Othoonyeziwa 21 - Hapari Zooshapweya

Pinku pheeya na tuniya pheeya

¹ Aphano koona pinku pheeya na tuniya pheeya, maana pinku ya mwanzo na tuniya ya mwanzo yaaviriye, na pahari khayaarivo.

² Koona Sitati Ttakatthiifu, Yeruzaleemu pheeya, yaari wiishukhaaye pinkuuni khwa phantte ya Nluku, etthenkeziwe nkhama namaposiwa woojirisiwa atiiseliwaka manna awe.

³ Khusiila huula yookhomaala yaari olankhaaye va khukulu eraka: “Nasaapi heema ttakatthiifu ya Nluku ena anaatamu, ethiito Nluku anttelaaye wiikhalaamo na yo. Anttela wiiya atthu awe, na Nluku mweenyeweene onttela wiiya vamote na yo na onttela wiiya Nluku aya.

⁴ Ye onlawa awaakukutthe mishozi za mmaasho mwaya zooshi. Khunteela wiiyavo theenya ofwa, wala huzuni, wala olila, wala olwaaza, maana vitthu epile za raku zavira.”

⁵ Otule eekhaliyeeyo va khukulu khuri: “Kinretta opheya vitthu zooshi!” Khweekezela alupaka yoori: “Waatikhe eti, maana mattakhuzi apa pi a haakhi na ansuhaaye waamineya.”

⁶ Khukuuza theenya yoori: “Zarettikhana. Miiyo ki Aalufwa na Oomeka, wa Waaza na wa Wiishela. Otule ariina nnyottha, kinimwinkha maati oonywa mahala khwa naattuuttu wa maati a ohaayi.

⁷ Otule anshinttaaye onteela orithi zooshi epi, na miiyo kinttela wiiya Nluku awe na ye onttela wiiya mwanaka.

⁸ Ila ananhiminyali, oohaamini, makookaani, anamahusuti, anakaapa twayifu, ashawi, anamwaaputu sanamu na anamahata ooshi puuro yaya enttela wiiya ontthatta la moottho onkholelanaaye oka. Opu pi ofwa wa phiiri.”

Yeruzaleemu pheeya

⁹ Mmote wa malayikha apale sapa aariina miphiko sapa zawiitaala pala epile za wiishela khukaattama na khukuuza yoori: “Ote, miiyo kuunoze namaposiwa, muukha wa Pwittipwitthi.”

¹⁰ Ye khukithuula nkatthi wa rooho ya Nluku mpakha vamwaako woolepa nwulweene na khukithoonyeza Sitati Ttakatthiifu, Yeruzaleemu, yaari wiishukhaaye pinkuuni khwa phantte ya Nluku.

¹¹ Ye aari omwasikhela khwa nuuru ya Nluku, na waara wawe waari nkhama wa nkufu wa fwayita, nkhama jaasipi, wa wooneela nkhama suupha.

¹² Aarina muuri nwulweene na woolepa waariina milako khumi na miwiri na malayikha khumi na mawiri aari weekeselaaye milako. Mmamilako mwaya aatikhiwemo mazina a mahimo khumi na mawiri a Ezirayiilu.

¹³ Zaariwo milako mittatthu okhu lintthamuwaawo njuwa, mittatthu kashikhazini, mittatthu kusini na mittatthu okhu lintupweelaawo njuwa.

¹⁴ Muuri wa sitati ya etile waarina machina khumi na mawiri, khwa machina atthaapo aari awaatikhiwa mazina khumi na mawiri a maaswihaapa a Pwittipwitthi.

¹⁵ Nlayikha laari ottakhulanaaye miiyo laarina puutta ya mphimo wa waattalaniwa weero yoori ephime sitati, milako zaya na muuri aya.

¹⁶ Olepa wa sitati yaya sawasawa na otaphuwa waya. Khuphima sitati yaya etile na puutta mpakha opuwa kiyasi ya alufu piiri na miiya piiri olepa waya, otaphuwa waya na owula waya yaari sawasawa.

¹⁷ Nlayikha ntthile khuphima theenya muuri aya, khupuwa phiima siithiini na thaanu khwa otaphuwa waya, khwa mphimo weenaatamu nlayikha aari orumeyelaaye.

¹⁸ Muuri aya waajekaniwe jaasipi, theenya sitati yaya yaari ya weero swaafi, yoolattanana suupha ya wooneela.

¹⁹ Machina a muuri a sitati yaya aattalaniwe wakhula nanna ya mawe a fwayita oofwarikhana. Mwanzo, jaasipi; ya phiiri, safiira; ya ttaatthu, ya kalisetooniya; yanne, ya eshimiralata;

²⁰ ya thaanu, na sorotooniyu; ya siitha, ya saaritiyu; ya saapa na kirizoliitu; ya naane ya periilu; ya tiisiya, na topaaziyu; ya khuumi na kirisoparaso; ya khumi na moote, na jaasintu; ya khumi na piiri, na ametishiita.

²¹ Milako khumi na miwiri aari mawe awaara khumi na mawiri aniiyaaye nkatthi wa khoope, wakhula nlako, waattalaniwe liwe limote la waara. Tarikhi khuulu ya sitati yaari ya weero swaafi, ya wooneela nkhama suupha.

²² Akooneeni hatha nyuupa yoosifwiwamo nsitati, maana Mbwana Nluku Nwahi zooshi na Pwittipwitthi ti yiiyiye nyuupa yoosifwiwamo.

²³ Sitati kinhithajiya njuwa, wala mweezi, yoori emwasikhelemo, maana nuuru ya Nluku ti emmwasikhelaawo, na Pwittipwitthi ti yiiyiye khantteya yaya.

²⁴ Khapila zooshi zinttela weettetta nnuuru mwawe, na afwalume a va tuniya anlawa antiisele maali zaya.

²⁵ Milako zaya khazinteela ofukiwa theenya nthana, maana khunteela wiiyavo osikhu.

²⁶ Maali na shitaha za khapila zooshi onttela otiiseliwa.

²⁷ Mpho khinteela weettamo hatha etthu yoohifwayi, wala ntthu anrettaaye etile yoopattisa haaya ama yoohata, ila paasi apale mazina aya aatikhiweeyo nkithaapu ya ohaayi wa Pwittipwitthi.