Mwanzo 30 - Hapari Zooshapweya

¹ Rakeele ooniyeevo yoori Yaakhumpa khaari ompatthela mwaana, khusala anlilela wiivu ttwiiye. Khumuuza Yaakhumpa yoori: “Okipatthele mwaana, nohiiyi etthiipo kintta ofwa!”

² Yaakhumpa khumkatipukhela Rakeele, khumuuza yoori: “Weeyo onikoona nkhama Nluku? Ye ti ahiniwinkhaaye mavokozi.”

³ Aphano Rakeele khumuuza yoori: “Kinaaye karumeya aka Biila, onthuule othuuto orapalelane yoori ampatthe mwaana zwaamu yaka, kiiye maama khwa ye.”

⁴ Tiito Rakeele khunthuula Biila khumwinkha Yaakhumpa khwiiya muukhaawe.

⁵ Biila khwiimittha khumpattha mwaana.

⁶ Aphano Rakeele khulupa yoori: “Nluku akirettela shariya, asiila lompa yaka akinkha mwaana.” Khuntthaja nzina la Daani.

⁷ Biila karumeya wa Rakeele khwiimittha theenya khumpattha mwaana wa phiiri.

⁸ Rakeele khulupa yoori: “Kaarina viittha khuluyeene na ttwiiyaku, ila kanshintta.” Mwaana otule khuntthaja nzina la Nafitaali.

⁹ Liiya nawoona yoori alikha ovokola, khunthuula karumeya awe Ziilipa khumwinkha Yaakhumpa khwiiya muukha awe.

¹⁰ Ziilipa karumeya wa Liiya, khupattheliwa mwaana ti Yaakhumpa.

¹¹ Liiya khulupa yoori: “Kashapweyiwa mwaani!” Khuntthaja nzina la Gaati.

¹² Ziilipa karumeya wa Liiya khunvokola mwaana nkinoko theenya.

¹³ Liiya khuri: “Kafurahi mwaani! Mpakha aakha akina anteela okuuza yoori kenkhiwa furaha!” Mwaana otule khuntthaja nzina la Asheeri.

¹⁴ Wakathi wa wuurula tiriku Ruubeni aalankhiye khusala alawa omashapa, khusikana mishumo eniitthiwaaye mathunkuja, khuthuula khulawa khumwinkha Liiya mamaawe. Rakeele khunvekela araka: “Safwatali, kimeeleni mathunkuja vattitthiiru apo atiisiyeeyo mwanenu.”

¹⁵ Ye khujipu araka: “Wanthuula mannaka, khootosheeni? Theenya ontakha othuule mathunkuja apa atiisiyeeyo mwanaka?” Rakeele khunjipu araka: “Kemaani! Nlaweni nipatili, mwikinkhe mathunkuja apo, osikhu opu Yaakhumpa mwilawe mwarapalelane mweeyo.”

¹⁶ Njuwa looveva Yaakhumpa arutaka omashapa, Liiya khunthepeeza khusala amuuza yoori: “Leelo onttela orapalelana miiyo, maana keetta wuurentteri na mathunkuja atiisiyeeyo mwanaka.” Nooripa Yaakhumpa khulala vamote na Liiya.

¹⁷ Nluku khusiila lompa ya Liiya, khwiimittha khumpattha mwaana wa thaanu wa Yaakhumpa.

¹⁸ Liiya khulupa yoori: “Nluku akitthuva mwaasa wonthuula karumeya aka khumwinkha mannaka.” Tiito khuntthaja nzina la Ezakaari.

¹⁹ Liiya khwiimittha theenya khumpattha mwaana wasiitha.

²⁰ Ye khuri: “Nluku akinkha etthu ya fwayita, aphano mannaka onteela otuveliwa venkivene ti miiyo mwaasa wompatthela aana sitha.” Tiito mwaana otule khuntthaja nzina la Zebulooni.

²¹ Wiishela waya Liiya khumpattha mwaana nkina wankha khuntthaja nzina la Tiina.

²² Nluku khumuupuwela Rakeele, khusiila lompa yawe khumwinkha mavokozi.

²³ Ye khwiimittha khumpattha mwaana. Khulupa yoori: “Nluku eeshisa haaya yaka.”

²⁴ Khuntthaja nzina la Yuusufu, alupaka yoori: “Nnyizinku ti akinkhe mwaana nkina.”

