Luuka 17 - Hapari Zooshapweya

Twampi na nswammaha

¹ Yinsa khuwooza anakhiyoni awe yoori: “Enteela opuwa vitthu zinteelaaye owaakwisela atthu ntwampi, ila atakhaliwa otule anttelaaye othowelela.

² Afwataali ofukeleliwa liwe loovalaza mmwisiko khutupweeziwa nkhilintti ya pahari ehiiyeeni owaakosisa apale eeyiye oohikhomaali.

³ Mwiiyane phoole! Ttwiiyo amana ookosa, onshowere; amana athupwiya, onswaamihi.

⁴ Amana ookosa swaafu sapa siikhu moote, na wakhula swaafu khusala ata olupa yoori: ‘Kathupwiya’, weeyo ona ya onswaamihi.”

Weekezeliwa wa amini

⁵ Maaswihaapa khunvekela Yinsa yoori: “Mbwana, weekezele amini yeetthu!”

⁶ Mbwana khujipu araka: “Eriwaka amini yenu yeettiye wiiya nkhama phunje ttiitthiiru ya muuyu, mweetta wuuza muutthi opu yoori: ‘Okhuleye watupweele mpahari,’ opo weetta wuushututelani.”

⁷ Yinsa khuvira alupaka yoori: “Paani mmote wa mweeyo anraaye nakhaazi awe wa olima, ama wa oshukisa pwittipwitthi ntthuttu, eettaka otaru animuuzaaye yoori: ‘Ote niikhale vameeza apha nije!’

⁸ Kinoona yoori khaavo! Ila khapula onimuuza yoori: ‘Wiipikhe etthu yoojiwa, owale kuwo zawo okirumeyele kijaka na kinywaka. Aphano amana kiisha na weeyo oje na onywe!’

⁹ Karumeya otule oninsuhi oshukhurweliwa mwaasa wooretta etile aarumiweeyo? Kinoona yoori wala!

¹⁰ Etthiipo na mweeyo, amana mwiretta epile mwirumiweezo, mwina ya olupa yoori: ‘Na akarumeya oohiina maana; naretta etile naariina ya oretta paasi.’ ”

Yinsa oniwaavonisa anamaaharaja khumi

¹¹ Yinsa eettaka Yeruzaleemu, aaviriye enakatthi ya Samariiya na Kalileya.

¹² Noofiya nti aya opo, khuta anamaaharaja khumi khweemela peetiwene

¹³ khusala ankhuwela araka: “Yinsa, Mwaaliimu, noonele huruma!”

¹⁴ Ye noowoona khuwooza yoori: “Mwilawe mwajithoonyeze wa anamalokozela a tiini.” Eettaka olawa etthiipile, yo khwiiya oovona.

¹⁵ Mmote wa apale khumi, nawoona yoori avona, khuruti ansifwaka Nluku na huula ya onyakula.

¹⁶ Khukokhora khufiyisa ajihi yawe vathi, khunshukhurwela Yinsa; ye aari nsamariiya.

¹⁷ Yinsa khumuuzela yoori: “Khahi atthu khumi avoniyeeyo? Khi apa akina tiisiya ari vayi?

¹⁸ Khaavo aawahiyeeyo oruti oteela onshukhurwela Nluku, woohiiyi otu wa malaponi?”

¹⁹ Yinsa khumuuza yoori: “Olankhe olawe; amini yawo yawuusuru.”

Ota wa ofwalume wa Nluku

²⁰ Yinsa eetta wuuzeliwa pi mafwarizeewu wakathi waari weettelaavo ota ofwalume wa Nluku. Ye khujipu araka: “Ofwalume wa Nluku khunta nkhama etthu enooneyaaye.

²¹ Khina anttelaaye olupa yoori: ‘Moone, opu ori apha!’ Ama ‘Opule oriiye okhule!’ Maana ofwalume wa Nluku ori vakatthi venu.”

²² Attaaphale khuwooza anakhiyoni awe yoori: “Onteela ofiya wakathi mwinttelaaye otakha woona siikhu moote khwa siikhu za Mwaana wa Pinaatamu, ila khamwinteela woona.

²³ Akinoko anlawa alupe yoori: ‘Ori okhule!’ Ama ‘Ori apha!’ Ila mwihilankhe olawa omweekesa.

²⁴ Nkhama etthiipo taari enzerimaaye phantte moote yeettaka phantte kiina, enteela wiiya etthiipo siikhu anttelaaye ota Mwaana wa Pinaatamu.

²⁵ Ila mwanzo ye ona yoohoowa venkivene na okatthaliwa pi atthu a leelo.

²⁶ “Nkhama zaarettikhaniyeezo wakathi opule wa Nuuhi, enttela orettikhana etthiipo wakathi wa Mwaana wa Pinaatamu.

²⁷ Atthu eetta oja na onywa, aari oralana na oloozana, mpakha siikhu Nuuhi aapakhiriyeeyo mmwaaraka, khuta nnyeri ooshi khufwa.

²⁸ “Nkhama zaarettikhaniyeezo wakathi wa Loothi. Atthu eetta oja na onywa, wuuzanya na wuuzanyisa, ozala na ojeka manyupa aya.

²⁹ Wakathi Loothi aliiyeewo Sotooma, khukwa vuula pinkuuni ya moottho na oka, khuwoola atthu ooshi.

³⁰ “Enttela orettikhana etthiipo siikhu anttelaavo othoonyeziwa Mwaana wa Pinaatamu.

³¹ Siikhu yaya eto, otule anttelaaye wiiya vatulu wa nyuupa ahiishukhe yoori alokotthele vitthu ziriiye nnyupa mwawe; otule anttelaaye wiiya omashapa ahirutele onti.

³² Mwimfikhirele muukha wa Loothi!

³³ Otule antakhaaye wuusuru ohaayi awe ontta ompwetheya, ila otule onimpwetheyaaye ohaayi awe ontta wuusuru.

³⁴ Miiyo kiniwuuzani yoori, osikhu wa siikhu yaya eto, atthu awiri oorapalela olili mmote, onttela othuuliwavo mmote, asalevo mmote.

³⁵ Aakha awiri achilaka tiriku vamote, onttela othuuliwavo mmote asale mmote.

³⁶ Atthu awiri ari mmashapa, onttela othuuliwavo mmote asale mmote.”

³⁷ Yo khumuuzela Yinsa yoori: “Mbwana, enttela orettikhana vayi?” Yinsa khuwaajipu yoori: “Vahali aniiyaavo muufwi, akhwaazi aniiya attaapho.”