เห่ขุทวาลู่ 37 - ลีเทส่อพ๊าอาเซ เร๊อ เห่ขุทวาลู๊

คูโยเซฟ อาเตโอ่เมอแหม่

¹ กู๊แหน่เร๊อ เพยาโคบ จว๊าโอ่ เด๊อ คานาอันเก่กู เบ๊อะ อาเพ โอ่น๊อ เกอเร๊อ เด๊อ เนอเค เนอ.

² เออหม่าเตราม๊าราแด เพยาโคบ อากลุยอาลุ๊ย ตากาแลซี เต๊เห่ อาหรี่อาแก. คูโยเซฟ หม่า อาหน่าเจ่ปา เด๊อ อา โอ่ ปาแพ๊ เช๊อโซซว๊าต๊าหน่า, เร๊อ อา จว๊าเกโหร่ เกอซิหมิ เน๊อ เป่ เน๊อ อาแหม่ ซี หม่าเฮ๊อ อาเพเมโหน่โป่ โหมะบิลฮาห์ เน๊อ โหมะศิลปาห์ อาพู๊เพรคู ซีเต๊เห่. เร๊อ เตซื๊อ เด๊อ อาแหม่ ซีเต๊เห่ เม เต๊เห่เนอ คูโยเซฟ กาแด๊โฉ่โล เป่ลอ เน๊อ อาเพ.

³ กู๊แหน่เร๊อ เพยาโคบ พู๊โอ่หนิ คูโยเซฟ ช๊า อาโหมะเพร่ เฮ๊อ เบ๊อะเนอ อาขว่าอาคยา, อาโมเร๊อเล๊อแหน่ คูโยเซฟ เน๊อ อาพู๊เพรคู เด๊อ อาโร เต๊เห่ เร๊อ อา เช๊ เป่ ลู จาจวาทู เด๊อ อาตว่า แหน่เจ๊อ ตือปือ เร๊อ อา เด๊อะ เน๊อ ลู.

⁴ เบ๊อะ อาแหม่ ซีเต๊เห่ แม๊เถอะ เน๊อ อาเพ โมเร๊อแหน่ คูโยเซฟ เน๊อ เหย่ซี เบ๊อะเนอ, เหย่ซี ซิเถ่ซิโตโค เร๊อ ลู เร๊อ เหย่ซี เฮ๊เบ่โมเฮ๊เบ่แร๊ ปา แลแค ลู โต่.

⁵ เตเซเค คูโยเซฟ โอ่เมอแหม่ เร๊อ อา เฮ๊โฉ่โล เป่ อาแหม่ ซี เบ๊อะเนอ, เหย่ซี ลื๋อ ซิเถ่แร๊ โป่ ลูลู.

⁶ เร๊อ อา เฮ๊ เหย่ซี เน๊อ, “หนิดา เกอ แลแค แว เตโอ่เมอแหม่ เออ เล๊.

⁷ เปโอ่ เด๊อ เพร๊ขุ เร๊อ เป กยากลอ โหร่ลู โบ๊ตู่ เร๊อ โต๊โพ๊โต แวโบ๊ตู่ จว๊า งอก๊อถ่อคยาแซ๊, เร๊อ ซีโบ๊ตู่ เต๊เห่ ก๊อถ่อโอ่ ตาวา ลอปลี แวโบ๊ตู่ เร๊อ อา งอแล แฮโต ลอ แวโบ๊ตู่.”

⁸ อาแหม่ เต๊เห่ เฮ๊ฉื่อ ลู เน๊อ, “เน เตเน เน๊อ เน เกเร ทวา คุ๊ย ปา แอ? เน เกเร เป๊อ หนิ หม่าแหน่ เป ปา แอ?” เด๊อ อาเตโอ่เมอแหม่ เน๊อ อาเตเฮ๊เบ่ เต๊เห่ อาขว่าอาคยา, เหย่ซี ลื๊อ ซิเถ่ซิโตโค เล๊อ โป่ ลูลู.

⁹ โทเร๊อ อา โอ่เมอแหม่ โป่ โต๊โพ๊ เร๊อ อา เฮ๊โฉ่โล เป่โป่ เน๊อ อาแหม่ ซีเต๊เห่ เร๊อ อา เฮ๊ เน๊อ, “หนิดา แลแค, แว โอ่เมอแหม่ โป่ เด๊อ อาโร เต๊อเจ่อ, เออ โต๊โพ๊ เร๊อ ต๊อเหมาะ, เล, เน๊อ เฉ่ เช๊อเตเม งอแล ลอ แลแค เด๊อ แวเป๊เส่เง นี๊.”

