Luuka 4 - Hapari Zooshapweya

Ozayiniwa wa Yinsa ti sheethwani

¹ Yinsa aarutiye omuttho Yorotaani ari wawiitaala Rooho Ttakatthiifu, aalokoziwe tithiito mpakha n'yaara.

² Nttumpho khuzayiniwa ti Sheethwani siikhu arupayiini. Siikhu zaya epile khaari oja etthu, nawiisha khunkhola jala.

³ Sheethwani khumuuza yoori: “Nkhama o mwaana wa Nluku, orume liwe nttho lithatuwe liiye phaawu.”

⁴ Ila Yinsa khunjipu araka: “Yaatikhiwa yoori: ‘Khahiyo phaawu paasi enimwinkhaaye ohaayi pinaatamu.’ ”

⁵ Sheethwani khunweza vatulu, khunnoza ofwalume wooshi wa olumwenku.

⁶ Khumuuza yoori: “Kintta owinkha ofwalume na siifwa za olumwenku opu wooshi, mwaasa yoori zooshi kenkhiwa miiyo, na miiyo kinimwinkha otule kinintakhelaaye.

⁷ Amana okaaputu miiyo, zooshi zintta wiiya zawo.”

⁸ Yinsa khunjipu yoori: “Yaatikhiwa yoori: “ ‘Omwaaputu Mbwana Nluku awo, na onrumeyele othuuto paasi.’ ”

⁹ Aphano sheethwani khunlawana Yeruzaleemu khunweza vatulu woolepavo wa Nyuupa Yoosifwiwamo, khumuuza yoori: “Nkhama o mwaana wa Nluku, ojeeselele vathi aphale.”

¹⁰ Maana yaatikhiwa yoori: “ ‘Ye ontta oruma malayikha awe awiinanele.

¹¹ Atthaapo antta wuukholelela na makhono aya yoori ohikwakwanttuwe va liwe.’ ”

¹² Yinsa khunjipu yoori: “Nttakhuzi la Nluku lalupa yoori: ‘Ohimweeze Mbwana Nluku awo.’ ”

¹³ Sheethwani nawiisha onzayini khumwaattuwa, khusala awejela wakathi wonkhweyela.

Yinsa onaaza khaazi zawe nti wa Kalileya

¹⁴ Aphano Yinsa khurutela Kalileya, owahi wa Rooho Ttakatthiifu ori vamote na ye. Hapari zaari olupaaye monkoni wa ye khumwazeyela miti zooshi za nkerekhere.

¹⁵ Aari osomisa mmasinakooka, atthu ooshi khusala anttottopela.

¹⁶ Khulawa mpakha sitati ya Nazareeti ohali aleliweewo. Siikhu ya saapatu khweetta nsinakooka nkhama etthiipo aazowereliyeezo. Khulankha yoori asome.

¹⁷ Khwinkhiwa kithaapu ya napiyu Ezaaya. Khufunula khusikana vahali yaatikhiweevo yoori:

¹⁸ “Rooho ya Mbwana eri vamote na miiyo, akithawaza yoori kiwaatafusirele hapari zooshapweya asikhini na owaatafusirela otaphuliwa wa anamahuzunikha, owoonisa apale oohooni, owaavumulisa apale oohukhumwiwa,

¹⁹ na olaleya yoori wafiya mwaakha wa rehema ya Mbwana.”

²⁰ Yinsa khufinikha kithaapu etile khumwinkha karumeya wa nsinakooka, ye khwiikhala. Atthu ooshi apale aarimo khusala amweekesa.

²¹ Ye khuwooza yoori: “Leelo zawaatikhiwa epi zarumeyeliwa, etthiipi mwinttaaye wiisharu osiila.”

²² Atthu ooshi khusala anttottopela, na khwiiya ootikinisiwa mwaasa wa mattakhuzi a rehema aari olankhaaye nkhanyo mwawe. Khusala oozelana yoori: “Khahi mwaana wa Yuusufu otu?”

²³ Yinsa khuwooza yoori: “Khweele mweeyo mwinlawa mwakuuze kittaphi mmote enraaye toono: ‘Tothoro, ojivonise omweenyewe!’ Orette mmuti mwawo mphu minjuza nisiiliyeeyo epile orettiyeezo Kafwaranaawu.”

