Mwanzo 24 - Hapari Zooshapweya

Oloola wa Esiyaakha

¹ Eburahiima aarettiye ooluvaliye arina nyaakha za waatta, Nnyizinku amparikhiyiye khwa zooshi.

² Siikhu moote, khumuuza karumeya nwulu wa vaje vawe aari weettettisaaye maali zawe zooshi aariinaazo, araka: “Othuule nkhono awo otthe vathi wa liphaja laka

³ kuulaphise khwa nzina la Nnyizinku, Nluku wa pinkuuni na vathi, yoori khunteela omweekesa muukha wa nti otthuupu kiniikhalaaye wa wiiya mwaana wa a Kanaani.

⁴ Ila olankhe olawe nti woowaka wamweekese muukha vakatthi wa ajamaazaku, ate eeye muukha wa Esiyaakha.”

⁵ Karumeya otule khumuuzela yoori: “Khi amana muukha oto ahitakhi okilotta miiyo mmuti mphu, kinthuule mwanawo kinlawane nti olankhiyeeyo?”

⁶ Eburahiima khunjipu yoori: “Phoole! Ohinlikhe mwanaka orutela ottuukhu.

⁷ Nnyizinku, Nluku wa pinkuuni akilaza vaje wa apapazaku nti wa ajamaazaku khukaahiti na olapha araka: ‘Nti opu kinttela winkha ojama awo.’ Ye ontta operekha nlayikha lawe yoori luulokoze, omweettele muukha yoori ate araliwe ti mwanaka Esiyaakha.

⁸ Amana muukha aya oto ahitakhi ota na weeyo, olapha wawo oniiya woofujeya. Ila ohiiye wonthuula mwanaka onlawana.”

⁹ Aphano karumeya otule khuthuula nkhono awe khuttha vathi wa liphaja la Eburahiima mbwanaawe. Khulapha yoori aari weettela oretta etthiipile ooziweezo.

¹⁰ Karumeya otule khuthuula enkamiiya khumi za mbwanaawe na majathi apale enkhiweeyo khusala alawa nti wa Mezapotaamiya sitati ya Nahoori.

¹¹ Njuwa looveva, wakathi opule aakha anttelakaaye ottekha maati, khukokhorisa enkamiiya zawe epile onlipu kharipu ya sitati.

¹² Attaaphale khusala alompa araka: “Oo! Nnyizinku, Nluku wa mbwanaaka Eburahiima, kinuuvekela yoori siikhu eti ya leelo okiparikhiye, na onthoonyeze pheta ya waamineya mbwanaaka Eburahiima.

¹³ Onikoonelaavo apha kiri wa weemela kharipu ya nlipu, aanaakha a atthu a sitati eti antakaavo ottekha maati.

¹⁴ Mwaari othuuto kinttelaaye omuuza yoori: ‘Wiinamise yuuku yawo okimeele maati kinywe,’ ye khulupa yoori: ‘Apa nywa, na kintta onywisa enkamiiya zawo,’ eeye othuuto onthawuleliyeeyo Esiyaakha. Ti etthu enttelaaye okijuwisa yoori wanthoonyeza pheta ya waamineya mbwanaaka Eburahiima.”

¹⁵ Ahineeshe olompa, nasaapiru onimoona Rapekha mwaana wa Betuweeli eettaka ota alankhaka nsitati athuuliye yuuku atthiye valifuzi. Betuweeli aari mwaana wa Miilika muukha wa Nahoori, ttwiiye Eburahiima.

¹⁶ Rapekha aari mwaari wooshapweya channu woohinjuwi nlume, ye khwiishukhela vanlipu khuttekha maati khwiitaaza yuuku yawe khuwelela.

¹⁷ Karumeya otule khulankha khusala antthirela, khumuuza yoori: “Safwatali kimeele maati apo ari nyuku mwawo kinywe.”

¹⁸ Ye khujipu araka: “Mwinyi, apa mwinywe.” Khurula yuuku khukholelela mmakhono khumwinkha khunywa.

¹⁹ Nawiisha omwinkha maati, khumuuza yoori: “Kinttela ottekha makina theenya kinkhe enkamiiya zenu zinywe mpakha zooshi ziishe.”

²⁰ Nasaapiru khwiitthela maati apale n'yoopo zaari onywaamo nyama, khwaakuva khulawa vanlipu ottekha swaafu za waatta yoori zinywe enkamiiya zooshi.

²¹ Mwinyi otule khusala anyamaliye amweekesaka mwaari otule saaneene yoori ajuwe nkhama Nnyizinku aparikhiya safwari yawe ama wala.

²² Ziishiyeevo onywa enkamiiya epile, khulaza kharawu ya weero ya karaama sitha na kakhana piiri za weero zaari ochiraaye karaama miiya olemela waya khunwalisa mmakhono mwawe.

