Mwanzo 26 - Hapari Zooshapweya

Esiyaakha na Rapekha nti wa Keraari

¹ Yaapuwiye jala nti opule nkhama etthiipile yaapuwiyeeyo wakathi wa Eburahiima. Tiito Esiyaakha khulawa nti wa Keraari okutthanana Apimeleekhi mfwalume wa Afiliishiti.

² Nnyizinku khumpuwelela Esiyaakha, khumuuza yoori: “Ohilawe tuniya ya Misuri; weekhale nti kintakhaaye owuuza.

³ Ottuukho miiyo kinttela wiiya vamote na weeyo na kinttela wuuparikhiya. Weeyo na ojama awo kinttela owinkhani nti opo wooshi, kilipiselaka wahati opule kaalaphiyeeyo kimwaahitaka papaawo Eburahiima.

⁴ Kinttela waattisa ojama awo nkhama matthottowa ootulu, na kinttela owinkha tuniya yooshi eti. Mwaasa wa ojama awo, khapila zooshi za va tuniya zinttela wiiya zooparikhiyiwa,

⁵ maana Eburahiima asiileza huula yaka, ashututela oruma waka, mwentto aka, kano zaka na masomi aka.”

⁶ Aphano Esiyaakha khusala eekhala nti wa Keraari.

⁷ Atthu a nti opule noomuuzela monkoni wa muukhaawe, ye khuri: “Nlupwaaka.” Mwaasa yoori Rapekha aari wooshapweya, Esiyaakha eetta woova olupa yoori muukhaawe. Ye aari wuupuwela yoori alume a mmuti mphule eetta omuula asale na Rapekha.

⁸ Esiyaakha eekhaliye Keraari siikhu zawaatta. Siikhu moote, Apimeleekhi mfwalume wa Afiliishiti eetta othurumela veettakha khumoona Esiyaakha ampapasaka muukhaawe.

⁹ Aphano Apimeleekhi khunkhuwela Esiyaakha khumuuza yoori: “Otu, khweele muukhaawo! Khi apho waari oraaye nlupuwo?” Ye khujipu yoori: “Keetta woova wuuliiwa mwaasa wa ye.”

¹⁰ Apimeleekhi khuri: “Niini epo oniretteliyeezo? Khi eriwaka ntthu mmote wa fweeyo eettiye olalana, weeyo waari onittha paathuli?”

¹¹ Apimeleekhi khuwooza atthu ooshi yoori: “Wakhula otule antakhaaye onsapa mwinyi otu ama muukhaawe weekhweele ontta ofwa.”

¹² Esiyaakha khulima nshapa lawe nti otthuupule, mwaasa wa Nnyizinku omparikhiya mwaakha otthuupo khuurula vitthu swaafu miiya zooziti epile aazaliyeezo.

¹³ Ye khureela, khusala evira zeekezeleyaka maali zawe, khwiiya thaajiri nwulweene.

¹⁴ Aarina maphanko a pwittipwitthi, puuzi, mompe na aarina akarumeya awaatta, ti nanna Afiliishiti laawaatiyeeyo nrima.

¹⁵ Milipu zooshi epile aathipiyeeyo akarumeya a Eburahiima paapa wa Esiyaakha ari haayi, Afiliishiti khusirela.

¹⁶ Aphano Apimeleekhi khumuuza Esiyaakha yoori: “Oleemo mmuti mphu, maana weeyo wapattha owahi waniziti fweeyo.”

¹⁷ Tiito ye khuthama nti opule, khulawa khumaka nttapo la Keraari khwiikhala ottuukho.

¹⁸ Khuthipa opheya milipu epile zaathipiweeyo wakathi wa Eburahiima, zaasireliweeyo pi Afiliishiti paata ya ofwa Eburahiima. Esiyaakha khwinkha mazina milipu epile, atthaapale papaawe aatthajiyeeyo.

¹⁹ Siikhu kiina, a karumeya awe khuthipa mmattapo nttumphule, khunsikana naattuuttu wa maati.

²⁰ Amakhampuzi a Keraari khusala anyakulisana na amakhampuzi a Esiyaakha araka: “Maati apa peetthu,” tiito Esiyaakha aatthajiyeeyo nzina nlipu aya opule la Eseki, mwaasa wa wuumaneliwa.

²¹ A karumeya awe khuthipa nlipu nkina, ila amakhampuzi apale a Keraari khupuwisa wuumani theenya, ye khutthaja nzina la Sitiina milattu.

²² Aphano khulaavo aphale vaya khulawa khuthipa nlipu nkina, khuhiivo hatha ntthu mmote wa wuumanelana. Ye khutthaja nzina la Rehopoothi araka: “Aphano Nnyizinku aninkha puuro ya nafwaasi, na ninteela oruwera saaneene nti otthuupu.”

²³ Attaaphale Esiyaakha khulawa Beeresheba.

²⁴ Nnyizinku khunteela osikhu khumuuza yoori: “Miiyo ki Nluku wa papaawo Eburahiima. Ohoove, kiri vamote na weeyo. Kintta wuuparikhiya kaattise ojama awo mwaasa wa papaawo karumeya aka.”

²⁵ Attaaphale ye khunjeka alitaari, khwaaputu nzina la Nnyizinku. Khweemesa heema yawe na akarumeya awe khuthipavo nlipu.

Osiilana wa Esiyaakha na Apimeleekhi

²⁶ Apimeleekhi aalankhiye nti wa Keraari na shawuriiya awe Ahuzaathi na Fikhoole namalokozela wa anajanka olawa okutthanana Esiyaakha.

²⁷ Esiyaakha noowoona khuwooza yoori: “Mweeyo khamwintuveliwa ti miiyo mweettiye okiikara mmuti mweenu. Khi mwateela ni?”

²⁸ Yo khunjipu araka: “Neetta woona yoori Nnyizinku ori vamote na weeyo. Khuupuwela yoori enshapweya olapha na winkhana wahati weeyo na fweeyo.

²⁹ Osiilana waya pu opu: Olaphe yoori khunnirettela zootakhala nkhama etthiipo fweeyo nihuuretteleeni, noorettela zooshapweya na khuulikha olaawo na heeri. Weeyo o wooparikhiyiwa ti Nnyizinku.”

³⁰ Esiyaakha khuwenkha etthu yoojiwa yooshapweya khuja khunywela.

³¹ Mmeesho mwaya supuyeene khulaphisana. Esiyaakha khuwaaleeza, yo khulawa na heeri.

³² Siikhu ethiitile khuta akarumeya a Esiyaakha oteela omuuza hapari za nlipu opule aathipiyeeyo yoori: “Napattha maati.”

³³ Nlipu aya opule Esiyaakha khutthaja nzina la Sheeba. Mpakha leelo sitati etile eniitthiwa Beeresheba.

³⁴ Wakathi Ezawu apatthiyeevo nyaakha arupayiini khunrala Yudiiti mwaana wa nhiiti aniitthiwaaye Beeri, na Basemaathi mwaana wa nhiiti nkinoko aniitthiwaaye Elooni.

³⁵ Aakha apo awiri, Khutapanya ohaayi wa Esiyaakha na Rapekha.