Luuka 7 - Hapari Zooshapweya

Amini ya namalokozela wa anajanka

¹ Eeshiyeevo mattakhuzi apale aari owoozaaye atthu, Yinsa khulawa sitati ya Kafwaranaawu.

² Ottuukho aariwo namalokozela mmote wa anajanka wa rooma, aariina karumeya awe wompheta aari olwaaziwaaye khusala asaleela ofwa.

³ Wakathi namalokozela wa anajanka otule asiiliyeevo monkoni wa Yinsa, khuwaaperekha attunkhulu akina a mayaahuuti yoori anvekele Yinsa ate anvonise karumeya awe.

⁴ Yo nonsikana khunvekela wookhanyarelavo araka: “Mwinyi oto onsuhi waawuniwa,

⁵ mwaasa yoori apheta khapila yeetthu na anijekela sinakooka.”

⁶ Aphano Yinsa khulankha khusala alawa vamote na yo, asaleelaka ofiya, namalokozela otule khuwaaruma ashirikha awe olawa omuuza yoori: “Mbwana, ohijantipu, miiyo akinsuhi wuupokherela vaje vaka.

⁷ Tiito miiyo kinoona yoori akinsuhi okutthanana weeyo, ila olupe nttakhuzi limote paasi, karumeya aka ontta ovona.

⁸ Maana na miiyo ki ntthu kiriiye vathi wa ofwalume na ki nlokozi wa anajanka. Kinimuuza mmote yoori: ‘Olawe,’ khulawa; khumuuza nkina yoori: ‘Ote,’ ye khuta. Kinimuuza karumeya aka yoori: ‘Orette khata,’ ye khuretta.”

⁹ Yinsa noosiila epo, khwiiya wooshanka, khuzukuluwa khuwooza atthu apale aari omperekhaaye yoori: “Hatha Ezirayiilu ottuukho akooneeniwo amini nkhama eti.”

¹⁰ Ashirikha apale aarumiweeyo khurutela owawe namalokozela otule, khunsikana karumeya otule avoniye.

Yinsa oninsisimula mwaana wa nunu mmote woofweliwa ti mannawe

¹¹ Mmeesho mwaya Yinsa khulankha khusala alawa sitati ya Nayiimu, anakhiyoni awe na khuntti ya atthu awaatta khusala enlotta.

¹² Asaleelaka ofiya vanlako wa sitati etile, khusaruwa atthu aari weettelaaye ozikha. Otule aari weettelaaye ozikhiwa aari mwaana mmote paasi wa nunu woofweliwa ti mannawe; atthu awaatta a nsitati mphule aari olawa vamote na ye.

¹³ Wakathi Mbwana Yinsa amooniyeevo nunu otule, khumoonela huruma, khunkhuwela khumuuza yoori: “Ohilile!”

¹⁴ Aphano khuwaasusela khusapa janaayiza, apale aathuuliyeeyo khweemela. Yinsa khulupa araka: “Shaapu! Miiyo kinuuruma yoori olankhe!”

¹⁵ Shaapu otule khulankha khwiikhala khusala attakhula; Yinsa khumwinkha mamaawe.

¹⁶ Atthu ooshi khwiiya awoova khunsifu Nluku araka: “Napiyu nwulu aniteela!” Na “Nluku aateeliye owuusuru atthu awe!”

¹⁷ Hapari epile za Yinsa khumwazeyela Yudeya yooshi mpakha miti epile zaattamananiyeeyo.

Yaahaya oniwaaruma anakhiyoni awe wa Yinsa

¹⁸ Yaahaya khuuziwa pi anakhiyoni awe vitthu epile zooshi. Ye khuwaakhuwela awiri,

¹⁹ khuwaaruma yoori alawe amuuzele Mbwana yoori: “Weeyo ti otu naari onwejaaye ama ninweje nkina?”

²⁰ Yo khulawa mpakha ottuukhule aariiwo Yinsa khumuuza yoori: “Neetta orumiwa ti Yaahaya yoori nite niwuuzele nkhama otule naari onwejaaye ti weeyo, ama nivire ninwejaka nkina?”

²¹ Wakathi otthuupule Yinsa khuwaavonisa atthu awaatta aarina vitthu zootakhala, marati awoopisa, na masheethwani, na khuwaafunula maasho atthu awaatta ahaari woonaaye.

²² Yinsa khuwaajipu araka: “Mwiruti mwamuuze Yaahaya epi mwinsiilaaye na mwinoonaaye: ananhooni anoona, anamarakala aneettetta, anamaaharaja antta otwahareshiwa, ananhisiili ansiila, ananfwa ansisimuwa, na hapari zooshapweya antafusireliwa asikhini.

²³ Wooparikhiyiwa ti otule ahinkwakwattuwaaye mwaasa wa miiyo.”

²⁴ Anakhiyoni a Yaahaya noolaavo, Yinsa khusala awooza atthu monkoni wa Yaahaya yoori: “N'yaara mweetteliye woona niini? Tteketthe yiinisiwaka ti pheevo?

