2 Korint 4 - Ekajuk New Testament

Nnoobo etib bi Esowo, ellennge ni

¹ Fvfo, eji Esowo ma-r ka eltum nia tib go ege a ndon, e nehm yini ekpu.

² Wahr ebyake nsol ndon nyi ane kpo lim mbehr mbehr. E kpehme lim awak, fere jo yaange alum Esowo. E kpo lennge etingitingi, fere jo tib nne awohng awohng elnahre, eji bo lꞌjo kahn go bo a ntir atahng re, e kpꞌjene go esamahr bi Esowo.

³ Nnoobo etib bi e kpꞌtiingi lꞌfere jol ana bo ma bulu mbomo, li ano ka ane ba kpꞌtane ba ba.

⁴ Bo li ane ba kil eltaame, owo wahnge ebꞌbi Ntul no njini nyia ma wa bo amahr, eji bo lꞌkꞌjo nyehn ellennge ni nnoobo etib bi ellub ni Kraist, ye ji li go elfoongo ni Esowo.

⁵ Alum Esowo nya e kpo bung, e kpehme bung re, wahr atul ba. E kpo bung re, Jisos Kraist wo li ntul, wahr alokeltum ebahne ba tib go esi ji Jisos.

⁶ Tibre Esowo bꞌnehm bi bungu re, “Ellennge jol go ejannge,” bꞌnehm bi ma kak ellennge go egahra ntim, nio ni elkahne ni ellub ni Esowo go esamahr bi Kraist.

Afang nya Esowo wob go atu

⁷ Wahr ji kpi afang nyaa, e li ana atu, eji egburu nsahm nyio lꞌjol nyi Esowo, lꞌkꞌjol nyꞌnyahre.

⁸ Bo kpo kohk-r tv, jol bo wahr kpehme ma bob. E kpehme nyehn mbang nyi elbeke for, wo, mbang nyia.

⁹ Bo kp-r kame, jol Esowo wahr ka yake. Bo ma-r rum tub ndi, jol e kpoom.

¹⁰ Ngare anyehng anyehng e kpo sol elkv ni Jisos kpo no go egahre agubjing, eji ane lꞌtob nyehn elkpin ni Jisos go egahre agubjing fvfo.

¹¹ Eji e kpeke li go elkpin, e li ane ba kpi ntaame ntaame elkv tib go esi ji Jisos, eji ane lꞌnyehn elkpin ni Jisos go egahre agubjing nya bahke kpoko.

¹² Etingitingi, elkv wob-r go atahng, kpi eltum ene lim, ana elkpin wob-n go egahne atahng, kpi eltum ene lim.

¹³ E kpi elkohn etohko na ajehng, wahr ji ma taame tv Jisos, a nne no nyono kak go nwer Esowo re, “N tꞌtaame, owo wahnge m bungu no.” Wahr fvfo, wahr ebtob taame, owo wahnge e kpꞌtob bung.

¹⁴ Tibre e kpꞌkahne re, Esowo bi nyahme Ntul a Jisos go elkv, á bahk-r tob nyahme a Jisos, fere ko-r awahn awahn, song yiimi go ege esamahr.

¹⁵ Nsol nyia kpee li tib go egahne esi, eji Esowo lꞌbel ellub tib go ege a nnoobo nyi ma gbal gbalee, eji ane gbalee kp-e kake saam.

Erem, a ellub

¹⁶ Ano wo wahnge e lꞌkꞌyini ekpu. Jol eji agubjing enyahre kpꞌrꞌrannge asongo, atohko enyahre kpꞌjolo na nfenfe efung abehng abehng.

¹⁷ Tibre erem bi e kpꞌnyehne a, li ntiil, bahke male. Wo, erem bia bahk-r kake egburu ellub ni li go njinanjini, ni nne lꞌkꞌma ko gare a ejum ajehng ajehng,

¹⁸ eji e kil jo yehke amahr enyahre kunu go nsol nyi nne kpꞌnyehne, e kpo yehke amahr enyahre kunu go nsol nyi nne kil ma nyehn. Tibre nsol nyi nne kpꞌnyehne bahke male. Wo, nsol nyi nne kil nyehne li go njinanjini.