Akaalata 2 - Hapari Zooshapweya

Paawulu onkhupaleliwa pi maaswihaapa

¹ Paata ya ovira nyaakha khumi na mine khurutela Yeruzaleemu na Baranabe kinthuuliye Tiitu.

² Kaalawiye, maana Nluku ti aakithoonyeziye yoori kaarina yooretta etthiipo. Vanthukumano wawiitthaala na attunkhulu, khuweeleza yo mattakhuzi a hapari zooshapweya kinlaleyaaye khwa amalapo, maana miiyo akaari otakha yoori khaazi kikholiyeeyo na khaazi kaari okholaaye ehiiye yoohiina fwayita.

³ Ila wala Tiitu, otule kaarina, khooziwe yoori akhiriye, eeyiyeru pure nkereeku.

⁴ Ila akina aajikusanyiye nkhuntti mweetthu, khujiretta wiiya attwiizetthu nkatthi wa amini, khusala atakha onkhiriyisa. Apo aya aateeliye othurumela otaphuliwa niriinaaye khwa Yinsa Al-Masiihu yoori anirutisele nkatthi wa oviitthwaana.

⁵ Fweeyo khuhiwaashirehezeli hatha vattitthiiru, yoori haakhi ya hapari zooshapweya yiiye yookhanyareleya khwa mweeyo.

⁶ Ila apale anjoonaaye wiiya oojuwanikha, kinlupa toowo, miiyo khinikijali nanna yo ariizo, maana Nluku khanimphuka ntthu khwa wumpo awe, apo anjoonaaye khakuuzeeni yoori kiina ya weekezelavo etthu khwa hapari epi kintafusiraaye.

⁷ Olikha toowo, yo anjuwa yoori Nluku akinkha miiyo, otafusiri hapari zooshapweya khwa apale oohikhiriyi, nkhama amwinkhiyeezo Pheeturu khwa apale ookhiriya.

⁸ Maana Nluku anrettiye Pheeturu wiiya aswihaapa wa apale ookhiriya ti othuuto theenya akirettiyeeyo miiyo wiiya aswihaapa wa amalapo.

⁹ Aphano Tiyaaku, Pheeturu na Yaahaya aakhupaliweeyo wiiya anamalokozela, ajuwiyeevo rehema enkhiweeyo ti Nluku, khookoleliwa nkhono nlume, miiyo na Baranabe nkhama alama ya osiilana. Khukhupalela yoori fweeyo ninttela okhola khaazi vakatthi wa amalapo na yo vakatthi wa apale ookhiriya.

¹⁰ Yo aanihirimiziye ohiwaasahawu asikhini, na ti etthu kaajilipisaniyeeyo oretta.

Paawulu oninshowera Pheeturu

¹¹ Wakathi Pheeturu atiiyeevo Antiyookiya, miiyo khummaruwela vakatthi wa mamuumini, maana ye aavonyiye channu.

¹² Maana ahinate atthu akinoko oolankha phantte ya Tiyaaku, ye aari ojaka vamote na amalapo; ila paata ya ota eetta ojiphakhula wa amalapo, oovaka khuntti etile yaari okhanyarelaaye yoori mamuumini ana ya okhiriya.

¹³ Attwi akina mayaahuuti khujiretta wiiya nkhama manaafikhi nkhama Pheeturu, mpakha Baranabe khujilikhelela khweetta nttumpho.

¹⁴ Ila miiyo kooniyeevo yoori khaneettetta saana khwa haakhi ya hapari zooshapweya, khumuuza Pheeturu vakatthi wa atthu ooshi yoori: “Khwa vitthu zoojiwa, weeyo oniikhala nkhama mmalapo khahiyo nkhama yaahuuti, khi oniwaakhanyarela toovi apale eeyiye amalapo wiikhala nkhama mayaahuuti?”

Mayaahuuti na Amalapo oosurwiwa khwa amini

¹⁵ Fweeyo na mayaahuuti khwa ephattu, khahi na amalapo “anatwampi”.

¹⁶ Ila ninjuwa yoori pinaatamu khanihakikhiwa mwaasa wa oretta etile kano enrumaaye, ila khwa amini ya Yinsa Al-Masiihu, na fweeyo theenya namayaahuuti nankhupali Yinsa Al-Masiihu yoori nipatthe ohakikhiwa ti amini khwa Al-Masiihu. Khahiyo mwaasa wa mwentto wa kano, maana khina ntthu anttelaaye ohakikhiwa ti kano.

¹⁷ Ila nkhama na fweeyo nineekesa ohakikhiwa ti Al-Masiihu, najijuwa yoori na anatwampi, talili enlupa yoori Al-Masiihu waziri wa twampi? Wala, hatha vattitthiiru!

¹⁸ Nkhama kinjeka etile kitapanyiyeeyo, enthoonyeza yoori kinamavonya.

¹⁹ Maana miiyo akiniikhala khwa kano, ila kafwa vakatthi wa kano, yoori kiiyane meekhazi khwa Nluku.

²⁰ Kakhomeliwa vamote na Al-Masiihu. Ohaayi opu kiriina nasaapi eti khayi waka, ila Al-Masiihu ti aniikhalaaye khwa miiyo; na ohaayi onikiikhazaaye nasaapi eti khwa mwiili aka kiniikhala khwa amini ya Mwaana wa Nluku, othuuto akiphetiyeeyo khujinkha mweenyeweene khwa zwaamu yaka miiyo.

²¹ Akinfuja rehema ya Nluku; maana nkhama shariya enta khwa kano, ofwa wa Al-Masiihu khuna fwayita!