Filimooni 1 - Hapari Zooshapweya

Salamu

¹ Miiyo Paawulu, namafukeliwa mwaasa wa Yinsa Al-Masiihu, na ttwiiyaku Timootiyu, kiniwaatikhela weeyo, Filimooni, swaahipu eetthu na nakhaazi wompheta,

² na nlupweetthu Safiya, Athipu ninkholanaaye khaazi vamote khwa nvittha na ojama wa Nluku onthukumanaaye owawo:

³ Rehema na heeri ya phantte ya Nluku Papeetthu na ya Mbwana Yinsa Al-Masiihu yiiye vamote na mweeyo.

Oshukhurwela

⁴ Wakhula swaafu kininshukhurwela Nluku aka, kuufikhiraka weeyo nlompa mwaka,

⁵ maana kinsiila elupiwaka amini yawo khwa Mbwana Yinsa na pheta yawo khwa attakatthiifu ooshi.

⁶ Kinlompa yoori osiilana wa amini yawo oretteye wiiya wa wooneya saaneene khwa ojuwa zooshi zooshapweya niriinaazo khwa Al-Masiihu.

⁷ Maana pheta yawo enikinkhaka furaha khuluyeene na okizuru, weeyo ttwiiyaku ontuvelisa rooho za attakatthiifu.

Ottakhula wa Paawulu khwa zwaamu ya Oneesimu

⁸ Tiito, hatha nkhama weetta wiiya wootaphuliwa khwa Al-Masiihu yoori kuurume etthu ontakhaaye oretta,

⁹ kinhithari oretta nkhuwo wa pheta. Miiyo, Paawulu, kooluvala na nasaapi eti theenya ki namafukiwa mwaasa wa Yinsa Al-Masiihu,

¹⁰ apho kinuuvekela khwa zwaamu ya mwanaka Oneesimu, kimpatthiyeeyo nkalapooso.

¹¹ Raku aari woohifwayi, nasaapi aretteya wiiya woofwayi khwa weeyo na miiyo.

¹² Kinuurutisela weeyo, nkhama rooho yaka.

¹³ Yaari okituvela ari vamote na miiyo yoori akaawuni khwa zwaamu yawo, wakathi opu kiiyiyeeyo woofukiwa mwaasa wa hapari zooshapweya.

¹⁴ Ila akitakheeni oretta etthu ohikinkheeni ruhusa, yoori wakhula onrettaaye ehiiye okhanyareliwa, yiiye khwa otakha wawo.

¹⁵ Talili ye aamwazeyaniye weeyo wakathi vattitthiiru, yoori weeyo ompwekherele opheya mileele,

¹⁶ woohiiyi theenya nkhama mwiitthwaana, ila wonziti mwiitthwaana, ila ozitisa omwiitthwaana, nkhama ttwiiyaku wompheta. Khwa miiyo ye ti ttwiiyaku wompheta, na theenya woozitivo khwa weeyo, waaza ontthu awe mpakha onamalottela wawe wa Mbwana.

¹⁷ Etthiipo, onikijalaazo weeyo nkhama nshirikha nkatthi wa amini, ompwekherele nkhama okipwekherelaka miiyo.

¹⁸ Nkhama ewaapho etthu ooretteliyeeyo, ama nkhama onimwiila otthe valifunku laka.

¹⁹ Miiyo Paawulu, kinaatikha na makhono aka, kinteela wuuripha, ohilupe yoori kiniwiila ohaayi awo.

²⁰ Khweele ttwiiyaku, miiyo yaari okituvela opwekherela khwa weeyo fwayita mwaasa wa wiiyana Mbwana. Otuvelise rooho yaka khwa Al-Masiihu.

²¹ Kiniwaatikhela kijuwaka yoori weeyo onlawa wakishututele, kijuwaka theenya yoori onretta zayita etile kuuvekeliyeeyo.

²² Olikha toowo, okeekesele puuro ya ovumula, mwaasa wa lompa zawo, kineekesela yoori kiwahi orutiseliwa mweeyo.

²³ Epaafara nshirikha kifukelaniweeyo nkalapooso mwaasa wa Yinsa Al-Masiihu onuuperekheza salamu.

²⁴ Nkhama etthiipo Maaruku, Arishitaruku, Teema na Luuka ashirikha aka.

²⁵ Rehema ya Mbwana eetthu Yinsa Al-Masiihu yiiye nroho mweenu mooshi mweeyo.