2 Korint 6 - Ekajuk New Testament

Ana Pol bungu bade eltum ene

¹ Eji e kpꞌlimi eltum ano a Esowo, e kp-n gboongo re wahn kꞌjol ane ba ma bel nnoobo nyi Esowo mbol mbol, ba kil rodo lim ejumjum.

² Tibre Esowo bungu re, “M ma-a wuk go ngare nyi nno. N kak-a kak ebo efung bio bi eltahre.” Anv wo li ngare nyi nno, lela wo li efung eltahre.

³ E kpo gare re wahr kꞌsoodo nne awohng awohng go ejum ajehng ajehng, eji eltum enahre ni e kpꞌlimi lꞌkꞌbel ebi mbing.

⁴ E kpo tib elnahre go ejum ajehng ajehng re wahr alokeltum Esowo ba. E kpo kpuumu erem abehng abehng, afi e yele nfem, afi e yele ejahkjahk ajehng ajehng, afi ejum ajehng ajehng ji kpan-r,

⁵ afi bo dv-r na, afi bo kak-r go ngbekobo, afi bo fere jokko edi, afi e bade lim eltum tꞌtahne, afi e kange mbir, afi e fere bade elnahre njal.

⁶ E kpo tib elnahre re, wahr alokeltum Esowo ba, eji e li saang, e ma fere bel elkahne, a elkpooro, a nnoobo eljini, a Etingi Etohko, go elkoro ni li go etingitingi,

⁷ a alum abungu go etingitingi, go nsahm nyi Esowo. Eno ji e ma li go esamahr Esowo, ji ji li nsol ebta enyahre, ejum ebta jehko go eboblum, jehko go ebobkal.

⁸ Egom jindiki kpo su-r su, egom jindiki jo tehk-r. Bo kpo ko-r ana anehm ane, na ga, e li go etingitingi.

⁹ Bo kpo ko-r ana ane ba bo ki nyi bo, na nyehne ga, ane kpee kp-r kahne. Bo kpo ko-r ana ane ba kpꞌkpoko, na ga, e li go elkpin. Bo kp-r kake erem, jol e ka tiki kpo.

¹⁰ E li ndon ndon, wo tvtv o, e kpo bel na eyebatahng ngare anyehng anyehng. E li akpak, wo tvtv o, e kpꞌlimi na ane gbalee, bo jo gbo afang. E kpimm ejumjum, wo tvtv o, wahr ebbel ejum ajehng ajehng.

Kraist, a nnehm

¹¹ Wahn aneb Korint, wahr eblennge ntir atahng enyahre ka-n. Wahr eblennge ntim enyahre kpee.

¹² Ń wob-r go egahra ntim, ntim enyahne ń ka lennge.

¹³ Anv, n yahke bung a nahne ana ń li abon ebame. Lenngen ntim enyahne, ana m ma lim ka-n!

¹⁴ Kana jol ajehng a ane ba ki nyi Esowo! Anv, bahke limi renan re eno, a ebi kehm jolo ajehng? Anv, ellennge abola ejannge bahke ma jol go elkoono renan?

¹⁵ Anv, Kraist abola nnehm, bo bahke ma bung bum nnyo amehng renan? Anv, ejum aji nne no ma taame tv Esowo, a nne no kala taame, bo kpo kod abo, jo lim?

¹⁶ Anv, bahke limi renan, etahk Esowo, a eblom kehm jolo jang jang? Tibre wahr ba li etahk Esowo bi li go elkpin. Ana Esowo bungu no re. “M bahke woomo go bo atahng, fere jo jen a bo. M bahke jolo Esowo ebo, bo bahke jolo ane ebame.”

¹⁷ Ntul Esowo kpe bung re, “Lohngen go bo ellong, wahn jol ejahne ejahne! Kana jo lak ejum ji ki li saang abo, eji n lꞌko-n.

¹⁸ M bahke jolo nso ejahne, ḿ bahke jolo abon ebame. Ana wo Ntul Esowo bi gbale sehng bungu no.”