เห่ขุทวาลู่ 49 - ลีเทส่อพ๊าอาเซ เร๊อ เห่ขุทวาลู๊

เพยาโคบ เด๊อะบุ๊ยเด๊อะเตอเรอ เกอเร๊อ อาพู๊เพรคู เต๊เห่

¹ เพยาโคบ เอ๊แฮ เร๊อ อาพู๊เต๊เห่ เร๊อ อา เฮ๊ เน๊อ, “แฮโอ่ ตาวา แลแค เน๊อ แว เบ๊อะเออ, ช๋า อาโหน่ปา เต เกเร ทวาแถ่ เน๊อ ซี ฮู๊เต ปา เนอ แว เฮ๊โฉ่ เป่ ซี,

² เก๋อ แวพู๊คู ซี, แฮโอ่ปล๊อลอ ลู เร๊อ หนิดา แลแค, แฮโอ่ปล๊อ หนิดา แลแค ซีเพ ยาโคบ อาเตเฮ๊เบ่ เออ.

³ เก๋อ รูเบน, เน หม่า แวพู๊แหว่เพร่ว. เน หม่า แวเตอเรอฉว่าชอ, แวอ๊าแวเหร่ อาแก่ช๊าแกแหร่. เน พย๊าหนิ เหล่โอ่ เด๊อ อาแถ่โลเล๊อ. เด๊อ แวพู๊ ลอปลี อาเกล เนอ, เนหม่า แกแย เด๊อ อาฉว่าอาชอ เล๊อเจ๊อ อู.

⁴ หม่าแน๊เร๊อ เนโอ่เมอเต่อเน๊อแวเม โหน่เตเพร. เนเมมู๊แหม่รีแจ่ เนเพ อาเหล่เมอ อาขว่าอาคยา, เนหม่า อาแซ่เน๊อ เทอเควแฉ่ เด๊อ อา ค๊อเป่ เกอเร๊อเกอ อาเหน่ โต่ เนอเฮ๊อ. เน ทวาแจ่ ปา แกแย เด๊อ อาดุเล๊อ อาแร๊เล๊อ เน๊อ เนโป่เนแหม่ เต๊เห่ ปาแตแค๋โต่ เฮ๊อ.

⁵ เก๋อ สิเมโอน เน๊อ เลวี ซี หม่า ซีโป่ เน๊อ แหม่ ลู. ซี นอเอ่ เกอเร๊อ ซี เน๊ เต๊เห่ เน๊อ เหล่เมปย๊าเมแก อู.

⁶ แว โนกู เกอ เน๊อ ซี เตเฮ๊เบ่โห่ เฮ๊เบ่เซ๊ เนอเต๊เห่ โต่. โท๊โต่ แว โนโอ่เต่อ เกอ เด๊อ ซี เตโอ่กู๊โอ่แก๊ อากูเนอ โต่โต่. เมเตเฮ๊เร๊อ เด๊อ ซี ซิปล่อดุ อาขว่าอาคยา, ซี เมเซอ เฮ๊อ แกแย เต๊เห่ เฮ๊อ. ซี เมด๊าเมเก่ แลหวี่แลวอ โก๊โหน่ลอ ปู่เพ เต๊เห่.

⁷ ซี เตซิปล่อดุ เน๊อ เตซิปล่อแถ่ เนอ, อาจาอาจือ แหน่เจ๊อ อาขว่าอาคยา, แว อิชอฮา เฮ๊อ ซีเฮ๊อ. เร๊อแว เก่ นอ ลูโพร๊ลูแพร จว๊าโค๊ แก ซี เด๊อ อิสราเอล เก่กู ปา. แว เก่ นอ จว๊าโอ่ปีชี แก ซี เด๊อ เมวเจ่อโร เต๊เห่ อาเกล ปา.

⁸ เก๊อ ยูดาห์, เน เก่ เป่ แกลอ เพรเด๊อ อาซิเถ่เน เต๊เห่ปา. เนโป่เนแหม่ เต๊เห่ เก่ ถู่เซ๊หนิ เน ปา. เนโป่ เนแหม่ เต๊เห่ เก่ แฮ แด๊งือ เด๊อ เนเป๊เส่เง ปา.

