โครินธ์ อาเหร่อเล๊อ ต๊าบ่า 16 - ลีเทส่อพ๊าอาเซ เร๊อ เห่ขุทวาลู๊

โถ่ปล๊อ เตเมหลู่เมแต เด๊อ จอแปแหร่ อาแกแย เต๊เห่ อาเง

¹ กู๊แหน่เออ, แว ซิหยื่อ เฮ๊ ซี เร๊อ ซี โถ่ปล๊อ รือ เตหลู่แต เด๊อ ซี เก่ เมจว่า เร๊อ เพรหยื่อเอ่ เออ เด๊อ อา โซพ๊าโซแร เร๊อ อา โอ่ เด๊อ ยูดาห์เก่กู เนอเต๊เห่ อาหรี่อาแก. แว ซิหยื่อ เฮ๊ ซี เร๊อ ครวาเมเกอ ฮู๊ แว เฮ๊แก กาลาเทีย เพรหยื่อเอ่เต ตู๊หมู่ตอกล๊อ เนอเต๊เห่ เบ่เม เนอ.

² ปว๋า โพ๊โพ๊ เบ๊อะแบเจ่ เหย่ซู่ ครี๊ ก๊อถ่อคยา ม๊อเนอโด่ เบ่ เฮ๊อ เนอ, ซี เตเพร เร๊อ เตเพร โต เบ่แด่ โอ่ปล๊อแกโค๊ ซี รือโน เตเกล๊ เร๊อ เตเกล๊ อากู เนอ. ซี เก่แด่โอ่ปล๊อ เต่อ ลอ ลู ฮู๊เนอ เฮ๊เรอ ช๋า แว แฮโต่เฮ๊อ อาเคปาเนอ, ซี โหล่ จว๊าลือ โถ่ปล๊อ ปาโต่ เฮ๊อ.

³ ช๋า แว แฮโต่ ปา เนอ, ซี โตเบ่ นว๊าแถ่ แกแย เต๊เห่ เด๊อ อา เก่ เบ่ จว๊าซู เป่ อู รือ เด๊อ วีเยรูซาเล็ม ปา. เร๊อ แซ่ฮู๊ แกแย เด๊อ อา เก่ พย๊าฉื่อ รือเออ ปา เต๊เห่ เก่ ซิเง เร๊อ อู เด๊อ รือ เออเนอ เร๊อ เตหรี่เตแก อิเต อาเงเนอ, แว เก่ ราจว๊าหนิ เป่ เพรพย๊าฉื่อ รือ เนอเต๊เห่ ลี ต๊าบ่า ปา, เร๊อ แว นอพย๊าจว๊าหนิ เร๊อ เหย่ซี ปา.

⁴ เบ๊อะเนอเค ปา, แว โหล่ โต จว๊า เต่อเกอเร๊อ เหย่ซี ปา เก่เฮ๊เรอ เหย่ซี เก่ จว๊าโหร่เกอ เร๊อ แว ปาหม่า อาหนิ แพ๊แพ๊.

คูเปาโล อา เตเตเนหนื่ออื่อ

⁵ แว โหล่ จว๊าโนเหร่อ เด๊อ มาซิโดเนียเก่ อาขว่าอาคยา, ช๋า แว จว๊าโน โทเฮ๊อ เด๊อ มาซิโดเนียเก่ ปา เนอ, แว เก่ แฮ แฮเง เด๊อ ซี โอ่ ปา.

⁶ แว เก่ แฮ โอ่เล งยา เกอ ซี ตี๊กิ ปา เก่. ตาแร๋ หม่า แว โอ่ปลื๊อ ตาลว๊า เกอ ซี เร๊อ เก่โหร่เค เออ ปา เก่. โทปาเรอ, แว เก่ จว๊า แฮเง โป่ แกล๊ ปา. เร๊อ แว เก่ จว๊า แฮเง โป่ แกล๊ เบ๊อะเต๋ โต๊โผ่ ปาเนอ เบ่เบ่, แว แม๊ชือ เร๊อ ซี เก่ เมจว่าเบ๊ แว แพ๊.

⁷ แฮ โอ่เล แพ๊ เตอเปลอฮู๊ เร๊อ แว ซิหยื่อ แฮ โอ่เล โต่. แบ่เจ่ เก่ ซิปล่อโอ่ เฮ๊เรอ, แว ซิหยื่อ แฮ โอ่เล งยา เกอ ซี ตี๊กิ.

