Luuka 18 - Hapari Zooshapweya

Nlikaniso wa namaphuka wootakhala rooho

¹ Yinsa khuwooza anakhiyoni awe nlikaniso mmote yoori aarina yoolompa woohilikheleli wala woohinyoonyeyi.

² Ye khulupa yoori: “Sitati moote aariwo namaphuka mmote ahaari omoovaaye Nluku, wala ahaari onshitahaaye ntthu.

³ Sitati ethiitile aariwo nunu mmote woofweliwa ti mannawe aalawiyeeyo onvekela namaphuka otule araka: ‘Okaawanyele haakhi khwa muumani aka.’

⁴ “Khunkatthalela wakathi mwinkeene, ila omwiisho waya khusala alupa nroho mwawe yoori: ‘Na kihimoovi Nluku na ohinshitahi ntthu,

⁵ nunu otu aaza raku okantipu; kintta omwaawanyela shariya yoori ahirutele okiwuti.’ ”

⁶ Mbwana Yinsa khuvira alupaka yoori: “Mwisiileze saana etthu anlupaaye namaphuka otu woohiiyi wa shariya.

⁷ Nluku khaniwaawanyela shariya ananthawuliwa awe apale aninvekelaaye osikhu na nthana? Mwinoona yoori ye onttela orupaza owaajipu?

⁸ Kiniwuuzani yoori ye oniwaawanyela shariya woohirupazi. Aphano Mwaana wa Pinaatamu wakathi anrutelaavo va olumwenku apha, onteela osikanavo amini?”

Nlikaniso wa mfwarizeewu na namariphisa lumpuru

⁹ Yinsa khulupa nlikaniso mmote awoozaka atthu apale aari ojoonaaye wiiya a shariya khusala awaatarawu azaaya. Ye khuri:

¹⁰ “Alume awiri aaviriye Nnyupa Woosifwiwamo khusala alompa; mmote aari mfwarizeewu, nkina aari namariphisa lumpuru.

¹¹ Mfwarizeewu ari wa weemela, aari olompa otthwe araka: ‘Nluku, miiyo kinuushukhurwela maana miiyo aki nkhama atthu akina, apale oheettetteli shariya, manantarawu, anamararuwa, wala nkhama namariphisa lumpuru oto ariiye apho.

¹² Miiyo kinfuka siikhu piiri wakhula sumana na kininkha zaakha khwa lifunku la khuumi ya wakhula etile kimpatthaaye.’

¹³ “Ila namariphisa lumpuru eemeliye peetiwene, ye hatha khaari wiinuwa yoori eekese otulu, ila ajipiyaka veefuwa aari ori: ‘Oo Nluku, koonele huruma, miiyo ki natwampi.’

¹⁴ “Miiyo kiniwuuzani yoori, namariphisa lumpuru aalawiye owawe ari woohakikhiwa ti Nluku, ila otule nkina wala. Maana otule anjiwulisaaye ontta opushuwisiwa, ila otule anjipushuwisaaye ontta owulisiwa.”

Yinsa oniwaaparikhiya asimaana

¹⁵ Atthu akina khusala awaatiisa asimaana yoori asapiwe ti Yinsa. Ila anakhiyoni awe noowoona khusala awaamaruwela.

¹⁶ Ila Yinsa khuwaakhuwela asimaana apale araka: “Mwiwaalikhe asimaana akiteele miiyo, wala mwihiwaakhattaze, maana ofwalume wa Nluku pi waya apale eeyiye nkhama asimaana.

¹⁷ Miiyo kiniwuuzani khweele yoori, wakhula otule ahimpokherelaaye ofwalume wa Nluku nkhama nsimaana, khanteela weettamo.”

Thaajiri na Yinsa

¹⁸ Nttunkhulu mmote khumuuzela Yinsa yoori: “Mwaaliimu saana, kirette niini yoori kipatthe ohaayi wa mileele?”

¹⁹ Yinsa khunjipu araka: “Mwaasa wa niini okikhuwelaka yoori woosaana? Khaavo ntthu woosaana woohiiyi Nluku paasi.

