Luuka 22 - Hapari Zooshapweya

Shawuri za wuuliiwa Yinsa

¹ Osaleelaka ofiya wakathi wa orettiwa Njampo la Phaawu yoohiina Fwaramento, liniitthiwaaye Paashikowa,

² mahaakhimu a tiini na anamanozela a kano aari owaza shawuri zoomuula Yinsa, khuhisala ewaheya mwaasa wa owoova atthu.

³ Aphano Epiliisi khumweetta Yuuda, aari wiitthiwaaye Eshikariyoote, wa khuntti ya apale khumi na awiri.

⁴ Ye khulawa osiilanana mahaakhimu a tiini na attunkhulu a anamweekesela a Nyuupa Yoosifwiwamo, yoori eekese shawuri ya onkholisa Yinsa.

⁵ Khwa mattakhuzi apale, yo khwiiya ofurahi, khumwaahiti Yuuda omwinkha nzurukhu.

⁶ Ye khukhupali, khusala eekesa kiphenyo ya onkholisa Yinsa, woohiivo hatha ntthu.

⁷ Khufiya siikhu ya orettiwa Njampo la Phaawu Yoohiina Fwaramento, siikhu yaya ethiito yaarina ya otwahiwa pwittipwitthi yoojeliwa Paashikowa.

⁸ Yinsa khunruma Pheeturu na Yaahaya araka: “Mwilawe mwaattalele etthu yoojiwa yeetthu ya Paashikowa.”

⁹ Yo khumuuzela yoori: “Ontakha naattalele vayi.”

¹⁰ Ye khuwaajipu yoori: “Noofiya ositati mwinlawa mwansikane mwinyi apwecheriye yuuku ya maati. Mwinlotte mpakha nyuupa anttaamo.

¹¹ Mwimuuze mweenyewe nyuupa yaya eto yoori: ‘Mwaaliimu onuuzela araka: Ori vayi nsana aka wa omakavo, kinttelaaye onjavo paashikowa na anakhiyoni aka?’

¹² Othuuto ontta wuuthoonyezani nsana nwulweene wa vatulu oriina zaana zooshi, mwaattalele attaapho njampo nttho.”

¹³ Yo khulawa khusikana nkhama etthiipile Yinsa aawooziyeezo, khwaattalela etthu yoojiwa ya Paashikowa.

¹⁴ Noofiya wakathi Yinsa na maaswihaapa awe khwiikhala vameeza.

¹⁵ Khuwooza yoori: “Kaari ohithajiya venkivene onja Paashikowa vamote na mweeyo kihinalawe ohoowa.

¹⁶ Kiniwuuzani yoori akinteela oja theenya njampo ntthi mpakha linttelaavo omariseliwa muufwalume wa Nluku.”

¹⁷ Athuuliyeevo jiikira khunshukhurwela Nluku, khuwooza yoori: “Mwithuule mwaawanyena.

¹⁸ Kiniwuuzani yoori akinrutela onywa nshumo wa nrayi wa wuuva mpakha ontaavo Ofwalume wa Nluku.”

¹⁹ Athuuliyeevo phaawu, khunshukhurwela Nluku, khumeya khuwenkha khuwooza yoori: “Opu mwiili aka onttelaaye ovahiwa khwa mweeyo. Mwisala mwiretta etthiipi mwikifikhiraka miiyo.”

²⁰ Khwa nanna ethiito nawiisha oja khuthuula jiikira khulupa yoori: “Jiikira eti wahati mpheya onrettiwaaye ti taamu yaka, enttelaaye wiittikha khwa mweeyo.

²¹ Ila mwijuwe yoori otule anttelaaye okikholisa ori vameeza attaapha vamote na miiyo.

²² Mwaana wa Pinaatamu onlawa afwe khwa nanna etthiipo Nluku asharutheliyeezo. Ila wootakhaliwa ti otule anttelaaye onzinkula.”

²³ Yo khusala oozelana atthaaporu yoori anjuwe nlupa aari weettelaaye oretta etthu yaya eto.

Ariina fwayita ti paani?

²⁴ Aphano maaswihaapa khusala anyakulisana atakhaka onjuwa paani eeyiyeeyo nwulweene vakatthi vaya.

