2 Korint 10 - Ekajuk New Testament

Ana Pol bungu bade eltum ene

¹ Me Pol, mefono antahng wo kp-n gboongo a, tib esi ji Kraist ji jolo soom, fere bel nnoobo eljini, me ji kpo rede elname, n lꞌjol go egahne ellong, n kpo sahb-n, eji n li fee,

² n kp-n gboongo re, wahn ki-m lim me m ba, ba bung esahb esahb a nahne ngare nyi n lꞌba go egahne, jol eji n kpꞌkꞌkahn re, m bahke bungu esahb esahb a ane ba kpꞌbungu re, wahr kpꞌjene ana njini.

³ Jol eji e li li go njini, e kpehme nok ebta ebahre ana njini.

⁴ Tibre nsol ebta nyi wahr kpo ko, nok ebta limm nsol ebta nyi njini, li nsol ebta nyi Esowo nyi kpi nsahm nyi bahke ma rannge ekum abehng abehng,

⁵ bi li nfaabe alimi, a ejum ajehng ajehng ji ane kpo bum wahre wahre, ji kil jo koono a elkahne ni Esowo. E kpo bob ntir anyehng anyehng, fere rod kak go elwo ni Kraist.

⁶ Ngare nyi ḿ ma lohko tib re, ń kpꞌlohko wuk Esowo, ngare nyio nyi e bahke kake nne awohng awohng erem, no kil elwuku Esowo.

⁷ Ń kpo kpur ane ana bo li ga njahm elatahk! Nne awohng awohng no lꞌbum elne re, ye li ka Kraist, nong, á tir antahng re, ana ye li ka Kraist, ano wo fvfo wahr tob li ka-e.

⁸ Tibre n nehme be ndon, jol afi n woro nnyo sehng ana kehn n jol woro kunu go nsahm nyi Ntul Esowo ma-m ka re me n lim-n, wahn gbal. Me á kaam re me n lim-n, wahn rannge.

⁹ N nehme seb re wahn tir re, n kp-n nehke na go egame awer nya m ma nyon tv-n.

¹⁰ Tibre bo kpo bung re, “Awer nya Pol kpi nsahm, kpo fere lub-r. Á lꞌjol a nahre, á kpo kooko sehng, alum enye kpehme tohko jꞌjol ejumjum.”

¹¹ Nong, elkohn ane bao kahn re, ana e kpo nyon go egahre awer ngare nyi e ki li, ano wo fvfo e kpo tob lim ngare nyi e lꞌjol a nahne.

¹² E kpehme sahb fange elnahre kak go ellong ane ba kpo tehk elbo. E kpehme ko elnahre gare a bo. Bo agboolo ane ba! Bo kpo rod elbo bum ana ejum egare nsol. Bo kpo ko elbo, gare atemtem.

¹³ E kpehme geere kak eltum ni Esowo ki-r ka re wahr lim. E kpo lim eltum ni Esowo ma-r ka ni ni. Eltum ni e kpꞌlimi go egahne ellong tob wob atahng eltum nio.

¹⁴ Eji wahn li ejang egbe ji Esowo ma-r ka re wahr lim eltum, ngare nyi e ba no re wahr ba tiing-n nnoobo etib bi Kraist, e baam ba lim, ta nnyab.

¹⁵ E kpehme geere kak eltum ni Esowo ki-r ka, ni nne noko ma lim. E kpꞌbumu re, ń lꞌkpe gbal go mbang nyi Esowo, ḿ bahk-m tobo, n kpe kim edi egbe budu,

¹⁶ eji e lꞌsong tiingi nnoobo etib adi nya li go fee, nne lꞌsehng Korint sa, wahr kiin geere kak eltum ni nne noko ma lim go ege egbe.

¹⁷ Ana nwer Esowo bungu no re, “Nne no lꞌgeere, nong, á jo geere kak Ntul Esowo.”

¹⁸ Tibre nne no lꞌtehk elne, ye sang Esowo kpo ko-e, sehngem nne no Ntul Esowo tehk-e no, ye wo, Esowo kpo ko-e.