Khaazi 15 - Hapari Zooshapweya

Nkutthaano wa maaswihaapa a Yeruzaleemu

¹ Atthu akina a Yudeya khuta mpakha Antiyookiya, noofiya khusala awaasomisa attwi zaya awoozaka yoori: “Mweeyo amana mwihikhiriyi nkhama etthiipo Munsa anisomisiyeezo khamwinteela wuusurukha.”

² Paawulu na Baranabe khusala akheetisanana atthu apale mpakha khufiyelela onyakulisana. Khwa etthiipo khuthawuliwa Paawulu na Baranabe na atthu akina, yoori alawe Yeruzaleemu amanyamanye mattakhuzi aya apale na maaswihaapa na attunkhulu a ojama wa Nluku.

³ Ojama wa Nluku wa Antiyookiya khuwaaruma yoori alawe, alawaka khuvira nti oniitthiwaaye Feniisiya mpakha Samariiya. Khusala awaathatelela attwiizaya nanna amalapo ankhupaliyeezo Yinsa; hapari zaya epo zaari owaafurahisa channu attwiizaya ooshi.

⁴ Wakathi afiiyeevo Yeruzaleemu, khupwekhereliwa ti ojama wa Nluku, attunkhulu a ojama wa Nluku na maaswihaapa, khuwaathatelela vitthu zooshi Nluku awaaretteliyeezo yo.

⁵ Aphano attaapho khupuwavo atthu aari a khuntti ya mafwarizeewu ankhupaliyeeyo Yinsa, khulupa yoori: “Atthu ahiiyeeni mayaahuuti nina ya owaakhiriyisa na owaakhanyarela oshututela kano za Munsa.”

⁶ Maaswihaapa apale na attunkhulu a ojama wa Nluku khukusanyeya yoori amanyamanye mattakhuzi aya apale.

⁷ Paata ya winkhelelaniwa, Pheeturu khulankha khuwooza yoori: “Mweeyo attwiizaku, mwinjuwa yoori thanku ya raku Nluku akithawula miiyo vakatthi veetthu yoori amalapo kiwaafiisele hapari zooshapweya nyuupa ya Daawuuda etile yaakwiyeeyo.

⁸ Nluku, anjuwaaye rooho za atthu ooshi, alaza oshaahiti wa owaakhupalela yo, awiishushelaka Rooho Ttakatthiifu nkhama etthiipo na fweeyo anishusheliyeeyo.

⁹ Ye khanivirikaniseeni fweeyo na yo, maana atwaharesha rooho zaya khwa amini.

¹⁰ Aphano khi niini mweeyo mwintakhelaaye omotoota Nluku, mwiwaattikhaka anakhiyoni mapwattha hatha fweeyo aya wala amarehemu apaapa zeetthu ahakhitiriyeeyo?

¹¹ Ila khwa rehema ya Mbwana eetthu Yinsa fweeyo nakhupali na noosurwiwa nkhama na yo osuruweeyo ti othuuto.”

¹² Atthu ooshi eettiye onyamala khusala ansiileza Paawulu na Baranabe alupaka alama na minjuza zooshi aarettiyeezo Nluku khwa yo vakatthi wa amalapo.

¹³ Paata ya yo wiisha ottakhula, na ye Tiyaaku khusala attakhula araka: “Attwiizaku, mwikisiileze.

¹⁴ Simawu Pheeturu aneeleza khwa nanna Nluku omwanzo anthoonyeziyeeyo wiiyana niiya na amalapo, atakhaka yoori akusanye khapila za atthu khwa nzina lawe.

¹⁵ Mattakhuzi aatikhiweeyo pi manapiyu raku, ankhupalela na apa, nanna aatikhiweezo yoori:

¹⁶ “ ‘Paata ya ovira epo, Miiyo kinlawa karuti kite kijeke opheya nyuupa ya Daawuuda etile yaakwiyeeyo; kimatthele mphule wapwecheyiyeemo, na kilansele,

¹⁷ yoori atthu apale akina ansalaaye amweekese Mbwana, mpakha amalapo ooshi ana yoottitthimisa nzina laka, alupiyeeyo ti Mbwana,

¹⁸ otule alaleyiyeeyo vitthu zaya epi thanku asulani.’

¹⁹ “Apho kiniwuuzani yoori nihiwaatthe tafwawuthi amalapo, apale antakhaaye yoori ankhupali Nluku.

