ยอห์น เนอบ่า ต๊าบ่า 1 - Eastern Kayah Shadaw Dialect

¹ ꤠꤢꤧ꤭ ꤗꤢ꤬ ꤗ꤫ꤥ꤬ꤖꤚꤢꤨ꤭ꤗ꤫ꤥ꤬ꤖꤚ꤫ꤢꤩ꤬ ꤘꤣ ꤢ꤬ ꤓꤝꤢ꤭ ꤊꤢꤨ꤬ꤊꤜꤢꤪꤊꤢꤨ꤬ꤊꤜꤢꤧ꤭ ꤒꤣ꤬ꤖꤚꤢꤩ꤬ ꤚꤣꤧ꤬ ꤠꤢꤧ꤭ ꤚꤢ꤭ꤡꤝꤢꤕ꤫ꤢꤩ꤬ ꤜꤤ꤬ꤣꤧ꤭ ꤘꤣ ꤗ꤫ꤥ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤣꤧ꤭ꤔꤣꤧ꤬ ꤒꤣ꤬ꤖꤚꤢꤩ꤬ ꤔꤢꤧ ꤢ꤬ꤖꤢꤨ ꤞꤤ꤭ꤒꤣꤧ꤬ꤟꤢꤩ꤬ ꤢ꤬ ꤥ꤬꤯ ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤘꤣ ꤠꤢꤧ꤭ ꤗꤥ꤬ꤚꤣꤧ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤒꤣꤧ꤬ꤟꤢꤩ꤬꤯ ꤠꤢꤧ꤭ ꤒꤣ꤬ꤖꤚꤢꤩ꤬ ꤗꤥ꤬ꤚꤣꤧ ꤒꤢꤦꤘꤢꤦ꤬ ꤞꤤ꤭ ꤔꤣꤧ꤬ ꤗ꤫ꤢ꤬ꤒꤥ꤬, ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤑꤢꤩ꤭ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤕꤝꤢ꤭꤮ ꤒꤣ꤬ꤖꤚꤢꤩ꤬ ꤒꤣꤧ꤬ꤟꤢꤩ꤬ ꤗꤥ꤬ꤚꤣꤧ ꤊꤣꤧ꤭ꤘꤢꤦ꤬ ꤞꤤ꤭ꤞꤤ꤭꤯

² ꤘꤣ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤥ꤬ ꤜꤣꤧ꤬ꤜ꤫ꤥ꤬ꤜꤣꤧ꤬ꤊꤜ꤫ꤢꤧ꤬ ꤘꤣ ꤕꤢꤩ꤬ꤊꤢꤨ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ ꤕꤢꤩ꤬ ꤗꤥ꤬ ꤚꤣꤧꤘꤢꤦ꤬ ꤞꤤ꤭ ꤖꤢꤧ꤯ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤣꤧ꤭ꤔꤣꤧ꤬ ꤢ꤬ ꤊ꤫ꤢꤦ꤬ ꤥ꤬ ꤒꤣꤧ꤬ꤘꤢꤦ꤬ ꤊꤣꤧ꤭ꤘꤢꤦ꤬ ꤔꤢꤧ ꤕꤢꤩ꤬ ꤒꤣꤧ꤬ꤡꤢꤨ꤬ꤖꤚꤢꤩ꤬ ꤒꤣꤧ꤬ꤜꤢꤧ꤬ꤋꤚꤢꤩ ꤕꤢ꤭꤯

ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ

³ ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤔꤢꤧ ꤢ꤬ꤖꤢꤨꤖꤚꤢꤩ꤬ꤋꤢꤨ꤭ ꤛꤢꤩ꤬ꤏꤛꤢꤨꤋꤚꤤ ꤊ꤫ꤢꤦ꤬ ꤘꤣꤧꤒꤢ꤭ꤘꤢꤦ꤬ ꤕꤢꤩ꤬ ꤘꤣ ꤢ꤬ ꤔ꤫ꤤ꤬ꤘꤢ꤭ ꤡꤢꤨ꤭ꤢꤩ꤬ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤚꤣꤧ꤬ ꤗꤥ꤬ ꤚꤣꤧꤘꤢꤦ꤬ ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ ꤒꤢꤩ꤬ꤙꤝꤤꤒꤢꤩ꤬ꤒꤣꤧ꤬ꤚꤣꤧ꤭, ꤒꤢꤩ꤬ꤞꤤꤛꤢꤪ꤬ꤊꤜꤢ꤬ꤙꤢꤩ꤬ ꤔꤢꤧ ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤣꤧ꤭ꤒꤣꤧ꤬ꤟꤢꤩ꤬ ꤔꤤ꤮꤯

ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤔꤢꤧ ꤒꤢꤩ꤬ꤗꤥ꤬

⁴ ꤠꤢꤧ꤭ ꤗꤢꤧꤓ꤫ꤣꤧ꤬ꤙꤢꤩ꤬ ꤔꤢꤧ꤬ꤖꤢꤨꤔꤢꤧ꤬ꤜꤣꤧ꤬ ꤒꤣꤧ꤬ꤟꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤘꤣ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤢ꤬ꤊꤢꤨ꤭ ꤟꤢꤨ ꤖꤢꤩ꤭ ꤡꤢꤪꤗꤣꤧ꤬ꤚꤢꤧ꤬ ꤗ꤫ꤢ꤬ꤊꤢꤧ꤭ ꤕꤢꤩ꤬ ꤍ꤫ꤥ꤬ ꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤞꤤꤋꤚꤢꤦ꤭ ꤔꤢꤧ꤬ꤡꤣꤧ꤯

⁵ ꤗ꤫ꤥ꤬꤮, ꤊꤢꤨꤔ꤫ꤢꤧ꤬ꤣꤧ꤭ ꤠꤢꤧ꤭ ꤊꤝꤤ꤭ꤞꤤꤛꤢꤪ꤬ ꤔꤢꤧ꤬, ꤕꤢꤩ꤬ ꤊꤢꤩ꤬ ꤗꤥ꤬ ꤚꤣꤧꤘꤢꤦ꤬ ꤜꤢꤪ꤭ ꤋꤛꤢ꤭ꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤕꤥ꤮꤯ ꤠꤢꤧ꤭ ꤚꤢ꤭ ꤕ꤫ꤢꤩ꤬ ꤔꤢꤧ꤬ ꤍ꤫ꤥ꤬ꤗ꤫ꤢ꤬ꤊꤢꤧ꤭ ꤣꤧ꤭ꤒꤣ꤬ꤗꤢꤦ꤭ ꤔꤣꤧ꤬ꤗꤢ꤬ ꤢ꤬ꤞꤢꤩ꤭ ꤗ꤫ꤢ꤬ꤒꤥ꤬, ꤍ꤫ꤥ꤬ꤗ꤫ꤢ꤬ꤊꤢꤧ꤭ ꤘꤣ ꤕꤢꤩ꤬ ꤔ꤫ꤤ꤬ꤙꤢꤩ꤬ꤔꤢꤪ ꤓꤥ꤭ꤟꤣꤧ ꤘꤣ ꤊꤣꤧ꤬ꤜꤢꤨꤋꤢꤩ꤭ ꤔꤣꤧ꤬ ꤒꤣ꤬ꤗꤢꤦ꤭ ꤖꤢꤧ꤯

