Mwanzo 31 - Hapari Zooshapweya

Yaakhumpa onintthira Labani

¹ Yaakhumpa khuuziwa mattakhuzi aari olupaaye aana a Labani araka: “Yaakhumpa athuula zooshi paapa aariinaazo, areela mwaasa wa maali za paapa.”

² Yaakhumpa khoona yoori Labani khaari omweettettisa saana nkhama aari omweettettisaazo raku.

³ Nnyizinku khumuuza Yaakhumpa yoori: “Orutele nti wa apapazo okhu ovokoliweewo, miiyo kinttela wiiya vamote na weeyo.”

⁴ Yaakhumpa khuruma okhuweliwa Rakeele na Liiya yoori alawe otthuttu okhule aari ojisaawo nyama zawe.

⁵ Noofiya khuwooza yoori: “Kinoona yoori papeenu khanikeettettisa saana nkhama raku. Ila Nluku wa paapa ori vamote na miiyo siikhu zooshi.

⁶ Mweeyo mwinjuwa yoori kakhola khaazi ya papeenu khwa kuvu zaka zooshi.

⁷ Papeenu khukittettekha na khuzukulisa phakari yaka swaafu khumi, ila Nluku khuhintakheli yoori akirettele zootakhala.

⁸ Noolupa yoori nyama epile zooshi za wiiyana malepa phakari yaka, nyama epile khusala ziwaapattha aana awiiyana malepa paasi. Noolupa yoori nyama zoottweleela pi zawo, nyama epile khusala ziwaapattha aana oottweleela.

⁹ Nluku othuuto ti ye athuuliyeeyo nyama za papeenu khukinkha miiyo.

¹⁰ “Noofiya wakathi zaari wiimitthaavo nyama epile, kooniye muulottha mirurumpi zaari opepheraaye ziri za mikhwenyenye, zoottweleela na za malepa.

¹¹ Nlayikha la Nluku khukikhuwela muulottha liraka: ‘Yaakhumpa!’ Miiyo khujipu: ‘Lapeekha!’

¹² Nlayikha ntthile khulupa yoori: ‘Olanse maasho awo woone nyama zimpepheriwa pi mirurumpi za mikhwenyenye, zoottweleela, na za malepa. Koona zooshi epile Labani ooretteliyeezo.

¹³ Miiyo ki Nluku otule oopuweleliyeeyo Beetele okhule waavaaziyeewo mafuttha liwe na khukaahiti. Oleemo mmuti mphu nasaapi ethiiti orutele nti ovokoliweewo.’ ”

¹⁴ Rakeele na Liiya khujipu araka: “Fweeyo khanina hatha etthu yoorithi mmakhono wa papeetthu.

¹⁵ Ye onnitthantta nkhama amalapo! Anuuzanyisa, nzurukhu eetthu wa mahari wooshi aja.

¹⁶ Maali epi zooshi Nluku alaziyeeyo mmakhono wa papeetthu pi zeetthu na aaneetthu. Apho orette zooshi epi Nluku awuuziyeeyo.”

¹⁷ Yaakhumpa khuwaapakhira aanaawe na aakhaawe vankamiiya.

¹⁸ Khuthuula nyama zawe na maali zawe zooshi aapatthiyeezo Pata Ara, khusala arutela wa papaawe Esiyaakha tuniya ya Kanaani.

¹⁹ Wakathi Labani aalawiyeeyo okasa ovuzi wa pwittipwitthi zawe, Rakeele khwiiya sanamu za papaawe aarettiyeeyo wiiya miluku zawe.

²⁰ Ti nanna Yaakhumpa anttettekhiyeeyo Labani wa nti wa Aramu, khutthirawo owawe woohinleezi.

²¹ Khutthirisa vitthu zawe zooshi arinaazo, khulokha muuttho wa Efwarati khusala alawa nti wa nyaako za Gileyaati.

Labani onimwiikarisa Yaakhumpa

²² Eviriyeevo siikhu ttatthu, Labani khuuziwa yoori Yaakhumpa atthira.

²³ Ye khuwaathuula ajamaaze khusala amwiikarisa Yaakhumpa mpakha siikhu sapa, khunsikana onyaako wa Gileyaati.

²⁴ Aphano Nluku khunlotthisa Labani osikhu eettaka olala yoori: “Phoole! Ohimuuze hatha etthu yooshapweya Yaakhumpa ama yootakhala.”

²⁵ Labani khunsikana Yaakhumpa eemesiye heema zawe onyaako wa Gileyaati ye na ajamaaze, noofiya khumaka kharipu na attaaphale aamakiyeevo Yaakhumpa.

²⁶ Ye khumuuzela Yaakhumpa yoori: “Epi okiretteliyeezo niini, zookittettekha khuwaathuula aanaaka nkhama atthu ookholiwa viittha?

²⁷ Wakittettekhela ni khutthira sirini? Okuuziye khaneetta oleezana na furaha niipaka maliipo, koma na tthakare?

²⁸ Weeyo khuhikiweji khapula kileezanana aanaaka na atuulwaka! Epi orettiyeezo vitthu zoololo.

²⁹ Miiyo kinaaye owahi wa wuuhoowisa, ila osikhu wa taana Nluku wa papaawo khukuuza yoori: ‘Phoole! Ohimuuze hatha etthu yootakhala ama yooshapweya.’

³⁰ Aphano nkhama weeyo watthira mwaasa wa wuunukhela wa papaawo, miluku zaka weeyela ni?”

