Olaawo 5 - Hapari Zooshapweya

Firawuuna oneekezela hukhumu

¹ Paata ya toole Munsa na Haruni khulawa ottakhulana Firawuuna amuuzaka yoori: “Nnyizinku, Nluku wa meezirayiilu, alupa toono: ‘Owaalikhe atthu aka alawe akirettele njampo n'yaara.’ ”

² Firawuuna khujipu araka: “Nnyizinku paani wonshututela miiyo khuwaalikha olawa meezirayiilu? Akininjuwa Nnyizinku aya na akiniwaalikha meezirayiilu olaamo mphu.”

³ Munsa na Haruni khukhanyarela araka: “Nluku wa meepereewu ettiye oniteela, safwatali onilikhe nilawe narette safwari ya siikhu ttatthu neettaka n'yaara, namwinkhe twaha Nnyizinku, Nluku eetthu, nohiiyi etthiipo antta oniteela marati ama ontta onuula na phanka.”

⁴ Aphano mfwalume wa Misuri khumuuza Munsa na Haruni yoori: “Mwaasa aya niini mweeyo mwiwantipwaka atthu na khaazi zaya? Haya! Mwilawe mwakhole khaazi.”

⁵ Theenya Firawuuna khulupa yoori: “Atthu apa pi awaatta mwintta owaalikhisa okhola khaazi zaya.”

⁶ Siikhu ethiitile Firawuuna khuwenkha oruma anamalokozela awe na masuphayi anakhaazi, araka:

⁷ “Waaza leelo ethiiti mwihirutele owenkha malala awaattalana khizolo nkhama mwaari orettaazo; asala alawa weekesa eenyewe.

⁸ Ila mwiwaakhanyarele waattala thamani ethiitile aari waattalakaaye, mwihiwaavukule hatha etthu; apa aya anamaviliwa, tiito aaziyeeyo okhuwa araka ‘ninttela omwinkha twaha Nluku eetthu.’

⁹ Mweekezele khaazi yaya yoolipa yoori ashikheye ahisiileze vitthu zoohatiwa.”

¹⁰ Anamalokozela na masuphayi khulawa khuwooza atthu apale yoori: “Firawuuna alupa toono: ‘Nilikhe owinkhani malala mweeyo.

¹¹ Mwilankhe mwilawe mwawooze yoori alawe akusanye malala nhali anwahaaye opatthamo, na khaazi yenu yoolipa khinteela ovukuwavo hatha etthu.’ ”

¹² Aphano atthu apale khumwazeyela nti wooshi wa Misuri khukusanya nyaani khwa zwaamu ya malala.

¹³ Anamalokozela a khaazi khuwaattitta awoozaka yoori: “Mwiishise khaazi khwa nanna mooziweezo okhola wakhula siikhu wakathi opule mwaari winkhiwaavo malala.”

¹⁴ Khujalitiwa masuphayi ameezirayiilu apale atthomiweeyo pi anamalokozela a anakhaazi a Firawuuna, na khusala oozeliwa yoori: “Mwaasa aya niini mwihiishisaka khaazi yenu ya waattala khizolo taana wala leelo nkhama mwaari orettaazo raku?”

¹⁵ Aphano masuphayi a meezirayiilu khulawa ojiliza wa Firawuuna yoori: “Mwaasa aya niini owaatthanttaka toono akarumeya awo?

¹⁶ Fweeyo akarumeya awo, khaninkhiwa malala na ninuuziwa waattala khizolo. Woone, nintta ojalitiwa; ila atthu awo pi ariina paathuli.”

¹⁷ Ila Firawuuna khujipu yoori: “Anamaviliwa! Mweeyo oviliwa! Tiito mwinraaye: ‘Nintakha olawa omwinkha twaha Nnyizinku.’

¹⁸ Nasaapi ethiiti mwirutele okhaazi. Khamwinteela opokhera malala! Ila mwina ya wuupa khizolo thamani ethiito mwaari wuupakaaye!”

¹⁹ Masuphayi apale a meezirayiilu khujuwa yoori aari nhukhumu, mwaasa woosiila yoori ahivukule thamani ya khizolo ooziweeyo waattala wakhula siikhu.

²⁰ Paata ya masuphayi apale noolaavo aphale aariivo Firawuuna, khunsikana Munsa na Haruni eettaka owaaweja.

²¹ Yo khulupa yoori: “Nnyizinku ti awooneni na oophukeni; maana mweeyo mwaniretta fweeyo wiiya atthu awiiphira omaasho wa Firawuuna na wa a karumeya awe, khuwenkha phanka mmakhono mwaya yoori anuule.”

Nnyizinku onlaleya otaphuliwa wa atthu

²² Aphano Munsa khuzukuluwela wa Nnyizinku khumuuza yoori: “Oo Mbwana, wawaahukhumwelani atthu apa? Khi wakirumeliyeeni?

²³ Maana thanku kilawiyeevo ottakhulana Firawuuna khwa nzina lawo yoori ontta owaahukhumu atthu apa, weeyo khuretteeni hatha etthu yoori owaataphule!”