧ꤬ꤟꤣꤧ ꤠꤢꤧ꤭ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬, ꤠꤢꤧ꤭ ꤒꤢꤩ꤬ꤋꤢꤧꤞꤤꤘꤥ꤭, ꤠꤢꤧ꤭ ꤒꤢꤩ꤬ꤗꤥ꤬, ꤠꤢꤧ꤭ ꤒꤢꤩ꤬ꤋꤢꤧꤞꤤꤕꤜꤢꤪ꤬ꤓꤢꤨ꤭ ꤒꤣꤧ꤬ꤟꤢꤩ꤬ꤟꤣꤧ,

¹¹ ꤓꤥ꤭ꤚꤣꤧ꤬ ꤠꤢꤧ꤭ ꤋꤢꤧꤙꤢꤩ꤬ꤔꤢꤪ ꤢꤨ꤭ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤠꤢꤧ꤭ ꤣꤧ꤭ꤔꤣꤧ꤬, ꤔꤢꤧ ꤠꤢꤧ꤭ ꤕ꤫ꤢꤪ꤬ꤞꤤꤒꤣ꤬ꤙꤢꤩ꤬ ꤔꤢꤧ ꤒꤢꤩ꤬ꤕ꤫ꤢꤧ꤬ꤒꤢꤩ꤬ꤏꤢꤩ꤭ ꤣꤧ꤭ꤒꤣꤧ꤬ꤟꤢꤩ꤬ ꤘꤣ ꤠꤤ꤭ꤢ꤬ꤒꤤ꤬ꤢꤪ꤬, ꤠꤤ꤭ꤤꤊꤢ꤬ꤔꤤ꤬ ꤔꤢꤧ ꤠꤤ꤭ꤜꤢꤨꤎꤢ꤬ꤒꤢ꤬ꤚꤢ꤬ ꤢ꤬ꤊꤢꤨ꤭ ꤔꤣꤧ꤬ꤗꤢ꤬, ꤢ꤬ ꤗꤢꤩ꤬ꤋꤚꤢꤧ ꤢ꤬ꤔ꤫ꤢꤩ꤬ ꤔꤢꤧ ꤠꤢꤧ꤭ ꤟꤢꤨꤒꤢꤩ꤭ꤔꤣꤧ꤬ ꤔꤢꤧ꤬ ꤞꤤꤑꤢꤩ꤭ ꤓꤥ꤭ꤘꤢꤦ꤬ꤟꤣꤧ꤯ ꤠꤢꤧ꤭ ꤋꤢꤧꤙꤢꤩ꤬ ꤢꤨ꤭ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤠꤢꤧ꤭ ꤒꤣꤧ꤬ꤘꤢꤦꤚꤣꤧ꤬ ꤜꤢꤪ꤭ ꤒꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬, ꤙꤢꤧ꤬ꤡꤢꤩ꤬ ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤕ꤫ꤢꤩ꤬ ꤜꤢꤪ꤭ꤕꤜꤤ꤭ ꤠꤢꤧ꤭ ꤖꤢꤧ꤯

¹² ꤊꤣꤧ꤬ꤛꤢꤧ꤭ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤘꤣ ꤢ꤬ ꤞꤤꤛ꤫ꤢꤦ꤬ ꤥ꤬ꤞꤣꤧ꤭ꤖꤚꤢꤩ꤬ ꤒꤥ꤭ ꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤞꤤꤕꤜꤢꤪ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ ꤘꤣ ꤛꤢꤩ꤬ꤏꤛꤢꤨꤋꤚꤤ ꤢ꤬ꤊꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢꤨ꤭ ꤊ꤫ꤢꤦ꤬ ꤗꤢꤩ꤬ꤡꤢ꤭ꤗꤢꤩ꤬ꤡꤢꤦ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤛꤢꤩ꤬ꤞꤤ꤭ ꤕꤢ꤭꤯