Labani na Yaakhumpa ansiilana opheya

²⁵ Paata ya Rakeele ompattha Yuusufu, Yaakhumpa khumuuza Labani yoori: “Kilikheni kirutele nti kivokoliweeyo.

²⁶ Okinkhe aakhaaka apa kiwaakholeliyeeyo khaazi na aanaaka kilawe. Weeyo onjuwa khaazi kuukholeliyeeyo.”

²⁷ Labani khujipu yoori: “Safwatali nkhama onikisiileza ohilawe, miiyo sako zaka zakuuza yoori Nnyizinku akiparikhiya mwaasa wa weeyo.

²⁸ Apho okuuze phakari ontakhaaye kisala kuuripha.”

²⁹ Yaakhumpa khunjipu: “Weeyo onjuwa yoori khaazi kuukholeliyeeyo ti yawaatta na nanna kaari oshukisaazo nyama zawo mpakha waatta.

³⁰ Miiyo kihinate nyama zawo zaari vattitthiiru leelo pi zawaatta. Nnyizinku ooparikhiyani mwaasa wa miiyo. Khi ajamaazaku kinttela owaatthantta lini?”

³¹ Labani khumuuzela yoori: “Kuuriphe niini?” Khujipu Yaakhumpa: “Mwihikiriphe hatha etthu. Kintta orutela oshukisa nyama zenu amana nisiilana saana.

³² Leelo kinttela woona maphanko ooshi a nyama zawo, kilazakamo pwittipwitthi zooriipa, zoottweleela na za malepa, puuzi zoottweleela na za malepa. Eto ti enttelaaye wiiya phakari yaka.

³³ Etthiipo enttela okhweya woona okho ninttaawo nkhama ki wa waamineya. Wakathi onttelaaye woona nyama zaka, amana yiiyamo nliphanko mwaka puuzi yohiiyi ya malepa ama ya mattottonka, na pwittipwitthi kiina yohiiyi yooriipa, ontta ojuwa yoori pi za wiiyiwa.”

³⁴ Labani khuri: “Osiilana weetthu wiiye otthuupo olupiyeeyo.”

³⁵ Siikhu ethiitile, Labani khuphakula puuzi zeelume na zeekha zaariina malepa oolakala, na pwittipwitthi epile zaariina malepa ooriipa khuwenkha aanaawe oshukisa.

³⁶ Labani khuruma osusisiwa liphanko ntthile, khulawaniwa ohali woolepawo kiyasi ya siikhu ttatthu ntthu ari nsafwari na okhule aariiwo Yaakhumpa. Yaakhumpa khusala ashukisa nyama za Labani epile zaasaliyeezo.

Nanna ariphiweezo Yaakhumpa ti Labani

³⁷ Yaakhumpa khushija puutta ttatthu miwishi za miitthi zoofwarikhana na khwa etthiipo khuttha mikhwenyenye zoolakala, amanyaka woolattanisavo na khuttha etthiipo phantte yoolakala nkatthi wa puutta zaya etthiipo.

³⁸ Nawiisha khuttheya puutta epile zomanyiwa vahali aphale zaari onywaavo, omaasho wa liphanko vahali zaari opepheranaavo. Tiito aari otthaakaaye puutta epile zoophaka omaasho waya amana zinywaka.

³⁹ Amana zipepherana paata ya woona puutta epile, aana zaari owaapatthaaye aari wiiya oophaka, oottweleela, na a malepa.

⁴⁰ Yaakhumpa khuphakula nyama epile khuttha mphule zaariimo pwittipwitthi zeekha zoolakala yoori zisala zeekesa okhule ziriiwo epile zooriipa na za malepa za nliphanko la Labani. Khufuwa maphanko awe khuphakula khuhikusanyi na epile za Labani.

⁴¹ Amana zipepheriwaka epile zeekha zaruthupa, ye eetta ootthaka puutta omaasho waya vahali zaari onywakaavo yoori zisala ziimittha zeekesaka puutta.

⁴² Ila nawoona yoori nyama eti ti yawootta khaari ottheela puutta. Epile zawootta zaari wiiya za Labani ila epile za ruthupa zaari wiiya za Yaakhumpa.

⁴³ Khwa etthiipo, ye khwiiya thaajiri nwulweene khwiiyana maphanko awaatta a nyama, akarumeya aakha na aalume, nkamiiya na apuuru.