Luuka 12 - Hapari Zooshapweya

Ohirimiza na olipisela

¹ Nakataalikha khuntti ya atthu khukusanyeya, mwaasa wa waatta akinoko khusala aluwatthana. Yinsa khuwooza khapula anakhiyoni awe yoori: “Phoole na fwaramento ya mafwarizeewu yiiyiye onaafikhi.

² Khayiivo yoovithiwa ehinteelaaye ovithuliwa na zooshi epile zoottiyeleliwa zinteela ojuwiwa.”

³ Zooshi zinlupiwaaye n'yiiza, zinlawa zalupiwe nthana, na zooshi epile zinlupiwaaye sirini zinlawa zeeye payana.

Nimoove Nluku paasi

⁴ “Miiyo kiniwuuzani ashirikha yoori: mwihiwoove apale anuulaaye mwiili, nawiisha khuhiretteli hatha etthu.

⁵ Ila miiyo kinuuthoonyezani paani wa omoova: mwimoove Nluku, otule paata ya wuula mwiili, ariina owahi wa weeselela motthooni. Oto ti mwiriina ya omoova.

⁶ Anyannyi athaanu attiitthi-attiitthi khanuuzanyisiwa sinku piiri? Ila apo aya khaavo mmote Nluku aninsahawaaye.

⁷ Hatha na nyuuli za mmwishwa mweenu zooshi pi za waalakiwa. Mwihoove, mweeyo mwinaaye fwayita zayita anyannyi apo awaatta.”

Onkatthala Yinsa na otukhuru

⁸ “Miiyo kiniwuuzani yoori: otule antukhurwaaye vakatthi wa atthu yoori namalottela aka, Mwaana wa Pinaatamu onteela otukhuru vakatthi wa malayikha a Nluku.

⁹ Ila otule anikikatthalaaye vakatthi wa atthu, na ye onteela okatthaliwa vakatthi wa malayikha a Nluku.

¹⁰ Wooshi otule anintarawaaye Mwaana wa Pinaatamu onswamihiwa, ila otule ankufurwelaaye Rooho Ttakatthiifu khanswamihiwa.

¹¹ “Amana mwithuuliwa olawa ophukiwa nsinakooka ama wa afwalume, mwihiiyane shaakha khwa nanna mwinttelaaye ojaakisa ama etthu mwinttelaaye olupa.

¹² Maana wakathi otthuupo Rooho Ttakatthiifu entta wuuthoonyezani etthu yoolupa.”

Thaajiri woohiina akhili

¹³ Mwinyi mmote wa khuntti etile khunvekela Yinsa araka: “Mwaaliimu, omuuze ttwiiyaku akaawanyele maali epile alikhiyeeyo papeetthu.”

¹⁴ Yinsa khunjipu araka: “Weyo, paani akirettiye wiiya namaphuka enu wala namwaawanya maali zenu?”

¹⁵ Aphano khuwooza yoori: “Phoole na omaashokopho wa vitthu, mwaasa yoori ohaayi wa pinaatamu khunlipisiwa pi vitthu epile ampatthaazo.”

¹⁶ Yinsa khulupa nlikaniso araka: “Aarivo mwinyi mmote wa thaajiri aaruweriyeeyo channu.

¹⁷ Ye khusala awaza toono: ‘Kirette-ni? Akina vahali wootthaavo peewu zaka epi.’

¹⁸ “Khulupa yoori: ‘Aaa, kajuwa etthu yooretta. Kintta opwecha matthala apa mattiitthi kijeke mawulu-mawulu yoori kittheemo peewu zaka na vitthu zaka zooshi epile kiriinaazo.

¹⁹ Nawiisha, kuuze nafusi yaka yoori: “Onaaye peewu na vitthu zawaatta zintoshelezaaye nyaakha zawaatta; ovumule, oje, onywe na ofurahi.” ’

²⁰ “Ila Nluku khumuuza yoori: ‘Nlolo! Osikhu otthuupu ontta ofwa. Maali zawo paani anttelaaye osalana?’ ”

²¹ Yinsa khumarisela araka: “Ntthu oto ori nkhama atthu apale anlipanaaye maali zaya ila mmakhono wa Nluku khahi mathaajiri.”