²⁰ Weeyo onjuwa oruma: Ohiraruwe, ohuule, ohiiye, wala ohilawele oshaahiti woovonyeya, onshitahi papaawo na mamaawo.”

²¹ Mwinyi otule khujipu yoori: “Waaza osimaana zooshi epo kinretta.”

²² Yinsa noosiila mattakhuzi apale khumuuza yoori: “Enuusaleela etthu moote. Wuuzanyise vitthu zawo zooshi nzurukhu aya owenkhe asikhini, toowo ontta wiiyana maali pinkuuni; nawiisha ote okilotte.”

²³ Noosiila mattakhuzi apale khwiiya woozinkuwa venkivene, mwaasa yoori ye aari thaajiri nwulweene.

²⁴ Yinsa noomoona yoori azinkuwa khulupa yoori: “Nanna enlipaazo thaajiri weetta muufwalume wa Nluku!

²⁵ Ti yookhweya enkamiiya ovira va liphotto la sikano zayita thaajiri weetta muufwalume wa Nluku.”

²⁶ Apale aari onsiilaaye khumuuzela yoori: “Nkhama pi toowo, paani anttelaaye wuusurukha?”

²⁷ Yinsa khujipu yoori: “Etile pinaatamu ahinwahaaye, enwaheya khwa Nluku.”

²⁸ Aphano Pheeturu khumuuza Yinsa yoori: “Woone! Fweeyo nalikha vitthu zeetthu zooshi, khusala nuulotta.”

²⁹ Yinsa khujipu araka: “Miiyo kiniwuuzani khweele yoori, khaavo anlikhaaye ojama awe ama muukhaawe, ama attwiize ama apapaze, ama aanaawe mwaasa wa Ofwalume wa Nluku,

³⁰ oto onteela opokhera venkivene vathi attaapha, na omwiisho waya apokhere ohaayi wa mileele.”

Yinsa oniwooza anakhiyoni awe ofwa na osisimuwa wawe

³¹ Yinsa khuwaakhuwelela othetekele apale khumi na awiri khuwooza yoori: “Moone! Apha nintta Yeruzaleemu, ottuukho zinttelaawo orettikhana zooshi epile zaatikhiweeyo pi manapiyu monkoni wa Mwaana wa Pinaatamu.

³² Ye onttela winkheleliwa mmakhono wa amalapo, antheye, anveyise, antthemele,

³³ anjaphe na amuule. Ila siikhu ya ttaatthu onttela osisimuwa.”

³⁴ Anakhiyoni awe khuhiweeleyi mattakhuzi aya apale maana aari oovitheya, yo khuhijuwi etthu aari olupaaye.

Ovonisiwa wa ntthu woohooni wa Yeriko

³⁵ Yinsa asaleelaka ofiya Yeriko, mwinyi mmote woohooni eekhaliye nshini wa tarikhi khusala alola zimola.

³⁶ Noosiila shintto za atthu aari oviraaye, ye khuuzela etthu yaari orettikhanaaye.

³⁷ Khuuziwa yoori: “Yinsa wa Nazareeti ontta ovira.”

³⁸ Aphano ye khusala akhuwa araka: “Yinsa, Mwaana wa Daawuuda, koonele huruma!”

³⁹ Atthu apale aari oviraaye khusala ammaruwela yoori anyamale, ila ye khusala atepa okhuwa araka: “Yinsa, Mwaana wa Daawuuda, koonele huruma!”

⁴⁰ Aphano Yinsa khweemela khuruma yoori atiiseliwe mwinyi otule. Nootiiseliwa khumuuzela araka:

⁴¹ “Ontakha yoori kuurettele niini?” Ye khujipu yoori: “Mbwana, kintakha woona.”

⁴² Attaaphale Yinsa khumuuza yoori: “Woone! Amini yawo yoovonisa.”

⁴³ Nasaapiru ye khurutela woona, khusala anlotta Yinsa ansifwaka Nluku. Wakathi atthu ooniyeevo etile yaarettikhaniyeeyo, khunsifu Nluku.