Luuka 6 - Hapari Zooshapweya

Yinsa ti mweenyewe saapatu

¹ Saapatu moote, Yinsa eetta ovira nshini wa nshapa la tiriku. Anakhiyoni awe khusala avulula asusuraka na makhono arafunaka phunje zaya.

² Mafwarizeewu khusala awoozela yoori: “Mwaasa aya niini mwirettaka vitthu ziiyiye mwiikho orettiwa saapatu?”

³ Ye khuwaajipu araka: “Khamwinasome etthu aarettiyeeyo Daawuuda wakathi yankholiyeevo jala na ashirikha awe?

⁴ Ye aaviriye Nnyupa ya Nluku khuthuula phaawu zoohalalishiwa khurafuna, kiina khuwenkha ashirikhaawe, ila aarina ruhusa ya orafuna aari anamalokozela a tiini paasi.”

⁵ Yinsa khulupa araka: “Mwaana wa Pinaatamu Mbwana na ti mweenyewe Saapatu.”

Mwinyi woorakala nkhono

⁶ Saapatu kiina, Yinsa khuvira nsinakooka khusala awaanozela, aarimo mwinyi aarakaliyeeyo nkhono nlume.

⁷ Anamanozela a kano na mafwarizeewu eetta omweekesela yoori amoone Yinsa nkhama aari onvonisa siikhu ya Saapatu, yoori ankwisele paathuli.

⁸ Ila ye aari ojuwa etthu aari wuupuwelaaye atthu apale. Khumuuza mwinyi otule woorakala nkhono nlume yoori: “Olankhe ote vakatthi apha.” Mwinyi khulankha khweemela.

⁹ Aphano Yinsa khuwoozela yoori: “Ensuhaaye orettiwa Saapatu ti tiivi? Yooshapweya ama yootakhala, wuusuru ama wuula?”

¹⁰ Aphano khuweekesa atthu ooshi apale aariivo khumuuza mwinyi otule yoori: “Wookole nkhono awo.” Ye khookola nkhono awe, khwiiya woovonisiwa.

¹¹ Anamanozela a kano na mafwarizeewu khwiiphiiriwa khusala awaza etthu yonrettela Yinsa.

Othawuliwa wa anakhiyoni khumi na awiri

¹² Siikhu zaya epile Yinsa khulankha khusala alawa omwaako olompa, khwiisha osikhu wooshi eettaka anvekelaka Nluku.

¹³ Noocha khuwaakhuwela anakhiyoni awe khuwaathawula khumi na awiri, atthaapo theenya khuwenkha nzina la owaaswihaapa.

¹⁴ Simawu antthajiye nzina la Pheeturu, Antere ttwiiye Simawu, Tiyaaku, Yaahaya, Filiipe, Parutulumeewu,

¹⁵ Matewuzhu, Tome, Tiyaaku mwaana wa Alufeeyu, na Simawu aniitthiwaaye Zelooti,

¹⁶ Yuuda mwaana wa Tiyaaku, na Yuuda Eshikariyoote, otule aari weettelaaye onzinkula Yinsa.

Onozela na ovonisa wa Yinsa

¹⁷ Yinsa khwiishukha vamwaako na anakhiyoni awe khweemela nshini vahali aariivo anakhiyoni awe na khuntti ya atthu a Yudeya yooshi na a Yeruzaleemu, mpakha apale a miti zawaattamela pahari, Tiiru na Sitooni.

¹⁸ Atiiyeeyo yoori asiile na ovonisiwa moolwele aya, mpakha na apale aari wantipwiwaaye ti masheethwani aari ovonisiwa.

¹⁹ Atthu ooshi aari otakha onsapa Yinsa mwaasa yoori waari onsaruwa owahi khusala owaavonisa ooshi.

²⁰ Aphano Yinsa khulansa maasho khuweekesa anakhiyoni awe khuwooza yoori: “Ooparikhiyiwa ti mweeyo mwiiyiye asikhini, maana Ofwalume wa Nluku pu weenu.

²¹ Ooparikhiyiwa ti mweeyo enuukholaanini jala nasaapi, maana mwinlawa mwarupale. Ooparikhiyiwa ti mweeyo mwinlilaaye, maana mwinteela otheya.

²² Ooparikhiyiwa ti mweeyo, amana atthu eephiiriwaka ti mweeyo, awiikarani, oottukhanani na khuwoonani ohifwayi mwaasa wonlotta Mwaana wa Pinaatamu.

²³ “Wakathi aya otthuupo, mwiiye woofurahi na mwitthape, maana tthuvo yenu eniiya khuluyeene pinkuuni. Maana wa nanna etthiipi, apaapa zaya na yo aawaaretteliye manapiyu.

²⁴ “Ila olaanikha pu weenu mweeyo mwaamathaajiri, maana mwapokhera phantte yenu vathi attaapha.

²⁵ Olaanikha pu weenu mweeyo ziwiitaaleliyeenini vitthu zoojiwa, maana mwinteela okholiwa jala. Olaanikha pu weenu mweeyo mwiriina furaha leelo eti, maana mwinteela ojiliza na olila.

²⁶ Olaanikha pu weenu mweeyo amana mwittottopeliwaka pi atthu ooshi, maana apaapa zaya aawaaretteliye etthiipo manapiyu oojipanka.

