Luuka 5 - Hapari Zooshapweya

Yinsa oniwaakhuwela anakhiyoni awe a mwanzo

¹ Siikhu moote, Yinsa aari nshini wa pahari ya Kalileya, khuzukuleliwa pi atthu awaatta yoori asiile nttakhuzi la Nluku.

² Ye khoona nyaatiya miwiri ziri vapatari ya pahari ethiitile, zaalikhiweeyo pi anamajiya aari woosaaye matthavi aya.

³ Yinsa khupakhira mmwaatiya mmote waari wa Simawu khunvekela yoori asusisele mpahari vattitthiiru, khwiikhala khusala awaanozela atthu.

⁴ Nawiisha onozela khumuuza Simawu yoori: “Othuule mwaatiya awo mwilawe vahali wawiichavo mwajiye.”

⁵ Simawu ajipwaka khuri: “Mbwana, najiya osikhu wooshi khuhipatthi etthu, ila wiiya walupa yoori neese, nintta weesa.”

⁶ Yo khulawa khweesa matthavi aya khuula swi zawaatta mpakha khusala avaruwa matthavi aya.

⁷ Khuwaakhuwela ashirikha aya aari mwaatiya nkina yoori ate arinkaanyele, khwiitaaza nyaatiya zaya zoomiwiri mpakha osaleela ozama.

⁸ Simawu Pheeturu nawoona etthu etile yaarettikhaniyeeyo, khunkokhorela Yinsa amuuzaka yoori: “Mbwana, okisuse maana miiyo ki natwampi.”

⁹ Simawu na ashirikha awe khuzinkuwa mwaasa wa swi epile zawaatta apatthiyeezo.

¹⁰ Theenya Tiyaaku na Yaahaya, aana a Zepeteewu, ashirikha a Simawu aari ojiyanaaye khwiiya ootikinisiwa. Aphano Yinsa khumuuza Simawu yoori: “Ohoove, waaza nasaapi eti onttela wiiya namajiya wa atthu.”

¹¹ Khuwelelisa nyaatiya zaya vapatari, khulikha vitthu zaya zooshi khusala anlotta Yinsa.

Yinsa oninvonisa namakuttula

¹² Yinsa ari sitati moote, khuvira mwinyi mmote aariina makuttula. Noomoona Yinsa khukokhora khunsijitela khumuuza araka: “Mbwanaaka, otakaru, okivonise.”

¹³ Yinsa khookola nkhono awe khunsapa khumuuza yoori: “Katakha! Vona!” Wakathi otthuupule khuvona.

¹⁴ Yinsa khumuuza yoori: “Vitthu epi ohinthatelele hatha ntthu, ila olawe wajithoonyeze wa namalokozela wa tiini, oorettele twaha ya ovonisiwa wawo nkhama etthiipile alupiyeezo napiyu Munsa, yoori wiiye oshaahiti vakatthi wa atthu aya apale.”

¹⁵ Ila hapari zawe zaari ovira zimwazeyaka. Atthu awaatta khusala ata oteela osiila hapari, na oteela ovonisiwa marati aya.

¹⁶ Ila Yinsa eetta olaakavo noolawa mmakuluttu olompa.

Ovonisiwa wa mwinyi woorakala

¹⁷ Siikhu moote Yinsa eetta onozela, aphale vaya aari onozelaavo aarivo mafwarizeewu na anamanozela a kano aalankhiyeeyo miti mikina za Kalileya na Yudeya mpakha Yeruzaleemu. Owahi wa Mbwana waari vamote na ye wa owaavonisa alwele.

¹⁸ Aphano atthu akina khuntana mwinyi aariina supiyaani anttattikheliye vanrepa, yo aari otakha omphenyisa ampwehe omaasho wa Yinsa.

¹⁹ Ila nawoona yoori khayiivo kiphenyo mwaasa wa atthu waatta, khuwela vatulu wa nyuupa khutamula liphala na khumwiishushela vakatthi wa atthu ari vanrepa omaasho wa Yinsa.

²⁰ Ye nawoona amini aariina atthu apale, khumuuza nasupiyaani otule yoori: “Swaahipu, twampi zawo zaswaamihiwa.”

²¹ Aphano mafwarizeewu na anamanozela a kano khusala attettha araka: “Otu aya paani ankufurwaaye? Paani anwahaaye oswaamihi twampi woohiiyi Nluku?”

²² Yinsa khujuwa etthu aari ofikhiraaye, khuwoozela yoori: “Mwinshukulikhela ni nroho mweenu?

²³ Yookhweya ti tiivi omuuza yoori ‘twampi zawo zaswaamihiwa,’ ama yoori ‘olankhe weettette’?

²⁴ Ila mwijuwe yoori Mwaana wa Pinaatamu onaaye owahi wa oswaamihi twampi vathi apha,” khumuuza nasupiyaani otule yoori: “Olankhe, othuule nrepa lawo, olawe owawo.”

²⁵ Nasaapiru mwinyi otule khulankha vakatthi wa atthu khuthuula nrepa lawe khusala alawa owawe ansifwaka Nluku.

²⁶ Atthu ooshi aariivo khwiiya ooshanka na woova channu, khusala ansifu Nluku araka: “Leelo noona vitthu zootikinisa.”

Okhuweliwa wa Leevi

²⁷ Paata ya wiisha vitthu epile, Yinsa khulankha khusala alawa, khunsikana mwinyi mmote ariphisaka lumpuru aari wiitthiwaaye Matewuzhu, khumuuza yoori: “Okilotte.”

²⁸ Ye khulikha khaazi zawe zooshi khusala anlotta.

²⁹ Leevi khuretta njampo liwululene owawe vamote na Yinsa, aarivo theenya anamariphisa lumpuru akinoko aya na atthu akina eekhaliye vamote na ye.

³⁰ Mafwarizeewu na anamanozela a kano khusala awaapa anakhiyoni a Yinsa araka: “Mwaasa aya niini mweeyo mwijanaka na mwinywanaka anamariphisa lumpuru na anatwampi?”

³¹ Yinsa khuwaajipu araka: “Akumi khaninhithajiya tothoro ila alwele.

³² Miiyo akaateeliye owaakhuwela anashariya, kateeliye owaakhuwela anatwampi yoori athupwiye.”

Monkoni wa ofuka

³³ Atthu akina khumuuza Yinsa yoori: “Anakhiyoni a Yaahaya Namoosa na anakhiyoni a mafwarizeewu anfuka na anlompa, ila awo weeyo antta oja na onywa.”

³⁴ Yinsa khuwaajipu yoori: “Enrettikhana toovi anamalaleyiwa harusi ofuka namaposa arivo?

³⁵ Ila enteela ofiya siikhu mposi anttelaaye olaziwavo vakatthi vaya, siikhu zaya etthiipo, anteela ofuka.”

³⁶ Elottelanaka Yinsa khulupa nlikaniso mmote araka: “Khaavo anshijaaye yaapa ya kuwo pheeya yoori atthe yaapa ya kuwo yoovutta, nooretta toowo etile pheeya entta oharipweya, mwaasa wa yaapa etile ya kuwo pheeya etthiiwevo oheezani na etile yoovutta.

³⁷ Khaavo anthuulaaye viinyu pheeya ottha nttompwiyo ya shapala ya raku. Nooretta toowo entta ophutuwa, viinyu yiittikhe ttompwiyo yaya eharipweye.

³⁸ Viinyu pheeya entthiiwa nttompwiyo pheeya.

³⁹ Khaavo annywaaye viinyu ya raku khutakha onywa viinyu pheeya, maana ontta olupa yoori: ‘Afwataali etile ya raku.’ ”