¹⁰ เร๊อ เบ๊อะ อา เฮ๊โฉ่โล เป่ อาเพ เน๊อ อาแหม่ เต๊เห่ เบ๊อะเนอ, อาเพ ซิพรวา ลู เร๊อ อา เฮ๊ ลู เน๊อ, “เน จว๊าโอ่เมอแหม่ โต่ ฮู๊เออหม่า อาโหง่แลช๊า แฮ ฮู๊เต? เนโหมะ เน๊อ แว เน๊อ เนแหม่ ซีเต๊เห่ เบ่ แฮแด๊งือแลลอ หม่าแหน่ เด๊อ เนเป๊เส่เง ปา แอ?” อา เฮ๊ ลู ฮู๊เนอ.

¹¹ ฮู๊เนอเร๊อ อาแหม่ เต๊เห่ ซิเคว๊ซิเถ่ ลอ แลแค ลู หม่าแน๊เรอ อาเพ โตหม่าเร๊อ เตหรี่เตแก เออ เด๊อ อาซิปล่อกู.

คูโยเซฟ อาแหม่ เต๊เห่ อิเชจว๊า แก ลู เด๊อ อียิปต์เก่

¹² เตอเนอเคเร๊อ คูโยเซฟ อาแหม่ ซีเต๊เห่ เถ่จว๊า เก่ แลแค อาเพซิหมิ เน๊อ เป่ เด๊อ วีเชเคม ช๊า โต๊โผะ.

¹³ เร๊อ เพยาโคบ เฮ๊ คูโยเซฟ เน๊อ, “เนแหม่ ซี จว๊าเก แลแค ซิหมิ เด๊อ วีเชเคม ช๊า โต๊โผะ. แว เฮ๊ เน, จว๊า เกอ เด๊อ เหย่ซีโอ่ เนอ นี๋.” เร๊อ คูโยเซฟ เฮ๊ฉื่อ อาเพ เน๊อ, “อ่อ, อาหนิ แพ๊, เพ.”

¹⁴ เร๊อ อาเพ เฮ๊ โป่ ลู เน๊อ, “จว๊ามอ กู๊แหน่ เร๊อ จว๊าแม๊แม๊ หม่า เนแหม่ ซี โอ่โมโอ่แร๊ ช๊าเหล่ แอ, โทเร๊อ ซิหมิ เน๊อ เป่ ซีเต๊เห่ หม่า อา เม แคร๋ ฮู๊เต เนอ, กาเฮ๊โฉ่โล เป แว นี๊.” เร๊อ อา โอ่ เบ๊อะ เฮโบรน เก่ตอกู เนอเร๊อ อา นอเถ่จว๊า คูโยเซฟ เด๊อ วีแซ๊เก่. เบ๊อะ คูโยเซฟ แฮโต่ เฮ๊อ เด๊อ วีเชเคม ช๊าเบ๊อะเนอ,

¹⁵ แกแย เตเพร แม๊เถอะ ลู เลโทเลแล เบ๊อะ เผร๊ขู่ เนอ เร๊อ อา แด๊เฮอ ลู เน๊อ, “เน จว๊า แม๊ปู แคร๊ อิเต?”

¹⁶ คูโยเซฟ เฮ๊ฉื่อ ลู เน๊อ, “แว จว๊าแม๊ปู แวแหม่ เต๊เห่ แพ๊. เหย่ซี จว๊าเก โต แลแค ซิหมิ เบ๊อะเต โต๊โผะ หม่า เน ซิเง แอ?”

¹⁷ เร๊อ แกแยเพ เออเตเพร เฮ๊ฉื่อ ลู เน๊อ, “เหย่ซี โอ่ เบ๊อะเออ เร๊อ อา เถ่จว๊า แกโท เฮ๊อ, แว หนิโฮ เหย่ซี เฮ๊ เกอเร๊อ ลู เน๊อ, ‘เป่ จว๊า เด๊อ วีโดธาน โป๊!’ อา เฮ๊ เกอเร๊อ แลแค ลู ฮู๊เนอ ว๊า.” ฮู๊เนอเร๊อ คูโยเซฟ ครวาจว๊าเกอ อาแหม่ ซีเต๊เห่ อาคยา, เร๊อ อา จว๊าแม๊เถอะ เหย่ซี เบ๊อะ วีโดธาน อาช๊า เนอ.