⁶ ꤒꤢꤩ꤬ꤗꤥ꤬ ꤢ꤬ꤍ꤫ꤥ꤬ꤜꤣꤧ꤬ꤏꤢ ꤗꤢ꤬, ꤕꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤋꤚꤝꤢ꤭ ꤔ꤫ꤤ꤬ꤘꤢ꤭ ꤡꤢꤪꤗꤣꤧ꤬ꤚꤢꤧ꤬ ꤗ꤫ꤢ꤬ꤊꤢꤧ꤭ꤍ꤫ꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤟꤣꤧ꤯ ꤟꤢꤨ ꤞꤤ꤭ ꤜꤢꤪ꤭꤮ ꤕꤜꤤ꤬ ꤔ꤫ꤤ꤬ꤟꤥ꤭ ꤓꤥ꤭ꤘꤢꤦ꤬ꤟꤣꤧ ꤍ꤫ꤥ꤬ꤗ꤫ꤢ꤬ꤊꤢꤧ꤭ ꤘꤣ ꤊꤣꤧ꤬ꤜꤢꤨꤋꤢꤩ꤭ ꤚꤣꤧ꤬ ꤢ꤬ ꤟꤢꤩ ꤔꤢꤧ, ꤜꤢꤪ꤭ ꤞꤤ꤭ꤣꤧ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤞꤤ꤭ ꤒꤥ꤭ꤙꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤘꤣ ꤒꤢꤩ꤬ꤗꤥ꤬ꤚꤣꤧ ꤜꤢꤨ꤭ ꤢ꤬ꤊꤢꤨ꤭, ꤢ꤬ ꤟꤢꤩ ꤟꤢꤨꤔꤣꤧ꤬꤯

⁷ ꤖꤚꤢꤩ꤬ꤢꤩꤜꤢ꤬ꤢꤩꤕꤜꤢꤩ ꤢꤨ꤭ ꤥ꤬ꤜꤥ꤭ꤓꤢꤧ꤬ ꤢꤩꤜꤥ꤬ ꤘꤣ ꤟꤢꤩ꤬ꤋꤢꤨ꤬ ꤣꤧ꤭ ꤟꤣꤧ꤯ ꤛꤢꤩ꤬ꤏꤛꤢꤨꤋꤚꤤ ꤟꤢꤧ꤭ꤜꤢꤧ꤬ ꤘꤣ ꤟꤢꤩ꤬ꤋꤢꤨ꤬ꤣꤧ꤭, ꤢ꤬ ꤟꤢꤧ꤭ ꤔꤢꤧ ꤖꤚꤢꤩ꤬ꤜꤢꤨ꤬ꤊꤣꤧ꤬ꤛꤢꤧ꤭ ꤢ꤬ ꤞꤝꤤ꤬ꤓꤣꤧ꤭ꤖꤢꤛꤢ꤬ ꤔꤣꤧ꤬, ꤛꤢꤩ꤬ꤞꤤ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤢ꤬ ꤢꤪꤜꤢꤧ꤬ ꤊꤣꤧ꤭ꤢꤨ꤭ ꤒꤥ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤢꤪꤜꤢꤧ꤬ ꤊꤣꤧ꤭ꤢꤨ꤭ ꤟꤢꤨꤔꤣꤧ꤬ ꤒꤥ꤬ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤟꤢꤩꤔꤣꤧ꤬ꤗꤢ꤬ ꤗ꤫ꤢ꤬ꤟꤣꤧ ꤊꤣꤧ꤬ꤛꤢꤧ꤭ ꤢꤩꤜꤢ꤬ꤢꤩꤕꤜꤢꤩ ꤢꤨ꤭ ꤟꤣꤧ, ꤚꤣꤧ꤬ ꤢ꤬ ꤗꤢ꤬ ꤗ꤫ꤢ꤬ꤟꤣꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤓꤢꤩ꤬ ꤋꤚꤤ ꤔꤣꤧ꤬ ꤒꤣ꤬ꤖꤚꤢꤩ꤬ ꤟꤣꤧ꤯

