Mwanzo 33 - Hapari Zooshapweya

Okutthana wa Ezawu na Yaakhumpa

¹ Wakathi Yaakhumpa alansiyeevo maasho, eetta omoona Ezawu eettaka ota na atthu awe miiya nne. Khuwaawanya aanaawe khumwinkha Liiya, Rakeele na akarumeya awe apale awiri aakha.

² Khuwaalokozisa akarumeya awe apale na aanaaya, khusala alottiwa ti Liiya na aanaawe, khwiishela Rakeele na Yuusufu.

³ Yaakhumpa khuwaalokozela, khukokhora khwiinama swaafu sapa mpakha nttunkhulu awe ofiya aphale aariivo.

⁴ Ezawu khutthira khulawa khumpatikha khumpejari, oowiiri khusala alila.

⁵ Ezawu khulansa maasho khuwoona aakha na aana, ye khuuzela yoori: “Khi apa apaani?” Yaakhumpa khunjipu: “Aana apa rehema Nluku amwinkhiyeeyo karumeyeenu.”

⁶ Aphano akarumeya apale na aanaaya khumwaattama khukokhora khwiinama.

⁷ Elottelanaka Liiya khuta attaaphale na aanaawe khukokhora khwiinama. Wa wiishela aari Yuusufu na Rakeele, khuta khukokhora khwiinama.

⁸ Ezawu khuuzela yoori: “Nyama epile zooshi kisikaniyeeyo ntarikhi ontakhela ni?” Yaakhumpa khujipu: “Kintakha kipatthe osuhi mmakhono mwawo mbwanaaka.”

⁹ Ezawu khulupa yoori: “Miiyo kinaaye pure ttwiiyaku, epo oriina pi zawo.”

¹⁰ Yaakhumpa khusala ankhanyarela araka: “Ohikatthale! Nkhama kinsuhi mmakhono mwawo safwatali pwekhera vitthu epi, maana noowoona weeyo koona nkhama kimooniye Nluku, khwa nanna okipwekhereliyeeyo saana.

¹¹ Kinuuvekela yoori opwekherele vitthu epi kuutiiseliyeeyo mwaasa yoori Nluku akiparikhiya, akinkha zooshi epile kinhithajiyaaye.” Ye khunkhanyarela Ezawu mpakha okhupali.

¹² Ezawu khuri: “Olawa neettette. Miiyo kintta wuuperekha.”

¹³ Ila Yaakhumpa khuri: “Mbwanaaka, ojuwe yoori aana apa nalelo asimaana na kinaaye pwittipwitthi na mompe zinaamwisaaye. Amana kikhanyarela weettettisa channu zooshi zintta ofwa siikhu moote.

¹⁴ Apho olokoze mbwanaaka, miiyo kintta ota vattiitthi vattiitthi khwa mwentto wa aanaaka na nyama zaka, mpakha ofiya nti wa Seyiiri.”

¹⁵ Ezawu khuri: “Kintakha atthu aka akina kuulikhele weeyo.” Yaakhumpa khuuzela yoori: “Mwaasa wa niini? Khinihithajiya. Ethiiti okipwekhereliyeeyo saana paasi.”

¹⁶ Siikhu ethiitile Ezawu khulankha khusala arutela owawe Seyiiri.

¹⁷ Yaakhumpa khulankha khusala alawa Sukooti. Ottuukhule khujeka nyuupa yawe na mazizi a nyama zawe. Tiito atthajiyeevo nzina la Sukooti.

Yaakhumpa ontta Shekemu

¹⁸ Yaakhumpa arutiyeevo Pata Ara khufiya Shekemu tuniya ya Kanaani ari nkumi, khweemesa heema zawe kharipu ya sitati ethiitile.

¹⁹ Khuuzanya nshapa puuro ethiitile eemesiyeevo heema yawe, na aana a Hamori, paapa wa Shekemu, khwa hisapu miiya nzurukhu wa feeta.

²⁰ Attaaphale khunjeka alitaari khuntthaja Elooyi “Nluku wa Ezirayiilu.”