¹⁸ หม่าแน๊เรอ เบ๊อะ อาแหม่ ซีเต๊เห่ แม๊เถอะ จว๊าโล ปาแพ๊ ลู, เร๊อ อา แฮโต่ แต่ล๋ายโต่ เบ๊อะเนอ, เหย่ซี เตเน เครเมเซอ แลแค ลู.

¹⁹ เร๊อ เหย่ซี เฮ๊ แลแค เน๊อ, “เด๊อ เนอเล๊, เพรโอ่เมอแหม่ แบ่เจ่ เนอเตเพร แฮ เฮ๊อ!”

²⁰ “จว๊า! เป จว๊าเมเซอแก ลู เร๊อ จว๊าวีตา แก ลู เด๊อ เทอกลื่อกูครา ตูกูกู อากู โป๋, เร๊อ เป กา เฮ๊ เน๊อ เตมีเตแหม่ เต๊อเจ่อ อ่าเซอ แก ลู เฮ๊อ ฮู๊เนอ โป๊! เร๊อ เป โอ่ป่อ แม๊แม๊ โป๊! อาเตโอ่เมอแหม่ เต๊เห่ แตแค๋ อา ทวาแถ่ แจ่ เน๊อ โต่.”

²¹ หม่าแน๊เรอ เบ๊อะ คูรูเบน หนิโฮ เฮ๊อ เหย่ซี เฮ๊ ฮู๊เนอ เบ๊อะเนอ, อา เมแลเปล๊ แก คูโยเซฟ เด๊อ เหย่ซี กู๊ยากู เร๊อ อา เฮ๊ เน๊อ, “เป เมเซอ ลู โต่ โป๊!”

²² คูรูเบน เฮ๊ โป่ เหย่ซี เน๊อ, “จว๊าเมเซอ แต ลู เหม่. วีตาแก ลู เด๊อ เทอกลื่อกูครา โอ่ เด๊อ เก่เชเทอแก่กู เออ, เมเซอ อา เน๊อ ซีเหน่ เร๊อดื่อ แต่ เหม่ นี๊.” คูรูเบน เฮ๊ ฮู๊เออเนอ หม่า อา เซเร เมแลเปล๊ คูโยเซฟ เด๊อ เหย่ซีกู๊ยากู เร๊อ อา เกเร เอ๊กาคยาแซ๊ ลู เด๊อ อาเพโอ่ แพ๊.

²³ ฮู๊เนอเร๊อ เบ๊อะ คูโยเซฟ แฮโต่ เฮ๊อ เด๊อ อาแหม่ เต๊เห่โอ่ เบ๊อะเนอ, เหย่ซี โปล๊แกลอ ลูจาจว่าทู ตว่า แหน่เจ๊อ เด๊อ อาแซ๊ เกอเร๊อ เออตือปือ.

²⁴ เร๊อ เหย่ซี วีตาแก ลู เด๊อ เทอกลื่อกูครา. เทอกลื่อ เออตื๊อกลื่อ หม่า อา ครา แพ๊ เร๊อ เทอ โอ่ เตอเจ๊อโต่.

²⁵ โทเร๊อ เบ๊อะ เหย่ซี โอ่แน เอ่ เฮ๊อ เฉ่ เบ๊อะเนอ, เหย่ซี แม๊จว๊า เร๊อ อา แม๊เถอะ แลแค อิชมาเอลเมวเจ่อพู๊ เบ๊หมู่ โอ่ เด๊อ กิเลอาดเก่ แฮ. เด๊อ เหย่ซี ตีซิโบดุลู เนอ อา แด่จว๊าหนิ แลแค เตโนมื๊อ เด๊อ เหล่โท๊โนมื๊อ เน๊อ อิซุ๊ยเต๊เห่, เซ๊อหรี่ เตขุโนมื๊อ ตี๊กิ เน๊อ มู๊หร่าเทอโนมื๊อ เร๊อ อา แด่จว๊า แลแค เด๊อ อียิปต์เก่.

²⁶ คูยูดาห์ เฮ๊ อาโป่แหว่ เต๊เห่ เน๊อ, “เป่ เก่ เมเซอ แก เป โป่ เร๊อ เป เก่ เมบี๊เมโอ๊ เร๊อ ลูโล เฮ๊หม่า, อาบุ๊ยเตอเรอ โอ่ อิเต?

²⁷ อา หม่า เปโป่ เร๊อดื่อ, เปสุ่ยเปเทอ เร๊อดื่อ แพ๊ เออ, พื๋อ เน๊อ เป เกเร เมเซอ ลู เนอ เร๊อ, จว่า! เป จว๊าอิเซ แก ลู เน๊อ อิชมาเอลเมวเจ่อพู๊ เนอเต๊เห่ โป๊!” เร๊อ อาโป่แหว่ เต๊เห่ จู เกอลอ ลูโหง่.

