ꤡꤛꤢꤩ꤭ꤗꤢ꤬ꤎꤣ꤬ 3 - ลีเทส่อพ๊าอาเซ เร๊อ เห่ขุทวาลู๊

ปลี อาหรี่อาแก

¹ แว โป่แหว่ ซี๋, ซี โต ทวา โหร่เอ๊ ซ๊าร๊า โต่, เมเตเฮ๊เรอ ฮู๊ ซี ซิเง โทดื่อเนอ เฮ๊อ, เป เด๊อ อา ทวา ซ๊าร๊า เต๊เห่เนอ, จอแปแหร่ เก่ เมจากาคยา ชอเล๊อ เป เน๊อ แกแย เด๊อ อาโร เนอเต๊เห่ ปา.

² เป เมซื๊อ กาคยาแฮเง ลอปลี เต ปว๋า เตเพร เฮ๊อ. หม่าแน๊เรอ แกแย เด๊อ อา เฮ๊เบ่ซื๊อน๊อ เกออู โตโพ๋ โต่ เตเพรเนอ, อา หม่า เฮ๊อ แกแย เด๊อ อาเล๊ออาบา เตเพร เน๊อ อารออาเรเบ๊ เกอเร๊อ ลอเฮ๊อ อา เหน่เชเพร เฮ๊อ.

³ แซ่ฮู๊ ตีซิ เก่ จูเอ่ เปโหง่เนอ เรอ, เป นอ อ่าหม่า ตีซิ เน๊อ ต่อเท๊เปลอ, เร๊อ เป ตีรี๊จว๊าเบ๊ ลอ ตีซิชีโด.

⁴ เก่หม่าโต่เรอ เตเนแม๊ แลแค ส่อเกลอดุ เต๊เบ่ อาหรี่อาแก เนอ. ส่อเกลอดุ เออ อาดุ แหน่เจ๊อ เร๊อ เก่แลเซ๊ดุ พอลูจว๊า เจ๊อ ลู หม่าแน๊เรอ เต เด๊อ อา ย๊อ ตีรี๊จว๊าเบ๊ ลู เนอหม่า ส่อเกลอ เหล่ย๊อวื๊อจว๊า ปีติ้วฮู๊ เต๊เบ่ แพ๊. เร๊อ เพรเหว่ ส่อเกลอดุ เออเตเพร ซิหยื่อ จว๊าเบ๊อะโต๊โผ่เนอ, ส่อเกลอ เหล่ย๊อวื๊อจว๊า เออเนอ ซูจว๊า ลู แพ๊.

⁵ แกแยปลี เนอหม่า อา แซ่ฮู๊ เนอเฮ๊อ. อา ปีติ้วฮู๊ แพ๊ หม่าแน๊เรอ อา เฮ๊เบ่ถู่เซ๊ แด๊เล๊อะแด๊กลอ เกอเร๊อ อาเตเม อาหรี่อาแก เต๊เห่. เตเนแม๊มอ, ตอนอโตโฮ ดุเจ๊อ บ๋า เต เบ่เบ่, หมิโพเส่ เตเปล๊ แพ๊เนอ, อา อือลอเบ๊ เป่ แพ๊.

⁶ แกแย ปลีเนอ อาแซ่เน๊อ หมิ เนอเฮ๊อ. เด๊อ เหน่กล่อ ครือขรว่า อาเกล เนอ, ปลี หม่า อาแซ่เน๊อ เห่ขุ เด๊อ อา เล๊อบา เร๊อ เตมู๊แหม่รีแจ่ เออต๊าบ่า เนอเฮ๊อ. อา เมซอ ลอเฮ๊อ แกแย อาเหน่กล่อ เหน่เชเพร เฮ๊อ. ปลีเออ อา ชื๊ออือ ลอหล่า ตี๊กลิแก ลอ เจ๊อ เป เตโอ่เซอเพร เน๊อ หมิเออ เฮ๊อ เร๊อ หมิ เออเนอหมา อา โอ่ เด๊อ ง่าหร่าปอรากยา อากู แฮ เฮ๊อ.

⁷ แกแย เห่ขุพู๊ เมแนแจ่ ลอ เตมีเตดอ ปว๊าเต๊อเจ่อ, อา เมแนแจ่ ลอ เตมีเตแหม่ เต๊เห่, ถู่ เต๊เห่, หรู่ เต๊เห่ เน๊อ เต๊ว เต๊เห่ ล๋อ ปลี เจ๊อ.

⁸ หม่าแน๊เรอ แกแย เด๊อ อา เมแน เบ๊แจ่ แกแยปลี เออเนอ อาโอ่ เตเพร่ว โต่. แกแยปลี เออเนอ อา เล๊อบา เจ๊อ เน๊อ เตมู๊แหม่รีแจ่ เต๊เห่ เจ๊อ, เร๊อ อู เป๊อเบ๊แจ่ ลู โต่. อา โอ่ เล๊อบา เจ๊อ เน๊อ อาเตแร เด๊อ อา เมเซอเมเหม่ อู เต๊เห่.

⁹ ซี ซิเง เน๊อ เป นอเอ่ เปปลี เออเนอ เน๊อ เหล่ถู่เซ๊แถ่ เปเพ แบ่เจ่ จอแปแหร่, โท๊โต่ เป นอเอ่ เกอ โป่ อา เน๊อ เป เหล่อิชอ มู๊แหม่ แกแย เด๊อ จอแปแหร่ แบ๊แล อา ฮู๊ อาเหน่กล่อ เออเนอเต๊เห่.

