Luuka 19 - Hapari Zooshapweya

Yinsa na Zakewu namariphisa lumpuru

¹ Yinsa khuvira sitati ya Yeriko eettaka olawa.

² Ottuukho aariwo mwinyi mmote aari wiitthiwaaye Zakewu, nttunkhulu wa anamariphisa lumpuru na aari thaajiri.

³ Ye aari otakha omoona Yinsa, ila khuhisala awahi mwaasa woofupheya channu na atthu aari enkeene.

⁴ Aphano khutthira khulokoza khulawa khuwela mmutthi yoori awahi omoona, mwaasa yoori Yinsa aari weettela ovira attaaphale.

⁵ Yinsa noofiya puuro etile, khweekesa otulu khumoona, khumuuza yoori: “Zakewu, waakuve wiishukhe, leelo kinttela omaka vaje vawo.”

⁶ Attaaphale, ye khwiishukha wawaakuvavo khumpwekherela Yinsa na furaha.

⁷ Atthu apale akinoko aari woonaaye vitthu epile, khwaaza ottettha araka: “Ye amaka vaje wa natwampi!”

⁸ Zakewu khulankha khweemela khumuuza Mbwana yoori: “Woone Mbwana! Kintta owenkha asikhini phantte moote ya maali zaka na apale kaari oweeyelaaye, kintta owaarutisela swaafu nne.”

⁹ Aphano Yinsa khulupa yoori: “Leelo vaje apha yafiyavo nusura maana otu naye ojama ya Eburahiima.

¹⁰ Mwaasa yoori Mwaana wa Pinaatamu ateela oweekesa apale aashikhiiyeeyo awoosuru.”

Nlikaniso wa nzurukhu khumi wa feeta

¹¹ Yinsa aattameliyeevo Yeruzaleemu, atthu khusala oopuwela yoori ofwalume wa Nluku waari oteela orettikhana nasaapiru. Aphano Yinsa khulupa nlikaniso opu araka:

¹² “Mwinyi mmote wa ojama wootafikhana, aasaafiriye khulawa nti woolepawo yoori athawaziwe ofwalume nawiisha aruti.

¹³ Ahinalawe khuwaakhuwela a karumeya awe khumi, wakhula mmote khumwinkha nzurukhu wa feeta khuwooza yoori: ‘Mwirettele zanshara mpakha miiyo oruti.’

¹⁴ “Ila atthu a mmuti mwawe khusala eephiiriwa ti ye, khunruma waziri onlotta olawa olupa yoori: ‘Khanimweepu mwinyi otule wiiya mfwalume eetthu.’

¹⁵ “Noothawaziwa ofwalume khurutela owawe, khulawa khuwaakhuwela a karumeya awe apale aawenkhiyeeyo nzurukhu wa feeta yoori ajuwe fwayita apattheliyeeyo wakhula ntthu.

¹⁶ “Khuta otule wamwanzo khulupa yoori: ‘Mbwana, nzurukhu opule mmote mwaakinkhiyeeyo kapatthela fwayita, wafiya khumi.’

¹⁷ “Mbwanaawe khunjipu yoori: ‘Waretta saana, o karumeya wa waamineya. Mwaasa yoori weeyo waamineya khwa vitthu vattitthiiru, apho onttela wiiya mfwalume wa sitati khumi.’

¹⁸ “Otule wa phiiri khuta khulupa yoori: ‘Mbwana, nzurukhu enu opule mwaakilikheliyeeyo, kapatthela fwayita wafiya mithaanu.’

¹⁹ “Mbwanaawe khumuuza yoori: ‘Kemaani, weeyo onttela wiiya mfwalume wa sitati thaanu.’

²⁰ “Otule wa wiishela khuta khulupa yoori: ‘Mbwana, nzurukhu enu opu, miiyo kaatthiiye mmwifukho khuthokorela.

²¹ Miiyo keetta owoovani mwaasa wa ojuwa yoori mweeyo woopisa, mwinthuula etthu mwihithokoreleeni na mwinuurula mwihizaleeni.’

²² “Mbwana otule khuri: ‘Karumeya wootakhala rooho! Kinuuphuka khwa mattakhuzi awo atthaapo! Weeyo waajuwiye yoori ki ntthu wawoopisa, kinthuulavo etile kihithokoreleeni na kinuurula etile kihizaleeni.

²³ Khi wahaathuuliye nzurukhu aka ottha mpanko? Toowo amana kiruti keetta opatthela fwayita.’