⁹ ยูดาห์, เน อ๊าฉว่าเหร่ชอ แซ่เน๊อ แอ๊ซี เด๊อ อา ปื่อเอ่โท เฮ๊อ เตมี, เร๊อ อา กาโตคยา เด๊อ อากู เร๊อ อา กาโอ่เมอ โตโกลตา, เร๊อ โอ่เมอโอ่โก๊ หนิ เนอเฮ๊อ. เน แซ่เฮ๊อ เน๊อ แอ๊ซีโหมะ โตโด เด๊อ อู เมซิเหน่ บื่อ ลู เตเพร่ว โต่ เนอเฮ๊อ.

¹⁰ อู เก่ พย๊าตาพาแก แจ่ปา คูยูดาห์ อาเตอเรอฉว่าชอแจ่ เตเพร่ว โต่. โท๊โต่ คุ๊ยอิแท๊โบ เนอ อา เก่ โอ่หม่าโอ่กลอ เด๊อ อากลุยอาลุ๊ย เต๊เห่ อากู๊ขู่กู ปา. เน เก่ เป๊อ โต่เด๊อ เมวเจ่อ เต๊เห่ พย๊าแฮ เป่ ลู เชหยู่ ปา. เร๊อ เมวเจ่อ เต๊เห่ เก่ แด่ดุหยื่อแหน่ ลอ เน ปา.

¹¹ ยูดาห์, เน เก่ จอกลอหม่า เนแมอ๊อแหล่โตโล๊ เน๊อ แท๊ทือเหมาะ ปา. เน เก่ จอกลอหม่า เนแมอ๊อแหล่เพโตโล๊ เน๊อ แท๊ทือแพ เด๊อ อาแร๊เล๊อ เนอ ปา. เน เก่ โฉ่ปลี เนจา เน๊อ เนจาจว่าทู เต๊เห่ เน๊อ แท๊ทือเทอแย ปา.

¹² เนเป๊เส่ปล่อ ลีกีซุ๋ย แซ่เจ๊อเน๊อ แท๊ทือเทอแยปา. เนกู่เคอ บูซูตู๊ แซ่เจ๊อเน๊อ ปู่อินุเทอ.

¹³ เก๊อ เศบูลุน, เน เก่ โอ่ เด๊อ เทอดุซาวาทือ ปา. เร๊อ เน เก่ ทวาแถ่ เหล่แด่โอ่โก๊ ส่อเกลอดุ ปา. เร๊อ เนเก่กือ เนอ อา เก่ แหล่ จว๊าโต่ เจ๊อ เด๊อ วีไซดอน เจ๊อปา.

¹⁴ เก๊อ อิสสาคาร์, เน แซ่เน๊อ แมอ๊อแหล่ เด๊อ อาอ๊าฉว่าเหร่ชอ เร๊อ เด๊อ อูแด่ แถ่เบ๊ หนิ ลู เน๊อ ตาเตปา, เร๊อ อาซิพร๊า โอ่เมอ แลคื๊อโอ่แต่ เด๊อ ตาเต อาเปล่กู อาเนอเฮ๊อ.

¹⁵ เร๊อ เบ๊อะ อา แม๊เถอะ อากู๊เหล่ เหล่โอ่โก๊ แร๊ แหน่เจ๊อ, โทเร๊อ เห่ขุเออ อาตว่าโม แหน่เจ๊อ เบ๊อะเนอ, อา ก๊อแลเร๊ออาแหง่ เด๊อ อา เก่ แด่จว๊า ตาเต อาเง. ฮู๊เนอเฮ๊อ อู เก่ นอฉว่านอชอ เน ฮู๊ หลู่ เตเพร ปา.

¹⁶ เก๊อดาน, เน เก่ เป๊อ หนิ เนโคแกแย เร๊อดื่อ เต๊เห่, ฮู๊ อิสราเอลเมวเจ่อ เด๊อ อาโร เต๊เห่ อาทวาดุ เป๊อหนิ เนปา

¹⁷ เน แซ่เน๊อ หรู่ เด๊อ อาแร โอ่ เร๊อ อา โอ่ เด๊อ แกล๊ทือ. เน แซ่เน๊อ หรู่ซิ โอ่ เด๊อ แกล๊ด๊อ. เน อิโพ ตีซิ แก๊โหน่แก เร๊อ เพรซิเถ่ เน หม่า เฮ๊อ เพรแด๊ ตีซิ เนอเตเพร ตาแถ่เอ กาคยา ปา.”