⁸ แว เก่ จว๊า โอ่ เบ๊อะวีเอเฟซัส อากู เนอ ปา เร๊อ แว เก่ โอ่ โต่เด๊อ ป่วย เด๊อ อู เอ๊ เร๊อ เพ็นเทคศเต โท เนอ ปา.

⁹ แกแย เด๊อ อา ซิเถ่ซิฮา แว เต๊เห่เนอ อา โอ่ เอ๊แหน่เจ๊อ หม่าแน๊เรอ แว จว๊า โอ่ เบ๊อะวีเอเฟซัส อากู เออเนอ อา งูดุงูชอ แหน่เจ๊อ เด๊อ แวเง เจ๊อ, เมเตเฮ๊เรอ แกแย เด๊อ อา ซิหยื่อ หนิโฮ จอแปแหร่ อาลาอาโหง่ เต๊เห่เนอ อา โอ่ เอ๊ แหน่ปาเจ๊อ.

¹⁰ ช๋า คูทิโมธี แฮ เต่อเกอ ซี ปา เบ๊อะเนอ, แม๊ตู่ แร๊ อา นี๋, เมเตเฮ๊เรอ อา หม่า แบ่เจ่ อาหลู่เล๊ เตเพร เด๊อ อา แซ่เกอดื่อ เร๊อ แว เออเนอ เฮ๊อ.

¹¹ ซี เบ่ เตเน ปีตี๊หนิ ลู เตเพร่ว โต่. แซ่ฮู๊ อา เก่ กาโต่เบ๊ คยา เด๊อ แว โอ่, โท๊โต่ แซ่ฮู๊ อา เก่ จว๊า แฮเง โมโม แร๊แร๊ โป่ แกล๊ เด๊อ เง ตากยา อาเงเนอ, ซี เบ่ เมจว่า ลู, เมเตเฮ๊เรอ แว โอ่ป่อแม๊ชือ อา เร๊อ อาโค โป่แหว่ ครี๊พู๊ เด๊อ อาโร เต๊เห่ เก่ กาโต่ โหร่ลอ ลู เด๊อ แว โอ่.

¹² คูอปอลโล หม่า เป โป่แหว่ ครี๊พู๊ เตเพร. อา เกอลาติ เร๊อ แว นอฉว่า แหน่เจ๊อ ลู เด๊อ อา เก่ จว๊าโอ่เล เกอ ซี เร๊อ อา เก่ ครวาจว๊าเกอ เร๊อ เป โป่แหว่ ครี๊พู๊ เด๊อ อา จว๊าโอ่เล เกอ ซี เนอเต๊เห่ หม่าแน๊เรอ อา เฮ๊ เร๊อ กู๊แหน่เรอ อา ซิหยื่อ จว๊าโอ่เล ล๋ายโต่, ช๋า ม๊อเนอ ตาโตตาเบ่ ปาเรอ อา จว๊าโอ่เล โหน่ ซี ปา อา เฮ๊ ฮู๊เนอ.

เตเฮ๊เบ่ เด๊อคยาเล๊อ เต๊เห่

¹³ แว โป่แหว่ ซี๋, โอ่ส่าเซ แลแค ซีเหน่ ปว๋า โตโพ๊ นี๋, ก๊อถ่อ แตแนหม่า แลแค เด๊อ ซี เตหยื่อเอ่ ครี๊ เออ อากูเนอ นี๋, แด่ บื่อ เกอ แลแค ซี ซิปล่อ นี๋, แด่ฉว่าแด่ชอ แลแค ซี ซิปล่อ เด๊อ เตหยื่อ อากูเนอ นี๋.

¹⁴ ซี เม เต อิเตเต๋ เบ่เบ่, โมเร๊อ อู เร๊อ เม แลแค นี๋.

¹⁵ คูสเทฟานัส เร๊อ อา ตี๊หี่แตแพพู๊ อาหรี่อาแก เนอหม่า ซี ซิเง ลอดื่อ เฮ๊อ. เด๊อ อาคายาเก่กู เนอหม่า, เพร เด๊อ อา หยื่อเอ่แหน่ กา เหร่อเล๊อ อู ครี๊ หม่า เหย่ซี เนอเต๊เห่ เฮ๊อ. เร๊อ เหย่ซี เมจว่า จอแปแหร่ อาแกแย เนอเต๊เห่ ปว๋า โตโพ๊ เจ๊อ.