²⁴ “Khuwooza apale aari attaaphale yoori: ‘Mwinnyakanye nzurukhu aya opo mwimwinkhe otule ariina khumi.’

²⁵ “Yo khujipu yoori: ‘Mbwana, oto aya mwininlupaaye yoori nimwinkhe onaaye nzurukhu khumi!’

²⁶ “Khulupa yoori: ‘Kiniwuuzani khweele yoori otule ariina zawaatta, ontta weekezeliwa venkivene, otule ahina, hatha etile ariina ontta onyakanyiwa.

²⁷ Maatuwi aka apale ahaari okitakhelaaye ofwalume, mwiwaatiise apha ooliiwe kiwoonaka.’ ”

Ofiya wa Yinsa Yeruzaleemu

²⁸ Paata ya wiisha olupa mattakhuzi apale, Yinsa khusala avira awelelaka eettaka Yeruzaleemu.

²⁹ Asaleelaka ofiya nti wa Betifwaaje na wa Betaaniya kharipu ya mwaako Oluveera, khuwaalokozisa anakhiyoni awe awiri.

³⁰ Khuwooza yoori: “Mwilawe nti opo mwinoonaaye omaasho weenu okho, mwifiyaka mwinlawa mwansikane mwaana wa puuru afukeleliwe ahinaweliweke ti hatha ntthu. Mwinfukule mwintiise.

³¹ Amana apuwa ntthu awuuzelani yoori: ‘Mwinimfukulela ni?’ Mwinjipu yoori: ‘Mbwana ti anintakhaaye.’ ”

³² Apale aawaarumiyeeyo khulawa khusikana nyama etile nkhama etthiipile aalupiyeezo Yinsa.

³³ Wakathi aari omfukulaavo mwaana wa puuru otule, ennyewe khuwoozela yoori: “Mweeyo! Mwaana wa puuru oto mwinimfukulela ni?”

³⁴ Yo khujipu yoori: “Mbwana eetthu ti ye anintakhaaye.”

³⁵ Aphano khuntiisela Yinsa, yo khuttattikhavo kuwo zaya va puuru ye khupakhiravo.

³⁶ Yinsa ataaka atthu khusala attattikha kuwo zaya ntarikhi.

³⁷ Wakathi aattameliyeevo va mwiishukhelo wa Mwaako Oluveera, khuntti ya anakhiyoni ooshi khwiiya ofurahi khwaaza onyakula ansifwaka Nluku khwa minjuza epile ooniiyeezo,

³⁸ araka: “Aparikhiyiwe mfwalume antaaye khwa nzina la Mbwana. Yiiyewo heeri pinkuuni na siifwa otulu.”

³⁹ Mafwarizeewu apale aari vakatthi wa atthu apale khusala amuuza Yinsa yoori: “Mwaaliimu, owooze anakhiyoni awo anyamale!”

⁴⁰ Ye khuwooza yoori: “Atthu apa amana anyamala, mawe pi anttelaaye onyakula.”

Yinsa onlila oonelaka huruma Yeruzaleemu

⁴¹ Wakathi Yinsa afiiyeevo Yeruzaleemu, nawoona sitati etile, khulila,

⁴² araka: “Eriwaka waari onjuwa otule aniwinkhaaye heeri leelo! Ila apho epo zaya zavitheya khwa weeyo.

⁴³ Onlawa wafiye wakathi maatuwi enu anttelaaye ojeka muuri khwa mweeyo na oojekeleleni phantte zooshi.

⁴⁴ Onttela ophwantteliwa vamote weeyo na aanaawo, khalinlawa osala hatha liwe vatulu wa liwe nzaaya, maana weeyo khunhakikheeni Nluku wakathi aateeliyeeyo owuusuru.”

Yinsa Nnyupa Woosifwiwamo

⁴⁵ Yinsa khuvira Nnyupa Woosifwiwamo khusala aweekara apale aari wuuzanyisaamo,

⁴⁶ awoozaka yoori: “Yaatikhiwa yoori: ‘Nyuupa yaka enttela wiiya nyuupa ya olompiwamo, ila mweeyo mwaretta wiiya puuro ya manantarawu.’ ”

⁴⁷ Wakhula siikhu Yinsa eetta onozela Nnyupa Woosifwiwamo, ila mahaakhimu a tiini, anamanozela a kano na anamalokozela a atthu aari weekesa shawuri zoomuula,

⁴⁸ ila khuhisala apattha nanna yooretta, maana atthu ooshi aari omwiitaalela ye nonsiileza.