ทิโมธี เนอบ่า ต๊าบ่า 2 - ลีเทส่อพ๊าอาเซ เร๊อ เห่ขุทวาลู๊

เหย่ซู่ครี๊ อาเกลอฮู๊ เด๊อ อา ซิปล่อจ๊อ เตเพร

¹ ฮู๊เนอ อาขว่าอาคยา, แวพู๊คู๋, แด่ฉว่าแด่ชอ เน ซิปล่อ เน๊อ เตบุ๊ยเตเตอเรอ เด๊อ อา โอ่ เด๊อ เหย่ซู่ครี๊ อากูเออ เนอ นี๋.

² พย๊าหนิ เตอิซว๊า เด๊อ เน หนิโฮ โทเฮ๊อ เด๊อ แว เฮ๊โฉ่เป่ โทเฮ๊อ เน เด๊อ เพรข่าเฮ๊โล แกแยโอ่โร๊ อา เป๊เส่เง เนอเต๊เห่ นี๋. เร๊อ เด๊อะตา แฮเง เต เออเต๊เห่เนอ เน๊อ แกแย เด๊อ อาตาอาเต เหล่ซิเลหนิ อา เร๊อ อา อิซว๊าแจ่ แฮเง เป่ อู เนอเต๊เห่ อา กู๊ยากู นี๋.

³ ข่าโหร่เกอ เตแป่เตเช เน๊อ ครี๊พู๊ เด๊อ อาโร เต๊เห่ ฮู๊ เหย่ซู่ครี๊ อาเกลอฮู๊ เด๊อ อาแร๊ เตเพรเนอ นี๋.

⁴ เกลอฮู๊ เด๊อ อา โอ่ เด๊อ เตเอ่เตแร อากู เตเพรเนอ, อา ย๋อ ซิหยื่อ เมโตเมโม อา เกลอฮู๊กู่กล๊อ อาซิปล่อ อาขว่าอาคยา, อา โต เม ดู๊แด หนิ อาเหน่ เร๊อ เตเอ่เตแร เด๊อ อาโร เต๊เห่ โต่.

⁵ แกแย เด๊อ อา ดี๊เจ เต เตเพรเนอ, เก่ อา หนิดา เมครวาเกอ เตดี๊เจ อา เตซว๊าเตแส่ โต่ เฮ๊เนอหม่า, อา พย๊าหนิแจ่ เกออู เตดี๊เจ อาคว๊าอาเก่ โต่.

⁶ แกแย เม เพร๊ เด๊อ อาครือ เตเพรเนอ, อา โต พย๊าหนิ เหร่อเล๊อ ส่อเส่เหว่โพ เต๊เห่ แพ๊.

⁷ เตเน ตาเต แลแค เต เด๊อ แว เฮ๊เออเนอ, เมเตเฮ๊เรอ แบ่เจ่ เก่ เด๊อซิเงโปล หนิลอดื่อ เน เตปว๋า เต๊อเจ่อ ปา.

⁸ ซิเหน่แถ่ แลแค เหย่ซู่ครี๊ เด๊อ จอแปแหร่ เมเซอเพร กาคยา อา เด๊อ เตเซอ เออเนอ เตเพร. อา หม่า หม่าเฮ๊อ ดาวิด อากลุยอาแล เฮ๊อ. เตซิครือมีลา เด๊อ แว แด๊โฉ่โด่แน เป่ ซี เออเนอหมา เหย่ซู่ เออ อาหรี่อาแก เฮ๊อ.

⁹ แว ย๋อ แด๊โฉ่โด่แน เป่ อู เตซิครือมีลา อาขว่าอาคยาเร๊อ, แว ข่าเบ่เฮ๊อ เตจาเตจือ เร๊อ อู จอกลอหม่า เจ๊อ แว เน๊อ สู่เปลอต่อเท๊ แซ่เน๊อ แกแย เมซื๊อ เตซว๊าเตแส่ เตเพร เจ๊อ. หม่าแน๊เรอ จอแปแหร่ อาลาอาโหง่ เนอ อู จอกลอหม่าแจ่ อา โต่.

¹⁰ ฮู๊เนอเรอ แซ่ฮู๊ แกแย เด๊อ จอแปแหร่ นว๊าแถ่ ลู เต๊เห่ เก่ พย๊าหนิเกอ เตเมแลเปล๊กา เน๊อ เตลีเตเค ตูจูเพร เด๊อ เหย่ซู่ครี๊ อากู เออเนอ เร๊อ, แว แด่ทูซิปล่อ เป่ เหย่ซี แพ๊.

¹¹ เตเฮ๊เบ่ โอ่ เน๊อ, “เป เก่ เซอเต่อเกอ เฮ๊อ เน๊อ ครี๊ เร๊อ เป เก่ เซอเพร เต่อเกอ เน๊อ อา ปา.

