2 Korint 12 - Ekajuk New Testament

Nsol nyi Esowo lennge ka Pol

¹ M bahke tiki wor nnyo, jol nsehng anyehng anyehng limm, nyi m bahke lehke. Anv, m bahke soro asi, jo bung bade akpokosi nsol nya Ntul Esowo ma-m lim re me n nyehn, a nsol nyi á ma lennge ka-m.

² N kpꞌkahne nne a Kraist, no bo m-e rod tahm a ne go nkpake elbung nyehko nyi biingi na era. Ewubu a nnya eni nyi ma kang a. Ma bo rod-e a ngubjing a ngubjing nji. Ma bo rod-e go etohko wo wo nji. Esowo bi kpꞌkahne.

³ N kpꞌkahne re, nne noo, bo rod-e tahm a ne go ejahbetul Esowo. Ma bo rod-e a ngubjing a ngubjing nji. Ma bo rod-e go etohko wo wo nji. Esowo bi kpꞌkahne.

⁴ Owo á wuku alum nya nne lꞌkꞌma bung, nya ki fuumu re nne bung.

⁵ M bahke woro nnyo kunu nne noo. N nehm wor nnyo kunu elname, sehngem elleenge ename ni ni m bahke jo wor nnyo kunu.

⁶ Lꞌkor-m re me n wor nnyo, n gboolem na, tibre etingitingi ji kehn n jol bungu. Me n yake nnyo aworo bum go, eji nne awohng awohng lꞌki-m jo bum wahre wahre go ege a ntir atahng, á lꞌjo bum-m wahre wahre tib go nsol nyi á kp-m nyehne, n kpꞌlimi, a nsol nyi á wuku go egame.

⁷ Esowo ma-m jahm ejoongo go egama ngubjing, eji n lꞌkꞌjo kuudu tib go akpokosi nsol gbalee nya á ma lennge ka-m. Ejoongo jio, enjel nyi nnehm nyi, nyi kpo dv-m, eji n lꞌkꞌgeere.

⁸ Me n gboongo Esowo nkpel era bade ejum jia re, eji enjel nyio lꞌlub yak-m abo.

⁹ Wo, Ntul Esowo faang-m re, “Nong, nnoobo enyame jo gbal-a. Tibre nsahm enyame bahke gbale, biingi go nseenge goji ane ba kpꞌleenge.” Fvfo, atahng kp-m yebe re me n geere kak elleenge ename ni n kpꞌleenge, eji nsahm nyi Kraist lꞌba lene tob-m.

¹⁰ Esi ji Kraist ji wahnge eltim kp-m yebe, jol afi n leenge na, jol afi bo su-m na, jol afi n nyehne erem, jol afi bo nohk-m na, jol afi n wob go afemfem. Tibre n lꞌleenge, n kpꞌtahne na.

Ana Pol jo tiiri aneb Korint

¹¹ Me n jol egboolo nne. Wahn ba ma-m lim re me n jo wor nnyo. Tibre wahn ba kehn jol jo yiim-m njahm. Tibre ajꞌjok abatiingetib bao gbalem sehnge me nkpel anyehng anyehng, jol eji n ki lꞌli ejumjum.

¹² Etingitingi, wahn ebnyehn ntiingetib no Esowo, no jo tib nliingi go egahne ellong, fere nyehn ana n jo kpuumu. Wahn ebnyehn nliingi, a akpokosi, go agburu nsol.

¹³ Ejum aji ji m ma ga lim ka aneb ero bako ji n kala lim ka-n? Sehngem ji m ma lim, li re, wahn n tokkem. Tahmen ka-m wahn go ebꞌbi jia!

¹⁴ Nkpel era nyi a, nyi m ma toobo ebjing re me m ba go egahne. Wahn n nehm tokko, tibre nsol enyahne sang n kpꞌsebe. N kpꞌsebe wahnfono antahng. Tibre abon a nne sang fuumu re bo jo kuuru akpohko bum babnde. Babnde nne bo fuumu re bo jo kuuru akpohko abon ebo.

¹⁵ Atahng kp-m yebe re me n fad ejum ajehng ajehng ji n kpi no, kak a mefono antahng tib go esi ji atohko enyahne, jol eji elkoro ni n kp-n koro ki bꞌbik a ni wahn kpi me kor.

¹⁶ Wahn ebtaame re, wahn n tokkem. Wo, egom ejahne jindiki re, n jo dehb-n, jo ko nsol enyahne go awak.

¹⁷ Anv, n li-n li nsehnga, nyi sehnge goji nne awohng awohng go ellong ane ba n tumu no tv-na?

¹⁸ N gboongo Taitus re á je, fere tum mmonannee noka, á toon-e. Anv, Taitus li-n li nsehnga? Anv, e joom jen go etohko jꞌnehm na ajehnga? Anv, ariidakpade nyanehm sang e jo toona?

¹⁹ Go nsol nyia kpee, ń kpꞌtiri re, e kpꞌbungu yehke elnahre go egahne esamahra? Akpondahme enyame, e kpo bung ana ane ba li ka Kraist go esamahr bi Esowo. Tibre ejum ajehng ajehng ji e kpꞌlimi, e kpꞌlimi, eji ń lꞌgbal.

²⁰ Tibre n kpꞌfahle re, n lꞌba, fundiki ń nehm jol ana kor-m no re wahn jol. Mefono antahng nehm jol ana kor-n no re me n jol. Fundiki m bahke ba kpir-n go ntaange, eteelala, erakatahng, elahmetong, afahnge akiimi lake ane, areyi alimi, elgeere, a nsol nyehko kpee nyi ki li nseenge.

²¹ N kpꞌfahle re, n lꞌkpe ba, Esowo ebame bahk-m rede go egahne esamahr, m bahke lingi egom ane gbalee ji limi abiafem wuku wuku, ji kala gbo ndon go asabsab nsol nya bo ma lim, a ebi elkpin, go enoongo ane.