¹⁰ เด๊อ แกกู ตูกูกู๋ แพ๊ เอออากูเนอ, เตถู่เซ๊แถ่ เร๊อ อา เถ่เถ่, เตอิชอ ฮามู๊แหม่ เต๊เห่ เร๊อ อา เถ่เถ่. แว โป่แหว่ ซี๋, อา โตเบ่ เถ่ ฮู๊เนอ โต่.

¹¹ เทอเถ่ขุ ตูกูกู แพ๊ อากู เนอ, เทอตู๊จู่ เร๊อ อา ทุ๊ยเถ่เถ่, เทอเข่ เร๊อ อา ทุ๊ยเถ่เถ่, อา ทุ๊ยเถ่ เต่อลู ฮู๊เนอหม่า อาหนิ แหน่ แอ?

¹² แว โป่แหว่ ซี๋, ก่อดุ๊ยเหมาะ เส่เถ่แจ่ โต๊โฉ่เส่ โต่. แท๊ทือเหมาะ เส่เถ่แจ่ ก่อดุ๊ยเส่ โต่, ฮู๊เนอเฮ๊อ เทอเถ่ขุ เด๊อ อาเข่ ตูกูเนอ, อา นอทุ๊ยเถ่ แจ่เกอ เทอตู๊จู่ โต่.

เตเตเนแจ่ โอ่ เด๊อ ม๊อขุ แฮ

¹³ แกแย เด๊อ ซีเกล เตเพรเพร เด๊อ อา โอ่ เน๊อ อา เหล่เตเน แจ่ เร๊อ อา ซิเง ตาปลู๊ เนอหม่า อูเป? อา โตเบ่ เด๊อะโล อาเต เออเต๊เห่เนอ เน๊อ อา เตโอ่เซอเพร เด๊อ อาแร๊, โท๊โต่ อา โตเบ่ เด๊อะโล อา เมเต เออเนอ เน๊อ เด๊อ แด่หยว่า ซิปล่อ. แด่หยว่าซิปล่อ เออเนอหมา อา แฮ แฮเง เด๊อ เตเตเนแจ่ เออเนอ อา โอ่ แพ๊.

¹⁴ หม่าแน๊เรอ เด๊อ ซี ซิปล่อกูเนอ, ซี เก่ ซิค๊าซิเถ่ แหน่เจ๊อ ลู, ซี โมแล เกอเร๊อ ซีเหน่ เร๊อ ซี แม๊ดุแล เกอเร๊อ ซีเหน่ เออเต๊เห่ เก่ โอ่ เฮ๊เนอ, เฮ๊เบ่ ถู่เซ๊ เกอเร๊อ แต่ ซีเหน่ เร๊อ ซี โอ่ เร๊อ เตเตเนแจ่ ฮู๊เนอ แต่เหม่. เร๊อ เมเต๊แก่ฉื่อ แต่ เตหมะเตจ๊อ เออเนอ แต่เหม่.

¹⁵ เตเตเนแจ่ ฮู๊เนอเต๊เห่ หม่า อา โอ่ เด๊อ ม๊อขุ แฮ หม่าโต่, เห่ขุเน๊ขุ อา เหล่เตเน แจ่ เนอเต๊เห่แพ๊. เตเตเนแจ่ ฮู๊เนอเต๊เห่ หม่า อา โอ่ เด๊อ แหย่โยบูโพ๊ แบ่เจ่ อา โอ่ แฮ หม่าโต่, อา โอ่ เด๊อ โลเน๊มู๊แหม่รีแจ่ อา โอ่ แฮ แพ๊.

¹⁶ เบ๊อะเตซิค๊าซิเถ่ ลู, เตโมแล เกอเร๊อ เหน่ เร๊อ แม๊ดุแล เกอเร๊อ เหน่ เต๊เห่ โอ่ อาเหล่โอ่ เนอ, ซี เก่ แม๊เถอะ เตเมตอปลอตือซือ เน๊อ เตมู๊แหม่รีแจ่ ปว๋า เต๊อเจ่อ เก่ โอ่แถ่ เบ๊อะเนอ ปา.

¹⁷ หม่าแน๊เรอ เตเตเนแจ่ เด๊อ อา โอ่ เด๊อ ม๊อขุ แฮ เฮ๊เนอหม่า อา อาโพ๊อาแปละ เหร่อเล๊อ ปา, โทปาเรอ อา เด๊อะ โอ่แถ่ดื่อ เตโมเตเป, เหล่เตเน แจ่เป่ เด๊อ อูเง, ซิปล่อโอ่ หนิดา อู เตเฮ๊เบ่, เล๊อบา เร๊อ เตซิยอ เร๊อ เมเตแร๊ เต๊เห่, แม๊ดุ แม๊ปีตี๊ อู โต่, โทเรอ เตจ่า เมค๊าเมโข่ เต๊เห่ โอ่ โต่.

¹⁸ แกแย เด๊อ อา เด๊อะโอ่แถ่ เตเพรอาดือ เนอ, อา อิช๊ออิปลือ เฮ๊อ เตโมเตเป อากลุยอาลุ๊ย เร๊อ ช๋า อู เก๊กาดว๊าเฮ๊อ อา เบ๊อะเนอปาเนอ, อา เก่ พย๊าหนิ เตจ๊อเตเต อาเส่ ปา.