¹⁸ โทเร๊อ เพยาโคบ จ๊อเบแถ่ จอแปแหร่ เน๊อ, “เก๋อ จอแปแหร่ ตูจูเพร, แว โอ่ป่อแม๊ชือ เฮ๊อ เน เตเมแลเปล๊กา เฮ๊อ.”

¹⁹ โทเร๊อ อา เฮ๊ เป่แฮ โป่ อาพู๊ซี เน๊อ, “เก๊อ กาด เพรปื่อเผ่พย๊าเผ่เอ่เต เต๊เห่ เก่ ช๊า เน ปา. หม่าแน๊เรอ เน เก่ ช๊าเป่แก เหย่ซี ปา. เร๊อ เน เก่ ลือโตโฮ แกล่เถ่แก ลอ เหย่ซี ปา.

²⁰ เก๊อ คูอาเชอร์, เฉ่เอ่เฉ่โอ เถ่ เด๊อ เน เก่กู เต๊เห่เนอ, อา เก่หวิเก่ชือ แหน่เจ๊อ ปา. เร๊อ เน เก่ เด๊อะเอ่เด๊อะโอ เป่ คุ๊ย เฉ่เอ่เฉ่โอ เด๊อ อาหวี่อาชือ โค๊เล๊อ เนอเต๊เห่ ปา.

²¹ เก๊อ คูนัฟทาลี, เน หม่า อาแซ่เน๊อ เตอเคอโหมะ เด๊อ อา ป่าแพร เร๊อ อา โอ่ปาลา เด๊อ มีเกล โตโด. เร๊อ อา พู๊โอ่หนิ เตอเคอพู๊ เด๊อ อาตว่า เต๊เห่.

²² เก๊อ คูโยเซฟ, เน หม่า อาแซ่เน๊อ แท๊ทือเหมาะ เด๊อ อาเส่กล๊อเส่โล ต๊อเหมาะ. เร๊อ อา แด๊แถ่ รีโร ตว่าแร๊ เด๊อ เทอเถ่ขู่ทือ. เร๊อ อาแพ เต๊เห่ ยูแถ่ ตาลว๊าลอ เจ๊อ เน๊อ วี เกเร๊ หล่อ เจ๊อ.

²³ เพรเค๊เกล่อ เต๊เห่ แฮช๊าจาช๊าจือ แหน่เจ๊อ เนอ. เร๊อ เหย่ซี ซิเถ่ซิฮา แหน่เจ๊อ เน เร๊อ อา แฮเค๊ แลแค เน.

²⁴ หม่าแน๊เรอ แว จอแปแหร่ดุ เด๊อ อาโพรอาเตอเรอ เด๊อ แว จ๊อเบแถ่ ลู, เร๊อ อู เอ๊ลู เน๊อ เพรเกซิหมิ, เพรเตเก เร๊อ อิสราเอล เนอเตเพร เมจว่า เน อาขว่าอาคยา, เนเกลอเนอ อา กู๊ก่า โต่, เนกู๊ขู่เนอ อาฉว่าอาชอ แหน่เจ๊อ.

²⁵ แวจอแปแหร่ดุ เก่ เมจว่า เน. จอแปแหร่ดุ เด๊อ อาโพรอาเตอเรอ เออเตเพร เก่ เด๊อะบุ๊ยเด๊อะเตอเรอ. อา เก่ เด๊อะบุ๊ยเด๊อะเตอเรอ เน เน๊อ เทอเถ่ขู่ เด๊อ เห่เล เนอเต๊เห่. อาเก่ เด๊อะบุ๊ยเด๊อะเตอเรอ ดื่อเนเตมีเตดอ เน๊อ เนพู๊เนเลอ เก่ โอ่โหร่ ดื่อ นี๋.