¹³ ꤊꤣꤧ꤬ꤛꤢꤧ꤭ ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤔꤢꤧ ꤊꤣꤧ꤬ꤛꤢꤧ꤭ ꤜꤣꤧ꤬ꤟꤥ꤭ꤜꤣꤧ꤬ꤟꤢꤧ꤬ ꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤑꤢ꤭ꤏꤝꤢ꤭ꤏꤝꤢ꤭ ꤢ꤬ꤗꤢꤨꤗ꤫ꤢꤧ꤬ꤟꤢꤧ꤭ ꤏꤝꤢ꤬ꤏꤝꤢ꤬ ꤕꤢ꤭꤯ ꤚꤣꤧ꤬ ꤢ꤬ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤢꤨ꤭ꤚꤥ꤬ ꤒꤣꤧ꤬ꤟꤢꤩ꤬ ꤕꤢ꤭, ꤚꤣꤧ꤬ ꤢꤨ꤭ ꤊ꤫ꤢꤦ꤬ ꤢꤩꤜꤢ꤬ꤜꤣꤧ꤬ꤟꤥ꤭ ꤜꤢ꤭ꤒꤢꤩ꤬ ꤚꤣꤧꤘꤢꤦ꤬ ꤛꤢꤩ꤬ꤞꤤ꤭ ꤕꤢ꤭꤯

¹⁴ ꤗꤢ꤬ꤔꤢꤧꤚꤣꤧ꤬ ꤔꤢꤧ꤬ꤣꤧ꤭, ꤒꤣꤧ꤬ꤚꤢꤨ ꤡꤝꤢꤟꤢꤧ꤭ꤑꤢꤩ꤭ ꤜꤢ꤭ ꤕ꤫ꤥ꤬ ꤘꤣ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤘꤣ ꤔꤢꤧ꤬ ꤤ꤬ꤞꤝꤢ ꤓꤥ꤭ꤟꤣꤧ, ꤚꤣꤧ꤬ ꤔꤢꤧ꤬ ꤛ꤫ꤢꤦ꤬ꤢꤩ꤬ꤔ꤫ꤢꤧ꤬ꤢꤩ꤬ ꤊꤜꤢꤪ꤬ꤗꤢ꤬ ꤓꤥ꤭ꤟꤣꤧ ꤔꤣꤧ꤬ꤒꤣꤧ꤬ꤟꤢꤩ꤬ ꤔꤤ꤮, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤔꤢꤧ꤬ ꤞꤤꤑꤢꤩ꤭ꤘꤢꤦ꤬ꤟꤣꤧ ꤔꤢꤧ ꤞꤢꤚꤢ ꤘꤣ ꤢ꤬ ꤤ꤬ꤞꤝꤢ ꤔꤢꤧ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤞꤢꤚꤢ ꤘꤣ ꤢ꤬ꤒꤥ꤭ꤢ꤬ꤙꤢꤩ꤬ ꤒꤣꤧ꤬ꤟꤢꤩ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤒꤣꤧ꤬ꤚꤢꤨ ꤡꤝꤢꤟꤢꤧ꤭ꤑꤢꤩ꤭ ꤜꤢ꤭ ꤟꤢꤨꤔꤣꤧ꤬ ꤔꤤ꤮꤯

¹⁵ ꤘꤣ ꤔꤢꤧ꤬ ꤖꤢꤨꤡ꤫ꤢꤩ꤬ꤋꤢꤩ꤭ ꤔꤣꤧ꤬, ꤢꤨ꤭ ꤤ꤬ꤞꤝꤢ ꤓꤥ꤭ꤟꤣꤧ ꤔꤢꤧ꤬ ꤔꤢꤧ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤣꤧ꤭ꤔꤣꤧ꤬ ꤟꤣꤧ꤯ ꤞꤢꤧꤟꤢꤨ ꤔꤢꤧ꤬ ꤊ꤫ꤢꤦ꤬ ꤛ꤫ꤢꤦ꤬ꤢꤩ꤬ ꤙꤢꤧ꤬ꤡꤢꤩ꤬ ꤛꤢꤩ꤬ꤏꤛꤢꤨꤋꤚꤤ ꤚꤣꤧ꤬ ꤔꤢꤧ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ ꤒꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤔꤢꤧ꤬ ꤢ꤬ꤑꤢꤩ꤭ꤔꤣꤧ꤬, ꤜꤤ꤬ꤓꤢꤩ꤭ꤞꤢꤪ꤬ꤖꤢꤣꤧ꤭ ꤘꤣꤧꤓꤥ꤭ꤟꤣꤧ ꤔꤢꤧ꤬ ꤒꤢꤩ꤬ꤞꤤꤖꤢꤩ ꤟꤣꤧ꤯

