ยอห์น เนอบ่า ต๊าบ่า 1 - ลีเทส่อพ๊าอาเซ เร๊อ เห่ขุทวาลู๊

¹ แว หม่า โหมะพรูโหมะเผร่ เด๊อ อา ทวา ทวาดุทวาเต เตเพร เร๊อ แว ราจว๊าเป่ ลีเออ เด๊อ โหมะ เด๊อ จอแปแหร่ นว๊าแถ่ อา เออเนอ เตเพร เร๊อ อาพู๊ ซีเต๊เห่ อา โอ่. ซี หม่า แกแย เด๊อ แว โมเร๊อ หม่าแหน่ เจ๊อ เต๊เห่. แว เตเพร โม ตื๊อดื่อ ซี เนอ หม่าโต่, แกแย เด๊อ อา ซิเง เตหมะเตจ๊อ ปว๋า เตเพร เต๊เห่ โมเร๊อ เกอดื่อ ซีซี.

² เด๊อ เตหมะเตจ๊อ โอ่ แลโหล่แลแกล เด๊อ เปกู อาขว่าอาคยา, เป โม เร๊อดื่อ ซี แพ๊. เตหมะเตจ๊อ เออเนอ อา เก่ โอ่ ตื๊อดื่อ เกอดื่อ เร๊อ เป ตูจูเพร แตแลเคร๊ ปา.

เตเฮ๊โมเฮ๊แร๊

³ เพ จอแปแหร่ เร๊อ อาพู๊คู เหย่ซู่ครี๊ เก่ เด๊อะตาดื่อ เป เด๊อ อา หนิดา จูเอ่ เตหมะเตจ๊อ เร๊อ โม เกอเร๊อ ลู เตเพร เร๊อ เตเพร เออเต๊เห่ เตบุ๊ยเตเตอเรอ, เตซิยอกล่าเบ่ เร๊อ เตเพรอาดือ เออเต๊เห่ นี๋.

เตหมะเตจ๊อ เร๊อ เตโม

⁴ แว แม๊เถอะเฮ๊อ เนพู๊เนเลอ เต๊เห่ โอ่เซอเพร เด๊อ เตหมะเตจ๊อ อากู ฮู๊ เพ จอแปแหร่ เมแก เป โหง่ เนอ อาขว่าอาคยา แว ซิครือ แหน่เจ๊อ.

⁵ โหม, กู๊แหน่เออ แว กุยซิยอ เน, เป เก่ โม เกอเร๊อ ลอ แคลู เตเพร เร๊อ เตเพร โป๋. แว รา เป่ เน โหง่เฮ๊แก เออตือมือ เนอหม่า อาเซ หม่าโต่, โหง่เฮ๊แก เด๊อ เป พย๊าหนิน๊อ โทเฮ๊อ เด๊อ กูลู่เค เนอ ตือมือ แพ๊.

⁶ เตโม อาโหง่แลช๊า หม่า, เป โอ่เซอเพร ครวา หนิดา จอแปแหร่ โหง่เฮ๊แก เนอเต๊เห่ เฮ๊อ. ฮู๊ ซี ล๋อ ปลี หนิโฮ โทดื่อเฮ๊อ โหง่เฮ๊แก เด๊อ กูลู่ เค เร๊อ อา เฮ๊ เนอ, ล๋อ ซีเออ เต๊เห่เนอ ซี โตเบ่ โอ่เซอเพร เด๊อ เตโมเร๊อ ลู อากู, อา เฮ๊ ฮู๊เนอ.

⁷ เพรอิลออี๊โหล่ อู โอ่โลแถ่ เอ๊ลู เด๊อ เห่ขุ เออ เฮ๊อ. เหย่ซู่ครี๊ แฮแล เด๊อ เห่ขุเออ, อา แฮ เร๊อ แกแยเห่ขุพู๊ อา สุ่ยเทอพ๊าหย่า เนอ, เหย่ซี เนอเต๊เห่ หม่า อา อ๊อแล เกออู โต่. แกแย เด๊อ อา อ๊อแล เกออู ฮู๊เนอ โต่ เตเพรเพร เฮ๊เนอหม่า หม่าเฮ๊อ แกแย อิลออี๊โหล่ อู เฮ๊อ. เร๊อ อา หม่า หม่าเฮ๊อ แกแย เด๊อ อา ซิเถ่ ครี๊ เนอ เตเพร เฮ๊อ.