²⁵ Ama moona niini? Mwinyi mmote awaliye kuwo zooshapweya? Moone, apale anwalaaye kuwo zootafikhana aniiya nraaha na aniikhala mmanyupa wa afwalume.

²⁶ Nka kuuzeni, mweetteliye woona niini? Napiyu? Wekhweele, miiyo kiniwuuzani yoori anziti napiyu.

²⁷ Otu ti otule yaatikhiweeyo monkoni wa ye yoori: “ ‘Moone, kinlawa kamperekhe karumeya aka omaasho wawo yoori atthenkeze tarikhi yawo.’

²⁸ “Miiyo kiniwuuzani yoori vakatthi wa apale avokoliweeyo pi aakha, khina mmote anzitiyeeyo Yaahaya; ila otule woopushuwa muufwalume wa Nluku, nwulweene zayita ye.”

²⁹ Atthu ooshi mpakha anamariphisa lumpuru noosiila mattakhuzi a Yinsa. Yo khukhupalela yoori tarikhi ya Nluku shariya, paata ya woosiwa ti Yaahaya.

³⁰ Ila mafwarizeewu na anamanozela a kano khukhijilela matakhelo a Nluku khwa yo, khuhoosiwi ti Yaahaya.

³¹ “Anaatamu apa a leelo eti kiwaalattisane niini? Yinsa khurutela theenya yoori, wala alattanana niini?

³² Alattanana khuntti ya asimaana eekhaliye vaparasa akhuwelanaka araka: “ ‘Fweeyo noovumiselani phivi za vaharusi, mweeyo khuhiini; khwiipa liipo la huzuni, ila mweeyo khuhilili.’

³³ Khuta Yaahaya Namoosa woofuka na ahinnywaaye viinyu, mweeyo mwinri: ‘Ye onaaye masheethwani.’

³⁴ Ata Mwaana wa Pinaatamu onja na onnywa, mweeyo mwinri: ‘Mmoone nsokho otu! Namanywa, nshirikha wa anamariphisa lumpuru na anatwampi!’

³⁵ Apale anlottaaye ojuwa wa Nluku, anthoonyeza yoori pi wookhweele.”

Natwampi aavaaziyeeyo mafuttha moolu a Yinsa

³⁶ Mfwarizeewu mmote anvekeliye Yinsa yoori alawe aje owawe. Noofiya Yinsa khuvira nnyupa khwiikhala yoori aje.

³⁷ Muukha mmote natwampi wa sitati ethiitile, noojuwa yoori Yinsa ontta oja wa mfwarizeewu, khuthuula suupha yawe ya mafuttha oonukhela.

³⁸ Khulawa khweemela onyoko wa Yinsa nshini wa moolu awe, khusala alila. Mishozi zawe khusala zittonkela moolu a Yinsa. Khusala akukuttha na nyuuli zawe na opejari moolu a Yinsa avaazaka mafuttha oonukhela.

³⁹ Aphano mfwarizeewu otule nawoona vitthu epile khusala alupa nroho mwawe araka: “Otu eriwaka aari napiyu, eetta ojuwa yoori mwanankha otu aninsapaaye natwampi.”

⁴⁰ Yinsa khumuuza Simawu yoori: “Kintakha owuuza etthu.” Simawu khujipu yoori: “Kuuzeni mwaaliimu.”

⁴¹ Yinsa khumuuza yoori: “Atthu awiri eetta wiiliwa nzurukhu ti mwinyi mmote aari wiipaashisakaaye, otu mmote aari wiiliwa miiya thaanu, otu nkina aari wiiliwa hamusiini.

⁴² Ila oowiiri khuhiivo mmote aawahiyeeyo onripha, ye khuwaaswaamihi oowiiri. Atthu apa awiri amphetachiyeeyo ti tuuvi?”

⁴³ Simawu khujipu araka: “Kinoona yoori ti otule aswaamihiweeyo wa waattavo.” Yinsa khumuuza yoori: “Walikanisa.”

⁴⁴ Ye khumuuza Simawu anthoonyezaka muukha otule araka: “Onimoona mwanankha otu? Miiyo kata vaje vawo apha khuhikinkhi hatha maati yoori koose moolu aka, ila ye oosa moolu aka na mishozi zawe khukukuttha na nyuuli zawe.

⁴⁵ Khukipokhereleeni na peeju, ila ye khalikheleleeni opejari moolu aka.

⁴⁶ Khukivaazeeni mafuttha oonukhela mmwishwa mwaka, ila otu avaaza mafuttha moolu aka.

⁴⁷ Tiito kiniwuuzaaye yoori twampi zawe epile zawaatta ariinaazo zaswaamihiwa; mwaasa woophetacha wawe. Ila otule aswaamihiweeyo vattitthiiru, opheta wawe vattitthiiru.”

⁴⁸ Aphano Yinsa khumuuza mwanankha otule yoori: “Twampi zawo zaswaamihiwa.”

⁴⁹ Apale akharipwishiweeyo khusala oozelana yoori: “Otu paani anwahaaye oswaamihi twampi za atthu?”

⁵⁰ Ila Yinsa khumuuza muukha otule yoori: “Waamini wawo wa wuusuru; olawe na heeri.”