Mwanzo 42 - Hapari Zooshapweya

Attwiize Yuusufu antta tuniya ya Misuri

¹ Yaakhumpa noojuwa yoori Misuri ewaakho etthu yoojiwa, khuwooza aanaawe araka: “Mwineekesana yoori niini?

² Kasiila oriwa Misuri ewaakho tiriku, apho mwilawe moozanye nijilelane nihifwe jala.”

³ Aphano khulankha attwiize Yuusufu khumi khusala alawa Misuri wuuzanya tiriku.

⁴ Yaakhumpa khunkhattaza Bejami ttwiiye Yuusufu owaalotta attwiize amoovisaka ompattha etthu yootakhala.

⁵ Aana a Yaakhumpa khulawa wuuzanya tiriku nkhama etthiipo aari olawaazo atthu akina, maana tuniya yooshi ya Kanaani yaarina jala.

⁶ Yuusufu nsatoro wa Misuri, tiye aari owoozanyezaaye tiriku atthu ooshi a mmuti. Attwiize noofiya khunkokhorela ajihi zaya khufiisa vathi.

⁷ Wakathi awooniyeevo khuwaajuwa, ila khumpuwa nkhama ahiwaajuweeni. Khusala awoozela awaatuturuchaka araka: “Mweeyo! Mwinlankha vayi?” Yo khunjipu “Ninlankha tuniya ya Kanaani, naateeliye wuuzanya etthu yoojiwa.”

⁸ Yuusufu khuwaajuwa attwiize ila yo khuhinjuwi.

⁹ Ye khupayini jozi epile aawooziyeeyo khuri: “Mweeyo mwahankawaani! Mwaateeliye ojuwa siiri za mmuti mweetthu.”

¹⁰ Yo khunjipu araka: “Wala Mbwana eetthu! Fweeyo akarumeya enu naateeliye wuuzanya etthu yoojiwa.

¹¹ Fooshi papeetthu mmote, na atthu awaamineya. Khahi naahankawaani.”

¹² Ila Yuusufu khusala akhanyarela owooza yoori: “Wala mweeyo mwateela ojuwa kiphenyo za mmuti mweetthu mphu.”

¹³ Yo khuri: “Fweeyo ninlankha tuniya ya Kanaani, niri aana khumi na awiri paapa mmote. Otu wa efutti aya nasaapi eti asala onti na paapa, ila otu nkina aya afwa.”

¹⁴ Khurutela owooza araka: “Pi etthiipo kilupiyeezo! Mweeyo mwahankawaani!

¹⁵ Apho kintakha kiwooneni. Kinlapha khwa ohaayi wa Firawuuna, yoori khamwinlaavo apha mwihintiiseeni ttwiiyenu oto weefutti.

¹⁶ Mwinrume ntthu mmote amweettele, ila apa akina ansalaaye anttela ofukeliwa. Noone nkhama mattakhuzi apa mwilupiyeeyo po ookhweele. Ila amana ehiiyi toowo kinlapha khwa ohaayi wa Firawuuna yoori phi mwinttelaavo ojuweya wiiya ahankawaani.”

¹⁷ Ye khuwaattha nkalapooso siikhu ttatthu.

¹⁸ Siikhu ya ttaatthu khuwooza yoori: “Miiyo kinimoova Nluku, apho nkhama mweeyo mwintakha wuusuru nafusi zenu, mwiri toono:

¹⁹ nkhama mwa atthu awaamineya mwinlikhe ttwiiyenu mmote nkalapooso, apa akina athuule tiriku awenkhe ajamaazenu ahifwe jala.

²⁰ Mwikitiisele ttwiiyenu oto weefutti kihakikhi nkhama mattakhuzi enu pi ookhweele, mwirettaru toowo khamwinuuliwa. Yo khukhupalela oretta epile ooziweezo.”

²¹ Aphano khusala oozana yoori: “Khweele ninaaye paathuli mwaasa wa ttwiiyetthu. Maana wakathi aashankiyeevo aanivekeliye yoori nimoonele huruma ila fweeyo khuhitakhi, apha tiiti na fweeyo anipatthiyeeyo matteso apa.”