⁸ ฮู๊เนอ อาขว่าอาคยา, แซ่ฮู๊ ซี พย๊าหนิ โทเฮ๊อ เตเนอเต๊เห่ เก่ โอ่เหม่แก เป่ แต่ ซี แต่เหม่. โท๊โต่ แซ่ฮู๊ ซี เก่ พย๊าหนิ เล๊อบา ลอ ซี เตเมหนิคว๊าเก่ อาเงเนอ, รอหนิ แลแค ซีเหน่ นี๋.

⁹ แกแย เด๊อ อา โอ่หม่าโอ่กลอ เกออู เด๊อ ครี๊ อา เตอิซว๊าอี๊แส่ อากู โต่, เร๊อ อา ฉู่โนเล๊อ โป่ อา เตอิซว๊าอี๊แส่ เต๊เห่ เด๊อ ครี๊ อา เตอิซว๊าอี๊แส่ อากู เต๊เห่เนอ, จอแปแหร่ โอ่เกอ เร๊อ เหย่ซี โต่. แกแย เด๊อ อา โอ่หม่าโอ่กลอ เด๊อ ครี๊ อา เตอิซว๊าอี๊แส่ อากู เต๊เห่เนอ, เพเร๊อพู๊ ซิเนอลอ เก่ โอ่เกอ เร๊อ เหย่ซี แพ๊.

¹⁰ ฮู๊เนอ อาขว่าอาคยา, แกแย เตเพรเพร เก่ แฮ เด๊อ ซี โอ่ เฮ๊เรอ อา เก่ พย๊าแฮหนิ เตอิซว๊าอี๊แส่ เออเต๊เห่ โต่ เฮ๊เนอ, เอ๊ฉื่อ แต่ อา เด๊อ ซี หี่ด๊อกู แต่เหม่ นี๋. “เตเพรอาดือ เก่ โอ่ดื่อ เร๊อ เน นี๋,” เฮ๊ฉื่อ แต่ อา ฮู๊เนอ แต่เหม่ เหม่.

¹¹ เมเตเฮ๊เรอ แกแย เตเพรเพร เด๊อ อา เอ๊ฉื่อ ลู เนอ, อา ทวาแถ่เฮ๊อ เพรเม เต่อเต เร๊อ ลู เด๊อ เม เตมู๊แหม่รีแจ่ อากู เฮ๊อ.

เฮ๊เบ่ ตื๊อดื่อแก โหง่ เด๊อคยาเล๊อ

¹² แว ซิหยื่อ แด๊โฉ่ เป่ เอ๊ลู ปา ซี โหง่เต๊เห่ หม่าแน๊เรอ แว ซิหยื่อ รา อา เร๊อ เจบ่า เร๊อ ลีโบเทอ โต่. หม่าแน๊เรอ แซ่ฮู๊ เป เก่ โอ่ เร๊อ เตซิครือ เล๊อเล๊อบาบา อาเงเนอ, แว แม๊ชือ เด๊อ แว เก่ แฮ เด๊อ ซี โอ่ เร๊อ เป เก่ แม๊เถอะ ตาฉื่อ เฮ๊เบ่ คยาแซ๊ลู เตเพร เร๊อ เตเพร ปา.

¹³ ซี โป่แหว่ เพรเหมาะ เด๊อ จอแปแหร่ นว๊าแถ่ อา เตเพร อาพู๊อาเลอ เต๊เห่ ซูแฮ เป่ ซี อาเตเฮ๊โมเฮ๊แร๊ เออเต๊เห่.