Olaawo 12 - Hapari Zooshapweya

Njampo la Paashikowa

¹ Nnyizinku khumuuza Munsa na Haruni nti wa Misuri yoori:

² “Opu ona ya wiiya mweezi wa mwanzo wa mwaakha khwa mweeyo.

³ Mwiwooze atthu ooshi a Ezirayiilu, mwiraka: Siikhu ya khuumi ya mweezi otthuupu, alume ooshi ana yoovalula nshapi la pwittipwitthi leelume ya wakhula liphanko ya wakhula nyuupa.

⁴ Ojama amana wiiya vattitthiiru ohinwahaaye orafuna nyama yooshi, ona yoowaalaleya anamwaattamanana aya apale a kharipu awaameele nyama enwahaaye owaafiyela khwa thamani ya atthu aya.

⁵ Nyama yaya enttelaaye othawuliwa ena ya wiiya yeelume ya mwaakha mmote, yoohirakali hatha vahali. Ena ya wiiya pwittipwitthi ama puuzi.

⁶ Mwipwehe mpakha siikhu khumi na nne ya mweezi, mpakha wakathi ajama ooshi a meezirayiilu anttelaaye otwahi, njuwa leettelaka otupweela.

⁷ “Mwittukunttele taamu yaya vatulu na mpavu wa milako za manyupa, apale mweeyo mwirafuniyeemu nyama.

⁸ Osikhu otthuupo mwina ya orafuna nyama yoomanikhiwa va moottho, na mathapa oowaawa na phaawu yoohiina fwaramento.

⁹ Mwihirafune nyama piishi wala yawiipikhiwa, ila yoomanikhiwa va moottho waaza eeshwa, moolu na marupo aya.

¹⁰ Mwihisalise hatha etthu efiya supu; amana esala mwilukuze.

¹¹ Mwiwale, nzako n'yuunu, jampali mmoolu na mwikholele pakhora mmakhono, mwirafune wawaakuvavo; otu paashikowa wa Nnyizinku.

¹² “Maana osikhu aya otthuupo kinttela ovira nti wa Misuri na kiwoole aana ooshi amwanzo aalume waaza atthu mpakha a nyama, na kiwaahukhumu a miluku ooshi a Misuri: Miiyo ki Nnyizinku!

¹³ Taamu mwivaziyeeyo milako zenu enttela wiiya alama yoori ethoonyeze manyupa mwiniikhalaaye, amana kiwaavulalisaka amisuri, miiyo kinttela woona taamu kisala kuuvikanani wooheemeli yoori mwihiiye wootapanyiwa ti pala yaya eto.

¹⁴ “Mwitthapele siikhu ethiito nkhama njampo la tiini muupuwelele yoori ti miiyo, Nnyizinku, kirettiyeeyo epo. Mweeyo na peewu yenu mwina yooretta njampo la paashikowa khwa mileele.

¹⁵ Nkatthi wa siikhu sapa mwina yooja phaawu yoohiina fwaramento. Siikhu yamwanzo mwilazemo fwaramento mmanyupa mweenu, maana wakhula otule anttelaaye oja etthu ya wiiyana fwaramento, ntthu aya oto ontta wiikariwa vakatthi wa meezirayiilu.

¹⁶ Siikhu yamwanzo na siikhu yasaapa ona ya wiiyavo nthukumano ttakatthiifu, ahiiyevo hatha ntthu mmote antakhaaye okhola khaazi siikhu zaya epo, woohiiyi otthenkeza etthu yoojiwa ya wakhula siikhu; mwina yooretta ethiito paasi.

¹⁷ “Mwirette njampo la phaawu yoohiina fwaramento, maana siikhu yaya ethiito ti kilaziyeeyo nti wa Misuri mahimo a atthu ooshi a meezirayiilu. Mwitthapele siikhu yaya eto wiiye oruma wa mileele, waaza wa apaapa mpakha wa aana aya.

¹⁸ Mwina yoorafuna phaawu yoohiina fwaramento makaaripi siikhu ya khuumi na nne ya mweezi wamwanzo mpakha makaaripi siikhu zeettettaka eshiriini na moote.

¹⁹ Siikhu epi sapa ahiiyevo ntthu mmote anttelaaye wiiyana fwaramento owawe. Wakhula antakhaaye oja etthu ya wiiyana fwaramento ontta wiikariwa muujama wa meezirayiilu, hatha nkhama mmalapo ama nnyunti.

²⁰ Mwihije hatha etthu ya wiiyana fwaramento mmanyupa mweenu wooshimo, ila mwina yooja phaawu yoohiina fwaramento.”

Paashikowa wamwanzo

²¹ Munsa khuruma okhuweliwa attunkhulu a atthu ooshi a meezirayiilu khuwooza yoori: “Mwithawule nshapi la pwittipwitthi yoori ajama ooshi a Ezirayiilu ashije pwittipwitthi ya Paashikowa.

²² Mwithuule zankalala mwinaanise na taamu eriiye mpasiya mwittukunttele milako zenu vatulu na mpavu mwaya. Ahiiyevo hatha ntthu mmote antakhaaye osaruwa nnyupa mwawe mpakha ocha.

²³ Amana Nnyizinku aviraka mmuti mphule yoori awoole amisuri, amana oona taamu etile mwittukuntteliyeeyo nlako enu phantte na phantte na vatulu vaya, Nnyizinku onttela ovira attaapho khanlawa onlikha namatapanya ovira mmanyupa mweenu yoori awuuleeni.