²² Ruubeni khujipu araka: “Miiyo akaalupiye yoori shaapu oto mwihinrettele vitthu zootakhala? Ila mweeyo khuhitakhi okisiileza! Apho nina yoojipu mwaasa woofwa wawe.”

²³ Yo khaari ojuwa yoori Yuusufu aari osiila epile aari ottakhulaazo, mwaasa yoori attakhulaka aarivo ntthu aari otaphulelaaye.

²⁴ Yuusufu khuwaasusa vattitthiiru khusala alila. Nawiisha khurutela attaaphale khusala attakhula, aphano khunthawula Simiyooni khuruma yoori afukiwe eettaka omoona.

Orutela Kanaani

²⁵ Elottelanaka Yuusufu khuwaaruma anakhaazi awe wiitaaza tiriku visurupa za attwiize na owaarutisela nzurukhu aya sirini atthaaka nvisurupa nttumpho, na owenkha etthu yooja ntarikhi. Khurettiwa etthiipo.

²⁶ Khuthuula visurupa epile wakhula ntthu khuttha vapuuru vawe khusala alawa.

²⁷ Noofiya vahali aalaliyeevo, mmote khufukula esurupa yawe yoori alazemo etthu yoojiwa enkhe puuru yawe, khusikana nzurukhu awe ori mwiisurupa nttumphule.

²⁸ Khuwooza attwiize yoori: “Moone! Nzurukhu aka karutiseliwa, opu ori mphu!” Aphano yo khusuthuwa khusala athukumela na woova oozelanaka yoori: “Niini epi Nluku aniretteliyeezo?”

²⁹ Noofiya wa papaaya Yaakhumpa tuniya ya Kanaani, khusala amuuza zooshi zawaavireliyeezo araka:

³⁰ “Nsatoro wa Misuri eetta onituturucha anuuzaka yoori naahankawaani.

³¹ Ila fweeyo khujipu yoori: ‘Khahi naahankawaani na atthu awaamineya.

³² Fweeyo khumuuza yoori, niri khumi na awiri paapa mmote, mmote afwa, nkina aya weefutti asala onti na paapa tuniya ya Kanaani.’

³³ “Aphano nsatoro wa nti aya opule khunuuza yoori: ‘Mwinlikhe ttwiiyenu mmote attaapha, toowo phi kinttelaavo ojuwa yoori mweeyo mwa atthu awaamineya: mwithuule etthu yoojiwa mwilawe mwawenkhe ajamaazenu ahifwe jala.

³⁴ Mwitaaka mwintiise ttwiiyenu otu wa efutti aya, kaamini yoori mweeyo khahi mwahankawaani ila mwa atthu awaamineya. Ttwiiyenu kintta wuurutiselani, kiwinkheni ejaaza yooretta zanshara zenu mmuti.’ ”

³⁵ Wakathi afukuliyeevo visurupa zaya, wakhula esurupa khunsikanamo nfukho wa nzurukhu, yo na papaaya nawoona nzurukhu opule khusala oova.

³⁶ Aphano papaaya khulupa yoori: “Mweeyo! Mwintakha okiishisela aanaaka. Yuusufu ti otule aashikhiyeeyo, Simiyooni khaavo apha na Bejami mwintakha onthuula theenya! Zooshi epo othunku aya ti miiyo kinoonaaye.”

³⁷ Ruubeni khumuuza papaawe yoori: “Mwikinkhe miiyo khanaashikha kininrutisa, amana kihinrutisi mwiwoole aanaaka apale awiri.”

³⁸ Yaakhumpa khujipu araka: “Akinintakhisa Bejami olawa na mweeyo, Yuusufu afwa, ye ti asaliyeeyo. Amana empattha etthu yootakhala ntarikhi okho mwineettaawo, mwintta okishukhelisa ahera na pwi zaka kirina huzuni yoototheliwa ti mweeyo.”