โครินธ์ อาเหร่อเล๊อ ต๊าบ่า 5 - Eastern Kayah Shadaw Dialectꤒꤢꤩ꤬ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭ ꤥ꤬ꤓꤢꤧ꤬ ꤘꤣ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤕꤜꤢꤪꤗꤢꤨ꤬ ꤢ꤬ꤊꤢꤨ꤭ 1 ꤊꤢꤨꤔ꤫ꤢꤧ꤬ꤚꤣꤧ꤬, ꤢꤨ꤭ ꤟꤢꤩꤜꤥ꤭ ꤕ꤫ꤢꤩ꤬ ꤠꤢꤧ꤭ ꤔꤢꤧ, ꤘꤣ ꤞꤤ꤭ꤊꤜꤢꤩ꤭ ꤔꤣꤧ꤬ ꤊꤣꤧ꤬ꤛꤢꤧ꤭ ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ ꤚꤣꤧ꤬ ꤢ꤬ ꤡꤝꤢꤞꤢꤦ ꤋꤛꤢ꤭ ꤚꤣꤧꤘꤢꤦ꤬ ꤔꤢꤧ ꤢ꤬ꤗ꤫ꤥ꤬ꤔꤥ꤬ ꤥ꤬ ꤒꤣ꤬ꤖꤚꤢꤩ꤬ ꤠꤢꤧ꤭ ꤔ꤫ꤤ꤬ꤟꤥ꤭ ꤢꤨ꤭ ꤟꤢꤩ ꤕ꤫ꤢꤩ꤬ ꤠꤢꤧ꤭ ꤟꤢꤨꤔꤣꤧ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ ꤋꤚꤤ ꤒꤥ꤬ ꤒꤣꤧ꤬ꤟꤢꤩ꤬ ꤡꤣꤧ ꤚꤣꤧ꤬ ꤒꤢꤩ꤬ꤞꤢꤦ ꤟꤢꤨꤣꤧ꤭ꤔꤣꤧ꤬ ꤢ꤬ ꤗꤢꤩ꤬ꤔꤢꤪ ꤜꤢ꤭ꤋꤢꤧ꤭ ꤒꤥ꤬꤯ 2 ꤊꤢꤩ꤬ ꤗꤢꤩ꤬ꤟꤢꤨꤔꤣꤧ꤬ꤚꤣꤧ꤬, ꤞꤤ꤭ ꤡꤝꤢ ꤖꤛꤢꤓꤢꤧ꤬ꤜꤥ꤭ꤡ꤫ꤢꤧ꤬ ꤚꤣꤧꤘꤢꤦ꤬ ꤞꤤ꤭ꤔ꤫ꤢꤩ꤬ ꤟꤢꤨꤒꤢꤩ꤭? ꤞꤤ꤭ ꤒꤥ꤭ ꤞꤤꤕꤜꤢꤩ꤭ꤞꤤꤛꤢꤪ꤬ ꤞꤣꤧ꤭ꤊꤢꤧ꤭ ꤒꤣꤧ꤬ꤕꤜꤢꤩ꤬꤮ ꤡꤣꤧ ꤞꤤ꤭ꤔ꤫ꤢꤩ꤬ ꤔꤢꤧ ꤞꤤ꤭ ꤖꤛꤢꤓꤢꤧ꤬ꤜꤥ꤭ ꤞꤤ꤭ꤔ꤫ꤢꤩ꤬ ꤔꤣꤧ꤬ ꤡꤣꤧ꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤝꤢꤞꤢꤦ ꤟꤢꤨꤣꤧ꤭ ꤒꤣ꤬ꤖꤚꤢꤩ꤬ꤖꤚꤢꤩ꤬ ꤔꤣꤧ꤬, ꤞꤤ꤭ ꤒꤥ꤭ ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤜꤢꤨ꤭ ꤘꤣ ꤞꤤ꤭ ꤢ꤬ꤕꤜꤢꤪꤢ꤬ꤗꤢꤨ꤬ ꤢ꤬ꤊꤢꤨ꤭꤯ 3 ꤠꤢꤧ꤭ ꤔ꤫ꤢꤩ꤬ꤊꤜ꤫ꤢꤪ꤬ ꤥ꤬ ꤛꤢ꤬ ꤡꤣꤧ ꤔꤢꤧ ꤞꤤ꤭ ꤒꤣꤧ꤬ꤘꤢꤦꤚꤣꤧ꤬ ꤠꤢꤧ꤭ ꤞꤤꤕꤜꤢꤪ꤬ ꤡ꤫ꤢꤩ꤬ꤡꤢꤦ꤭ ꤔꤢꤧ ꤞꤤ꤭ ꤖꤢꤧ꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤗꤢꤩ꤬ꤒꤢꤩ꤬ꤞꤢꤦ ꤢ꤬ꤘꤢꤨ꤬ꤢ꤬ꤛꤢꤧ꤭ ꤟꤢꤨꤣꤧ꤭ ꤔꤣꤧ꤬ꤒꤣꤧ꤬ꤟꤢꤩ꤬ꤔꤣꤧ꤬, ꤠꤢꤧ꤭ ꤘꤣꤧꤡꤢ꤭ ꤟꤣꤧ ꤢ꤬ ꤘꤣ ꤛꤢꤩ꤬ꤏꤛꤢꤨ ꤢ꤬ꤗꤝꤤ꤭ ꤢ꤬ꤊꤢꤨ꤭ ꤟꤢꤨ ꤠꤢꤧ꤭ ꤥ꤬ꤒ꤫ꤣ꤬ꤊꤣꤧ꤭ ꤔꤢꤧ ꤞꤤ꤭ ꤔꤣꤧ꤬ ꤟꤣꤧ꤯ 4 ꤙꤣꤧ ꤞꤤ꤭ ꤥ꤬ꤊꤢꤨ ꤗꤢꤧꤓ꤫ꤣꤧ꤬ ꤒꤢ꤭ꤏꤢꤦ꤬ ꤚ꤫ꤥ꤬ꤜꤢꤪ꤭ ꤜꤢꤨ꤭ ꤢ꤬ꤋꤢꤩ꤭ꤕꤢ꤭ꤔꤣꤧ꤬, ꤠꤢꤧ꤭ ꤞꤤꤛ꤫ꤢꤦ꤬ ꤔꤢꤪ꤭ꤗꤢꤩ꤬ ꤜꤢꤪ꤭ ꤞꤤ꤭ ꤕꤝꤢ꤭꤮ ꤒꤣ꤬ꤡꤣ꤬ ꤘꤣ ꤢ꤬ꤞꤢꤧꤔꤢꤧ ꤠꤢꤧ꤭ ꤥ꤬ꤒ꤫ꤣ꤬ꤊꤣꤧ꤭ ꤟꤣꤧ ꤔꤢꤧ ꤞꤤ꤭ ꤟꤢꤨꤔꤣꤧ꤬꤯ 5 ꤞꤢꤧꤟꤢꤨ ꤢꤨ꤭ ꤊ꤫ꤢꤦ꤬ ꤗꤢꤩ꤬ꤕꤛꤢꤊꤢꤧ꤭ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤞꤝꤤ꤬ꤓꤣꤧ꤭ꤖꤢꤛꤢ꤬ ꤢ꤬ ꤒꤢꤩ꤬ꤞꤤꤛ꤫ꤢꤦ꤬ꤞꤤꤜꤢꤪ꤭ ꤢ꤬ꤑꤢꤩ꤭ꤔꤣꤧ꤬, ꤞꤤ꤭ ꤙꤢꤩ꤬ ꤘꤣꤧꤒꤢ꤭ꤊꤢꤧ꤭ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤘꤣ ꤜꤥ꤭ꤔꤢꤩꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤊꤢꤨ꤬ꤊꤜꤢꤪ ꤢ꤬ ꤊꤢꤨꤛꤢ꤭ꤊꤢꤨ꤭꤯ ꤞꤢꤧꤟꤢꤨ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤛ꤫ꤢꤧ꤬ꤛꤥ꤬ꤞꤣꤧ꤭ꤖꤚꤢꤩ꤬ ꤊ꤫ꤢꤦ꤬ ꤔ꤫ꤤ꤬ꤙꤢꤩ꤬ ꤒꤢꤩ꤬ꤗꤢꤩ꤬ꤜꤣꤧ꤬ꤕꤜꤢꤩꤊꤢ꤬ ꤏꤢ꤮ ꤙꤢꤧ꤬ꤡꤢꤩ꤬ ꤢ꤬ ꤗ꤫ꤢꤪ꤬ꤔꤣꤧ꤭ ꤕꤢ꤭ ꤒꤣ꤬ꤔꤣꤧ꤭ ꤢ꤬ꤑꤢꤩ꤭ꤔꤣꤧ꤬, ꤞꤤ꤭ ꤙꤢꤩ꤬ ꤗꤢꤩ꤬ ꤟꤢꤨꤔꤣꤧ꤬꤯ ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤞꤤ꤭ ꤔ꤫ꤤ꤬ꤙꤢꤩ꤬ꤟꤣꤧ ꤙꤢꤧ꤬ꤡꤢꤩ꤬ ꤢ꤬ ꤒꤣꤧ꤬ꤚꤣꤧ꤭ꤏꤝꤢ꤬ꤏꤢꤪ꤭ ꤔꤢꤧ ꤢ꤬ ꤒꤢꤩ꤬ꤖꤚꤥ꤬ꤒꤢꤩ꤬ꤖꤚꤢꤧ꤬ ꤟꤣꤧ ꤢ꤬ꤋꤝꤢ꤬ꤢ꤬ꤋꤛꤢ꤭ ꤗꤢꤩ꤬ ꤜꤢ꤭ꤋꤢꤧ꤭ ꤟꤢꤨꤔꤣꤧ꤬꤯ 6 ꤞꤤ꤭ ꤡꤝꤢ ꤟꤢꤩꤙꤢꤩ꤬ ꤓꤢꤧ꤬ꤜꤥ꤭ ꤒ꤫ꤥ꤬ ꤞꤤ꤭ꤍ꤫ꤥ꤬ ꤟꤢꤨꤔꤣꤧ꤬ꤗꤢ꤬ ꤢ꤬ꤗ꤫ꤢ꤬ ꤒꤥ꤬꤯ ꤞꤤꤔ꤫ꤢꤩ꤬ꤓꤢꤧ꤬ ꤜꤢ꤭ꤋꤢꤧ꤭ ꤍ꤫ꤥ꤬ ꤒꤣ꤬ꤗꤢꤦ꤭ ꤘꤣ ꤢ꤬ ꤟꤢꤩ ꤔꤢꤧ, “ꤟꤥ꤭ꤗꤢꤦ꤬ ꤒꤣꤧ꤬ꤊꤤ꤬ꤟꤢꤨ ꤖꤢꤧ ꤚꤣꤧ꤬ ꤢ꤬ ꤗꤢꤩ꤬ꤒꤣꤧ꤬ꤖꤥ꤬ ꤜꤢꤪ꤭ ꤋꤢꤪꤗꤢꤨ꤭ ꤒꤣ꤬ꤊꤜ꤫ꤢꤪ꤬,” ꤢꤨ꤭ ꤟꤢꤩ ꤔꤣꤧ꤬ꤗꤢ꤬ ꤞꤤ꤭ ꤞꤤꤑꤢꤩ꤭ ꤠꤢꤧ꤭ꤟꤢꤩ꤯ ꤟꤢꤨꤔꤣꤧ꤬ꤚꤣꤧ꤬ ꤊꤣꤧ꤬ꤛꤢꤧ꤭ ꤣꤧ꤭ꤒꤣ꤬ꤖꤚꤢꤩ꤬ ꤢ꤬ ꤒꤢꤩ꤬ꤞꤢꤦꤔꤣꤧ꤬, ꤢ꤬ ꤘꤣꤧꤓꤝꤢ꤭ꤓꤢꤧ꤬ ꤒ꤫ꤥ꤬ꤊꤣꤧ꤭ ꤜꤢꤪ꤭ ꤟꤣꤧ ꤞꤤ꤭ ꤒꤣ꤬ꤗꤢꤨ꤬ꤜꤢꤪ꤭ ꤢ꤬ꤒꤢꤩ꤬ꤞꤢꤦ ꤟꤣꤧ꤯ 7 ꤞꤢꤧꤟꤢꤨ ꤞꤤ꤭ ꤊ꤫ꤢꤦ꤬ ꤕꤜꤤ꤭ꤖꤥ ꤜ꤫ꤢ꤬ꤒꤣꤧ꤬ꤊꤜꤤ꤬ ꤜꤢꤪ꤭ ꤢ꤬ꤑꤢꤩ꤭ꤔꤣꤧ꤬, ꤞꤤ꤭ ꤙꤢꤩ꤬ ꤖꤛꤢꤓꤢꤩ꤬ꤊꤢꤧ꤭ ꤟꤥ꤭ꤗꤢꤦ꤬ ꤜꤣꤧ꤬ ꤢ꤬ꤒꤢꤩ꤬ꤞꤢꤦ ꤣꤧ꤭ꤔꤣꤧ꤬, ꤒꤢꤦꤚꤣꤧ꤬ ꤞꤤ꤭ ꤓꤝꤢ꤭ꤓꤢꤧ꤬ ꤞꤢꤧꤔꤢꤧ ꤋꤢꤪꤗꤢꤨ꤭ ꤞꤢꤩ꤭ ꤘꤣ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤥ꤬ꤒ꤫ꤣ꤬ꤒꤥ꤬ ꤣꤧ꤭ꤔꤣꤧ꤬ ꤕꤢ꤭꤯ ꤠꤢꤧ꤭ ꤞꤤꤑꤢꤩ꤭ ꤒꤢ꤭ꤒꤢꤩ꤬ ꤡꤣꤧ ꤔꤢꤧ ꤞꤤ꤭ ꤗꤢ꤬ ꤊꤣꤧ꤬ꤛꤢꤧ꤭ ꤕꤜꤤ꤭ꤖꤥ ꤓꤥ꤭ꤟꤣꤧ ꤒꤣꤧ꤬ꤟꤢꤩ꤬, ꤗꤢꤩ꤬ꤒꤢꤩ꤭ꤟꤢꤩꤚꤣꤧ꤬ ꤋꤚꤤ ꤗꤢ꤬ ꤕꤢꤩ꤬ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤢ꤬ꤞꤤꤗꤤ꤬ ꤘꤣ ꤢ꤬ ꤋꤢꤧꤞꤣꤧ꤭ ꤓꤥ꤭ ꤕ꤫ꤢꤩ꤬ ꤟꤣꤧ ꤘꤣ ꤕꤢꤩ꤬ꤑꤢꤩ꤭ ꤚꤣꤧ꤬ ꤢ꤬ ꤕꤜꤝꤢ꤭ꤊꤢꤧ꤭ ꤕꤢꤩ꤬ ꤒꤢꤩ꤬ꤞꤢꤦ ꤒꤣ꤬ꤖꤚꤢꤩ꤬꤯ 8 ꤟꤢꤨꤔꤣꤧ꤬ꤚꤣꤧ꤬ ꤕꤢꤩ꤬ ꤢꤩ꤬ꤥ꤭ ꤚ꤫ꤥ꤬ꤜꤢꤨ꤭ ꤒꤢꤩ꤬ꤡꤝꤢꤒꤣꤧ꤬ꤜꤝꤢꤕꤝꤢꤩ꤬ ꤣꤧ꤭ꤔꤣꤧ꤬ ꤕꤥ꤮꤯ ꤋꤢꤪꤗꤢꤨ꤭ ꤘꤣ ꤢ꤬ ꤥ꤬ꤏꤤ꤭ꤜꤢꤧ ꤒ꤫ꤣ꤬ ꤔꤢꤧ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤣꤧ꤭ꤔꤣꤧ꤬, ꤕꤢꤩ꤬ ꤒꤥ꤭ꤙꤢꤩ꤬ ꤢꤩ꤬ ꤢ꤬ ꤒꤥ꤬꤯ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤣꤧ꤭ꤔꤣꤧ꤬, ꤢ꤬ ꤗꤢꤩ꤬ ꤘꤢꤨ꤬ꤓꤢꤧ꤬ ꤢꤩꤓꤢꤧ꤬ ꤒꤢꤩ꤬ꤞꤢꤦ ꤔꤢꤧ ꤒꤢꤩ꤬ꤗꤢꤨꤗ꤫ꤢꤧ꤬ꤚꤤ꤬ꤡ꤫ꤢꤧ꤬ ꤒꤣꤧ꤬ꤟꤢꤩ꤬ ꤖꤢꤧ꤯ ꤕꤢꤩ꤬ ꤊ꤫ꤢꤦ꤬ ꤢꤩ꤬ꤥ꤭ ꤚ꤫ꤥ꤬ꤜꤢꤨ꤭ ꤋꤢꤪꤗꤢꤨ꤭ ꤘꤣ ꤟꤥ꤭ꤗꤢꤦ꤬ꤒꤣꤧ꤬ꤖꤥ꤬ ꤥ꤬ꤒ꤫ꤣ꤬ꤏꤤ꤭ꤜꤢꤧ ꤒꤥ꤬ ꤣꤧ꤭ꤔꤣꤧ꤬, ꤔꤢꤧ ꤋꤢꤪꤗꤢꤨ꤭ ꤘꤣ ꤢ꤬ ꤕꤜꤤ꤭ꤖꤥ ꤣꤧ꤭ꤔꤣꤧ꤬ ꤔꤢꤧ ꤒꤢꤩ꤬ꤗ꤫ꤢ꤬ꤒꤢꤩ꤬ꤡꤢꤪ ꤣꤧ꤭ꤔꤣꤧ꤬ ꤒꤣꤧ꤬ꤟꤢꤩ꤬ ꤕꤥ꤮! 9 ꤠꤢꤧ꤭ ꤚꤢ꤭ ꤕ꤫ꤢꤩ꤬ ꤞꤤ꤭ ꤜꤤ꤬ ꤘꤣ ꤢ꤬ꤚ꤫ꤣꤧ꤬ꤋꤢꤩ꤭ ꤒꤣ꤬ꤙꤢ꤬ ꤔꤣꤧ꤬ꤗꤢ꤬, ꤠꤢꤧ꤭ ꤟꤢꤩ ꤞꤤ꤭ ꤔꤢꤧ ꤙꤢꤧꤞꤝꤢꤋꤢꤩꤋꤥ꤭ ꤒ꤫ꤢꤧ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤒ꤫ꤢꤧ꤬ꤗꤢꤩ꤬, ꤠꤢꤧ꤭ ꤚꤢ꤭ ꤟꤢꤩꤡꤝꤢ ꤕ꤫ꤢꤩ꤬ ꤞꤤ꤭ ꤟꤢꤨꤔꤣꤧ꤬꤯ 10 ꤗꤢ꤬ꤔꤢꤧꤚꤣꤧ꤬ ꤠꤢꤧ꤭ ꤟꤢꤩ ꤟꤢꤨꤣꤧ꤭ ꤔꤣꤧ꤬ꤗꤢ꤬, ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤩ ꤔꤢꤧ ꤙꤢꤩ꤬ ꤙꤢꤧꤞꤝꤢꤔ꤫ꤤ꤬ ꤔꤢꤧ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ ꤊꤣꤧ꤭ꤢꤨ꤭ ꤛꤢꤩ꤬ꤏꤛꤢꤨꤋꤚꤤ ꤒꤥ꤬ ꤔꤣꤧ꤬ꤒꤣꤧ꤬ꤟꤢꤩ꤬ ꤒ꤫ꤢꤧ꤬ꤗꤢꤩ꤬ ꤟꤢꤨꤔꤣꤧ꤬ ꤗ꤫ꤢ꤬ꤒꤥ꤬꤯ ꤘꤣ ꤛꤢꤩ꤬ꤞꤤ꤭ ꤢ꤬ꤊꤜꤢꤩ꤭ ꤒꤣꤧ꤬ꤟꤢꤩ꤬ꤟꤢꤩ꤬ꤔꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭, ꤢ꤬ ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ ꤚꤣꤧꤘꤢꤦ꤬ ꤢ꤬ꤑꤢꤩ꤭, ꤢ꤬ ꤢꤩ꤬ꤟꤥ꤬ꤢꤩ꤬ꤟꤤ, ꤢ꤬ ꤡꤢꤪꤙꤢꤩ꤭ ꤜꤢ꤭ꤋꤢꤧ꤭ ꤖꤚꤢꤩ꤬ꤛꤥ꤬ ꤞꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤢ꤬ ꤥ꤬ ꤢ꤬ꤋꤝꤢ꤬ꤢ꤬ꤋꤛꤢ꤭ ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤩ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ ꤗ꤫ꤢ꤬ꤒꤥ꤬꤯ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤛ꤫ꤢꤦ꤬ꤢꤩ꤬ ꤊꤣꤧ꤭ꤢꤨ꤭ ꤡꤢꤪꤗꤣꤧ꤬ꤚꤢꤧ꤬ ꤒꤥ꤬ ꤒꤣꤧ꤬ꤟꤢꤩ꤬ꤔꤣꤧ꤬ ꤞꤤ꤭ ꤙꤢꤩ꤬ ꤙꤢꤧꤞꤝꤢꤔ꤫ꤤ꤬ ꤛꤢꤩ꤬ꤞꤤ꤭ ꤒꤥ꤬ ꤊꤢꤩ꤬ꤟꤢꤩꤚꤣꤧ꤬, ꤞꤤ꤭ ꤙꤢꤩ꤬ ꤓꤢꤩ꤬ꤡꤝꤢ ꤒꤣꤧ꤬ꤖꤢ꤭ꤊꤢꤧ꤭ ꤕꤜꤢꤦꤜꤢ꤭ ꤟꤣꤧ ꤔꤢꤧ ꤟꤢꤩ꤬ꤋꤢꤨ꤬ ꤣꤧ꤭ꤔꤣꤧ꤬ ꤟꤣꤧ꤯ 11 ꤠꤢꤧ꤭ ꤞꤤꤛ꤫ꤢꤦ꤬ ꤟꤢꤩꤔꤣꤧ꤬ꤗꤢ꤬ ꤟꤢꤨꤒꤢꤩ꤭ꤟꤢꤩꤚꤣꤧ꤬ ꤊꤣꤧ꤬ꤛꤢꤧ꤭ ꤘꤣ ꤢ꤬ ꤟꤢꤩꤜꤢꤧ꤬ ꤚꤣꤧꤘꤢꤦ꤬ ꤜꤢ꤭ꤋꤢꤧ꤭ ꤢ꤬ꤔ꤫ꤢꤩ꤬ ꤔꤢꤧ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤖꤢꤨ ꤒꤣꤧ꤬ꤟꤢꤩ꤬ ꤒꤣꤧ꤬ꤘꤢꤦꤚꤣꤧ꤬ ꤢ꤬ ꤊꤢꤩ꤬ ꤡꤝꤢꤞꤢꤦ ꤖꤚꤢꤩ꤬ꤗꤢꤪ꤬ꤖꤚꤢꤩ꤬ꤋꤢꤨ꤭, ꤢ꤬ ꤗꤢꤧꤕꤢꤨ꤭ ꤊꤢꤨꤠ꤫ꤢ꤬ꤊꤢꤨꤠꤢꤩ꤭ ꤢꤩ꤬ꤚꤣꤧꤘꤢꤦ꤬ ꤢ꤬ꤑꤢꤩ꤭, ꤢ꤬ ꤡꤢꤪꤙꤢꤩ꤭ ꤖꤚꤢꤩ꤬ꤛꤥ꤬, ꤘꤢꤧꤗꤣꤧ꤬ꤓ꤫ꤣꤧ꤬ꤛꤥ꤬ ꤢꤨ꤭, ꤢꤩ꤬ꤗꤢꤦ꤬ꤥ꤭ꤖꤚꤢꤧ ꤗ꤫ꤢ꤬ꤒꤥ꤬ꤚꤣꤧ꤬ ꤢꤩ꤬ꤟꤥ꤬ꤢꤩ꤬ꤟꤤ ꤞꤤ꤭ ꤒꤣꤧ꤬ꤟꤢꤩ꤬ꤔꤣꤧ꤬ ꤙꤢꤧꤞꤝꤢ ꤒ꤫ꤢꤧ꤬ ꤛꤢꤩ꤬ꤞꤤ꤭ ꤒ꤫ꤢꤧ꤬ꤗꤢꤩ꤬꤯ ꤙꤣꤧ ꤢꤩ꤬ꤒ꤫ꤣ꤬ꤥ꤭ꤒ꤫ꤣ꤬ ꤖꤢꤧ ꤔꤢꤧ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ ꤖꤢꤧ ꤔꤣꤧ꤬ ꤢꤩ꤬ꤒ꤫ꤣ꤬ꤥ꤭ꤒ꤫ꤣ꤬ ꤒ꤫ꤢꤧ꤬ꤗꤢꤩ꤬ ꤗꤢꤩ꤬꤯ 12-13 ꤟꤢꤩꤒꤢ꤭ꤒꤢ꤭꤮ ꤗꤢ꤬, ꤘꤣꤧꤡꤢ꤭ ꤊꤣꤧ꤬ꤛꤢꤧ꤭ ꤥ꤬ ꤘꤣ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ꤕꤜꤢꤪꤗꤢꤨ꤬ ꤢ꤬ꤊꤜꤢꤪ꤭ ꤔꤣꤧ꤬ꤒꤣꤧ꤬ꤟꤢꤩ꤬ ꤗꤢ꤬ ꤠꤢꤧ꤭ ꤒꤢꤩ꤬ꤗꤢꤩ꤬ ꤗ꤫ꤢ꤬ꤒꤥ꤬꤯ ꤊꤣꤧ꤬ꤛꤢꤧ꤭ ꤟꤢꤨꤔꤣꤧ꤬ ꤒꤣꤧ꤬ꤟꤢꤩ꤬ ꤗꤢ꤬ ꤡꤢꤪꤗꤣꤧ꤬ꤚꤢꤧ꤬ ꤘꤣꤧꤡꤢ꤭ ꤘꤢꤦ꤬ ꤛꤢꤩ꤬ꤞꤤ꤭ ꤕꤢ꤭꤯ ꤗꤢ꤬ꤔꤢꤧꤚꤣꤧ꤬ ꤞꤤ꤭ ꤒꤥ꤭ꤙꤢꤩ꤬ ꤘꤣꤧꤡꤢ꤭ ꤚꤣꤧꤘꤢꤦ꤬ ꤞꤤ꤭ ꤖꤚꤢꤩ꤬ꤛ꤫ꤢꤦ꤬ꤢꤩ꤬ꤒꤢꤩ꤬ ꤕꤜꤢꤪꤗꤢꤨ꤬ꤖꤢꤨ ꤒꤣꤧ꤬ꤟꤢꤩ꤬ ꤔꤣꤧ꤬ꤗꤢ꤬ ꤗ꤫ꤢ꤬ꤒꤥ꤬ ꤟꤢꤧ꤭? ꤜꤤ꤬ꤓꤢꤩ꤭ꤞꤢꤪ꤬ꤖꤢꤊꤢꤨ꤭ ꤟꤢꤩ ꤔꤢꤧ, “ꤠ꤫ꤢꤩ꤬ꤓꤢꤩ꤬ꤊꤢꤧ꤭ ꤊꤣꤧ꤬ꤛꤢꤧ꤭ ꤗꤢꤨꤗ꤫ꤢꤧ꤬ ꤘꤣ ꤞꤤ꤭ꤊꤜꤢꤩ꤭ ꤔꤣꤧ꤬,” ꤚꤣꤧ꤬ ꤞꤤ꤭ ꤙꤢꤩ꤬ ꤗꤢꤩ꤬ ꤊꤣꤧ꤭ ꤟꤢꤨꤔꤣꤧ꤬꤯ |
Wycliffe USA
The Seed Company