Olaawo 10 - Hapari Zooshapweya

Pala yanaane: Mapalaka

¹ Nnyizinku khumuuza Munsa yoori: “Olawe wakutthanane Firawuuna, maana miiyo koomisa rooho yawe na rooho za mashawuriiya awe, yoori miiyo kithoonyeze alama zaka epo vakatthi vaya,

² na yoori mwiwaathatelele aaneenu na atuulwenu nanna miiyo kiwaahukhumwiyeezo amisuri na minjuza zootikinisa kirettiyeezo vakatthi vaya, khwa etthiipo pi mwinttelaavo ojuwa yoori miiyo ki Nnyizinku.”

³ Aphano Munsa na Haruni khulawa okutthanana Firawuuna, yo khumuuza yoori: “Nnyizinku, Nluku wa meepereewu alupa yoori: ‘Mpakha lini weeyo okatthalaka ojipushuwisa mmakhono mwaka miiyo? Owaalikhe atthu aka alawe akaaputu.

⁴ Amana okhanyarela ohitakhi owaalikha atthu aka olawa, meesho kintiisa pala ya mapalaka mmuti mwawo.

⁵ Yo anteela ofinikha vathi ohisala wooneyavo, maana anteela orafuna zooshi epile zaalikhiweeyo ti vuula ya mawe mpakha na miitthi epile zinphutuwaazo mmashapa.

⁶ Anttela wiitaala nnyupa mwawo na mmanyupa wa mashawuriiya awo na wa amisuri ooshi. Vitthu amarehemu apapazenu ahooneeni siikhu epo eekhaliyeezo mphu mpakha leelo.’ ” Elottelanaka Munsa khulankha khulaavo aphale aariivo Firawuuna.

⁷ Aphano mashawuriiya a Firawuuna khusala alupa yoori: “Mpakha lini ntthu otu anituturushaka? Owaalikhe atthu apa alawe amwaaputu Nnyizinku, Nluku aya. Khiniweeleya yoori Misuri yatapanyeya?”

⁸ Aphano khuthuuliwa Munsa na Haruni opheya khulawaniwa mpakha wa Firawuuna, ye khuwooza yoori: “Ettani mwamwaaputu Nnyizinku, Nluku enu. Mwikuuze, anlawaaye paani?”

⁹ Munsa khujipu yoori: “Ninlawa na atthu ooshi, mashaapu etthu, na anakhuuluvale etthu, aaneetthu, pwittipwitthi zeetthu mpakha mompe zeetthu. Maana ninttela onrettela njampo Nnyizinku eetthu.”

¹⁰ Firawuuna khuwooza yoori: “Mweeyo mwinttela onhithajiya Nnyizinku amana kuulikhani olawa na aakha enu na aana enu! Eto enthoonyeza yoori mweeyo mwinwaza shawuri zootakhala.

¹¹ Khahiyo toowo! Mwilawe alume ru mwamwaaputu Nnyizinku maana eto ti waakivekeliyeeyo.” Munsa na Haruni khwiikariwa aphale aariivo Firawuuna.

¹² Aphano Nnyizinku khumuuza Munsa yoori: “Wookolele nkhono nti wa Misuri yoori ate mapalaka vathi apha arafune mathapa ooshi ariimo na zooshi epile zaalikhiweeyo ti vuula ya mawe.”

¹³ Munsa khookola pakhora yawe ookolelaka nti wa Misuri, Nnyizinku khutiisa pheevo ya ntulayi khuvuma nthana wooshi mpakha osikhu. Noocha pheevo etile khutana mapalaka.

¹⁴ Misuri yooshi khwiitaala mapalaka woohilikhi hatha vahali, aari awaatta venkivene. Aari ahinapuwewo nkhama apo na paata ya apo khapuwiyewo theenya nkhama apo.

¹⁵ Maana aafinikhiye phantte zinki za Misuri mpakha nti wooshi khwiiya wooriipa. Khurafuna zooshi epile zaalikhiweeyo ti vuula ya mawe, mathapa na mishumo za miitthi woohisali hatha etthu piishi waaza mmitthi mpakha mmashapa, nti wooshi wa Misuri.

¹⁶ Firawuuna khuruma olawa okhuweliwa Munsa na Haruni woohirupazi, khuwooza yoori: “Kankosa Nnyizinku, Nluku enu na kookosani mweeyo!

¹⁷ Apho kinuuvekelani yoori mwikiswaamihi twampi yaka swaafu eti theenya na mwinvekele Nnyizinku, Nluku enu yoori akilaze pala eti yoofwiwa.”

¹⁸ Munsa paata ya olaavo aphale vaya aariivo Firawuuna khunvekela Nnyizinku.

¹⁹ Aphano Nnyizinku khuvumisa pheevo yawaatta ya okhu lintupweelaawo njuwa, ethiito khukhupa mapalaka ooshi khwiitthela mpahari yookhuttuwa; khuhisalimo hatha lipalaka limote nti opule wa Misuri.

²⁰ Ila nalelo Nnyizinku khuumisa rooho ya Firawuuna; ye khuhitakhi owaalikha meezirayiilu olawa.

Pala ya tiisiya: Yiiza

²¹ Aphano Nnyizinku khumuuza Munsa yoori: “Makhono awo olansele pinkuuni yoori Misuri yooshi yiiye yoofinikhiwa ti yiiza yookhomaala.”

²² Munsa khookolela nkhono awe otulu, Misuri yooshi khufinikhiwa ti yiiza yookhomaala khwa siikhu ttatthu.

²³ Khuhisala oonana mmote na nzaawe, khaarivo mmote aaliyeevo vahali aariivo khwa siikhu ttatthu; ila meezirayiilu ooshi mmanyupa mwaya yaarimo nuuru.

²⁴ Aphano Firawuuna khunkhuwela Munsa khumuuza yoori: “Ettani mwamwaaputu Nnyizinku. Ila zisale pwittipwitthi zenu na mompe zenu paasi; ila aakha na aana mwilawane.”

²⁵ Munsa khujipu yoori: “Weeyo ona ya oninkha nyama za orettela twaha na olukuza, yoori nimwinkhe Nnyizinku, Nluku eetthu.

²⁶ Olikha toowo, nyama zeetthu nilawaka nintta othuula hatha likhope khalinsala, maana ninttela orumeyela etthiipo yoori nimwaaputu Nnyizinku, Nluku eetthu, khanijuweeni nyama-ni ninttelaaye omwaaputu-na Nnyizinku mpakha ofiya.”

²⁷ Ila Nnyizinku khuumisa rooho ya Firawuuna, ye khuhitakhi owaalikha olawa.

²⁸ Firawuuna khumuuza Munsa yoori: “Oleevo apha na ohirutelevo theenya! Siikhu onttelaavo okoona theenya ontta ofwa.”

²⁹ Munsa khuri: “Walikanisa! Akinteela woona theenya wuuso awo.”