โครินธ์ อาเหร่อเล๊อ ต๊าบ่า 8 - Eastern Kayah Shadaw Dialectꤏꤢꤩ꤬ꤢꤩ꤬ ꤘꤣ ꤢꤨ꤭ ꤙꤥ꤬ꤓꤢꤧ꤬ ꤔꤢꤧ ꤖꤚꤢꤩ꤬ꤛꤥ꤬ ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭ 1 ꤊꤢꤨꤔ꤫ꤢꤧ꤬ꤚꤣꤧ꤬ ꤠꤢꤧ꤭ ꤞꤤꤛ꤫ꤢꤦ꤬ ꤚꤢ꤭ꤡꤝꤢ ꤕ꤫ꤢꤩ꤬ ꤞꤤ꤭ ꤏꤢꤩ꤬ꤢꤩ꤬ ꤘꤣ ꤢꤨ꤭ ꤙꤥ꤬ꤓꤢꤧ꤬ ꤔꤢꤧ ꤖꤚꤢꤩ꤬ꤛꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤢ꤬ꤚꤤ꤬ꤢ꤬ꤊꤢꤧ꤭꤯ ꤞꤤ꤭ ꤟꤢꤩ ꤔꤢꤧ ꤖꤚꤢꤩ꤬ꤛꤥ꤬ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤏꤝꤢ꤬ꤏꤢꤪ꤭ ꤘꤣ ꤢ꤬ ꤜ꤫ꤢꤩ꤬ꤗꤢꤩ꤬ꤕ꤫ꤢꤩ꤬ ꤕꤢꤩ꤬ ꤔꤣꤧ꤬ ꤢ꤬ꤥ꤬ ꤒꤥ꤬ ꤔꤣꤧ꤬ ꤕꤢꤩ꤬ ꤞꤤꤑꤢꤩ꤭, ꤞꤤ꤭ ꤟꤢꤩ ꤟꤢꤨꤔꤣꤧ꤬ ꤗꤢ꤬ ꤢ꤬ꤗ꤫ꤢ꤬ ꤠꤢ꤯ ꤞꤤ꤭ ꤒꤢꤩ꤬ꤞꤤꤑꤢꤩ꤭ ꤣꤧ꤭ꤔꤣꤧ꤬, ꤢ꤬ ꤔꤢꤪ꤭ꤖꤛꤢꤓꤢꤧ꤬ꤜꤥ꤭ ꤞꤤ꤭ ꤔꤢꤧ ꤞꤤ꤭ ꤔ꤫ꤢꤩ꤬ ꤗꤢ꤬ꤔꤢꤧꤚꤣꤧ꤬ ꤒꤢꤩ꤬ꤗꤥ꤬ ꤔꤣꤧ꤬ ꤢ꤬ ꤗꤢꤩ꤬ꤡꤝ꤫ꤢ꤬ꤖꤛꤢꤡꤝ꤫ꤢ꤬ ꤗ꤫ꤢ꤬ꤔꤤꤔꤢꤧ꤬ ꤡꤣꤧ ꤢꤨ꤭ ꤡꤣꤧ꤯ 2 ꤊꤣꤧ꤬ꤛꤢꤧ꤭ ꤘꤣ ꤢ꤬ ꤒꤣꤧ꤬ꤔꤢꤩ꤬ ꤚꤣꤧꤘꤢꤦ꤬ ꤢ꤬ꤔ꤫ꤢꤩ꤬ ꤔꤢꤧ ꤠꤢꤧ꤭ ꤞꤤꤑꤢꤩ꤭ ꤢꤩꤜꤥ꤬ ꤟꤣꤧ ꤒꤣꤧ꤬ꤟꤢꤩ꤬ꤔꤣꤧ꤬, ꤒꤢꤩ꤬ ꤘꤣ ꤢ꤬ ꤒꤥ꤭ꤙꤢꤩ꤬ ꤞꤤꤑꤢꤩ꤭ ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ ꤞꤤꤑꤢꤩ꤭ ꤜꤢ꤭ꤟꤤ ꤒꤣ꤬ꤡꤣ꤬꤮ ꤒꤥ꤬꤯ 3 ꤗꤢ꤬ꤔꤢꤧꤚꤣꤧ꤬ ꤊꤣꤧ꤬ꤛꤢꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤘꤣ ꤢ꤬ ꤗꤥ꤬ ꤡꤢꤪꤗꤣꤧ꤬ꤚꤢꤧ꤬ ꤔꤣꤧ꤬, ꤡꤢꤪꤗꤣꤧ꤬ꤚꤢꤧ꤬ ꤞꤤꤑꤢꤩ꤭ ꤜꤢꤨ꤭ ꤔꤢꤧ ꤢ꤬ ꤗꤢ꤬ ꤢ꤬ꤊꤣꤧ꤬ꤛꤢꤧ꤭ ꤟꤣꤧ꤯ 4 ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢꤩ꤬ꤏꤢꤩ꤬ꤢꤩ꤬ ꤘꤣ ꤢꤨ꤭ ꤙꤥ꤬ꤓꤢꤧ꤬ ꤔꤢꤧ ꤖꤚꤢꤩ꤬ꤛꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤕꤢꤩ꤬ ꤞꤤꤑꤢꤩ꤭ ꤔꤢꤧ ꤖꤚꤢꤩ꤬ꤛꤥ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤊꤢꤧ꤭ꤘꤢꤩ꤭ ꤖꤢꤧ, ꤢ꤬ꤍ꤫ꤥ꤬ꤜꤣꤧ꤬ꤏꤢ ꤥ꤬ ꤒꤣ꤬ꤡꤣ꤬꤮ ꤒꤥ꤬꤯ ꤕꤢꤩ꤬ ꤞꤤꤑꤢꤩ꤭ ꤊꤣꤧ꤭ ꤕ꤫ꤥ꤬ ꤘꤢꤦ꤬ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤖꤢꤧ ꤒꤣ꤬ꤖꤚꤢꤩ꤬ꤒꤥ꤬꤯ 5 ꤡꤢꤪꤗꤣꤧ꤬ꤚꤢꤧ꤬ ꤗ꤫ꤢ꤬ꤒꤥ꤬ ꤘꤣ ꤊꤣꤧ꤬ꤛꤢꤧ꤭ ꤡꤢꤪꤙꤢꤩ꤭ ꤜꤢꤨ꤭ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ꤥ꤬ ꤢꤩꤔꤢꤧ꤬ꤡꤣꤧ꤯ ꤚꤣꤧ꤬ ꤛꤢꤩ꤬ꤞꤤ꤭ ꤟꤢꤩ ꤜꤢ꤭ꤋꤢꤧ꤭ ꤔꤢꤧ, ꤡꤢꤪꤗꤣꤧ꤬ꤚꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤥ꤬ ꤘꤣ ꤗꤢꤪꤋꤢꤨ꤬, ꤗ꤫ꤢ꤬ꤒꤥ꤬ꤚꤣꤧ꤬ ꤢ꤬ ꤥ꤬ ꤙꤣꤧ ꤟꤢꤩ꤬ꤋꤢꤨ꤬ ꤣꤧ꤭, ꤟꤢꤨꤔꤣꤧ꤬꤯ ꤚꤣꤧ꤬ ꤡꤢꤪꤗꤣꤧ꤬ꤚꤢꤧ꤬ ꤗ꤫ꤢ꤬ꤒꤥ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬ ꤛꤢꤩ꤬ꤞꤤ꤭ ꤡꤢꤪꤙꤢꤩ꤭ꤓꤢꤧ꤬ ꤚꤣꤧꤘꤢꤦ꤬ ꤜꤢꤨ꤭ ꤟꤢꤨ ꤛꤢꤩ꤬ꤞꤤ꤭ ꤡꤢꤪꤗꤣꤧ꤬ꤚꤢꤧ꤬, ꤛꤢꤩ꤬ꤞꤤ꤭ ꤙꤢꤧ꤬ꤡꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬꤯ 6 ꤗꤢ꤬ꤔꤢꤧꤚꤣꤧ꤬ ꤕꤢꤩ꤬ ꤞꤤꤑꤢꤩ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤗꤢ꤬ ꤢ꤬ ꤥ꤬ꤖꤢꤧ ꤒꤣ꤬ꤖꤚꤢꤩ꤬ꤖꤚꤢꤩ꤬꤮ ꤟ꤫ꤢꤨ꤬ ꤖꤢꤧ꤯ ꤢ꤬ ꤗꤢ꤬ ꤕꤢꤩ꤬ꤖꤢꤩ꤭, ꤢ꤬ ꤗꤢ꤬ ꤢ꤬ ꤙꤢꤧꤜꤢꤧ꤬ ꤒꤢꤩ꤬ꤕꤝꤢ꤭꤮ ꤒꤣ꤬ꤡꤣ꤬ ꤚꤣꤧ꤬ ꤕꤢꤩ꤬ ꤥ꤬ꤞꤣꤧ꤭ꤖꤚꤢꤩ꤬ ꤕ꤫ꤢꤩ꤬ ꤘꤣ ꤜꤢꤨ꤭ꤑꤢꤩ꤭꤯ ꤙꤢꤧ꤬ꤡꤢꤩ꤬ ꤗꤢ꤬ ꤢ꤬ ꤥ꤬ꤖꤢꤧ ꤒꤣ꤬ꤖꤚꤢꤩ꤬ꤖꤚꤢꤩ꤬꤮ ꤟ꤫ꤢꤨ꤬ ꤒꤥ꤬, ꤢ꤬ ꤗꤢ꤬ ꤛꤢꤩ꤬ꤏꤛꤢꤨꤋꤚꤤ ꤟꤣꤧ꤯ ꤡꤢꤪꤗꤣꤧ꤬ꤚꤢꤧ꤬ ꤔꤢꤪ꤭ꤙꤢꤧꤒꤢ꤭ ꤘꤤ꤭ꤒ꤫ꤢꤦ꤬ ꤒꤢꤩ꤬ꤕꤝꤢ꤭꤮ ꤒꤣ꤬ꤡꤣ꤬ ꤔꤢꤧ ꤛꤢꤩ꤬ꤏꤛꤢꤨꤋꤚꤤ꤯ ꤖꤚꤢꤩ꤬ ꤘꤣ ꤢ꤬ ꤘꤣꤧ ꤕꤢꤩ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤗꤢ꤬ ꤗ꤫ꤢ꤬ ꤢ꤬ ꤟꤣꤧ꤯ 7 ꤗꤢ꤬ꤔꤢꤧꤚꤣꤧ꤬, ꤕꤢꤩ꤬ ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤒꤣꤧ꤬ꤟꤢꤩ꤬ꤟꤢꤩ꤬ ꤘꤣ ꤢ꤬ ꤞꤤꤑꤢꤩ꤭ ꤒꤢ꤭ꤒꤢꤩ꤬ ꤜꤢꤪ꤭ ꤊꤣꤧ꤭ ꤜꤢ꤭ꤟꤤ ꤒꤢꤩ꤬ꤞꤤꤑꤢꤩ꤭ ꤘꤣ ꤠꤢꤧ꤭ ꤚꤢ꤭ ꤕ꤫ꤢꤩ꤬ ꤞꤤ꤭ ꤊꤢꤨꤔ꤫ꤢꤧ꤬ꤣꤧ꤭ ꤒꤥ꤬ ꤔꤣꤧ꤬ ꤢ꤬ꤥ꤬ ꤒꤣꤧ꤬ꤟꤢꤩ꤬꤯ ꤙꤣꤧ ꤛꤢꤩ꤬ꤞꤤ꤭ ꤛ꤫ꤢꤦ꤬ꤢꤩ꤬ ꤒꤢꤧ꤬ꤜꤢ꤭ꤟꤤ ꤛꤢꤩ꤬ꤏꤛꤢꤨ ꤒꤥ꤬ ꤢ꤬ꤋꤢꤩ꤭ꤔꤣꤧ꤬, ꤛꤢꤩ꤬ꤞꤤ꤭ ꤒꤣꤧ꤬ꤔꤢꤩ꤬ ꤔꤢꤧ ꤖꤚꤢꤩ꤬ꤛꤥ꤬ ꤣꤧ꤭ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤛꤢꤩ꤬ꤞꤤ꤭ ꤊ꤫ꤢꤦ꤬ꤚꤢꤩ꤭ ꤠꤤ꤭ꤊꤢꤧ꤭ ꤢ꤬ ꤒꤢꤩ꤬ꤒꤣꤧ꤬ꤔꤢꤩ꤬ ꤣꤧ꤭ꤒꤣꤧ꤬ꤟꤢꤩ꤬ꤔꤣꤧ꤬, ꤢ꤬ꤕ꤫ꤢꤧ꤬ꤢ꤬ꤏꤢꤩ꤭ ꤔꤢꤧ꤬ꤡꤣꤧ ꤘꤣ ꤛꤢꤩ꤬ꤞꤤ꤭ ꤢ꤬ꤑꤢꤩ꤭ ꤡꤣꤧ꤯ ꤚꤣꤧ꤬ ꤙꤣꤧ ꤛꤢꤩ꤬ꤞꤤ꤭ ꤢꤩ꤬ꤏꤢꤩ꤬ꤢꤩ꤬ ꤘꤣ ꤢꤨ꤭ ꤜꤢꤨ꤭ꤒꤢꤧ꤭ꤓꤢꤧ꤬ ꤔꤢꤧ ꤖꤚꤢꤩ꤬ꤛꤥ꤬ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤋꤢꤩ꤭ꤔꤣꤧ꤬, ꤢ꤬ ꤗꤥ꤬ ꤜꤢꤨ꤭ꤞꤤꤕꤜꤢꤪ꤬ ꤒꤥ꤬, ꤚꤣꤧ꤬ ꤢ꤬ ꤗꤢꤩ꤬ꤞꤢꤦ ꤟꤣꤧ ꤒꤢꤩ꤬ ꤟꤣꤧ ꤢ꤬ ꤒꤣꤧ꤬ꤔꤢꤩ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ 8 ꤏꤢꤩ꤬ꤢꤩ꤬ꤏꤢꤩ꤬ꤥ꤭ ꤣꤧ꤭ꤔꤣꤧ꤬ ꤢ꤬ ꤗꤢꤩ꤬ꤚꤢꤧꤓꤢꤧ꤬ꤒ꤫ꤥ꤬ ꤕꤢꤩ꤬ ꤒꤢꤩ꤬ꤙꤢꤧꤞꤝꤢꤋꤢꤩꤋꤥ꤭ ꤔꤢꤧ ꤡꤢꤪꤗꤣꤧ꤬ꤚꤢꤧ꤬ ꤒꤣꤧ꤬ꤊꤤ꤬꤮ ꤒꤥ꤬꤯ ꤕꤢꤩ꤬ ꤢꤩ꤬ ꤙꤢꤩ꤬ꤙꤢꤩ꤬, ꤕꤢꤩ꤬ ꤢꤩ꤬ ꤒꤥ꤬ ꤙꤢꤩ꤬ꤙꤢꤩ꤬, ꤢ꤬ ꤜ꤫ꤢꤩ꤬ꤓꤝꤢ꤭ꤙꤝꤤ ꤓꤝꤢ꤭ꤒꤣꤧ꤬ꤚꤣꤧ꤭ ꤒ꤫ꤥ꤬ ꤘꤣ ꤕꤢꤩ꤬ꤑꤢꤩ꤭ ꤒꤣ꤬ꤡꤣ꤬꤮ ꤒꤥ꤬꤯ 9 ꤞꤤ꤭ ꤞꤤꤛ꤫ꤢꤦ꤬ ꤢꤩ꤬ ꤒꤢꤩ꤬ ꤤ꤭ꤒꤢꤩ꤭ꤒꤢꤩ꤭꤮ ꤔꤣꤧ꤬ ꤞꤤ꤭ ꤢꤩ꤬ꤔ꤫ꤤ꤬ ꤖꤢꤧ ꤒꤣꤧ꤬ꤘꤢꤦꤚꤣꤧ꤬, ꤚꤢꤪ꤬ꤚꤣꤧ ꤜꤢ꤭ꤋꤢꤧ꤭ ꤞꤤ꤭ꤔ꤫ꤢꤩ꤬ ꤔꤤ꤮꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤤ꤭ ꤗꤢꤩ꤬ ꤒꤢꤩ꤬ ꤒꤣꤧ꤬ꤟꤢꤩ꤬ꤔꤣꤧ꤬, ꤔꤢꤪ꤭ꤓꤝꤢ꤭ꤓꤢꤧ꤬ ꤒ꤫ꤢꤧ꤬ ꤒꤢꤩ꤬ꤜꤣꤧ꤬ꤋꤢꤦꤜꤣꤧ꤬ꤜꤢꤪ꤭ ꤘꤣ ꤊꤣꤧ꤬ꤛꤢꤧ꤭ ꤢ꤬ ꤒꤢꤩ꤬ꤛ꤫ꤢꤦ꤬ꤒꤢꤩ꤬ꤔ꤫ꤢꤧ꤬ ꤕꤣꤧ꤬ꤒꤤ ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤒ꤫ꤢꤧ꤬ꤗꤢꤩ꤬꤯ 10 ꤟꤢꤩꤊꤥꤚꤣꤧ, ꤊꤣꤧ꤬ꤛꤢꤧ꤭ ꤘꤣ ꤢ꤬ꤒꤢꤩ꤬ꤛ꤫ꤢꤦ꤬ ꤕꤣꤧ꤬ꤒꤤ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤊꤢꤩ꤬ ꤗꤢꤧꤓ꤫ꤣꤧ꤬ ꤞꤤ꤭ ꤡꤝꤢ ꤖꤛꤢ ꤢꤩ꤬ꤏꤢꤩ꤬ ꤘꤣ ꤢꤨ꤭ ꤜꤢꤨ꤭ꤓꤢꤧ꤬ ꤔꤢꤧ ꤖꤚꤢꤩ꤬ꤛꤥ꤬ ꤣꤧ꤭, ꤟꤢꤩꤙꤛꤢ꤬ꤔꤣꤧ꤭꤯ ꤞꤤ꤭ ꤞꤤꤑꤢꤩ꤭ ꤔꤢꤧ ꤖꤚꤢꤩ꤬ꤛꤥ꤬ ꤣꤧ꤭ꤔꤣꤧ꤬ꤗꤢ꤬ ꤢ꤬ ꤊꤢꤧ꤭ꤘꤢꤩ꤭ ꤖꤢꤧ, ꤢ꤬ꤍ꤫ꤥ꤬ꤜꤣꤧ꤬ꤏꤢ ꤥ꤬ ꤒꤣ꤬ꤡꤣ꤬꤮ ꤒꤥ꤬ ꤒꤣꤧ꤬ꤘꤢꤦꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤞꤤꤑꤢꤩ꤭ ꤊꤣꤧ꤭ꤢꤨ꤭ ꤒꤥ꤬ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬ ꤢ꤬ ꤗꤢꤧꤙꤢꤦ꤭ ꤊꤣꤧ꤭ ꤞꤤ꤭ ꤚꤣꤧ꤬ ꤢ꤬ ꤊ꤫ꤢꤦ꤬ ꤡꤝꤢꤖꤛꤢꤢꤩ꤬ ꤊꤣꤧ꤭ ꤕꤢ꤭꤯ ꤢ꤬ ꤖꤛꤢꤢꤩ꤬ ꤚꤣꤧ꤬ ꤢ꤬ ꤗꤥ꤬ ꤜꤢꤨ꤭ꤞꤤꤕꤜꤢꤪ꤬ ꤒꤥ꤬, ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤊ꤫ꤢꤦ꤬ ꤖꤛꤢꤢꤩ꤬ ꤕꤢ꤭꤯ 11 ꤟꤢꤨꤔꤣꤧ꤬ꤚꤣꤧ꤬ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤘꤣ ꤢ꤬ꤒꤢꤩ꤬ꤛ꤫ꤢꤦ꤬ ꤕꤣꤧ꤬ꤒꤤ ꤣꤧ꤭ꤒꤣ꤬ꤖꤚꤢꤩ꤬ꤔꤣꤧ꤬, ꤞꤤ꤭ ꤒꤥ꤭ꤙꤢꤩ꤬ ꤞꤤꤑꤢꤩ꤭ ꤔꤢꤧ ꤋꤚꤤ ꤋꤢꤧꤞꤣꤧ꤭ ꤕ꤫ꤢꤩ꤬ ꤒ꤫ꤥ꤬ꤊꤣꤧ꤭ ꤘꤣ ꤢ꤬ꤑꤢꤩ꤭꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤘꤣ ꤞꤤ꤭ ꤞꤤꤑꤢꤩ꤭ ꤒꤢꤩ꤬ꤣꤧ꤭ ꤔꤢꤧ ꤞꤤ꤭ ꤗꤢꤩ꤬ꤒꤢꤩ꤬ ꤣꤧ꤭ ꤢ꤬ꤋꤝꤢ꤬ꤢ꤬ꤋꤛꤢ꤭ꤚꤣꤧ꤬ ꤞꤤ꤭ ꤗꤢꤩ꤬ꤕ꤫ꤢꤧ꤬ꤗꤢꤩ꤬ꤏꤢꤩ꤭ ꤟꤣꤧ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤣꤧ꤭ ꤟꤣꤧ꤯ 12 ꤘꤣ ꤞꤤ꤭ ꤗꤢꤩ꤬ꤟꤢꤨꤔꤣꤧ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤞꤤ꤭ ꤗꤢꤩ꤬ꤞꤢꤦꤟꤣꤧ ꤞꤤ꤭ ꤕ꤫ꤥ꤬ꤠ꤫ꤢꤧ꤬ ꤣꤧ꤭ꤒꤣꤧ꤬ꤟꤢꤩ꤬ ꤟꤣꤧ꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤢ꤬ꤒꤢꤩ꤬ꤛ꤫ꤢꤦ꤬ ꤕꤣꤧ꤬ꤒꤤ ꤚꤣꤧ꤬ ꤢ꤬ ꤋꤚꤝꤢ꤭ ꤗꤢꤧꤙꤢꤦ꤭ ꤗꤢꤩ꤬ꤊꤣꤧ꤭ ꤞꤤ꤭ ꤚꤣꤧ꤬ ꤢ꤬ꤞꤤꤕꤜꤢꤪ꤬ ꤗꤥ꤬ ꤚꤣꤧꤘꤢꤦ꤬ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤢ꤬ ꤞꤢꤧ ꤟꤣꤧ ꤔꤢꤧ ꤞꤤ꤭ ꤗꤢꤩ꤬ꤞꤢꤦꤟꤣꤧ ꤋꤚꤤ ꤔꤣꤧ꤬ ꤟꤣꤧ꤯ 13 ꤗꤢꤩ꤬ꤟꤢꤨꤔꤣꤧ꤬ꤚꤣꤧ꤬, ꤘꤣ ꤠꤢꤧ꤭ ꤢꤩ꤬ ꤤ꤬ꤛꤢ꤬ ꤋꤝꤢ꤬ꤋꤛꤢ꤭ꤚꤣꤧ꤬ ꤢ꤬ ꤊꤢꤩ꤬ ꤘꤣꤧꤓꤝꤢ꤭ꤓꤢꤧ꤬ ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤢ꤬ ꤒꤢꤩ꤬ꤜꤣꤧ꤬ꤋꤢꤦꤜꤣꤧ꤬ꤜꤢꤪ꤭ ꤊꤢꤩ꤬ꤟꤢꤩꤔꤣꤧ꤬, ꤠꤢꤧ꤭ ꤢꤩ꤬ ꤕꤢ꤬ ꤤ꤬ꤛꤢ꤬ ꤒꤣ꤬ꤖꤥ꤮ ꤒꤥ꤬꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤠꤢꤧ꤭ ꤞꤤꤛ꤫ꤢꤦ꤬ ꤔꤢꤪ꤭ꤓꤝꤢ꤭ꤓꤢꤧ꤬ ꤒꤢꤩ꤬ꤜꤣꤧ꤬ꤋꤢꤦꤜꤣꤧ꤬ꤜꤢꤪ꤭ ꤘꤣ ꤠꤢꤧ꤭ ꤕ꤫ꤥ꤬ꤠ꤫ꤢꤧ꤬ ꤋꤚꤤꤖꤢꤨ ꤣꤧ꤭ꤒꤣꤧ꤬ꤟꤢꤩ꤬ ꤢ꤬ꤑꤢꤩ꤭ ꤒꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭, ꤠꤢꤧ꤭ ꤢꤩ꤬ ꤕꤢ꤬ ꤒꤥ꤬ ꤖꤢꤧ꤯ |
Wycliffe USA
The Seed Company