¹⁶ ꤜꤤ꤬ꤓꤢꤩ꤭ꤞꤢꤪ꤬ꤖꤢ ꤜꤢꤪ꤭꤮ ꤕꤜꤤ꤭ ꤔꤣꤧ꤬ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤛ꤫ꤢꤧ꤬ꤛꤥ꤬ ꤘꤣꤧ ꤕꤢꤩ꤬, ꤚꤣꤧ꤬ ꤢ꤬ ꤥ꤬ ꤔꤢꤧ ꤢ꤬ꤙꤝꤤꤢ꤬ꤒꤣꤧ꤬ꤚꤣꤧ꤭ ꤘꤣ ꤢ꤬ ꤤ꤬ꤞꤝꤢ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤒꤣꤧ꤬ꤟꤢꤩ꤬, ꤢ꤬ ꤤ꤬ꤞꤝꤢꤤ꤬ꤞꤢꤧ꤬ ꤚꤢꤧꤊꤢ꤬ꤋꤛꤢ꤭ ꤒꤢꤩ꤬ꤛ꤫ꤢꤦ꤬ꤢꤩ꤬ꤞꤢꤦ ꤒꤣꤧ꤬ꤟꤢꤩ꤬, ꤢ꤬ ꤗꤢꤩ꤬ꤚꤢꤧ ꤒꤥ꤭ꤙꤢꤩ꤬ ꤊꤢ꤬ꤋꤛꤢ꤭ ꤋꤛꤢ꤭ꤞꤢꤧ ꤒꤢꤩ꤬ꤗꤢꤩ꤬ ꤘꤣ ꤢ꤬ꤞꤢꤦ ꤒꤣꤧ꤬ꤟꤢꤩ꤬, ꤔꤢꤧ ꤒꤢꤩ꤬ꤤ꤬ꤞꤝꤢ ꤘꤣ ꤢ꤬ ꤞꤢꤨ꤭ ꤊꤣꤧ꤬ꤛꤢꤧ꤭ ꤘꤣ ꤒꤢꤩ꤬ꤥ꤬ꤞꤣꤧ꤭ꤖꤚꤢꤩ꤬ ꤢ꤬ꤡꤢꤪꤢ꤬ꤒꤢꤩ꤬ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤟꤣꤧ,

¹⁷ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤢꤧꤟꤢꤨ ꤡꤢꤪꤗꤣꤧ꤬ꤚꤢꤧ꤬ ꤢ꤬ꤊꤣꤧ꤬ꤛꤢꤧ꤭ ꤊ꤫ꤢꤦ꤬ ꤜꤣꤓꤢꤧ꤬ꤙꤢ꤭ꤓꤢꤧ꤬ ꤚꤣꤧ꤬ ꤊ꤫ꤢꤦ꤬ ꤥ꤬ ꤒꤣꤧ꤬ꤚꤤ꤬ꤒꤣꤧ꤬ꤚꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ ꤢ꤬ ꤊ꤫ꤢꤦ꤬ ꤗꤢꤩ꤬ꤒꤢꤩ꤬ ꤢ꤬ꤚꤢꤧ ꤕꤝꤢ꤭꤮ ꤒꤣ꤬ꤡꤣ꤬ ꤢ꤬ꤑꤢꤩ꤭ꤔꤣꤧ꤬ꤚꤣꤧ꤬, ꤢ꤬ ꤤ꤬ꤞꤝꤢ ꤕ꤫ꤢꤩ꤬ ꤢꤨ꤭ ꤟꤣꤧ꤯