¹⁶ แว โป่แหว่ ซี๋, แว กุยซิยอ ซี๋, แกแย เด๊อ อา ทวา ทวาดุทวาเต แซ่เร๊อ คูสเทฟานัส เร๊อ อาโค เพรเมเต่อ ลู เต เต๊เห่ เฮ๊ ซี เร๊อ หนิดา แลแค เหย่ซี เนอเต๊เห่ อาโหง่ นี๋.

¹⁷ ซีโค ดอกูพู๊ คูสเทฟานัส, คูฟอร์ทูนาทัส เร๊อ คูอาคายคัส เต๊เห่ แฮโต่ เร๊อ แว ซิครือ แหน่เจ๊อ. ซี โอ่ ยา เร๊อ ซี แฮ แม๊เถอะเบ๊ แว โต่ หม่าแน๊เรอ กู๊แหน่เออ เหย่ซี แฮ แม๊เถอะ เฮ๊โมเฮ๊แร๊เบ๊ แว อาขว่าอาคยา, อา แซ่เฮ๊อ เน๊อ ซี แฮ แม๊เถอะฉื่อ เฮ๊โมเฮ๊แร๊ แว เฮ๊อ.

¹⁸ ฮู๊ เหย่ซี เม ซิครือซิลอ ซี เนอ, เหย่ซี เม ซิครือซิลอ แหน่เจ๊อ แว. เร๊อ แด่ดุหยื่อแหน่ แลแค แกแย ฮู๊เนอ เต๊เห่ นี๋.

¹⁹ เพรหยื่อเอ่เต ตู๊หมู่ตอกล๊อ เด๊อ อา โอ่ เด๊อ เอเซียเก่กู เออเต๊เห่ ซูแฮ เป่ ซี อาเตเฮ๊โมเฮ๊แร๊ เต๊เห่. เพอาควิลลา เร๊อ อาเม โหมะปริสสิลลา เร๊อ เพรหยื่อเอ่เต ตู๊หมู่ตอกล๊อ เด๊อ อา แฮจ๊อเบ เด๊อ อาหี่ เต๊เห่ ซูแฮ เป่เกอ ซี เหย่ซี อาเต เฮ๊โมเฮ๊แร๊ เด๊อ ครี๊ อากู.

²⁰ เป โป่แหว่ ครี๊พู๊ เด๊อ อา โอ่ เบ๊อะเออ ล๋อ ปลี เต๊เห่เนอ เบ่เบ่, อา ซูแฮ เป่เกอ ซี อาเต เฮ๊โมเฮ๊แร๊ เต๊เห่. ซี โอ่ แลแค เบ๊อะเนอ เต๊เห่ เบ่เบ่, เฮ๊โมเฮ๊แร๊ เกอเร๊อ ลู เตเพร เร๊อ เตเพร เร๊อ เด๊อะโล แลแค ซี เตโมเร๊อ ลู เตเพร เร๊อ เตเพร เนอ นี๋.

²¹ แว หม่าเฮ๊อ คูเปาโลเออ, แว ราจว๊า เป่ ซี ลีโตโกล เร๊อ แวเหน่ เร๊อดื่อ เจ๊อ. แว ราจว๊า เป่ ซี เร๊อ แว เฮ๊ ฮู๊เออ, “เฮ๊โมเฮ๊แร๊ ซี ปว๋า เตเพร,” แว รา ฮู๊เนอ.

²² อูเปเป๋ เบ่เบ่, เด๊อ อา โมเร๊อ แบ่เจ่ โต่ เนอ, เตอิชอฮามู๊แหม่ เก่ เบ่ดื่อ ลู นี๋. “มารานาส่า” เก๋อ เป แบ่เจ๋! แฮเมอ นี๋.

²³ แบ่เจ่ เหย่ซู่ อาบุ๊ยอาเตอเรอ เก่ โอ่ เกอดื่อ เร๊อ ซี นี๋.

²⁴ ล๋อ แกแย เด๊อ อา หยื่อเอ่ ครี๊ เร๊อ อา ทวาเฮ๊อ เต๊อเจ๋อ โต เร๊อ ลู เต๊เห่เนอ, แว เตโม เก่ โอ่เกอดื่อ เร๊อ เหย่ซี นี๋.