¹² เป เก่ แด่ทูซิปล่อ เต เฮ๊เรอ, เป เก่ เป๊อ เต่อเกอ เต เน๊อ อา ปา. เป เก่ เท๊แก อา เร๊อ อา เก่ เท๊แกเกอ เป ปา.

¹³ เป เก่ จ๊อ เร๊อ อา โต่ หม่าแน๊เรอ อาจ๋อ ตือดื่อดื่อ ปา เน๊อ เป ปา, เมเตเฮ๊เรอ อา เท๊บี๊ แลหนิ แจ่เร๊อเกอ อาเหน่โต่.” เตเฮ๊เบ่ เออเต๊เห่ หม่า อาจ๊ออาเต แพ๊.

เพรแรเต เด๊อ อาโต จอแปแหร่ อาซิปล่อ เตเพร

¹⁴ เด๊อะ ซิเหน่แถ่ คยาแซ๊ ล๋อ เพรหยื่อเอ่ เออ เนอเต๊เห่ เน๊อ เตเออเต๊เห่ นี๋. เร๊อ แซ่ฮู๊ เหย่ซี เก่เคร๊เก่แขระ เกอ เร๊อ คยาลู เร๊อ โหง่เฮ๊เบ่ เออเต๊เห่ แต่เหม่เนอ นอรอ นอเร ส่าเผร่ เหย่ซี เด๊อ แบ่เจ่ อา เป๊เส่เง เนอ นี๋. เตเนอเต๊เห่ หม่า อา เมแร๊ เต หม่าโต่. โท๊โต่ อา เมปย๊าเมหลู่ แพ๊ แกแย เด๊อ อา แฮ หนิโฮ เหย่ซี เคร๊แขระ เกอเร๊อ คยาลู เน๊อ โหง่ เนอเต๊เห่ แพ๊.

¹⁵ แซ่ฮู๊ เน เก่ เมโตเมเบ่ ฮู๊ จอแปแหร่ อา เตซิหยื่อ เนอ, โท๊โต่ แซ่ฮู๊ เน เก่ แซ่เน๊อ เพรแรเต เตเพร เด๊อ อา ซิเตเร เกอเร๊อ อา เตเอ่เตแร โต่, โท๊โต่ แซ่ฮู๊ เน เก่ ทวาดื่อ แกแย เด๊อ อา อิซว๊าโต อิซว๊าเบ่ เป่ อู เน๊อ จอแปแหร่ อาลาอาโหง่ อา เตหมะเตจ๊อ เตเพร อาเงเนอ, แอ๊จื๊อ เมแร๊แร๊ เจ๊อ นี๋.

¹⁶ จว๊าวอ เควอแก เตเฮ๊เบ่ เด๊อ อา แด่หยื่อแด่แหน่ จอแปแหร่ โต่ เนอเต๊เห่ นี๋, เมเตเฮ๊เรอ เตเฮ๊เบ่ ฮู๊เนอ เต๊เห่ หม่า แตแกล๊ เน๊อ อา ซู ตาพา ยาจว๊า ยาจว๊าแก อู เร๊อ เตแด่หยื่อแด่แหน่ จอแปแหร่ เนอแพ๊.

¹⁷ เต เด๊อ แกแย เออเต๊เห่ โด่แน เนอหม่า, อาแซ่เน๊อ เตจู่เตแท เด๊อ อา เอ่ ตาพรอแก พ๊าหย่า เนอเต๊เห่ แพ๊. แกแย โอ่ ซิเนอ เด๊อ อา เมเต ฮู๊เออ เนอหม่า หม่าเฮ๊อ คูฮีเมเนอัส เร๊อ คูฟีเลทัส.

¹⁸ เหย่ซี จว๊า ตาพาแก เตหมะเตจ๊อ อาแกล๊ เร๊อ เหย่ซี เฮ๊ แลแค เน๊อ, เตเซอ ก๊อถ่อ เซอเพร กาคยา เนอหม่า อา ทวาแถ่ โทเฮ๊อ อา เฮ๊ แลแค ฮู๊เนอ อาขว่าอาคยา, อา เมปย๊าแก ลอ แกแย เต๊เห่ อา เตหยื่อเตแหน่.

¹⁹ หม่าแน๊เรอ อู เม โกโยแจ่ เน๊อ จอแปแหร่ อา เตแก่ช๊า อาหม่าอากลอ เออเนอ โต่. เด๊อ เตแก่ช๊า เออ อาโอ่เนอ อู ราโอ่ เน๊อ, “แบ่เจ่ ซิเง เกอเร๊อดื่อ อาแกแย” เร๊อ “แกแย ปว๋า เตเพร เด๊อ อา เฮ๊ เร๊อ แว หม่า แบ่เจ่ อาแกแย เต๊เห่เนอหม่า, อา โตเบ่ ตีรี๊ จว๊าโค๊แก อาเหน่ เร๊อ เตซื๊อ เออเนอ.”

