Khaazi 21 - Hapari Zooshapweya

Tarikhi ya weetta Yeruzaleemu

¹ Paata yoomwazeyanana apale aya, khupakhira mpankaya khulokhela eperepere esura ya Kooshi. Mmeesho mwaya khulawa esura ya Roote mpakha sitati ya Patara.

² Khusikana kalawa yaari weettaaye Fineesiya, khupakhira khusala nilawa.

³ Nooniyeevo esura ya Shiipere khulotta phantte ya kusini nilokhelaka Siiriya. Khupakhuwa sitati ya Tiiru, ohali pankaya yeetthu yaari weettelaawo opakhula pakaji.

⁴ Khuwaasikana anakhiyoni aari wiikhalaaye ottuukhule, khwiiya vamote na yo siikhu sapa. Ari awiitaalawene Rooho Ttakatthiifu, khumuuza Paawulu yoori ohilawe Yeruzaleemu.

⁵ Eviriyeevo siikhu zaya epile, fweeyo khulaamo mphule mwaya, khusala nilawa niperekhiwaka pi ooshi, wakhula mmote na muukhaawe na aana awe mpakha othetekele wa sitati. Khulawa khukokhora mmattima khusala nilompa.

⁶ Paata ya oleezana neetta opakhira mpankaya, attwi apale khurutela owaya.

⁷ Khuvira nilawaka safwari yeetthu ya olankha Tiiru mpakha ofiya Pitolemasi, ohali nawaachelisiyeewo attwiizetthu khwiiya ottuukho siikhu moote vamote na yo.

⁸ Mmeesho mwaya khusala nilawa mpakha Sezareeya, khulawa khwiikhala owawe Filiipe namalaleya hapari zooshapweya. Ye aari wa khuntti ya apale sapa.

⁹ Ye aarina aanaawe wane aamwari aari ohupirakaaye.

¹⁰ Paata yawiisha siikhu zawaatta niri ottuukhule khuta napiyu mmote aari olankhaaye Yudeya aari wiitthiwaaye Akaapu.

¹¹ Khuta vahali naariivo, khuthuula nzako wa Paawulu, khufuka moolu awe na makhono awe khusala alupa yoori: “Rooho Ttakatthiifu yalupa yoori mweenyewe nzako opu onteela onfukiwa khwa nanna ethiiti ti mayaahuuti Yeruzaleemu, enkheleliwe mmakhono wa amalapo.”

¹² Noosiila toowo fweeyo na atthu apale ottuukhule khunvekela saaneene Paawulu yoori ahilawe Yeruzaleemu.

¹³ Aphano Paawulu khuri: “Mwinlilani mwikipatthisaka huzuni? Miiyo kiri thwayaari khahiyo ofukiwaru paasi, ila na theenya ofwa Yeruzaleemu ottuukho mwaasa wa nzina la Mbwana eetthu Yinsa.”

¹⁴ Wiiya khanaari owahi onlikhisa olawa; khukayiri niraka: “Ti erettikhane etile yiiyiye matakhelo a Mbwana eetthu.”

¹⁵ Paata ya ovira siikhu zaya epile khujilokotthela khusala nilawa Yeruzaleemu.

¹⁶ Attwi a sitati ya Sezareeya vamote na fweeyo, ataaka aataniye Manasoni wa esura ya Shiipere nakhiyoni wa raku othuuto naari weettelaaye ommakela.

Ofiya wa Paawulu Yeruzaleemu

¹⁷ Wakathi nifiyeevo Yeruzaleemu, attwi khunipwekherela na furaha khuluyeene.

¹⁸ Mmeesho mwaya Paawulu khulawa vamote na fweeyo okutthanana Tiyaaku na attunkhulu a ojama wa Nluku ooshi aari attaaphale.

¹⁹ Paawulu khuwaachelisa khusala athatela saaneene zooshi Nluku arettiyeeyo vakatthi wa amalapo khwa khaazi yawe.

²⁰ Paata ya osiila mattakhuzi apale yo khunttitthimisa Nluku na khulupa yoori: “Owoone attwiizetthu, alufu alufu zene mayaahuuti aretteyiyeeyo onamalottela a Yinsa na ooshi pi ookhomaalela kano za Munsa.

²¹ Yo ooziwa yoori weeyo oniwaasomisa mayaahuuti aniikhalaaye vakatthi wa amalapo, owoozaka yoori aphakuwanane kano za Munsa na ahiwaakhiriyise aanaaya wala ahishitahi thwapiya za mayaahuuti.

²² Niri toovi? Weekhweele yo anteela ojuwa yoori weeyo wata.

