3 Yaahaya 1 - Hapari Zooshapweya

Salamu

¹ Miiyo, namarumeyela, kinimwaatikhela mphetani aka Kaayu, otule kinimphetachaaye weekhweelevo.

² Mphetani aka, kinuulompela weeyo yoori wiiyane ekumi na vitthu zooshi esala ziweettettela saana, nkhama etthiipo eneettettaaye saana nafusi yawo.

³ Kafurahi venkivene khwa opokherela othotoliwa pi attwi akinaaya alupiyeeyo monkoni wa waamineya wawo khwa haakhi, na nanna onviraaye olottaka haakhi.

⁴ Akina furaha kiina yooziti eto, ya osiila oriwa aanaaka aneettetta nhaakhi.

⁵ Mphetani aka, weeyo o wa waamineya khwa epile oniwaarettelaaye attwiizo, hatha nkhama aletto.

⁶ Yo ooza ojama wa Nluku monkoni wa pheta yawo ethiito. Safwatali, owaawuni atthu apo avire alawaka safwari yaya khwa nanna enintuvelaazo Nluku.

⁷ Maana yo aaza safwari yaya ya onrumeyela Al-Masiihu woohikhupaleli hatha awuni moote ya amalapo.

⁸ Tiito fweeyo nina ya owaapokherela attwi nkhama apo, yoori niretteye onamwaattalela khwa phantte ya haakhi.

⁹ Miiyo kaaperekhiye warakha vakatthi wa ojama wa Nluku, ila Diyooterefe, otule wontuvela wiiya nlokozi vakatthi wa azaawe, khannipwekherela.

¹⁰ Amana kita okho, kinttela onlikhisa mwaasa wa vitthu epo anrettaazo na mattakhuzi ootakhala annilupezaaye. Khinintosha epoza, amana attwiize afiyawo khaniwaapokherela. Olikha toowo hatha apuwa ntthu wa otakha awaapokherela ontta onkhattaza na omwiikara muujama wa Nluku.

¹¹ Mphetani aka oheezele vitthu zootakhala ila weezele vitthu zooshapweya. Otule anrettaaye zooshapweya tu wa Nluku; otule anrettaaye zootakhala khanamoone Nluku.

¹² Ooshi aninlupeza mwentto wooshapweya Temeetiriyu; hatha haakhi ethiito enlawela oshaahiti khwa zwaamu yawe. Na fweeyo ninlawela oshaahiti, na weeyo onjuwa yoori oshaahiti eetthu pu weekhweele.

¹³ Kinaaye vitthu zawaatta za owaatikhela, ila akintakha orumeyela lipaphelo na wiino.

¹⁴ Kinaakhipwela oteela owoona nasaapi, na ninteela ottakhula wuuso khwa wuuso.

¹⁵ Heeri yiiye vamote na weeyo. Maswaahipu okhuno anuuperekheza salamu. Owaachelise maswaahipu okho wakhula mmote.