²⁶ แว เด๊อะบุ๊ยเด๊อะเตอเรอ เต๊เห่ หม่า อาดุเล๊อ เจ๊อ เน๊อ โฉ่ เด๊อหนู่เด๊อะส่า เต๊เห่ เจ๊อ. อา เด๊อะบุ๊ยเด๊อะเตอเรอ เต๊เห่ เจ๊อ. อาแร๊ เล๊อ ปา เจ๊อ เน๊อ โฉ่ปลู่ เด๊อ อาหน่างยาเลงยา เต๊เห่ อาเตตว่าเตแร๊ เต๊เห่ เจ๊อ. เก๊อโยเซฟ, เน เก่ พย๊าหนิ ลอดื่อ เตเด๊อะบุ๊ยเด๊อะเตอเรอ เออเต๊เห่ ปา นี๋. เน เก่ พย๊าหนิ ดื่อ เตเด๊อะบุ๊ยเด๊อะเตอเรอ เด๊อ เหล่แถ่ทวาดุทวาขู่ เด๊อ เนโป่อาแหม่ซี เต๊เห่ อาขุเนอ ปา นี๋.

²⁷ เก๊อคูเบนยามิน, เน หม่า อาแซ่เน๊อ ถุ่ยมี เด๊อ อาซิกู๊ซิวี แหน่เจ๊อ อาเฉ่ โตโด เบ๊อะ เหมาะลี เบ๊อะเนอ อา เอ่ เตมีหย่า. เบ๊อะ เหมาะเฮ๊ เบ๊อะเนอ อา เบเอ่ เป่ อู เต เด๊อ อา ปื่อเอ่หนิ เนอเต๊เห่.”

²⁸ ล๋อ เออเต๊เห่ หม่า อิสราเอล เมวเจ่อเช๊อเนอโหมะ เต๊เห่ เฮ๊อ, เร๊อ เออหม่า โหง่ เด๊อ อาเพ เฮ๊โมเฮ๊แร๊ แก เหย่ซี ฮู๊ อาโตอาเบ่ เน๊อ เหย่ซี เตเพร่ว เน๊อ เตเพร เนอเต๊เห่ เฮ๊อ.

เพยาโคบ เซ๊ปลื๊อแก

²⁹ โทเร๊อ เพยาโคบ เฮ๊แก อาพู๊ซี โหง่ เน๊อ, “แว เกเร ผื่อ เซอ เฮ๊อ, โล๊ เต่อเกอ แว เน๊อ แวโหมะเพเพอโพ ซี เด๊อ หล่อกู โอ่ เด๊อ ฮิตไทต์ เมวเจ่อพู๊ คูเอโฟรน อาเพร๊ขู่ เนอโต๊โผะ นี๊.

³⁰ แวโพ โพอับราฮัม พรีแก หล่อกู ตูกู เร๊อ อา โอ่ เด๊อ มัคเป-ลาห์ เหล่โอ่, คูมัมเร อาหี่ขุ ซิเถ่ คานาอันเก่กู เนอ. เร๊ออา พรี เห่ขุเด๊อ ฮิตไทต์ เมวเจ่อพู๊ คูเอโฟรน อากู๊ยากู เร๊อ อา เมแก เน๊อ อาเหล่โล๊โน อากลุยอาแล เหล่โอ่.

³¹ เร๊อ อูโล๊โน แก เฮ๊อ แวเพอแวโพ โพอับราฮัม เน๊อ อาเม เพอซาราย เบ๊อะ เนอเฮ๊อ. โท๊โต่ แวโหมะแวเพ เพอิสอัค เน๊อ อาเม โหมะเรเบคาห์ หม่า อู โล๊โน เหย่ซี เบ๊อะ เนอ เฮ๊อเฮ๊อ. โทเร๊อ ซีโหมะ โหมะเลอาห์ หม่า แว โล๊โน เฮ๊อ ลู เบ๊อะเนอ เฮ๊อเฮ๊อ.

³² เพร๊ เน๊อ หล่อกู โอ่ เด๊อ เพร๊ เนอเต๊เหล่ อากูเนอ หม่า อู พรี อา เด๊อ ฮิตไทต์ เมวเจ่อ อากู๊ยากู, เร๊อ โล๊ โน แกแว เบ๊อะ เนอ นี๋.”

³³ เบ๊อะ เพยาโคบ เมแก โทเฮ๊อ อาพู๊ซี โหง่ เบ๊อะเนอ, อา โอ่เมอตา กาคยา เด๊อ เหล่เมอขุ เร๊อ อา เซ๊ปลื๊อ แก เร๊อ อา จว๊าโอ่เต่อ โก๊แก เน๊อ อาโหมะ เพ เพอโพ ซี เต๊เห่.