2 Korint 7 - Ekajuk New Testament

¹ Akpondahme enyame, eji Esowo ma nyam elkohn anyam ana nyaa tong-r, nong, wahr ru elnahre, yehke ndahn ndahn go egahre agubjing, a atohko enyahre, fere jol ejahre ejahre ka Esowo abo akpade akpade, tib eji e kpꞌjene go elfahle ni Esowo.

Eyebatahng ji Pol bele no

² Nong, wahr woom-n go egahna ntim. E ka soodo nnene. Jol e ka rannge nne awohng awohng. E ka lim a lim nne awohng awohng amahr.

³ M bungem ana re me n ka-n ebi. Ana n tohko bung, ń wob-r go eltim, afi e kpo na, afi e li go elkpin, e bahke jolo ajehng.

⁴ N kp-n sahb bꞌbum go etingitingi. N kpꞌsahb gꞌgeere kak-n. Esowo ma-m kak eltim gbalee. Tvtv go erem abehng abehng bi e kpꞌnyehne, n kpꞌbele na eyebatahng budu.

⁵ Eji e ba rehng go Masedonia, e belem erekekv ajehng ajehng. E jo bele afemfem edi ajehng ajehng. Ane jo taange a nahre. Elfahle jolo go egahra ntim.

⁶ Esowo bi kpo kak ane ba nfem ma nyede bo eltim, ye wo kak-r eltim, eji Taitus ba no.

⁷ Lohngem re elbake ene ni ni kak-r eltim. Ji á tong-r no bade ana á bobo eltim tib wahn, ji ji tob kak-r eltim. Tibre á tong-r bade ana kp-n sahb kꞌkor re wahn nyehn-m, ana ń li ndon ndon, ana ń kp-m yiimi njahm. Owo wahnge n kpe bel eyebatahng budu.

Bada nwer nyehko nyi Pol nyono no

⁸ Jol afi nwer enyame nyi n nyono no tv-n lim-n re, wahn jol ndon ndon, ndon me nehme fili. Ndon jol-m fili, eji n sebe kahn re ń jolo ndon ndon, jol eji jolo jol mmongare ntiil.

⁹ Wo anv, me m bel eyebatahng, lohngem re, tib eji m ma-n lim, ḿ ma jol ndon wo. M bele eyebatahng, tib eji ndon enyahne ma-n lim, ḿ ma yaange mbang enyahne. Tibre ndon nyi fil-n no, jolo elkohn ndon nyi kpo kor Esowo. Wahr sang wahng ka ń rannge no go eyaame ajehng ajehng.

¹⁰ Ndon nyi kpo fili nne go esamahr bi Esowo, nyi nyi kpo lim nne, á yaange mbang enye, fere ko eltahre ba a ni. Ndon nyia kpehme lim nne, á bung re, kehn ndon nyia fuumem a name. Wo, ndon nyi njini nyia kpo ko elkv ba a ni.

¹¹ Nyehnen ana ndon nyia nyi fil-n go esamahr Esowo lim-n no re nkpa jo tab-n, wahn fere jo yiim-m njahm, atahng wahn joom yebe, ń jo fꞌfahl, fere sahb jo sꞌseb re wahn nyehn-m, jo sahb mell-n melle go egahna ntim re wahn kak nne no ma soodo erem. Wahn ebtib go ejum ajehng ajehng re, ebo ebahne o wobem.

¹² Tibre eji n nyono nwer nyio tv-n, n nyonem tib nne no soodo no, jol n nyonem tib nne no á sood-e no. N nyono, tib eji lꞌlenng-n go esamahr Esowo ana ḿ ma yake elnahne ka-r.

¹³ Jia ji ma-r kak eltim. Fvfo, e jo tob bele eyebatahng gbalee budu tib go eyebatahng ji Taitus bele no. Tibre wahn ane kpee eblim eltim m-e naange.

¹⁴ Nsol kpee nyi n tong-e bada nahne, nyi n woro nnyo kun-n, ndon me ń rikem. Ana ejum ajehng ajehng ji e bungu tong-n jolo go etingitingi, ano wo fvfo nnyo aworo emahre mi e woro tong Taitus ma tob jol go etingitingi.

¹⁵ Ano wo wahnge elkoro ni ń kp-e koro kpꞌgbale, eji á kpꞌbuumu ana wahn ane kpee jo wuk-r, fere vvr-e afahlafahle, fere jo kꞌkahm.

¹⁶ Me m bel eyebatahng, tibre n kp-n bumu go etingitingi go eyaame ajehng ajehng.