Khaazi 6 - Hapari Zooshapweya

Othawuliwa wa awaziri sapa

¹ Siikhu etthiipile eetta ovira ataaka mamuumini aari onlottaaye Yinsa, apale aari ottakhulaaye ekereeku atthaaporu aari owaattakhula mamuumini aari ottakhulaaye eheepere, mwaasa yoori anamafweliwa pi amanna zaya a phantte yaya etta osahawiwaka amana yaawanyiwaka etthu yoojiwa ya wakhula siikhu.

² Tiito maaswihaapa apale khumi na awiri aawaakhusanyiyeeyo mamuumini ooshi, khusala awooza yoori: “Khaninwahi onyoonyeliwa olaleya nttakhuzi la Nluku khusala naawanya etthu yoojiwa.

³ Attwiizetthu, mwiwaathawule vakatthi venu alume sapa ooshitahiwa, anaakhili, awiitaala Rooho Ttakatthiifu, yoori niwenkhe khaazi eto,

⁴ na fweeyo nisala nilompa na weeleza nttakhuzi la Nluku.”

⁵ Mattakhuzi apale khuwaatuvela ooshi aya, khunthawula Shiteevawu, nlume wa waamineya na wawiitaala Rooho Ttakatthiifu, na Filiipe, Porokoro, Nikanore, Timomu, Parimenashi na Nikolawu, otule asilimweliyeeyo oyaahuuti wa nti wa Antiyookiya.

⁶ Khuwaathoonyeza atthu apale vakatthi wa maaswihaapa, atthaapo khuwaalompela awaattheliye makhono.

⁷ Etthiipile nttakhuzi la Nluku khusala limwazeyela Yeruzaleemu, Thamani ya anakhiyoni khusala yeekezeleya; na anamalokozela a tiini enkeene aari oshututela amini.

Ofukeliwa wa Shiteevawu

⁸ Shiteevawu ntthu wawiitaala rehema na owahi, aari oretta vitthu zootikinisa na alama khuluzeene vakatthi wa atthu.

⁹ Attaaphale khulankha atthu akina aari a sinakooka ya anamataphuliwa, yaari ya mayaahuuti aalankhiyeeyo Sireene na Alishanteriya na apale a nti wa Siliisiya na Aaziya. Atthu aya apo khwaaza onyakulisana na Shiteevawu.

¹⁰ Ila khaari owahi oshintta akhili na Rooho etile aari ottakhulanaaye.

¹¹ Aphano khupankiwa atthu akinoko olawa olupa yoori: “Nansiila Shiteevawu attakhulaka mattakhuzi okufuru anlupezaka Munsa na Nluku.”

¹² Khwa ethiito, khuwaatapanya atthu, attunkhulu a tiini na anamanozela a kano, khunkhola Shiteevawu khunthuula khulawana wa Mashawuriiya.

¹³ Noofiya khusala alaza oshaahiti woovonyeya araka: “Mwinyi otu okhitiri ottakhula pure khwa puuro eti ttakatthiifu na khwa kano.

¹⁴ Nansiila araka Yinsa wa Nazareeti ontapanya puuro ya eti na onzukulisa thwapiya anilikheliyeezo Munsa.”

¹⁵ Wakathi amwekesiyeevo, ooshi apale eekhaliyeeyo nyuupa khuulu ya Mashawuriiya khusala oona wuuso awe wuupuwaka nkhama wa nlayikha.