Onroromela Nluku

²² Aphano Yinsa khuwooza anakhiyoni awe araka: “Tiito kiniwuuzaanini yoori: mwihiiye woovelavelela ohaayi enu, wala etthu mwinttelaaye oja, ama mwiili enu khwa etthu ya owalisa.

²³ Maana ohaayi ona fwayita khuluyeene zayita etthu yoojiwa na mwiili ona fwayita khuluyeene zayita kuwo.

²⁴ Mwiwoone anakhuku; khanzala wala khanuurula hatha ntthala khana loopwehavo vitthu zoojiwa zaya, ila Nluku oniwenkha etthu yoojiwa. Ila mweeyo mwinaaye fwayita khuluyeene zayita anyannyi apo!

²⁵ Paani wa mweeyo anwahaaye weekezela mansha awe hatha nkhama eetta oshukulikhela?

²⁶ Mweeyo khamwinwahi oshintta vitthu nkhama epo ttiitthittiitthi, khi mwinshukulikhela toovi kinoko zaya?

²⁷ “Moone nanna enwulaazo miitthi za ntthuttu na maluwa aya: yo khazinkhola khaazi, wala khazinsona. Ila wekhweele kiniwuuzani yoori: Seleyimaana na othaajiri wawe, khawaleeni kuwo zooshapweya nkhama maluwa apa.

²⁸ Moone, Nluku onwalisa nyaani za ntthuttu leelo ziriivo meesho zinttelaaye olukuziwa khatepeeni, wuuwalisani mweeyo channu atthu oopushuwa amini!

²⁹ Mwihishukulikhele etthu mwinttelaaye oja ama onywa.

³⁰ Maana amalapo pi anshukulikhelaaye vitthu epo, ila mweeyo Papeenu onjuwa yoori enuuhithajiyani vitthu epo.

³¹ Mweekese khapula ofwalume wa Nluku, vitthu zaya epo mwintta weekezeliwa.”

³² Yinsa khulupa theenya araka: “Mwihoove mweeyo mwiiyiye nkhama khuntti ttiitthiiru ya pwittipwitthi, maana Papeenu ti ye atakhiye owinkhani ofwalume awe.

³³ Muuzanyise zooshi mwiriinaazo, nzurukhu aya mwiwenkhe asikhini. Mwijaattalelele mifukho zihinvaruwaaye, toowo mwinthokorela maali pinkuuni zihiniishaawo, okhu ahinifiyaawo nantarawu wala maweephe yoori aharipu.

³⁴ Maana attaapho eniiyavo maali zawo rooho yawo eniiya attaapho.”

Anamarumeyela oojeekesela

³⁵ Yinsa khuvira alupaka yoori: “Mwiiye oojeekesela na khantteya zenu ziri zookhoziwa.

³⁶ Mwina yawiiya nkhama anamarumeyela aninwejelaaye mbwana aya yoori arutaka onjampo la harusi, amana apiiya nlako anfukulele nasaapiru.

³⁷ Ooparikhiyiwa anamarumeyela apale mbwana aya anttelaaye owaasikana eettaka ojeekesela. Kiniwuuzani khweele yoori, mbwana aya na ye ontta ojiwalisa yoori arumeye, awooze wiikhala vameeza asala awaarumeyela.

³⁸ Hatha nkhama ata osikhu layili ama lifwajiri, ooparikhiyiwa anamarumeyela apale mbwanaaka anttelaaye owaasikana ari oojeekesela.

³⁹ Ila eweeleyeni vitthu zaya epi: maana, mweenyewe nyuupa eriwaka eetta ojuwa wakathi antaavo natarawu, khaari olikhelela opwechiwa nyuupa yawe.

⁴⁰ Mweeyo theenya mwiiye woojilikanisa, maana wakathi antaavo Mwaana wa Pinaatamu pi opule mwihinaakhipwelaaye.”

