Khaazi 24 - Hapari Zooshapweya

Ophukiwa wa Paawulu vakatthi wa Feelishi

¹ Eviriyeevo siikhu thaanu haakhimu nwulu wa tiini aniitthiwaaye Ananiiya khwiishukhela Sezareeya vamote na attunkhulu a tiini na namwaakisa aari wiitthiwaaye Terituulu. Yo khulawa khujithoonyeza wa nsatoro yoori anlokoveze vitthu Paawulu.

² Wakathi akhuweliweevo Paawulu, Terituulu khwaaza nlattu awe, araka: “Woohishimwiwa waziri khwa rehema yawo na nanna olanseliyeeyo na akhili zawo vakatthi wa atthu apa nimpuhela heeri khaamili.

³ Khwa wakhula phantte ninkhupalela na ninshukhurwela zooshi orettiyeeyo woohishimwiwa Feelishi.

⁴ Aphano akintakha wuurupazisa; tiito kinuuvekelaaye yoori onisiileze wakathi vattitthiiru na emaani yawo.

⁵ Mwinyi otu, fweeyo ninimoona nkhama namakarewela antanaaye nzuuzu vakatthi wa mayaahuuti na mmuti wooshimo. Ye ti eeyiye namalokozela wa zoovonyeya za anazare.

⁶ Othuuto aalakeliyeeyo okufurwela Nyuupa Yoosifwiwamo. Fweeyo nankhola yoori nimphuke khwa mwentto wa kano zeetthu.

⁷ Ila khuta nttunkhulu wa anajanka aniitthiwaaye Liisiya, khunthuula mmakhono mweetthu na kuvu zawe zooshi.

⁸ Khuruma yoori ate apale aari onluphatthaaye apha oriivo. Amana weeyo omuuzela ontta woona haakhi monkoni wa vitthu epo aninlokovezaaye.”

⁹ Mayaahuuti ankhupalela olokova waya opo, alupaka yoori mattakhuzi aya apo aari a khweele.

Paawulu onthoonyeza ojaakisa wawe

¹⁰ Nsatoro Feelishi khumwinkha alama Paawulu yoori attakhule, ye khutukhuru araka: “Miiyo kinjuwa yoori khaazi eti yoophuka waaza raku, tiito kinfurahela saaneene ojaakisa vakatthi vawo.

¹¹ Mwinlawa mwahakikhi yoori wala kifiyeeni siikhu khumi na piiri thanku kilawe Yeruzaleemu omwaaputu Nluku;

¹² wala apo anikilokovezaaye khakisikaneeni Nnyupa Woosifwiwamo keettaka onyakulisana na ntthu, wala owaalazela nzuuzu atthu nsinakooka wala nsitati;

¹³ wala yo khanlawa opattha hakiikha ya vitthu zaya epo anikilupezaayo.

¹⁴ Nakataalikha kintukhuru kiwuuzaka yoori nkatthi wa Tarikhi eti eniitthiwaaye yoovonyeya, kininrumeyela Nluku wa amarehemu apapazetthu, kikhupalelaka vitthu zooshi za kano na zawaatikhiwa pi manapiyu.

¹⁵ Na kinaaye nroromelo khwa Nluku otthuupo arinaaye apa yoori owaapho osisimuwa wa anahaakhi na apale ohiina haakhi.

¹⁶ Khwa attaapho theenya kinjilipisa yoori kiiyane rooho swaafi omaasho wa Nluku na wa anaatamu.

¹⁷ Paata ya olaawo Yeruzaleemu khwa nyaakha vattitthiiru, kaaruteliyewo olawa othuula zimola yoori kawenkhe atthu a mmuti mwaka na kilawaka oretta twaha.

¹⁸ Wakathi kaari orettaavo epo zaya, paata ya miiyo wiisha njampo la otwahareshiwa, mayaahuuti akina khukisikana phantte ya Nnyupa Woosifwiwamo, khaarivo atthu awaatta wala nzuuzu.

¹⁹ Ila mayaahuuti akina a Aaziya aarina ya wiiya attaapha oriivo weeyo, asala alupa nkhama anaaye etthu ya okilupeza.

²⁰ Ama apa ariiye apha alupe husuti akisikananiyeeyo wakathi kaathuuliweevo kilawaniwa wa Mashawuriiya,

²¹ woohiiyi mattakhuzi apa kilupiyeeyo wakathi kaari vakatthi vaya kiraka: ‘Leelo kintta ophukiwa ti mweeyo monkoni wa osisimuwa wa ananfwa.’ ”

²² Aphano Feelishi aari ojuwa saaneene Tarikhi yaya etile, khukayirisa nlattu opule khuri: “Amana ata nttunkhulu Liisiya, phi kinttelaaye ottakhula nlattu enu mweeyo.”

²³ Na khunruma namalokozela wa anajanka yoori amweekesele Paawulu mphule aafukeliweemo, amwinkhe ruhusa ya owahi waawuniwa pi ashirikhaawe.

²⁴ Ziviriyeevo siikhu vattitthiiru, Feelishi khuta na Turusiila, muukha awe, aari yaahuuti. Khurumisa okhuweliwa Paawulu khunsiila attakhulaka amini khwa Yinsa Al-Masiihu.

²⁵ Ila wakathi Paawulu aaziyeevo ottakhula monkoni wa ohaayi wa shariya, ojishintta omwenyeweru na siikhu ya ophukiwa, Feelishi khwiiya wawoova na khuri: “Paasi! Saruwa, amana kuutakha kintta wuukhuwela theenya.”

²⁶ Feelishi aari onkhuwelaka Paawulu khusala apiyana mwaasa oonaka yoori onteela omwinkha nzurukhu.

²⁷ Noovira nyaakha miwiri, Feelishi khurentteriwa ti Poorisiyu Feeshitu. Feelishi aari otakha owaatuvelisa mayaahuuti, tiito khunlikha Paawulu ari nkalapooso.