²⁰ เด๊อ แกแย ดุแหย่ หี่เตเม อากูเนอ ดีปอดีโด โอ่ อาเมวเมว อาเจ่อเจ่อ เจ๊อ. เต๊เห่เห่ เนอ อู เม อา เน๊อ รือเท, เต๊เห่เห่ เนอ อู เม อา เน๊อ ส่อ, เต๊เห่เห่เนอ อู เม อา เน๊อ เห่. เต๊เห่เห่ เน๊อ อู นอเอ่ อา เบ๊อะอู โหล่ดุ โค๊ดื่อ อา เค, เต๊เห่เห่ เนอ, อู นอเอ่ เน๊อ เหมาะเฮ๊เหมาะลี อาเง แพ๊.

²¹ แกแย เตเพรเพร เก่ เม อาเม โพ๊แปละแถ่ คยาอาเหน่ เน๊อ เต เด๊อ อา วี๊ ลู เนอเต๊เห่ เฮ๊เนอ, อา ทวาแถ่ ดีปอดีโด เต๊อเจ่อ เด๊อ อู นอเอ่ อา เบ๊อะอู โหล่ดุ โค๊ดื่อ อา เบ๊อะเนอ เฮ๊อ. อา แด่บูโพ๊ อาเหน่ อาขว่าอาคยาเร๊อ, อา ทวาบุ๊ยทวาเตอเรอ เด๊อ อา แบ่เจ่ อาเง. โทเรอ อา โอ่ ตี๊หรี่แตแร อาเหน่ เน๊อ อา เตเร เมแร๊ เต ล๋อ ปลี อาเง เฮ๊อ.

²² จว๊า ตาพาแก เน๊อ พู๊เส่ อา เตซิหยื่อซิลอ แร๊โต่ เนอเต๊เห่ นี๋, เร๊อ ลือ แลแค เตจ๊อเตเต, เตหยื่อเตแหน่, เตโม เน๊อ เตตู๊จุเตอเจ๊อ, เร๊อ โอ่เต่อเกอ เน๊อ แกแย เด๊อ อา เอ๊โทแถ่ แบ่เจ่เน๊อ อาซิปล่อ เด๊อ อา อาโพ๊อาแปละ เนอเต๊เห่ นี๋.

²³ จว๊า ตาพาแก เน๊อ เตเคร๊แขระ แกเด เด๊อ อาโหง่แลช๊า โอ่โต่ เนอเต๊เห่ นี๋. เน ซิเง เน๊อ เต เออเต๊เห่เนอ เด๊อคยา ตื๊อดื่อ ปาหม่า อา เด๊อะโอ่ ทวาแถ่ เตกย๊าตางา คยาลู แพ๊.

²⁴ แบ่เจ่ อาหลู่เล๊ เตเพร เฮ๊เนอหม่า อา โต เบ่กย๊าเบ่งา หนิ อู โต่, โท๊โต่ อา โต เฮ๊เบ่ ซิโดซิ งา เด๊อ อู ล๋อปลี อาขุ, โทเรอ อา โตเบ่ หม่า ซ๊าร๊า เด๊อ อาแร๊ เร๊อ อา แด่ทูซิปล่อ เตเพร.

²⁵ เบ๊อะอา อิซว๊า แร๊ กาคยา แกแย เด๊อ อา เท๊ฉื่อ อา เต๊เห่ เบ๊อะเนอ, อา โต เฮ๊เบ่ ซิโดซิ งา อู. แตแร๋ หม่า, จอแปแหร่ เก่ เด๊อะหนิ เป่ เหย่ซี ค๊าขิ แร๊ เด๊อ อา เก่ ถู่แหล่ เต๊เปล่ อาซิปล่อปา เร๊อ อา เก่ ซิเง แถ่คยา เตหมะเตจ๊อ ปา.

²⁶ เร๊อ เหย่ซี เก่ ซิเงแถ่ หนิคยา อาเหน่ ปา เร๊อ อา เก่ เมแลเปล๊กา เกอเร๊อ อาเหน่ เน๊อ โลเน๊มู๊แหม่รีแจ่ กู่กล๊อ แตแจ เออ อากู ปา. หม่าเมเตเฮ๊เรอ โลเน๊มู๊แหม่รีแจ่ กู่กล๊อ ปื่อหนิ เฮ๊อ เหย่ซี เร๊อ อา นอเม เฮ๊อ เหย่ซี ฮู๊ อาโต ลูซิปล่อ เนอ เฮ๊อ.