⁴¹ Aphano Pheeturu khumuuzela Yinsa yoori: “Mbwana, nlikaniso opo pu weetthu ama pu wa atthu ooshi?”

⁴² Mbwana khujipu araka: “Ti paani eeyiyeeyo nsatoro wa waamineya na wa akhili, Mbwana awe amwinkhiyeeyo owaalokozela akarumeya azaawe na owenkha etthu yoojiwa amana ofiya wakathi?

⁴³ Wooparikhiyiwa karumeya otule Mbwana awe amana ataaka anttelaaye onsikana arettaka etthiipo.

⁴⁴ Weekhweele, kiniwuuzani yoori onttela olikheliwa maali zooshi.

⁴⁵ Ila karumeya otule amana eeya wootakhala rooho, ajilupezaka mweenyewe yoori: ‘Mbwanaaka ontta orupaza,’ khusala awaapiya akarumeya apale akina aakha na aalume, ajaka, anywaka na ahapaliwaka,

⁴⁶ mbwana wa karumeya otule onttela ota siikhu ahaari waakhipwelaaye na wakathi ahinjuwaaye. Ye ontta onhukhumu saaneene antthe puuro ya atthu oohaamineyi.

⁴⁷ “Karumeya otule anjuwaaye matakhelo a mbwana awe, ila khuhisala ajeekesela na khuhisala aretta epile antakhaazo mbwana awe, onteela ohukhumwiwa na ojaphiwa venkivene.

⁴⁸ Ila otule ahinrettaaye matakhelo a mbwanaawe mwaasa woohijuwi, onteela ojaphiwa na ohukhumwiwa vattitthiiru. Wakhula otule enkhiweeyo zawaatta ona yoorutisa zawaatta; na otule aalikheliweeyo zawaatta, onlawa avekeliwe venkivene.”

Waawanyeya mwaasa wa Yinsa

⁴⁹ Yinsa khurutela olupa yoori: “Miiyo kateela okhoza moottho va olumwenku, kaari otakha woona okholeliye!

⁵⁰ Ila yamwanzo kiina ya woosiwa khwa ohoowa, kiri muuthunku mpakha vitthu epi zirettikhane!

⁵¹ Mweeyo mwinaakanyera yoori miiyo katiisa heeri voolumwenku? Wala! Kiniwuuzani khweele yoori, miiyo katiisa ohisiilani.

⁵² Waaza nasaapi mpakha ninttaawo, nkatthi wa ojama wa atthu athaanu, onteela opuwamo waawanyeya; attatthu ohisiilanani apale awiri, apale awiri ohisiilanani apale attatthu.

⁵³ Paapa wuumana na mwanawe na mwaana wuumana na papaawe. Maama wuumana na mwanawe wankha, mwaana wankha wuumana na mamaawe, nkhwe wuumana na nkhwewe, nkhwe wuumana na nkhwewe.”

Alama za wakathi

⁵⁴ Yinsa khuwooza atthu aakusanyeyiyeeyo yoori: “Mweeyo amana moona liwiku leettaka phantte ya okhu lintupweelaawo njuwa mwilupaka yoori: ‘Entakha onya vuula’, khweele khurettikhana.

⁵⁵ Amana moona pheevo za kuusi mwinlupaka yoori: ‘Enteela opuwa haari’, khweele khurettikhana.

⁵⁶ Manaafikhi! Mweeyo mwinjuwa olupa alama za va tuniya na za otulu, aphano toovi mwihijuwaka olupa alama za wakathi opu?

⁵⁷ “Mwaasa aya niini mwihijuwaka othawula etile yiiyiyeeyo ya shariya?

⁵⁸ Amana weeyo na muumani awo mwilawaka wa namaphuka, enhithajiya osiilana khapula rakuzeene mwihinalawe, maana amana ofiya wa namaphuka ontta omuuza namweekesela ootthe nkalapooso.

⁵⁹ Miiyo kiniwuuza khweele yoori khunlaamo ohiripheeni nzurukhu woolikana.”