²⁴ Khulupa theenya yoori: “Wa ookhweele kiniwuuzani, yoori khaavo napiyu mmote ankhupaliwaaye mmuti mwawe.

²⁵ Na wa ekhweele wakathi wa napiyu Aliyaasi, Ezirayiilu aariwo aakha oofweliwa pi amanna zaya wakathi yaafukiweevo pinku nyaakha mittatthu na nyeezi sitha na yaapuwiye jala miti zooshi.

²⁶ Aliyaasi khaaperekhiwe hatha vahali wa apale aya, woohiiyi nanfweliwa ti mannawe mmote wa Sarapita ya Sitooni.

²⁷ Siikhu za napiyu Elizeewu, Ezirayiilu aariwo anamaaharaja awaatta, khuhiivo hatha mmote aavonisiweeyo ila Naama paasi wa nti wa Siiriya ti ye aavonisiweeyo otthwe.”

²⁸ Atthu ooshi aari nsinakooka, noosiila mattakhuzi apale aari olupaaye Yinsa yo khwiiphiiriwa!

²⁹ Khwiikariwamo nsitati mphule khulawaniwa vamwaako yaajekiweevo sitati yaya etile, yoori ansukhumele vathi.

³⁰ Ila Yinsa khuvira vakatthi vaya khusala alawa.

Yinsa onimwiikara sheethwani

³¹ Paata ya toole Yinsa khwiishukhela Kafwaranaawu, sitati ya Kalileya, khusala awaanozela siikhu ya saapatu.

³² Yo aari ooshankisiwa ti masomi awe, mwaasa yoori nttakhuzi lawe laarina ofwalume.

³³ Nsinakooka aarimo ntthu mmote aariina sheethwani. Aphano sheethwani khunyakula na kuvu zawe zooshi araka:

³⁴ “Eeee! Onnitakhelani weeyo Yinsa wa Nazareeti? Wata yoori onitapanye? Miiyo kinuujuwa weeyo yoori o Ttakatthiifu wa Nluku!”

³⁵ Yinsa khummaruwela sheethwani araka: “Onyamale, oleemo mmwiili wa mwinyi otu!” Attaaphale sheethwani khunkwisela vathi ntthu otule vakatthi wa atthu, khumwaattuwa woohinvulalisi.

³⁶ Atthu ooshi aari ooshankisiwa, khusala oozana atthaaporu: “Nttakhuzi ni ntthi? Khwa ofwalume na owahi wawe otu onruma masheethwani khusaruwa!”

³⁷ Aphano siifwa ya Yinsa yaamwazeyeliye miti zooshi za nkerekhere.

Yinsa ona owahi vatulu wa masheethwani na marati

³⁸ Yinsa khusaruwamo nsinakooka khweetta owawe Simawu. Nkhwewe Simawu aari nlwele hooma, yo khunvekela Yinsa yoori anvonise.

³⁹ Ye khwiinama khwiikara hooma etile khunlikha, nasaapiru nunu otule khulankha khusala awaarumeyela.

⁴⁰ Njuwa litupweelaka atthu ooshi apale aariina marati khusala atiiseliwa Yinsa, ye noowaattheela makhono noowaavonisa.

⁴¹ Theenya aarivo atthu awaatta aari owaasaruwaaye masheethwani, anyakulaka araka: “Weeyo o mwaana wa Nluku!” Yinsa khusala amaruwa alikhisaka masheethwani apale ottakhula, maana yo aari ojuwa yoori ye ti Al-Masiihu.

Yinsa onlaleya hapari zooshapweya

⁴² Noocha Yinsa khulankha khusala alawa puuro yawiitthaaleyavo. Atthu awaatta khusala amweekesa, nonsikana khuhisala atakha onlikha olawa.

⁴³ Ye khuwooza yoori: “Enhithajiya theenya miiyo olawa sitati kiina olaleya hapari za Ofwalume wa Nluku, kaperekheliwa matakhelo atthaapo.”

⁴⁴ Ye aari otafusiri mmasinakooka za Yudeya.