⁸ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤞꤢꤧꤟꤢꤨ ꤞꤤ꤭ ꤔ꤫ꤤ꤬ꤙꤢꤩ꤬ ꤓꤥ꤭ꤟꤣꤧ ꤒꤢꤩ꤬ꤔꤣꤧ꤬ꤒꤣꤧ꤬ꤟꤢꤩ꤬ ꤊ꤫ꤢꤦ꤬ ꤥ꤬ꤗ꤫ꤢꤩ꤬ꤊꤢꤧ꤭ ꤕ꤫ꤢꤩ꤬ ꤒ꤫ꤢꤧ꤬ ꤞꤤ꤭ ꤒ꤫ꤢꤧ꤬ꤗꤢꤩ꤬, ꤓꤥ꤭ꤒꤥ꤬ ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤜꤣꤙꤢ꤭ ꤜꤢꤪ꤭ ꤞꤤ꤭ ꤒꤢꤩ꤬ꤗꤢꤩ꤬ꤔ꤫ꤤ꤬ꤋꤝꤢꤊꤢꤩ꤬ ꤢ꤬ꤑꤢꤩ꤭ꤔꤣꤧ꤬, ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮꤯

⁹ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤊꤜꤢꤪ꤬ꤏꤢꤪꤗꤢ꤬ ꤊꤣꤧ꤭ꤢꤨ꤭ ꤘꤣ ꤋꤚꤤ ꤢ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤢ꤬ꤊꤢꤨ꤭ ꤒꤥ꤬, ꤚꤣꤧ꤬ ꤢ꤬ ꤏꤢꤨ꤬ꤔꤥ꤭ꤜꤣꤏꤢꤨ꤬ꤔꤥ꤭ꤊꤜꤢꤪ꤭ ꤕ꤫ꤥ꤬ ꤢ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤒꤣꤧ꤬ꤟꤢꤩ꤬ ꤘꤣ ꤋꤚꤤ ꤢ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤢ꤬ꤊꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤥ꤬ꤊꤣꤧ꤭ ꤔꤢꤧ ꤛꤢꤩ꤬ꤞꤤ꤭ ꤒꤥ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤥ꤬ꤊꤜꤢꤪ꤬ꤏꤢꤪꤗꤢ꤬ ꤘꤣ ꤋꤚꤤ ꤢ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤢ꤬ꤊꤢꤨ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤖꤢꤩ꤭ꤔꤢꤧꤖꤢꤨ ꤞꤤꤔꤣꤧ꤭ꤜꤢꤪ꤭ ꤊ꤫ꤢꤦ꤬ ꤥ꤬ꤊꤣꤧ꤭ ꤔꤢꤧ ꤛꤢꤩ꤬ꤞꤤ꤭ ꤖꤢꤧ꤯

¹⁰ ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤟꤢꤧ꤭ ꤘꤣ ꤞꤤ꤭ ꤥ꤬ ꤟꤢꤩꤚꤣꤧ꤬ ꤢ꤬ ꤊꤢꤩ꤬ ꤖꤛꤢꤟꤢꤧ꤭ꤔ꤫ꤤ꤬ ꤒꤢꤩ꤬ꤤ꤬ꤞꤝꤢꤤ꤬ꤞꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤒꤥ꤬ ꤟꤢꤩꤔꤣꤧ꤬, ꤢꤩꤏꤢꤦ꤬ ꤒ꤫ꤢꤧ꤬ ꤢ꤬ ꤘꤣ ꤞꤤ꤭ ꤟꤤ꤬ꤘꤢꤪꤊꤢꤨ꤭ ꤒ꤫ꤢꤧ꤬ꤗꤢꤩ꤬ ꤔꤤ꤮꤯ “ꤒꤢꤩ꤬ꤖꤚꤢꤩ꤭ꤒꤢꤩ꤬ꤘꤢꤦ꤭ ꤊ꤫ꤢꤦ꤬ ꤥ꤬ꤘꤢꤦ꤬ ꤔꤢꤧ ꤔꤢꤧ꤬ ꤔꤤ꤮,” ꤟꤢꤩꤏꤢꤦ꤬ ꤒ꤫ꤢꤧ꤬ ꤢ꤬ ꤟꤢꤨꤔꤣꤧ꤬ ꤒ꤫ꤢꤧ꤬ꤗꤢꤩ꤬ ꤗꤢꤩ꤬꤯

