Mwanzo 7 - Hapari Zooshapweya

Nuuhi na ajamaaze ampakhira mmwaaraka

¹ Aphano Nnyizinku khumuuza Nuuhi yoori: “Weeyo na ajamaazo ooshi opakhire mmwaaraka. Vakatthi wa atthu apa, Miiyo kawoona weeyo paasi wiiya ntthu washariya.

² Othuule nyama za halaali sapa zeelume na sapa zeekha ila epile zohiiyi za halaali othuule piiri piiri, yeelume na yeekha.

³ Owaathuule theenya anyannyi sapa eelume na sapa eekha yoori jaati yaya ehaashikhe.

⁴ Amana zivira siikhu sapa kinlawa kanyisele vuula va tuniya siikhu arupayiini nthana na osikhu, kipweteche zumpe zooshi kumpiyeezo.”

⁵ Nuuhi khuretta zooshi epile Nnyizinku anrumiyeezo.

⁶ Wakathi maati aazamisiyeevo tuniya, Nuuhi aari oretta arina nyaakha miiya sitha.

⁷ Ye khupakhira mmwaaraka vamote na muukhaawe, aanaawe na aakha aya mwaasa wa maati a nnyeri aari oteelaaye ozamisa olumwenku.

⁸ Nyama za halaali na zohiiyi za halaali, anyannyi na nyama epile zinjipurulaaye vathi,

⁹ khupakhira mmwaaraka vamote na Nuuhi piiri piiri zeelume na zeekha, nkhama etthiipo Nluku aamuuziyeezo.

¹⁰ Ziviriyeevo siikhu sapa, maati oozamisa olumwenku khwaaza opuwa va tuniya.

¹¹ Siikhu Nuuhi afiiyeevo nyaakha miiya sitha, mweezi wa phiiri orina siikhu khuumi na sapa, khuphutuwa matthatta a vathi ooshi apale awiicha na milako za pinku khufukuwa.

¹² Khunya vuula va tuniya siikhu arupayiini nthana na osikhu.

¹³ Siikhu ethiito Nuuhi, muukhaawe, aanaawe Sheemu, Haamu, Yafeeti, na aakha a ttatthu a aanaawe khweetta mmwaaraka.

¹⁴ Nuuhi aapakhiriye nyama zooshi za ntthuttu, mifuwo zooshi za vaje, nyama epile zooshi zinjipurulaaye, na anyannyi a wakhula jaati na epile zooshi za wiiyana mapaphelo.

¹⁵ Zumpe zooshi ziriina phuumu zoohaayi khupakhira piiri piiri mmwaaraka mphule vamote na ye.

¹⁶ Nyama zooshi zeettiyeemo zaari zeekha na zeelume za wakhula jaati nkhama etthiipo Nluku anrumiyeezo. Nawiisha opakhira, Nnyizinku khufuka nlako wa aaraka.

¹⁷ Nnyeri weeshiye siikhu arupayiini va tuniya. Maati khuvira eekezeleyaka mpakha olansa aaraka, mpakha khwaaza weeleela vatulu wa tuniya.

¹⁸ Maati eetta ovira atepaka waatta mpakha aaraka otule khusala eeleela vatulu wa maati.

¹⁹ Khwaatta channu mpakha khufiyelela ozamisa nyaako.

²⁰ Maati khuvikana nyaako epile kiyasi ya phiima sapa.

²¹ Zumpe zooshi zoohaayi zaari va tuniya khufwa; anyannyi, mifuwo za vaje, nyama za ntthuttu, epile zinjipurulaaye vathi na anaatamu ooshi.

²² Zumpe zooshi epile zaariina phuumu yoohaayi, zaari ovumulaaye voolumwenku apha khufwa.

²³ Nluku khupwetecha zumpe zooshi zoohaayi zaari va tuniya. Pinaatamu, nyama za ntthuttu, na epile zinjipurulaaye vathi na anyannyi ootulu zooshi khupwetheya. Khusala Nuuhi otthwe na ajamaaze na nyama epile zaari vamote na ye mmwaaraka.

²⁴ Maati aarupaziye va tuniya siikhu miiya na hamusiini.