²³ Khumuuzela yoori: “Weeyo o mwaana waani? Safwatali nkakuuze nkhama wa papaawo ewaakho puuro yoolalawo miiyo na ashirikhaaka apa.”

²⁴ Ye khujipu yoori: “Miiyo ki mwaana wa Betuweeli, mwaana wa Miilika na Nahoori.

²⁵ Onti ewaakho puuro yoolalawo mweeyo, na nyaani za waatta zooja enkamiiya zenu.”

²⁶ Aphano karumeya otule khukokhora khumwaaputu Nnyizinku,

²⁷ araka: “Asifwiwe Nnyizinku, Nluku wa mbwanaaka Eburahiima, ahisahaweeni onthoonyeza pheta yawe ya waamineya khwa mbwanaaka, maana akilokoza mpakha vaje wa ajamaaze mbwanaaka.”

²⁸ Aphano mwaari otule khutthira eettaka owawe, khuwooza ajamaaze vitthu zaarettikhaniyeezo.

²⁹ Rapekha aarina nlupuwe aari wiitthiwaaye Labani. Ye khutthira eettaka onlipu yoori amoone ntthu aya otule.

³⁰ Wakathi amonaniyeevo kharawu na kakhana aawalisiweeyo nlupuwe, na khusiila vitthu ooziweeyo Rapekha ti nlume otule, ye khulankha khusala alawa omoona nlume otule ottuukhule aariiwo na enkamiiya zawe nshini wa nlipu.

³¹ Labani khuri: “Ote okhuno, weeyo wooparikhiyiwa ti Nnyizinku! Weekhalela ni veetakale apho? Kawaattalelela puuro onti na vahali woopwehavo enkamiiya zawo.”

³² Attaaphale Labani khusala alawa na karumeya otule mpakha owawe. Khwiishushiwa mapwattha va enkamiiya epile na khwinkhiwa nyaani yoori zije, na karumeya otule khwinkhiwa maati yoori oose moolu awe na atthu apale aarinaaye.

³³ Nawiisha khutiisiwa etthu yoojiwa khwinkhiwa, ila karumeya otule khuri: “Akinja kihaazeeni olupa etthu kaateeliyeeyo.” Labani khumuuza yoori: “Haya lupa.”

³⁴ Aphano khwaaza olupa araka: “Miiyo ki karumeya wa Eburahiima.

³⁵ Nnyizinku amparikhiya venkivene, amwinkha maali khwiiya woojuwanikha; onaaye pwittipwitthi na mompe, feeta na weero, akarumeya aalume na aakha, enkamiiya na apuuru.

³⁶ Suhura muukha wa mbwanaaka Eburahiima, anvokola mwaana ooluvaliye. Mwaana aya otu amwinkha vitthu zooshi ariinaazo.

³⁷ Mbwanaaka khukilaphisa araka: ‘Nti opu kiniikhalaaye ohimweekesemo muukha wa aana a Kanaani.

³⁸ Ila olawe wa apapazaku vakatthi wa ajamaazaku wamweekese ottuukho muukha yoori ate araliwe ti mwanaka.’

³⁹ Aphano miiyo khunjipu mbwanaaka: ‘Khi muukha aya oto amana ahitakhi okilotta?’

⁴⁰ Ye khukijipu yoori: ‘Nnyizinku otu kininrumeyelaaye ontta operekha nlayikha luulokoze, na ontta oparikhiya safwari yawo yoolawa omweekesa muukha wa wiiya jamaayaku na wa vaje wa apapazaku yoori ate araliwe ti mwanaka.

⁴¹ Amana ofiya wa ajamaazaku yo khuhitakhi owinkha, apho ontta wiiya wootaphuliwa khwa olapha.’

⁴² “Phi kiriyeevo noofiya onlipu leelo, khusala kimuuza Nnyizinku kiraka: ‘Oo Nnyizinku! Nluku wa mbwanaaka Eburahiima, nkhama safwari eti kineettaaye otakha wawo, okijaaliwe.

⁴³ Nasaapi eti miiyo kiri apha nshini wa nlipu opu wa maati; mwaari othuuto antelaaye ottekha maati amana kinvekela yoori: “Kimeele maati ariiye nyuku mwawo,”

⁴⁴ ye khukuuza yoori: “Apa onywe, na kinttela ottekha makina kinkhe nyama zawo,” eeye othuuto muukha aya athawuliweeyo ti Nnyizinku yoori araliwe ti mwaana wa mbwanaaka.’

⁴⁵ “Ahineeshe mattakhuzi apale oolompa varoho vaka, kinoona Rapekha athuuliye yuuku valifuzi vawe eettaka vanlipu ottekha maati, miiyo khumuuza yoori: ‘Safwatali kimeele maati kinywe.’