²⁰ Ila ti yooshapweya owaatikhela warakha yoori ahisala aja vitthu za okafwareliwa sanamu, wala ahisala aretta khaapa ya haraamu, wala ahije nyama yoohishijiwi wala taamu yaya.

²¹ Waaza raku kano za Munsa zaari otafusiriwa wakhula sitati na zaari osomiwa mmasinakooka wakhula saapatu.”

Warakha maaswihaapa awaatikheliyeeyo amalapo

²² Aphano maaswihaapa na attunkhulu a ojama wa Nluku ooshi, khuwaathawula atthu khuwaaruma weetta Antiyookiya vamote na Paawulu na Baranabe. Atthu aya apo aari Yuuda, aari ojuwaniwaaye nzina la Baresaapa, na Siila. Apo aari ooshitahiwa vakatthi wa attwiizaya.

²³ Alawaka khwinkhiwa warakha yaari olupaaye yoori: Fweeyo attwiizenu, maaswihaapa mpakha attunkhulu a ojama wa Nluku: Ninuuperekhezani salamu. Mweeyo mwiiyiye attwiizetthu amalapo mwiniikhalaaye Antiyookiya mpakha nti wa Siiriya na Siliisiya.

²⁴ Nasiila yoori, vakatthi veetthu alankhavo atthu ata ottuukho oteela wuutapanyani na mattakhuzi oovonyeya arutiselaka nyuma nafusi zenu woohirumiwi ti fweeyo.

²⁵ Aphano, fweeyo khukusanyeya khusiilana owaathawula atthu akina yoori niwaaperekhe okho vamote na jiraani eetthu Paawulu na Baranabe,

²⁶ apo aleva ohaayi aya mwaasa wa nzina la Mbwana eetthu Yinsa Al-Masiihu.

²⁷ Tiito ninrumiyeeyo ota okho Yuuda na Siila yoori ate aweelezeni saaneene mattakhuzi apo naatikhiyeeyo.

²⁸ Maana Rooho Ttakatthiifu yathoonyeza saaneene khwa fweeyo ohuuttikhini hatha mapwattha, ohiiyi apa aatikhiweeyo.

²⁹ Mwiwerawere oja nyama za okafwareliwa sanamu; wala taamu yaya, wala mwihije nyama yoohishijiwi, wala mwihisala mwiretta khaapa twayifu. Amana mwiwerawera epo zaya, mwintta woona vitthu zenu eweettettelakani saana. Khwa heeri.

³⁰ Khurumiwa atthu apale khusala alawa Antiyookiya, noofiya khukusanya ojama wa Nluku wooshi khuwenkha warakha etile.

³¹ Yo khusoma khwiiya ootuveliwa mwaasa woolipiselaniwa mattakhuzi ooshapweya aari olupaaye warakha etile.

³² Yuuda na Siila, wiiya aari manapiyu, na mattakhuzi menkeene awaalipiseliye na owaatumerela atthu apale a Antiyookiya.

³³ Eeshiye siikhu zawaatta, nawiisha khuleezana na attwiizaya khwa parakha na heeri, khusala arutela okhule ariiwo apale awaarumiyeeyo.

³⁴ Ila Siila khujilakelela osala ottuukhule.

³⁵ Paawulu na Baranabe khurupazawo Antiyookiya okhule na anamalottela akina enkeene, asomisaka nttakhuzi la Mbwana na otafusiri hapari zooshwapweya.

Omwazeyana wa Paawulu na Baranabe

³⁶ Ziviriyeevo siikhu vattitthiiru, Paawulu khumuuza Baranabe yoori: “Nirutele sitati epile zooshi niviriyeezo nitafusiraka nttakhuzi la Nluku, nilawe nawaathotole attwiizetthu na woona menttezi aya.”

³⁷ Aphano Baranabe alawaka khusala atakha yoori anthuule Yaahaya anjuwaniwaaye nzina likina la Maaruku.

³⁸ Ila Paawulu khuhooni wiiya yooshapweya onthuula Yaahaya, maana wakathi aari ooshi nti wa Panfiiliya, ye ettiye otthira khuwaalikhela khaazi.

³⁹ Paata ya ethiito, weetta opuwa ohisiilani nwulweene Paawulu na Baranabe mpakha khumwazeyana. Baranabe khunthuula Maaruku khulokhela nti wa Shiipere,

⁴⁰ ila Paawulu khunthawula Siila, attwiizaya khuwenkhelela nkatthi wa rehema ya Mbwana khulankha khusala alawa.

⁴¹ Khuvira Siiriya mpakha Siliisiya alipiselaka ojama wa Nluku wooshi.