2 Korint 2 - Ekajuk New Testament

¹ Owo n kehm toobo antahng re, n nehm kpe ba go egahne ndon ndon.

² Tibre n lꞌlim-n, ń jol ndon ndon, nne awo bahk-m kake eyebatahng? Nne no n lim-e no, á jol ndon ndon woa?

³ Ejum jꞌnehm ji n nyono go nwer nyehko nyi n tumu tv-n. N joom seb re me m ba, ba jol ndon ndon tib ane bao ba jol-m kake eyebatahng. Tibre n kpꞌsahb kꞌkahn re, n lꞌbel eyebatahng, wahn kpee bahke tob bel eyebatahng fvfo.

⁴ Eji n nyono nwer nyio, n joom bang, eltim jo gbiing-m sehng, n nyono a abonngo go amahr. N nyonem, eji ń lꞌjol na ndon ndon. N nyono, eji ń lꞌkahn elkohn egburu elkoro ni ń kp-m koro.

Tahmen ka nne no ma soodo

⁵ Joare nne awohng eblim nne noko re á jol go ndon, me sang á lim-m no. Eyaame jindiki á ma-n lim wahn ane kpee, wahn ebjol ndon ndon. N nehme seb re me n rod ejum jio bum ana egburu nfem.

⁶ Anv, ebgbal, eji egom ejahne gbalee ma ka nne noo erem.

⁷ Ga nob re, wahn tahm ka-e, fere kak-e eltim, eji ndon lꞌki-e ga jo fili.

⁸ N kp-n gboongo re, wahn lohko tib re, á kp-n lohko kor.

⁹ Ji wahnge n nyono nwer nyio, n nyono re me n kahn ana ń sehnge mbahbe nyio, fere kahn, joare ń kpꞌlimi ejum ajehng ajehng ji n lꞌtong-n.

¹⁰ Nne awohng awohng no ń lꞌtahm ka-e, m bahke tob tahm ka-e. Lꞌjol re, ejum lꞌlohko jol ji nne noo sood-m no, ejum jio, me n tahm ka-e go esamahr bi Kraist tib go egahne esi,

¹¹ eji nnehm lꞌki-r ko elfono. Tibre e kpꞌkahne ji á kpꞌtiri.

Ngare nyi Pol jolo go Troas

¹² Eji n rehnge go Troas re me n song tiingi nnoobo etib bi Kraist, Ntul Esowo lꞌlim eyake ka-m.

¹³ Eltim me tikem naange, eji n ki nyehn mmonannee Taitus ona. Owo n kehm kake bo nnyo, tahm bo sa, song rehng go Masedonia.

Wahr ba li ana esꞌsvv eleenge

¹⁴ Wahr kaken Esowo saam, bi kpo lim-r re wahr jo ga anebekv ebahre ngare anyehng anyehng, fere jo geere, tib eji e li ajehng a Kraist. Esowo ma-r ko kpꞌlimi, eji ane lꞌkahn Kraist edi ajehng ajehng, ana esꞌsvv eleenge ji kpꞌyeele edi ajehng ajehng.

¹⁵ Wahr ba li ana esꞌsvv eleenge jio ji insens nyi Kraist kpꞌjahme jo teebe ka Esowo, ji kpꞌyeele go ellong ane ba kpꞌbele eltahre, a ane ba kpꞌtane.

¹⁶ Go ejang bi ane ba kpꞌtane, esꞌsvv jio, ejum elkv ji kpo wul nne ji. Goji ane baka esꞌsvv jio, ejum ji kpo ka nne elkpin ji. Nne awo bahke ma jol elkohn nne ana noa?

¹⁷ E limm ana egom ane bandiki gbalee, ba kpo yaange alum Esowo, fere jo kpiidi a nya. E kpo bung go etingitingi ana ane ba Esowo tumu bo. E kpo bung go esamahr bi Esowo ana alokeltum ba Kraist.