Luuka 2 - Hapari Zooshapweya

Ovokoliwa wa Yinsa

¹ Wakathi aya opo, Seezari Akuushitu mfwalume nwulu aarumiye yoori atthu ooshi apale a nkatthi wa ofwalume wa Rooma aarina ya olawa waatikhiwa nwarakha ya afwalume.

² Waatikhiwa opo wamwanzo waarettikhaniye Kureeniyo ari nsatoro wa Siiriya.

³ Wakhula ntthu khusala alawa nti aavokoliweewo olawa waatikhiwa.

⁴ Yuusufu khulankha Kalileya, sitati ya Nazareeti, khulawa Yudeya sitati ya Belemu, ottuukho aavokoliweewo wa mfwalume Daawuuda. Eetteliye waatikhiwa maana aari wa ojama wa Daawuuda.

⁵ Ye aalawiye waatikhiwa na mposi awe Mariyamu ari wa wiimittha.

⁶ Siikhu zaya epo ari Belemu ottuukhule, Mariyamu khunfiyela siikhu ya opattha ekumi.

⁷ Khumpattha mwaana wa omwanzo awe, khumputaputela va kuwo, khunttattikhela nkashothi zaari ojaamo nyama, mwaasa yoori khaarina puuro yoomaka.

Malayikha na Amakhampuzi

⁸ Nti otthuupule aariwo amakhampuzi aari wiikhalaaye ntthuttu ashukisaka pwittipwitthi zaya na weekesela osikhu wooshi.

⁹ Nlayikha la Mbwana khwiishukhela attaaphale aariivo amakhampuzi apale, na nuuru ya Mbwana khuwaamwasikhela, khwiiya awoova channu.

¹⁰ Ila nlayikha khuwooza yoori: “Mwihoove! Miiyo kateela owuuzani hapari zooshapweya za furaha khuluyeene, enttelaaye wiiya ya atthu ooshi.

¹¹ Leelo ethiiti, sitati ya Daawuuda avokoliwa Namuusuru eeyiye Al-Masiihu, Mbwana!

¹² Alama yenu tiito: Mwininsikana mwaana aputaputeliwe va kuwo, attattikheliwe nkashothi.”

¹³ Nasaapiru khupuwa malayikha awaatta, khuphakanyeya na ntthile la mwanzo, khusala ansifu Nluku araka:

¹⁴ “Asifwiwe Nluku otulu, na vathi apha heeri yiiye vamote na atthu ooshi awaatakheliyeeyo osaana.”

¹⁵ Wakathi malayikha apale aruteliyeevo pinkuuni, amakhampuzi khuuzana yoori: “Nlaweni Belemu noone etthu erettikhaniyeewo, etile Mbwana anuuziyeeyo.”

¹⁶ Yo khuhirupazi, khulawa khunsikana Mariyamu na Yuusufu, na mwaana otule attattikheliwe nkashothi.

¹⁷ Paata ya omoona mwaana otule, yo khusala athatela epile ooziweezo ti nlayikha monkoni wa ye.

¹⁸ Ooshi apale aasiiliyeeyo hapari aari olupaaye amakhampuzi apale khwiiya ooshanka.

¹⁹ Ila Mariyamu aari ottha nroho mwawe vitthu epile aari osiilaazo, khusala apheleleza maana aya.

²⁰ Paata ya toole, amakhampuzi apale khurutela ntthuttu anttitthimisaka Nluku na ansifwaka khwa zooshi aasiiliyeezo na ooniiyeezo, etthiipile nlayikha laawooziyeezo.

Okhiriya wa Yinsa

²¹ Noofiya siikhu naane, mwaana otule khukhiriyisiwa, khutthajiwa nzina la Yinsa, nttintthile aalupiyeeyo nlayikha ahineemitthiwe.

Winkheleliwa wa Yinsa Nnyupa Woosifwiwamo

²² Zimariseliweevo siikhu zootwahareshiwa Mariyamu na Yuusufu, nkhama etthiipo zaari olupaazo kano za napiyu Munsa, khunthuula mwaana otule khunlawana Yeruzaleemu yoori enkheleliwe mmakhono wa Mbwana,

²³ maana yaatikhiwa nkano za Mbwana yoori: “Mwaana wamwanzo wanlume ona yoophakuliwa khwinkhiwa Mbwana.”

²⁴ Yuusufu na Mariyamu khwinkha twaha nkhama etthiipo zinrumaazo kano za Mbwana: “Makhoko mawiri ama jiwa piiri.”

²⁵ Wakathi aya opo Yeruzaleemu aariwo mwinyi mmote aari wiitthiwaaye Simiyooni, aari wa shariya na wa omoova Nluku. Ye aari owejela wuusurwiwa wa atthu a Ezirayiilu. Rooho Ttakatthiifu yaari vamote na ye,

²⁶ na khuthoonyeziwa ti Rooho Ttakatthiifu yoori khaari ofwa ahimooneeni Al-Masiihu wa Mbwana.