³¹ Yaakhumpa khunjipu Labani araka: “Keetta woova, kaari wuupuwela yoori mwintta okinyakanya aaneenu.

³² Amana mwinsikanana ntthu miluku zenu, ahiiye haayi. Mashaahiti ajamaazetthu apa; noosikana etthu ya wiiya yenu kirina miiyo mwithuule.” Yaakhumpa khaajuwiye yoori Rakeele ti eeyiyeeyo miluku epile.

³³ Labani khuvira nheema wa Yaakhumpa na nheema wa Liiya na etile ya akarumeya apale awiri, ila khuhisikanimo. Noosaruwamo nheema wa Liiya, khweetta nheema wa Rakeele.

³⁴ Rakeele aarettiye atthiiye vathi wa nsaawu wa enkamiiya eekhaleliye. Labani khuthola nheema wooshimo khuhipatthi.

³⁵ Rakeele khumuuza papaawe yoori: “Mwihikatipukhe mbwanaaka mwaasa woohilankhi noowoonani, keetta wiiya mmweezi.” Ye khweekesa miluku zawe epile ila khuhipatthi.

³⁶ Yaakhumpa khwiiphiiriwa, khusala ammaruwela Labani yoori: “Niini kitthekiyeeyo? Wala kakosa ni yoofiyelela okiikarisa mwiri wookatipukha?

³⁷ Mapwattha aka ooshi mwathola, mwasikanamo niini ya wiiya yenu? Nkhama mwasikanamo etthu yenu mwitiise apha ariivo attwiizaku na attwiizenu aniphuke fweeyo awiri.

³⁸ “Neekhala vamote nyaakha eshiriini. Khina pwittipwitthi yenu wala puuzi yenu enaharipweye erukulu yaya na akinarafune hatha pwittipwitthi moote ya nliphanko mweenu.

³⁹ Akinootiseleni hatha nyama moote yoovulalisiwa khufwa; miiyo keetta oriphelaka. Mweeyo mwaari oveka oriphiwa wakhula nyama yaari wiiyiwaaye osikhu na nthana.

⁴⁰ Nthana keetta ohoowa mwaasa wa haari, osikhu keetta ohoowa mwaasa wa ozizima, osikizi khawaari okikhola.

⁴¹ Ti nanna miiyo keekhaliyeeyo vaje venu nyaakha eshiriini. Kookholelani khaazi nyaakha khumi na mine yoori eeye mahari a aaneenu oowiiri, na nyaakha sitha kishukisaka nyama zenu, phakari yaka yiiyaka nyama etthiipo, ila mweeyo khuzukulisa phakari yaka swaafu khumi.

⁴² Eriwaka khaari Nluku wa paapa, Nluku wa Eburahiima otu amooviyeeyo Esiyaakha, wiiya vamote na miiyo, mweetta okiikara woohikinkhi hatha etthu. Ila Nluku khoona ohoowa waka na khaazi kikholiyeeyo, taana osikhu ye ooshowerani.”

Wahati wa Yaakhumpa na Labani

⁴³ Labani khunjipu Yaakhumpa yoori: “Aakha apa aanaaka, aanaaya atuulwaka, nyama epo oriina pi zaka. Zooshi epi onoonaazo pi zaka. Miiyo kiwaarettele niini aanaaka na aanaaya apa awaavokoliyeeyo?

⁴⁴ Apho, nirette wahati miiyo na weeyo, otthuupo wiiye oshaahiti eetthu.”

⁴⁵ Aphano Yaakhumpa khuthuula liwe khweemesa nkhama nripu.

⁴⁶ Ye khuwooza ajamaaze yoori: “Mwilokotthele mawe muukele.” Yo khulokotthela, khwiikhala khusala aja nshini wa mawe atthaapale ookeliyeeyo.

⁴⁷ Labani khutthaja nzina puuro etile la Yakaare Sahatuuta, naye Yaakhumpa khutthaja nzina la Kaleeti.

⁴⁸ Aphano Labani khulupa yoori: “Mawe apa nuukeliyeeyo apha leelo, oshaahiti eetthu miiyo na weeyo.” Tiito yaari wiittheliwaaye nzina la Kaleeti.

⁴⁹ Khusala yiittheliwa theenya nzina la Misipha, mwaasa wa ye olupa araka: “Nnyizinku asala aneekesela amana naattuwana.

⁵⁰ Amana owaahazula aanaaka na khuweekesa aakha akina ohiiyi yo, hatha nkhama khajuweeni ntthu, wuupuwele yoori Nluku shaahiti eetthu.”

⁵¹ Labani khumuuza Yaakhumpa yoori: “Woone mawe apa ariiye apha na nripu ntthi keemesiyeeyo vakatthi veetthu miiyo na weeyo.

⁵² Kulu eti ya mawe na nripu, oshaahiti yoori akinteela wiirukhela kaapu yawo oteela wuuharipwela, wala weeyo ohiirukhe otaaka kaapu yaka oteela okiharipwela.

⁵³ Nluku wa Eburahiima, Nluku wa Nahoori, Nluku wa papaawo ti aniphuke.” Yaakhumpa khulapha khwa nzina la Nluku wa Esiyaakha otule aari omoovaaye.

⁵⁴ Yaakhumpa khuretta twaha vamwaako khuwaakhuwela ajamaaze ooshi aariinaaye yoori aje vamote, nooja nawiisha khulala vamwaako attaapho.

⁵⁵ Mmeesho mwaya lifwajiri Labani khulankha khuwaapatikha aanaawe na atuuluwe, khuwaaparikhiya, khusala arutela owawe.