Othoonyeziwa 19 - Hapari Zooshapweya

Furaha pinkuuni

¹ Paata ya toowo miiyo khusiila etthu pinkuuni yoolattanana huula ya khuntti ya atthu awaatta enyakulaka yoori: “Aleluuya! Nusura, ottitthima na owahi pu wa Nluku eetthu,

² maana ophuka wawo pu haakhi na shariya. Ye anhukhumu malempe nwulu aari otapanyaaye tuniya na omalempe awe. Ye khujiripha khwa taamu ya akarumeya awe.”

³ Khuntti etile khurutela theenya onyakula eraka: “Aleluuya! Loosi lininlankhaaye linwela khwa mileele.”

⁴ Attunkhulu a tiini eshiriini na wane na zumpe haayi nne khukokhora na khumwaaputu Nluku, eekhaliyeeyo va khukulu vawe, khunyakula araka: “Amiina, Aleluuya!”

⁵ Aphano khusiileya huula yalankhiyeeyo va khukulu yaari onyakulaaye: “Mwinsifu Nluku eetthu, mooshi mweeyo akarumeya awe, mweeyo mwinimoovaaye, waaza nwulu mpakha nttiitthi!”

⁶ Miiyo khusiila etthu yoolattanana huula ya khuntti ya atthu a waatta, nkhama onyakula wa pahari na taari yookhomaala yaari ovumaaye eraka: “Aleluuya! Maana onlokozela Mbwana, Nluku eetthu, Nwahi zooshi, ti Mfwalume!

⁷ Nifurahi! Na nlaweni nitthape na ninttitthimise! Maana wafiya wakathi wa harusi ya Pwittipwitthi, na mposi awe tu woojilikanisa.

⁸ Yoori awale, khwinkhiwa paafutha yoopeepheya, yawaara na swaafi.” Paafutha yoopeepheya pi zooretta za shariya za attakatthiifu.

⁹ Nlayikha khukuuza yoori: “Waatikhe yoori: Ooparikhiyiwa pi apale akharipwishiweeyo njampo liwululene la harusi ya Pwittipwitthi!” Na khumarisela alupaka yoori: “Apa pi mattakhuzi a haakhi ya Nluku.”

¹⁰ Aphano miiyo kikwela nshini wa moolu a nlayikha yoori kaaputu, ila khukuuza yoori: “Ohirette etthu eto! Ki karumeya nkhama weeyo na nkhama attwiizo apale ari nkatthi wa waamineya khwa oshaahiti wa Yinsa. Omwaaputu Nluku! Oshaahiti wa Yinsa rooho ya ohupiri.”

Nakhavalo va khavalo yoolakala

¹¹ Khoona pinku efukuwiye na omaasho waka eriwo khavalo yoolakala, nakhavalo aya aari wiitthiwa Waamineya na Haakhi, ye omphuka na onuumana khwa shariya.

¹² Maasho awe ari nkhama eviriviri ya moottho, veeshwa vawe zirivo jarata za waatta na nzina limote ahinjuwaaye hatha ntthu, woohiiyi ye mweenyewe.

¹³ Awala ajapi yawaatikhaniwa taamu na nzina lawe Nttakhuzi la Nluku.

¹⁴ Anajanka a pinkuuni eettaka onlotta, awaliye paafutha zoopepheya, zoolakala na swaafi, na apakhiriye va khavalo zoolakala.

¹⁵ Nkhanyo mwawe enlaamo phanka yoonoliwa yoori avulaze khapila zooshi. “Ye onttela olokozela na puutta ya yuuma.” Ye onluwatthela nkulaathayini wa viinyu ya katapu ya wiiphiiriwa ya Nluku Nwahi zooshi.

¹⁶ Khwa ajapi yawe na maphaja awe yaatikhiwamo yoori: mfwalume wa afwalume na mbwana wa ambwana.

¹⁷ Khoona nlayikha leemeliye vanjuwa. Likhuwaka na huula yoosileya khwa anyannyi ooshi anvavaaye khwa vakatthi wa pinku yoori: “Mwite nikusanyeye khwa njampo liwulu la Nluku!

¹⁸ Yoori arafune nyama za afwalume, attunkhulu a najanka na anamawahi, nyama za khavalo na anakhavalo aya, nyama za atthu ooshi amwiitthwaana na anantaphuliwa, awulu na attiitthi.”

¹⁹ Aphano miiyo khoona nyama yawoopisa vamote na afwalume a va tuniya na anajanka aya akusanyeyiye yoori oomanane otule apakhiriyeeyo va khavalo na anajanka awe.

²⁰ Ila nyama yawoopisa khufukiwa vamote na napiyu woojipanka aarettiyeeyo alama za minjuza khwa nzina laya. Atthaapo awaahatiyeeyo apale apwekhereliyeeyo alama ya nyama yawoopisa na khwaaputu ratarato yaya. Oowiiri khweeseleliwa ari awoona va ntthatta la moottho onkholelanaaye oka.

²¹ Ooshi khuulaaniwa phanka yaari olankhaaye nkhanyo wa otule apakhiriyeeyo va khavalo yoolakala. Na anyannyi ooshi khurupala nyama ya atthu apale.