²⁴ “Mwishututele oruma opu mweeyo na aana enu ooshi khwa mileele.

²⁵ Amana mwifiya nti opule Nnyizinku awahitiyeenini owinkhani, mwina yooretta njampo ntthi.

²⁶ Aaneenu amana awuuzelani yoori: ‘Njampo laya ntthi maana aya niini?’

²⁷ Mwiwaajipu yoori: ‘Twaha ya Paashikowa wa Nnyizinku, aviriyeeyo vatulu wa manyupa a meezirayiilu nti wa Misuri, na khwiinanela manyupa eetthu wakathi aari owoolaavo amisuri.’ ” Attaaphale meezirayiilu khukokhora khumwaaputu Nnyizinku.

²⁸ Meezirayiilu khulaavo, khulawa khuretta nanna ethiitile Nnyizinku amuuziyeeyo Munsa na Haruni.

Pala ya Khuumi: Ofwa wa aana amwanzo oovokoliwa pi amisuri

²⁹ Aphano osikhu layili, Nnyizinku khuwoola aana ooshi amwanzo a Misuri, waaza mwaana wamwanzo wa Firawuuna, namarithi ofwalume awe, mpakha mwaana wamwanzo wa napherezu aari nkalapooso na theenya aana amwanzo a nyama.

³⁰ Osikhu otthuupule, Firawuuna na mashawuriiya awe ooshi na amisuri ooshi khulankha na wapuwiye olila nwulweene, maana khayaarivo nyuupa yahaafwiweemo.

Olaawo

³¹ Osikhu otthuupule Firawuuna khuruma okhuweliwa Munsa na Haruni khuwooza yoori: “Mwileemo nasaapi mmuti mwaka, mweeyo na meezirayiilu! Mwilawe mwamwaaputu Nnyizinku enu, nkhama etthiipo mwivekiyeezo.

³² Mwithuule pwittipwitthi zenu mompe zenu na puuzi zenu, nkhama mwaalupiyeezo na mwikiparikhiye theenya.”

³³ Amisuri aari owaakhanyarela atthu apale yoori aleemo mmuti mphule, alupaka yoori: “Amana mwihiliimo fooshi fweeyo nintta ofwa!”

³⁴ Aphano atthu apale khuthuula tiriku yookhattiwa yoohiina fwaramento, khuputaputela vakuwo khuttha mmapasiya mwaya khuvikela mmafuzi.

³⁵ Meezirayiilu khushututela oruma wa Munsa, khuwaavekela amisuri vitthu za feeta za weero na kuwo.

³⁶ Nnyizinku khuwaaretta atthu awe wooneliwa huruma pi amisuri, khwa nanna awenkhiyeevo etile avekiyeeyo; khwa etthiipo khusavula maali zooshi za amisuri.

³⁷ Meezirayiilu khulankha khusala alawa mwentto, khuvira Rameesi eettaka Sukooti. Aari alume alufu miiya sitha, ohiwaalaki aakha na aana.

³⁸ Khuntti khuluzeene zoofwarikhana za atthu akinoko aawaalottiye, na theenya maphanko mawulumawulu a nyama, mompe, pwittipwitthi na puuzi.

³⁹ Khoocha phaawu zoohiina fwaramento khwa tiriku etile aathuuliyeeyo Misuri, maana khayaarina fwaramento mwaasa wawiikariwa Misuri, khuhiwahi otthenkeza etthu yoojiwa.

⁴⁰ Meezirayiilu eekhaliye Misuri nyaakha miiya nne na talaathiini.

⁴¹ Siikhu ethiito afisiyeevo nyaakha miiya nne na talaathiini, atthu ooshi a Nnyizinku eetta olaawo Misuri.

⁴² Osikhu otthuupo, Nnyizinku eekeseliye olaawo waya Misuri wooshiwo. Tiito, osikhu nkhama otthuupu na yo anttela ojeekesela ojama khwa ojama khwa shitaha ya Nnyizinku.

Kano monkoni wa Paashikowa

⁴³ Nnyizinku khumuuza Munsa na Haruni yoori: “Epi kano za Paashikowa: ahiiyevo hatha mmalapo mmote anttelaaye onja.

⁴⁴ Mwiitthwaana wawuuzanyiwa ona yonja Paashikowa, amana eeya wookhiriya.

⁴⁵ Ila apale eettiye omaka na apale aateeliye okhola khaazi ahinje.

⁴⁶ “Mweeyo mwina yonja nnyupa nttumpho aattaliweemo, mwihithuule hatha phittula moote mwisarulelaka vaje, wala mwihipweche hatha likhonkolo la nyama mwinttelaaye orafuna.

⁴⁷ Atthu ooshi a Ezirayiilu ana yontthapela Paashikowa.

⁴⁸ “Wakhula mmalapo aniikhalaaye nttumphu antakhaaye oretta njampo ntthi la Paashikowa wa Nnyizinku, mwina yowaakhiriyisa alume ooshi a muujama mwaya; apo ana yontthapela nkhama aana a muujama. Ahiiyevo ntthu woohikhiriyi anttelaaye ontthapela.

⁴⁹ Kano ethiito ena ya orumeyeliwa pi anyunti na atthu akina apale aniikhalaaye vakatthi venu.”

⁵⁰ Meezirayiilu ooshi khuretta nkhama etthiipo Nnyizinku amuuziyeezo Munsa na Haruni.

⁵¹ Siikhu ethiitile Nnyizinku khuwaalazawo meezirayiilu Misuri, khuwaatthenkeza lihimo khwa lihimo.