²³ Orette etile ninttelaaye owuuza. Awaapho vakatthi veetthu alume wane anrettiyeeyo natiri.

²⁴ Owaathuule olawe warette njampo la otwahareshiwa vamote na yo, wariphe etile enhithajiyeyaaye yoori owahi onyooliwa, orettaru toowo atthu ooshi anttela ojuwa yoori epi enlupiwaazo monkoni wa weeyo khahiyo haakhi. Atthu aya atthaapo ooshi anttela woona yoori Paawulu onshitahi kano.

²⁵ Monkoni wa amalapo akhupaleliyeeyo, nawaaperekheza warakha nawooza yoori ahije nyama zootwaheliwa sanamu, wala taamu ya nyama zoohishijiwi na alikhe khaapa twayifu.”

²⁶ Aphano Paawulu mmeesho mwaya khuphakanyeya na alume apale wane khulawa khutwahareshiwa vamote, ye khuvira Nnyupa Woosifwiwamo, yoori awooze atthu apale siikhu laari weettelaaye wiisha njampo ntthile lootwahareshiwa na winkha zaakha yawe khwa apale wane.

²⁷ Esaleelaka wiisha siikhu sapa epile za otwahareshiwa, mayaahuuti aalankhiyeeyo Aaziya, noomoona Paawulu ari Nnyupa Woosifwiwamo, khuwaatumerela atthu apale khunkhola.

²⁸ Khusala anyakulaza alupaka yoori: “Meezirayiilu, mwinaawuni! Mwinyi otu ti othuutu aniwaasomisaaye atthu a phantte zooshi alupaka vitthu zoohata khwa khapila ya Ezirayiilu, akufurwelaka puuro eti na athanyaka kano za Munsa, theenya oniwaavirisa makereeku Nnyupa Woosifwiwamo.”

²⁹ Yo aalupiye mattakhuzi apa mwaasa woomoona Torofimu wa Eefezu ari vamote na Paawulu nsitati mphule aari wuupuwela yoori ye eetta onthuula khunvirisa Nnyupa Woosifwiwamo.

³⁰ Khupuwa nzuuzu nsitati mphule, khuwaakusanya atthu khusala ata eettaka otthira. Khukholiwa Paawulu khupuruleliwa othetekele wa Nyuupa Yoosifwiwamo, nasaapiru khufukiwa milako.

³¹ Yo atakhaka omuula, hapari epile khunfiyela nttunkhulu wa anajanka a Rooma yoori Yeruzaleemu lapuwawo nzuuzu.

³² Nttunkhulu otule khuwaakhuwela anamalokozela na anajanka aya, khutthira alawaka mpakha aphale aariivo atthu apale. Wakathi ooniweevo nttunkhulu na anajanka awe, khunlikha ompiya Paawulu.

³³ Nttunkhulu otule khumwaattama Paawulu, khunkhola khuruma ofukaniwa makwinjili mawiri. Khuuzela yoori ti paani otu aya wala arettani?

³⁴ Atthu akina a khuntti ethiitile eetta onyakula alupaka eti akina alupaka etthu kiina. Nttunkhulu wa anajanka khuhisala awahi ojuwa etthu yaari orettikhanaaye, mwaasa wa nzuuzu ntthile, ye khuruma yoori athuuliwe Paawulu alawaniwe puuro yookhomaaziwa.

³⁵ Wakathi afiiyeevo vashikatta, anajanka aarina ya omweerekha mwaasa wa husuti ya khuntti ya atthu.

³⁶ Atthu apale khusala anlottelela anyakulaka araka: “Mwimuule!”

³⁷ Paata ya othuuliwa alawaniwaka puuro yoolipaneya, Paawulu khumuuzela nttunkhulu wa anajanka yoori: “Onwahi okinkha ruhusa yoori kiwuuzele etthu?” Nttunkhulu wa anajanka khumuuzela yoori: “Weeyo onjuwa ottakhula ekereeku?

³⁸ Khahiyo weeyo mmisuri waaziyeeyo owaatumerela atthu onizukuluwela raku na khuwaathuula anamahusuti alufu nne khuwaalawana n'yaara?”

³⁹ Paawulu khujipu yoori: “Miiyo ki yaahuuti, wa Taarusu, sitati ya fwayita khuluyeene ya nti wa Siliisiya. Mwikinkhe ruhusa kittakhulane atthu.”

⁴⁰ Khwinkhiwa ruhusa, Paawulu khweemela vashikatta, khuwaattheela alama na nkhono. Atthu ooshi khwiiya oonyamala, ye khusala attakhula khwa luuka ya meepereewu araka: