2 Korint 13 - Ekajuk New Testament

Esꞌkohro erehke

¹ Nkpel era nyi ana, nyi n yahke kpe ba go egahne. N lꞌba, “tohko jol re ane abal, ane ara ba yiimi ntianse bung bum nnyo amehng, ellum anehng anehng nehm yiimi,” ana nwer Esowo bungu no.

² N rehke ane ba limi abiafem wuku wuku, fere rehke ane bako kpee. N kpꞌkpeke rehke bo anv, eji n ki li a bo, ana n limi ngare nyi n jolo a bo, eji n kpe ba go egahne etoono nkpele. N lꞌkpe ba, n nehm yake na yake bo, bo kꞌnyehn erem,

³ tib eji ń kpꞌsebe re me n tib-n re Kraist kpꞌbungu go egame atahng, ye jio ji kil jo leenge go egahne ellong, ye ji ń kpo nyehn nsahm enye go egahne ellong.

⁴ Jol eji bo kum-e kum go ekros ana nne no kpꞌleenge, anv, á li go elkpin tib go nsahm nyi Esowo. Eji e li ajehng a ne, e kpꞌleenge. E bahke jolo go elkpin a ne tib go nsahm nyi Esowo, e lꞌjol go egahne ellong.

⁵ Feeden elnahne, joare ń kpꞌjene go mbang nyi Esowo! Wuungen elnahne! Ń nehme kahn re, Jisos Kraist wob-n go egahne atahnga? Tohko jol ano, ḿ bahke jo gbꞌgbo abahbe.

⁶ N kpꞌbumu re, ḿ bahke sebe kahn re, wahr ka gbo.

⁷ E kpꞌkake ero ka Esowo re, wahn kꞌlim ebi ajehng ajehng. E nehme seb re wahr tib re, wahr ebsehng mbahbe. E kpꞌsebe re wahn lim ji kpꞌnobo, jol eji li li ana e ma gbo mbahbe.

⁸ Tibre e nehm ma kpan etingitingi. E li ka etingitingi.

⁹ Atahng kp-r yebe, eji e li lenge lenge, wahn kpꞌtahne. Ji e kpꞌkake ero bade li re, wahn tuungu ji ma rannge.

¹⁰ N kpꞌnyono nsol nyia, eji n ki li a nahne, eji n lꞌba, n lꞌkꞌba bib a nahne tib go nsahm nyi Ntul Esowo ma-m ka re me n jo lim ane, bo gbal. M-e á kaam re me n jo lim bo, bo rannge.

¹¹ Abonanee, anv, wahn jol me! Tuungen mbang enyahne, wahn jo bum alum enyame! Jo belen ntir atahng na anyehng, wahn jol go elkoono atemtem, owo Esowo bi elkoro, a bi elkoono bahke kehm jolo a nahne.

¹² Jo kaken atemtem nnyo go nnyo asodo ana abonanyehn nne. Aneb Esowo kpee kp-n kake nnyo.

¹³ Nong, nnoobo nyi Ntul a Jisos Kraist jol a nahne, a elkoro ni Esowo, a elkoono nio ni Etingi Etohko.