¹¹ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤢꤩꤏꤢꤦ꤬ ꤜꤢꤨ꤭ ꤔꤣꤧ꤬, ꤢ꤬ ꤓꤝꤢ꤭ꤓꤢꤧ꤬ꤟꤣꤧ ꤖꤚꤢꤩ꤬ꤗꤢꤩ꤬ ꤒ꤫ꤣ꤬ꤒꤢꤩ꤬ ꤔꤢꤧ ꤜꤢꤨ꤭ ꤘꤣ ꤗꤢꤩ꤬ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤢ꤬ꤊꤢꤨ꤭ ꤟꤣꤧ꤯

ꤟꤢꤩꤙꤢꤩ꤬ ꤒꤣꤧ꤬ꤘꤢꤦ꤬ꤊꤢꤧ꤭ ꤍ꤫ꤥ꤬ ꤘꤣꤋꤛꤢ꤭ꤜꤣ

¹² ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤩꤏꤥ꤬ ꤕ꤫ꤢꤩ꤬ ꤢꤩꤜꤥ꤬ ꤕꤢ꤬ ꤞꤤ꤭ ꤍ꤫ꤥ꤬ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ ꤞꤤꤛ꤫ꤢꤦ꤬ ꤚꤢ꤭ ꤢ꤬ ꤔꤢꤧ ꤡꤢꤩ꤬ꤙꤢ꤬ ꤔꤢꤧ ꤜꤤ꤬ꤙꤥ꤭ꤓꤣꤧ꤭ ꤒꤥ꤬꤯ ꤗꤢ꤬ꤔꤢꤧꤚꤣꤧ꤬ ꤞꤢꤧꤟꤢꤨ ꤕꤢꤩ꤬ ꤊ꤫ꤢꤦ꤬ ꤥ꤬ ꤔꤢꤧ ꤒꤢꤩ꤬ꤞꤤꤋꤚꤢꤦ꤭ ꤜꤣꤜꤣꤙꤢ꤭ꤙꤢ꤭ ꤢ꤬ꤑꤢꤩ꤭ꤔꤣꤧ꤬, ꤠꤢꤧ꤭ ꤗꤢꤧꤏꤢꤦ꤭ ꤘꤣ ꤠꤢꤧ꤭ ꤊ꤫ꤢꤦ꤬ ꤟꤢꤧ꤭ ꤘꤣ ꤞꤤ꤭ ꤥ꤬ ꤚꤣꤧ꤬ ꤕꤢꤩ꤬ ꤊ꤫ꤢꤦ꤬ ꤗꤢꤧꤓ꤫ꤣꤧ꤬ ꤒꤢ꤭ꤏꤢꤦ꤬ ꤟꤢꤩꤙꤢꤩ꤬ ꤋꤛꤢ꤭ꤞꤢꤧꤜꤢꤨ꤭ ꤒꤣ꤬ꤖꤚꤢꤩ꤬ ꤔꤢꤧ ꤒꤣ꤬ꤖꤚꤢꤩ꤬ ꤕꤢ꤭꤯

¹³ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤖꤚꤢꤩ꤬ꤗꤢꤪ꤬ ꤘꤣ ꤡꤢꤪꤗꤣꤧ꤬ꤚꤢꤧ꤬ ꤔꤝꤢꤓꤢꤧ꤬ ꤢ꤬ ꤒꤣ꤬ꤖꤚꤢꤩ꤬ ꤢ꤬ꤖꤢꤨꤢ꤬ꤜꤣꤧ꤬ ꤒꤣꤧ꤬ꤟꤢꤩ꤬ ꤞꤢꤨ꤭ꤟꤢꤧ꤭ ꤕ꤫ꤢꤩ꤬ ꤞꤤ꤭ ꤢ꤬ꤒꤢꤩ꤬ꤟꤢꤩꤗꤥ꤬ꤟꤢꤩꤚꤢꤧ ꤣꤧ꤭ꤒꤣꤧ꤬ꤟꤢꤩ꤬꤯