Owaapheta maatuwi

²⁷ “Nakataalikha mweeyo mwinikisiilaaye, kiniwuuzani yoori mwiwaaphete maatuwi enu, mwiwaarettele saana apale aniiphiiriwaaye ti mweeyo.

²⁸ Mwiwaaparikhiye apale anuulaanaanini na mwiwaalompele apale anuurettelaanini zootakhala.

²⁹ Nkhama ntthu oopwakula nlaku limote, na ntthi likina ontheteezele. Nkhama ntthu oovula ajapi yawo, ohinkhattaze othuula hempe yawo.

³⁰ Omwinkhe wakhula otule anuuvekelaaye, nkhama ntthu athuula etile yiiyiye yawo, ohinkhanyarele wuurutisela.

³¹ Epile mweeyo zinuutuvelaanini oretteliwa pi azeenu, na mweeyo mwiwaarettele azeenu etthiipo.

³² “Amana mwiwaaphetaka apale anuuphetaanini paasi, fwayita ni mwineekeselaaye mmakhono wa Nluku? Hatha anatwampi atthaapo aniwaapheta apale na yo aniwaaphetaaye.

³³ Amana mwiwaarettelaka saana apale na yo anuurettelaanini saana paasi, fwayita ni mwinteelaaye wiiyana? Hatha anatwampi atthaapo na yo anretta etthiipo.

³⁴ Amana mwiweepaashaka paasi apale mwinkhupalaaye wuurutiselani, fwayita ni mwinteelaaye wiiyana? Hatha anatwampi atthaapo aniipaashana aroromelaka orutiselana.

³⁵ Mwiwaaphete maatuwi enu, mwiwaarettele zooshapweya, mwiweepaashe mwiheekeselaka wuurutiselani. Toowo tthuvo yenu enttela wiiya khuluyeene na mwinttela wiiya aana a Nwulu wa Pinkuuni, maana Nluku nkemaani hatha khwa apale ahininshukhurwaaye na apale ootakhala rooho.

³⁶ Mwiiye a huruma nkhama etthiipi Papeenu wa pinkuuni naye eeyiye wa huruma.

³⁷ “Mwihimphuke nzeenu yoori mwihiphukiwe; mwihinhukhumu nzeenu yoori mwihihukhumwiwe; mwinswaamihi nzeenu yoori mwiswaamihiwe.

³⁸ Mwiwenkhe azeenu na Nluku ontta owinkhani: na mphimo khwaamili, wookhitteleliwa na wawiitaala mpakha wiittikha. Maana mphimo otthuupo mwimphimanaaye mwinteela ophimelaniwa otthuupo.”

³⁹ Yinsa khulupa nlikaniso mmote araka: “Ntthu woohooni khaninlokoza ntthu woohooni nzaawe, oowiiri antta okwela nliphotto.

⁴⁰ Nakhiyoni khaninziti mwaaliimu awe, ila wakhula otule ansomiseyaaye saana oniiya nkhama mwaaliimu awe.

⁴¹ “Mwaasa aya niini woonaka etutu eriiye mmaasho wa ttwiiyo, ila khuhooni lipikhi liriiye mmaasho mwawo?

⁴² Enrettikhana toovi weeyo omuuza nzaawo yoori: ‘Ttwiiyaku, nkankaani kuulaze etutu eto eriiye mmaasho mwawo’, na khupe weeyo ohiwahaka woona lipikhi liriiye mmaasho mwawo? Naafikhi! Olazemo khapula lipikhi liriiye mmaasho mwawo, toowo ontta woona saana, khuwahi olazamo etutu eriiye mmaasho wa nzaawo.

Muutthi na mishumo zaya

⁴³ “Khawiivo muutthi wooshapweya oniimaaye mishumo zootakhala, wala muutthi wootakhala oniimaaye mishumo zooshapweya.

⁴⁴ Maana wakhula muutthi onjuweya mwaasa wa mishumo zaya. Mmiiwa khinshumiwamo mishumo za muuyu, mmutthalala khanshumiwamo wuuva.

⁴⁵ Ntthu wookemaani, nroho mwawe onsarulamo vitthu zooshapweya, na ntthu wootakhala rooho, nroho mwawe onsarulamo vitthu zootakhala, maana milomo zawe zinttakhula etthiipile ziitaliyeeyo nroho mwawe.

⁴⁶ “Mwinkikhuwelelani yoori ‘Mbwana, Mbwana’ mwihirettaka epile kiniwuuzaanini?

⁴⁷ Miiyo kinuuthoonyezani ntthu anlikananaaye otule ansiilaaye mattakhuzi aka na khushututela.

⁴⁸ Onlikanana ntthu anjekaaye nyuupa yawe khuthipa khwiichisa saaneene khuttha vanchina la mawe woozivalavo. Khuta nnyeri khupiya nyuupa etile ila khuhisakhinyeyi mwaasa woozivalisiwa.

⁴⁹ Ila otule ansiilaaye mattakhuzi aka khuhishututeli onlikanana ntthu ajekiyeeyo nyuupa yawe va nshaka woohizivalivo. Khuta nnyeri khupiya nyuupa etile nasaapiru khukwa, khupwecheya khuhisali hatha etthu.”