Luuka 24 - Hapari Zooshapweya

Osisimuwa wa Yinsa

¹ Jumwa-phiili supuyeene, aakha apale khusala alawa okhapuri athuuliye mafuttha oonukhela apale aattaliyeeyo.

² Yo noofiya khoona liwe ntthile laafukaniweeyo nlako wa khapuri liri loolaziwavo.

³ Nooviramo, mwiili wa Mbwana Yinsa khuhisikanimo.

⁴ Khwiiya oozinkuwa venkivene, attaaphale khuwaapuwelela atthu awiri awaliye kuwo zawaara.

⁵ Aakha apale khuwaapattha woova khukokhora khufiyisa ajihi zaya vathi, atthu apale khusala awoozela yoori: “Mwinimweekesela ni ntthu wawoona vakatthi wa ananfwa?

⁶ Ye khaamo mphu, asisimuwa. Muupuwele mattakhuzi apale awuuziyeenini ari nti wa Kalileya!

⁷ Aalupiye yoori: ‘Mwaana wa Pinaatamu ona ya winkheleliwa mmakhono wa anatwampi, akhomeliwe vansalapa, siikhu ya ttaatthu asisimuwe.’ ”

⁸ Aphano aakha apale khuupuwela mattakhuzi apale aalupiyeeyo Yinsa.

⁹ Nooruti okhapuri okhule, khuwooza vitthu epile zooshi anakhiyoni apale khumi na mmote na atthu apale akinoko aariivo.

¹⁰ Aakha aari Mariyamu Mataleena, Zhuwaana na Mariyamu mamaawe Tiyaaku na aakha akinoko aalawaniyeeyo ottuukhu. Yo khuwooza maaswihaapa vitthu epile.

¹¹ Ila maaswihaapa khuhisala akhupali mattakhuzi a aakha apale, oonaka yoori aari oololo.

¹² Aphano Pheeturu khulankha khusala atthira alawaka okhapuri, noofiya khuthurumelamo khusikanamo joora, khusala aruti ari wootikinisiwa khwa epile zaarettikhaniyeezo.

Anakhiyoni eettaka Emawu

¹³ Siikhu ethiitile, anakhiyoni awiri a Yinsa khulankha khusala alawa nti waari wiitthiwaaye Emawu, woolepelana Yeruzaleemu kiyasi ya phiima alufu khumi na moote.

¹⁴ Yo aari olawa attakhulaka monkoni wa vitthu epile zaarettikhaniyeezo.

¹⁵ Eettaka olawa etthiipile apiyaka mwaasa na akheetisanaka, Yinsa mweenyeweene khuwaattama khusala alawa vamote na yo.

¹⁶ Ila yo khumpuwa nkhama oowaariipa omaasho, khuhisala anjuwa yoori Yinsa aya tuthuutule.

¹⁷ Ye khuwoozela yoori: “Mwinnyakulisana monkoni wa niini ntarikhi mphu mweettaka weettetta?” Yo khweemela ari oohuzunikha.

¹⁸ Mmote wa yo aari wiitthiwaaye Keleyoopa, khumuuzela Yinsa yoori: “Niri weeyo o nletto mmote paasi wa Yeruzaleemu ohinjuwaaye vitthu zirettikhaniyeezo siikhu epi?”

¹⁹ Yinsa khuwoozela yoori: “Niini erettikhaniyeeyo?” Yo khunjipu yoori: “Epile zinrettikhaneliyeeyo Yinsa wa Nazareeti. Ye aari napiyu wa owahi khwa zooretta na mattakhuzi awe vakatthi wa Nluku mpakha wa atthu ooshi.

²⁰ Ila mahaakhimu a tiini na afwalume a mmuti mweetthu khuruma ohukhumweliwa ofwa, khulawa khukhomeliwa vansalapa.

²¹ Fweeyo naari onwejela yoori aari ye aari weettelaaye otana okaphuliwa wa Ezirayiilu. Thanku zirettikhane vitthu epo leelo siikhu ya ttaatthu.

²² Neeya wooshanka mwaasa yoori aakha akina a nkhuntti mweetthu, aalawiye okhapuri leelo lifwajiri,

²³ khuhisikani mwiili awe, khuta khunuuza yoori ooniye malayikha, atthaapo pi alupiyeeyo yoori ye asisimuwa ori haayi.

²⁴ Khulawa ashirikha etthu akina okhapuri, khusikana etthiipile aalupiyeezo aakha apale, ila yo khuhimooni.”

²⁵ Aphano Yinsa khuwooza yoori: “Atthu oorupaza weeleyiwa na oolipa waamini epile alupiyeezo manapiyu!