²⁸ ฮู๊เนอเร๊อ เบ๊อะ มีเดียนเมวเจ่อ เพรเมกื่อเมค๊า เต๊เห่ แฮโต่ เฮ๊อ เบ๊อะเนอ, อาแหม่ซี จุ่ยแถ่ คูโยเซฟ เด๊อ เทอกลื่อกูครา เร๊อ เหย่ซี อิเชแก ลู เน๊อ เพรเมกื่อเมค๊า เต๊เห่ เน๊อ รือหย่า อาเบ่ เนอเชอ. เร๊อ เหย่ซี เอ๊จว๊า หนิแก คูโยเซฟ เด๊อะ อียิปต์เก่.

²⁹ เบ๊อะ คูรูเบน กาโต่ เด๊อ เทอกลื่อกู เออ เร๊อ อา กาแม๊เถอะ ปา คูโยเซฟ เบ๊อะเนอ โต่ เบ๊อะเนอ, อา ซิเปล เร๊อ อา ท๊อยา เกอเร๊อ อาจา.

³⁰ เร๊อ อา กาคยาโต เด๊อ อาโป่แหว่ เต๊เห่ อาโอ่ เร๊อ อา เฮ๊ เน๊อ, “เปโป่เพรคู โอ่ ปา โต่ ว๊า! แว เบ่ เม ปา ฮู๊เต?”

³¹ เหย่ซี เมเซอ เป่พู๊ โตโด โทเร๊อ อา พย๊า คูโยเซฟ อาจาจวาทู เออ เร๊อ อา เจโน แก ลูจา เด๊อ เป่สุ่ยเกล.

³² เหย่ซี พย๊ากาหนิ ลูจาจว่าทูตว่า เออ ตือปือ เด๊อ อาเพโอ่ เร๊อ เหย่ซี เฮ๊ แลแค เน๊อ, “เป แม๊เถอะ จา เออ, จา เออ ตือปือ หม่า เนพู๊ อาจาจวาทู หม่า แอ หม่าโต่ แอ เนอ, เน แม๊ ตาเต แม๊แม๊ เล๊.”

³³ อาเพ โตม๊าหนิแร๊ จา เออ เร๊อ อา เฮ๊ เน๊อ, “เออ หม่า แวพู๊ อาจาจวาทู หม่าแหน่ เฮ๊อ! เตมีเตแหม่ เต๊อเจ่อเจ่อ อ่าเซอแก เฮ๊อ ลู เฮ๊อ. อา อ่าหมื่ออ่าปล๊า ลอเจ๊อ เฮ๊อ คูโยเซฟ เฮ๊อ.”

³⁴ เพยาโคบ เด๊อะโล อาเตซิเปล เร๊อ อา ท๊อยา อาจา เร๊อ อา แซ๊แถ่ ติ เห่อจา ตูพรู๊ เร๊อ อาโหง่อาเห่ ม๊อเนอม๊อเซ งย๋า แหน่เจ๊อ เด๊อ อาพู๊เง.

³⁵ ล๋อ อาพู๊เพรคู เน๊อ อาพู๊เพรเหมาะ เต๊เห่ แอ๊จื๊อ แฮ อิลออี๊ ลู ตื๊อดื่อเร๊อ อา จู อิลออี๊ เน๊อ อาเหน่ โต่ เร๊อ อา เฮ๊ เน๊อ, “แว โอ่อี๋ แหน่โต่. แว เก่โหง่เก่เห่ โต่ เด๊อ แว เซอ เร๊อ เก่ จว๊า โอ่เต่อเกอ เน๊อ แวพู๊ เด๊อ โลเก่เน๊ดอ ปา.” เร๊อ คูโยเซฟ อาเพ โหง่เห่ เป่แฮ หนิโป่ ลูเง.

³⁶ เบ๊อะเนอเค, มีเดียนเมวเจ่อพู๊ เต๊เห่ อิเชแก คูโยเซฟ ฮู๊ หลู่ เตเพร เบ๊อะ อียิปต์เก่กู เนอ. เร๊อ อา อิเช เน๊อ เกลอกู่กล๊อดุ โปทิฟาร์. เกลอกู่กล๊อดุ โปทิฟาร์ หม่า อา เม เป่ อียิปต์เก่คุ๊ย อาเตเม. อา ทวา เพรโอ่ป่อเตเกบี๊ หนิ คุ๊ย เต๊เห่ อากู่กล๊อ.