2 Korint 9 - Ekajuk New Testament

Nne no lꞌbahm ntiil, á bahke kpake ntiil

¹ Nsehng anyehng anyehng kpeem li re, me n kpe nyon bade ayare nya ń kpꞌkake aneb Esowo ba li go Judea.

² Tibre n kpꞌkahne re, kp-n koro re wahn kak ebo. Owo wahnge n kpꞌworo nnyo tib wahn go esamahr aneb Masedonia re, “Aneb Akaya toobo ebjing yamahne yamahne.” Ekpuku ji ń kpꞌkake ji ma melle ane gbalee go bo ellong.

³ Anv, n kpꞌtumu abonanee baa, eji nnyo mi e kpꞌworo kun-n lꞌkꞌjol mbol mbol go eyaame jia, eji ń lꞌtoobo ebjing ana m bungu no re, wahn ebtoobo ebjing,

⁴ tohko jol ano, aneb Masedonia lꞌtoon-m ba, fere ba nyehn ana ń kala toobo ebjing, bahk-r riki ndon, eji m bum-n go etingitingi. Anv, jia wahn nehm tob riki ndona?

⁵ N tiri re, ga li re me n rehke abonanee baa, fere tum bo, bo gbo-m mbang ba rehng go egahne, eji n lꞌba, ḿ ma toobo ayare nya ń nyame no bum, ana ayare nya kor-n na antahng. Nong, kꞌjol ana bo bob-n na.

⁶ Buumen re, nne no lꞌbahm ntiil, á bahke kpake ntiil. Nne no lꞌbahm gbalee, á bahke tob kpa gbalee.

⁷ Nong, nne awohng awohng jo ka ana á tiri go ege eltim. Á kꞌjo ka go ebeke ndon, jol á kꞌjo ka ana bo bob-e na. Tibre nne no kpo ka go eyebatahng wo kpo kor Esowo.

⁸ Esowo bahk-n ma ka elfuulu anehng anehng, eji ejum ajehng ajehng lꞌki-n kpe rin ngare anyehng anyehng, eji ń lꞌbel gbalee, fere sa-n gbalee nya ḿ bahke jo ko, lim eltum anehng anehng ni nno.

⁹ Ana nwer Esowo bungu no re, “Á kpo wohngo amohk nti enye. Á kpo kꞌka akpak. Nnoobo enye li go njinanjini.”

¹⁰ Nne no kpo ka mbahmgbe amohk nti, fere ka-e ejum alehke, á bahk-n tob ka amohk nti, fere lim, eji lꞌgbal, fere kab akab gbalee, nya bahke tibi re, wahn ebli eno go esamahr bi Esowo.

¹¹ Á bahk-n limi, ń gbo afang kpee, nya ḿ bahke male jo wehr abo ngare anyehng anyehng, eji ane gbalee lꞌjo kak Esowo saam tib wahr.

¹² Tibre ekakebo ji ń kpꞌkake a, ń kpꞌkake aneb Esowo ebo go nsol nyi ma lehng bo. Jio tob li re, ane gbalee jo sahb kꞌkak Esowo saam.

¹³ Bo lꞌbel ayare enyahne nya kpꞌtibi re wahn ebsehng mbahbe, bo bahke Esowo ellub ka, bo lꞌnyehn ana ń kpꞌbumu alum nya nnoobo etib bi Kraist, bi ń kpꞌyiimi ntianse, fere yare bo gbalee, fere tob yare ane bako kpee.

¹⁴ Owo bo bahke kehme ero kak ka-n a egburu elkoro tib go nnoobo nyi Esowo nyi ma rur wꞌwohng go egahna ntim.

¹⁵ Nong, wahr kaken Esowo saam go ege ayare nya nne lꞌkꞌma bung go nnyo.