²⁷ Simiyooni khweetta Nnyupa Woosifwiwamo alokoziwe ti Rooho Ttakatthiifu, wakathi apapaze antaniyeevo Yinsa yoori aretteliwe etile yaalupiweeyo nkano,

²⁸ Simiyooni khunthuula mwaana otule mmakhono mwawe, khunshukhurwela Nluku araka:

²⁹ “Mbwanaaka, aphano onleeze karumeya awo na heeri maana yarettikhana etile waahitiyeeyo.

³⁰ Koona nusura yawo na maasho aka

³¹ owaattaleleliyeeyo atthu ooshi.

³² Ye nuuru ya omwasikhela khapila zooshi za amalapo na siifwa ya atthu awe a Ezirayiilu.”

³³ Papaawe na mamaawe khwiiya ooshanka mwaasa wa mattakhuzi apale aari onlupaaye Simiyooni monkoni wa mwaana otule.

³⁴ Simiyooni khuwaaparikhiya, khumuuza Mariyamu maama wa mwaana yoori: “Moone, mwaana otu Nluku anthawula yoori atthu awaatta a Ezirayiilu ajikwise ama awoosuru. Ye alama ya Nluku; atthu awaatta anlawa anttakhule wootakhalavo.

³⁵ Mwaasa wa ethiito, wuupuwela wa nroho za atthu awaatta onteela osaruwa; weeyo Mariyamu enteela wuupattha huzuni khuluyeene nkhama phanka yoonoliwa yoori eshije nafusi yawo.”

³⁶ Attaaphale aarivo halifwa mmote aari wiitthiwaaye Aana. Aari mwaana wa Fwanuweele wa lihimo la Asheeri, aari wawuuluvala. Eekhalaniye mannawe nyaakha sapa,

³⁷ paata ya ofwa mannawe, khuhiraliwi mpakha opattha nyaakha thamaaniini na mine. Khaari olaamo Nnyupa Woosifwiwamo osikhu na nthana, khaazi yawe yaari omwaaputu Nluku khwa ofuka na olompa.

³⁸ Wakathi otthuupo khwaaza onshukhurwela Nluku attakhulaka monkoni wa mwaana otule, awoozaka atthu ooshi apale aari owejelaaye wookhowa wa Yeruzaleemu.

³⁹ Yuusufu na Mariyamu nawiisha oretta zooshi epile zaari orumaazo kano ya Mbwana, khurutela Kalileya sitati ya Nazareeti owaya.

⁴⁰ Mwaana otule khuvira awulaka na okhomaala, eetaaliye ojuwa, na rehema ya Nluku yaari vamote na ye.

Yinsa Nnyupa wa Nluku

⁴¹ Wakhula mwaakha Mariyamu na Yuusufu aari weettaka Yeruzaleemu Onjampo la Paashikowa.

⁴² Wakathi Yinsa apatthiyeevo nyaakha khumi na miwiri, Mariyamu na Yuusufu khunthuula onlawana onjampo la Paashikowa nkhama etthiipile aazowereliyeezo.

⁴³ Noofiya khuretta njampo ntthile mpakha wiisha, Mariyamu na Yuusufu khusala arutela owaya. Ila Yinsa khusala Yeruzaleemu, mamaawe na papaawe woohijuwi.

⁴⁴ Yo aari woona yoori ori khuntti etile yaari orutelaaye onti, khuvira siikhu ntero eettaka weettetta, aphano khwaaza omweekesa awoozelaka ajamaaze na ashirikhaawe.

⁴⁵ Khuhisala ampattha, khurutela Yeruzaleemu olawa omweekesa.

⁴⁶ Eviriyeevo siikhu ttatthu, khunsikana ari Nnyupa Woosifwiwamo, eekhaliye na ajuwi awulu a tiini eettaka onsiila na omuuzela.

⁴⁷ Ooshi apale aari onsiilaaye khunshankela mwaasa woojuwa wawe na nanna aari owaajipwaazo.

⁴⁸ Aphano apapaze noomoona khushanka, mamaawe khumuuzela araka: “Mwanaka! Niini epi oniretteliyeezo? Miiyo na papaawo naari wa wantipweya naaza raku oweekesa.”

⁴⁹ Ye khujipu yoori: “Mwaari okeekeselani? Khamwaari ojuwa yoori miiyo kaarina ya wiiya Nnyupa wa Paapa?”

⁵⁰ Ila yo khuhiweeleyi etthu aari olupaaye.

⁵¹ Yinsa khurutela nti wa Nazareeti na papaawe na mamaawe khusala awaashututela. Mamaawe aari othokorela vitthu epile zooshi nroho mwawe.

⁵² Yinsa khusala avira awulaka nkatthi wa hirimu, ojuwa, khwa rehema ya Nluku na atthu.