²⁵ Yinsa khuwooza yoori: “Afwalume a vathi apha aniiyana oshintta vakatthi wa atthu aya, na apale aneettettisaaye ofwalume oniwaatuvela olupeziwa onamaretta saana.

²⁶ Ila mweeyo mwihiiye toowo, nttunkhulu vakatthi venu eeye ti nttiitthi aya, otule anlokozelaaye eeye ti namarumeyela aya.

²⁷ Nttunkhulu ti paani, ti otule aniikhalaaye vameeza ama otule anrumeyaaye? Khaniiya otule aniikhalaaye vameeza? Ila vakatthi venu mweeyo, miiyo kiri nkhama otule anrumeyaaye.

²⁸ Mweeyo tiye mwinhoowaaye vamote na miiyo mphule kinzayiniwaamo.

²⁹ Nkhama etthiipo Paapa akinkhiyeeyo ofwalume, na miiyo kiniwinkhani mweeyo,

³⁰ yoori mwije na mwinywe vameeza vaka muufwalume mwaka, na mwiikhale va khukulu ya ofwalume yoori mwiphuke mahimo khumi na mawiri a Ezirayiilu.

³¹ “Simawu, Simawu, Epiliisi avekela yoori oopepetthe nkhama tiriku.

³² Ila miiyo koolompela yoori amini yawo ehizime. Amana orutela wiiya vamote na miiyo, owaalipisele azaawo.”

³³ Simawu khujipu yoori: “Mbwanaaka, miiyo kakhupali wuulotta hatha nkhama nkalapooso, hatha nkhama ofwa.”

³⁴ Ila Yinsa khunjipu araka: “Miiyo kiniwuuza weeyo Pheeturu, yoori leelo eti likukhuwi lihineekhe, onkikhana swaafu ttatthu oraka khunkijuwa.”

³⁵ Aphano Yinsa khuwooza araka: “Wakathi opule koorumiyeenini mwihina hatha nfukho wala napampa, ama shapatthu, niini yoosaleeliyeenini?” Yo khujipu yoori: “Hatha etthu khayaanisaleeliye.”

³⁶ Ye khuwooza yoori: “Ila nasaapi eti otule ariina nfukho athuule na napampa awe anthuule. Otule ahina phanka oozanyise ajapi yawe oozanye.

³⁷ Nkhama etthiipo Nttakhuzi la Nluku linlupaazo yoori: ‘Ye onaalakiwa nkhama anamavonya.’ Miiyo kiniwuuzani khweele yoori sharuthi vitthu epi zirettikhane khwa miiyo, maana etile yaatikhiweeyo monkoni wa miiyo ena yoorettikhana.”

³⁸ Anakhiyoni apale khulupa yoori: “Fweeyo apha Mbwana ninaaye phanka piiri.” Ye khujipu araka: “Weesha mwaasa aya opo!”

Yinsa onlompa vamwaako wa Oluveera

³⁹ Khulankha khusala alawa vamwaako wa Oluveera nkhama etthiipo aazowereliyeezo, anakhiyoni awe khunlotta.

⁴⁰ Noofiya khuwooza yoori: “Mwilompe yoori mwihikwele muuzayiniwa.”

⁴¹ Ye khuwaasusa vattitthiiru khukokhora khusala alompa araka:

⁴² “Paapa amana otakha, okilaze jiikira eti ya ohoowa. Ila ehirettikhane otakha waka miiyo, arettikhane matakhelo awo.”

⁴³ Aphano khumpuwelela nlayikha la pinkuuni khusala linlipisela.

⁴⁴ Ari mmashakha, khusala alompa woojilipisavo, mattottonka oovujuwela wawe nkhama taamu khusala akwela vathi.

⁴⁵ Noolaavo aphale aari olompaavo, khweetta aphale aariivo anakhiyoni awe, khuwaasikana eettaka olala ari oohuzunikha.

⁴⁶ Khuwoozela araka: “Mwinlala ni? Mwilankhe mwilompe yoori mwihikwele muuzayiniwa.”

Okholiwa wa Yinsa

⁴⁷ Eettaka ottakhula nalelo, khupuwa khuntti ya atthu awaatta, na mmote wa apale khumi na awiri, otule aari wiitthiwaaye Yuuda, aawaalokozeliyeeyo, khumwaattama Yinsa yoori ampatikhe.

