2 Korint 8 - Ekajuk New Testament

Akpohko nya aneb ero tahbe no

¹ Abonanee, e kpꞌsebe re wahn kahn ji nnoobo nyi Esowo ma lim go aro nya li go Masedonia.

² Bo yele go egburu nfem nyi Esowo wuungu bo. Wo tvtv o, bo gbale go eyebatahng sehng. Owo wahnge bo jo wehr abo, jol eji bo sahb gbꞌgbo ekpak.

³ N kpꞌyiimi bo ntianse re, bo ka ana bo bele no, jol bo ka na bꞌbudu, ana koro bofono antahng.

⁴ Bo gboong-r sehng re, wahr tob nongo bo, bo tob jo kak aneb Esowo ba li go Judea ebo.

⁵ Bo limi sehnge ana wahr tiri no. Tibre bo gbo mbang yake elbo ka Ntul Esowo, kehm fere yake elbo ka-r ana koro Esowo.

⁶ Owo wahnge e kehm rehke Taitus re, á soro asi go ege eltum ni á ma bom, fere kak-n ebo, wahn gohro lim eltum nio ni elkoro.

⁷ Wahn ebfang go ejum ajehng ajehng ana eltaame, alum abungu, elkahne, eko ji ń kpꞌkak go eltum Esowo kpee, a elkoro ni e kp-n koro. Anv, tob koon gbalee, wahn ka go eltum nio ni elkoro.

⁸ N nehme bung ana nne no kpꞌjehke ntahm. Eji m ma nyehn eko ji ane bako kpꞌkake, owo wahnge n kpꞌsebe re me n wuung-n, joare elkoro enahne li etingitingi elkoro.

⁹ Tibre ń kpꞌkahne nnoobo nyi Jisos Kraist Ntul ewahre. Jol eji á jolo efange nne, á fere gbo ekpak tib go egahne esi, eji ekpak ebe lꞌwahng, ń gbo afang.

¹⁰ Elle ni n kp-n tubu ni a. Bahke nobo a nahne, ń lꞌgohro lim eltum nio ni ń toobo no re wahn lim, ni ḿ ma bom ellimi, ma kang elya.

¹¹ Gohren lim mal! Ana kor-n no, ń toobo no wuku wuku, ano wo nobo re wahn gohro lim, ana ḿ male no.

¹² Tibre nne no lꞌkor-e re á ka, ye wo, Esowo bahke koko ayare enye ana nne noo bele no. Esowo nehme seb re á ko ji nne ki kpi.

¹³ Alum nya m bungu a, lohngem re n kpꞌsebe re me n tele ane bako elsol, fere si wahn, wahn sol elsol ni nnen.

¹⁴ Nobo re nne awohng awohng jo sol jang jang. Eji ń kpi gbalee anv, nobo re wahn kak ane ba li go elehng nsol ebo, eji ngare nyi bo lꞌbel gbalee, bo lꞌtob kak-n ebo, ń lꞌjol go elehng nsol. Ano wo bahke wahnge, nne awohng awohng bel jang jang.

¹⁵ Ana nwer Esowo bungu no re, “Nne no jo kpu gbalee luk, joom kpe sa ejum ajehng ajehng. Nne no jo kpu ntiil luk, ejumjum we joom tiki rin.”

Ane ba Pol tumu no

¹⁶ E kpꞌkake Esowo saam, bi kpꞌlimi Taitus re á jo kak ekpuku ana wahr kpꞌkake go eltum ni á kp-n kake ebo.

¹⁷ Eji e gboong-e no, á tꞌtaame. Jol ano ano sang. Eji kp-e sahb kꞌkor re á kak-n ebo, á kpꞌbake go egahne ana kor-e antahng.

¹⁸ E kpꞌtob tum mmonannee noko re á toono Taitus, no aneb ero kpee kpo tehk-e, tib eji á kpo tiingi nnoobo etib.

¹⁹ Jol ano ano sang. Aneb ero ba m-e yehke re á toon-r, eji e kpꞌlimi eltum nia ni elkoro, ni li ka ellub ni Esowo, fere tib ana kp-r koro re, wahr kak aneb ero ba li go Judea ebo.

²⁰ E kpꞌkunu ekpu, eji nne awohng awohng lꞌki-r ka ebi, tib eji bo ma-r kak agburu ayare nyao go ebo.

²¹ Ntir enyahre ga li re, wahr kꞌjo lim ji kpꞌnobo go esamahr bi Esowo bi bi, tob li re, wahr tob jo lim ji kpꞌnobo go esamahr ane fvfo.

²² E kpꞌtob tum mmonanne ejahre noko re á tob toono bo, no e m-e wuungu gbalee, lohko nyehn ana á kpo kak eko, jo lim ajoobo ntum tvv. Anv, eji á kp-n bumu go etingitingi wo, á kpꞌsahb kpe kꞌkak na eko budu, jo kak-n ebo.

²³ Taitus wo li nne no e kpꞌlimi eltum ano, ye wo li nne no kpo kak-m ebo go eltum ni n kpꞌlimi ka-n. Abonanee bako ba li ane ba aneb ero yehke bo tum, bo ji li ellub nio ni Kraist.

²⁴ Tiben bo elkoro enahne ni ń kpi no go esamahr aneb ero kpee, wahn fere tib re, nnyo mi n woro kun-n, lohko li go etingitingi.