²⁶ Al-Masiihu khaarina yoohoowa etthiipo yoori eette nnuuru mwawe?”

²⁷ Khusala aweeleza mattakhuzi ooshi aatikhiweeyo nkithaapu aari onlupaaye ye, waaza kithaapu ya napiyu Munsa mpakha za manapiyu akinoko.

²⁸ Asaleelaka ofiya nti opule aari weettaaye, Yinsa khusala opuwa nkhama aari otakhaaye ovikana.

²⁹ Ila yo khunkhanyarela araka: “Wiiye attaapha na fweeyo, njuwa linttela otupweela waripa.” Apho Yinsa khuvira nnyupa khwiiya vamote na yo.

³⁰ Wakathi eekhaliyeevo vameeza vamote na atthaapale awiri, khuthuula phaawu khuparikhiya, khumeya khuwenkha.

³¹ Attaaphale, oowiiri maasho aya khufunuwa khunjuwa yoori ti Yinsa, ila ye khwaashikha.

³² Khusala oozelana araka: “Wakathi opule naari ottakhulanaavo ntarikhi aneelezaka mattakhuzi a nkithaapu, rooho zeetthu khazeetta onikaphula?”

³³ Yo khulankha nasaapiru khusala arutela Yeruzaleemu, khuwaasikana maaswihaapa apale khumi na mmote na anakhiyoni akina a Yinsa akusanyeyiye vahali vamote,

³⁴ alupaka yoori: “Khweele Mbwana asisimuwa, ampuwelela Simawu.”

³⁵ Nayo apale awiri khusala alupa epile ooniyeezo ntarikhi na nanna anjuwiyeezo Mbwana wakathi ameyiyeevo phaawu.

Yinsa oniwaapuwelela anakhiyoni awe

³⁶ Anakhiyoni apale nalelo eettaka ottakhula etthiipile, Yinsa khuta vakatthi vaya, khulupa yoori: “Heeri yiiye vamote na mweeyo.”

³⁷ Yo khwiiya oosuthuwa na woova amoonaka nkhama nshitapehe.

³⁸ Yinsa khuwoozela yoori: “Mwasuthuwa ni? Wala mishikili ziriiye nroho mweenu pi za niini?

³⁹ Moone makhono aka na moolu aka mwintta ojuwa yoori ti miiyo! Mwikikhole moone, maana nshitapehe khuna nyama wala makhonkolo nkhama etthiipo mweeyo mwinikoonaazo.”

⁴⁰ Alupiyeevo vitthu epile, khuwaathoonyeza makhono awe na moolu awe.

⁴¹ Mwaasa wa furaha khuluyeene na oshanka, yo khuhisala aamini nalelo, aphano Yinsa khuwoozela yoori: “Mwinaaye etthu yoojiwa mwikinkhe kije?”

⁴² Yo khumwinkha pattaasu ya swi ya woochiwa.

⁴³ Khuthuula khusala arafuna attaapho yo amoonaka.

⁴⁴ Nawiisha khulupa yoori: “Pi etthiipi kaawuuziyeenini wakathi opule kaari vamote na mweeyo, yoori zaarina yoorettikhana zooshi epile zaatikhiweeyo khwa miiyo nkithaapu ya kano ya napiyu Munsa na kithaapu za manapiyu akina na Zaapuura.”

⁴⁵ Aphano Yinsa khuwaapatthisa fwahamu yoori ziweeleye Zawaatikhiwa Ttakatthiifu za nkithaapu.

⁴⁶ Khuwooza araka: “Yaatikhiwa yoori Al-Masiihu aarina yoohoowa na siikhu ya ttaatthu osisimuwa vakatthi wa ananfwa,

⁴⁷ na khwa nzina lawe onlawa walaleyiwe othupwiya yoori ziswaamihiwe twampi, waaza Yeruzaleemu mpakha khapila zooshi za va olumwenku.

⁴⁸ Mweeyo mwa mashaahiti wa vitthu zaya epi.

⁴⁹ Miiyo kinlawa kooperekhezeni etile Paapa ahitiyeeyo. Ila mweeye Yeruzaleemu ottuukho mpakha mwiitaazaniwe owahi wa pinkuuni.”

Owela wa Yinsa pinkuuni

⁵⁰ Aphano Yinsa khuwaathuula anakhiyoni awe khulawana Betaaniya, noofiya khulansa makhono awe khuwaaparikhiya.

⁵¹ Awaaparikhiyaka etthiipile, khuwaasusa khuweziwa pinkuuni.

⁵² Yo khumwaaputu, khurutela Yeruzaleemu na furaha khuluyeene.

⁵³ Wakhula siikhu aari othukumana vaje wa Nyuupa Yoosifwiwamo ansifwaka Nluku.