⁴⁶ Ye khwiishusha yuuku yawe nasaapiru khukuuza yoori: ‘Apa onywe, na kintta winkha enkamiiya zawo zinywe.’ Khukinkha miiyo khunywa na khwinkha enkamiiya zaka khunywa.

⁴⁷ “Aphano miiyo khumuuzela yoori: ‘O mwaana waani?’ Ye khujipu yoori: ‘Miiyo ki mwaana wa Betuweeli mwaana wa Nahoori na Miilika.’ Ethiito miiyo khunwalisa kharawu vaphula vawe khunwalisa kakhana makhono awe.

⁴⁸ Miiyo khukokhora, khwiinama khumwaaputu Nnyizinku, khunshukhurwela Nnyizinku, Nluku wa mbwanaaka Eburahiima akeettettisiyeeyo tarikhi yooshapweya yoori kimweettele mwaana wa ttwiiye mbwanaaka ate araliwe ti mwanawe.

⁴⁹ Aphano, nkhama mwatakha onthoonyeza pheta ya waamineya mbwanaaka Eburahiima, mwikuuze. Nkhama khamweepu, mwikuuze kijuwe etthu yooretta.”

⁵⁰ Labani na Betuweeli khujipu araka: “Epo zalankha wa Nnyizinku, fweeyo khanina etthu yoowaza.

⁵¹ Rapekha aya otu ari apha, onthuule alawe eeye muukha wa mwaana wa mbwanaawo, etthiipo Nnyizinku alupiyeezo.”

⁵² Noosiila mattakhuzi apale karumeya wa Eburahiima khukokhora khwiinama khufiyisa ajihi vathi omaasho wa Nnyizinku.

⁵³ Elottelanaka khusarula vitthu za feeta na za weero na kuwo khumwinkha Rapekha, khulaza vitthu kiina theenya za maali khumwinkha nlupuwe na mamaawe.

⁵⁴ Nawiisha, ye na akarumeya apale amperekhiyeeyo khuja na khunywa khulala mpakha supu. Noocha karumeya otule khulupa yoori: “Mwikilikhe kirutele wa mbwanaaka.”

⁵⁵ Ila nlupuwe Rapekha na mamaawe khumuuza yoori: “Mwaari otu eekhale attaapha na fweeyo nenkawu siikhu khumi, nawiisha osala olawa saana.”

⁵⁶ Ye khuri: “Mwihikirupazise maana Nnyizinku ashapweyisa safwari yaka. Mwikilikhe kirutele wa mbwanaaka.”

⁵⁷ Aphano yo khunjipu yoori: “Nintta onkhuwela mwaari oto nimuuzele mweenyewe.”

⁵⁸ Khukhuweliwa Rapekha khuuzeliwa: “Ontakha onlotta mwinyi otu?” Ye khujipu yoori: “Aaa, kintakha.”

⁵⁹ Ajamaaze khuleezana na Rapekha na yaaya awe na karumeya wa Eburahiima na atthu apale aataniyeeyo.

⁶⁰ Khuparikhiyiwa Rapekha na mattakhuzi apa: “Weeyo nlupweetthu wiiye maama wa ojama alufu alufu zene; Ojama awo opo oshintte sitati ya maatuwi aya.”

⁶¹ Rapekha khulankha na akarumeya awe a aakha khuwela enkamiiya zaya khusala alawa na nlume otule. Attaaphale karumeya khunthuula Rapekha khusala alawa.

⁶² Esiyaakha aarettiye arutaka onlipu oniitthiwaaye Beeri-Laayi-Rooyi, aari wiikhala Nikeepu, phantte ya kusini ya Kanaani.

⁶³ Siikhu moote, njuwa looveva wakathi Esiyaakha aari othepelaavo mmashapa, khweesa maasho khoona enkamiiya zeettaka ota.

⁶⁴ Rapekha khweesa maasho khumoona Esiyaakha, ye khwiishukha va enkamiiya vawe.

⁶⁵ Khumuuzela karumeya: “Khi mwinyi otule anlankhaaye mmashapa mphule ataaka okhuno niriiwo ti paani?” Ye khujipu araka: “Ti mbwanaaka.” Noosiila toole ye khuthuula nshukwi lawe khujifinikha.

⁶⁶ Karumeya khumuuza Esiyaakha zooshi epile zaarettikhaniyeezo.

⁶⁷ Esiyaakha khunthuula Rapekha khunttha nheema etile yaari ya mamaawe Suhura. Khunrala khwiiya muukhaawe wompheta channu. Aphano Esiyaakha khumpattha ntthu wonkhiza paata yoofwa mamaawe.