⁴⁸ Attaaphale Yinsa khuri: “Yuuda, Mwaana wa Pinaatamu oninkholisana opatikha?”

⁴⁹ Anakhiyoni awe nawoona vitthu epile khulupa yoori: “Mbwana, niwoomanane na phanka?”

⁵⁰ Aphano nakhiyoni mmote khushija nshiilo la nkhono nlume la karumeya wa haakhimu nwulu wa tiini.

⁵¹ Ila Yinsa khuri: “Onlikhe ohinrutele!” Ye khukhola nshiilo la ntthu otule khunvonisa.

⁵² Aphano Yinsa khuwoozela mahaakhimu a tiini na attunkhulu a anamweekesela a Nyuupa Yoosifwiwamo na attunkhulu a tiini apale aateeliye onkhola araka: “Mwakiteela na phanka na puutta nkhama kiiyiye namalokozela wa anazompere?

⁵³ Wakhula siikhu kaari wiiya vamote na mweeyo vaje wa Nnyupa Woosifwiwamo, khuhisala mwikikhola, aphano, opu wakathi enu na otule ariina ofwalume wa n'yiiza.”

Pheeturu oninkhana Yinsa

⁵⁴ Aphano Yinsa nookholiwa khulawaniwa mpakha nlikokoro wa haakhimu nwulu wa tiini. Pheeturu khusala anlottelela Yinsa woohimwaattami.

⁵⁵ Yo khukhoza moottho vaje khusala oottha, naye Pheeturu khuta attaapho khwiikhala.

⁵⁶ Njaazi mmote aariivo noomoona eekhaliye nshini wa moottho khumweekesa saaneene khuri: “Otu aari vamote na Yinsa.”

⁵⁷ Pheeturu khukhana araka: “Weyo mwanankha! Miiyo akininjuwa ntthu aya oto.”

⁵⁸ Noovira wakathi vattitthiiru, Pheeturu khooniwa ti ntthu nkina khumuuza yoori: “Weeyo o wa khuntti ethiitile.” Ila Pheeturu khukhana araka: “Mwinyi, khahiyo miiyo!”

⁵⁹ Oviriyeevo wakathi mmote, ntthu nkina theenya khulupachacha yoori: “Weekhweele otu aari vamote na ye, maana otu aya naye nkalileya.”

⁶⁰ Pheeturu khujipu araka: “Mwinyi! Miiyo akinjuwa etthu mwinlupaaye.” Eettaka ottakhula etthiipile, likukhuwi khwiikha.

⁶¹ Mbwana khuzukuluwa khumweekesa Pheeturu, ye khufikhiri mattakhuzi apale ooziweeyo ti Mbwana yoori: “Leelo ethiiti likukhuwi lihineekhe, onteela okikhana swaafu ttatthu.”

⁶² Pheeturu khulaavo aphale vaya khusala alila ari wookafilikha.

⁶³ Atthu apale aari omweekeselaaye Yinsa khusala anveyisa na ompiya,

⁶⁴ khunfinikha omaasho wawe khusala amuuzela yoori: “Weeyo khahi o napiyu? Onlupe otu oopiyiyeeyo!”

⁶⁵ Khusala anlupeza mattakhuzi awaatta a mattukhano.

Yinsa onlawaniwa wa amashawuriiya

⁶⁶ Noocha khukusanyeya attunkhulu a mahaakhimu a tiini na anamanozela a kano, khuruma olawaniwa Yinsa wa mashawuriiya.

⁶⁷ Khusala amuuzela yoori: “Nkahaya, nkanuuze nkhama weeyo o Al-Masiihu.” Ye khujipu araka: “Amana kiwuuzani khamwinkaamini,

⁶⁸ na amana kiwuuzelani khamwinkijipu.

⁶⁹ Ila waaza nasaapi ethiiti Mwaana wa Pinaatamu onttela wiikhala nkhono nlume wa Nluku Wa owahi.”

⁷⁰ Aphano ooshi khumuuzela yoori: “Apho niri weeyo o Mwaana wa Nluku?” Yinsa khujipu araka: “Apho mweeyo mwalupa.”

⁷¹ Yo khulupa yoori: “Nininhithajiya shaahiti theenya? Nansiila alupaka mweenyewe na nlomo awe.”